’Toqusut makissapput’

’Qarlortaat kingullissaq pilerpat, qarlortarumaarpormi, toqusullu aserujuitsuullutik makissapput, uagullu allanngortinneqarumaarpugut.’ — 1 KORINTUMIUT 15:52.

1, 2. (a) Neriorsuut tuppallernartoq suna pruffiiti Hoseas aqqutigalugu saqqummersinneqarsimava? (b) Qanoq nalunngissinnaavarput Guutip toqusimasut inuunermut utertikkumagai?

ASASANNIK toqukkut annaasaqarsimavit? Taava nalunngilat toqu qanoq aliasutsitsisinnaatigisoq. Taamaattoq kristumiut Guutip pruffiiti Hoseas aqqutigalugu neriorsuutaa tuppallersaatigisinnaavaat: ’Uneriffimmit kingumut pissavakka; toqumit utertissavakka. Nungussutigissavarma, toqu-aa; perluutigissavarma, uneriffik-aa.’ — Húsia 13:14.

² Toqusimasut inuunermut uternissaannik eqqarsaat upperumanngitsut isumaqanngilluinnartutut isigissavaat. Guutili Ajugaqanngitsoq soorunami taama tupinnartuliornissaminut piginnaassuseqarpoq! Apeqqutaaginnarpoq Guuti toqusimasut inuunermut makitinneqarnissaannut piumassuseqarnersoq. Angut naapertuilluartoq Job ima aperisimavoq: „Toqusoq uummaqqissinnaanerpa?“ Nangilluni isumalluarnartumik akivoq: „Oqaluffigiumasuugumma akissagaluarpakkit, taava pinngortitat kipilerfigissagaluarpat.“ (Job 14:14, 15) Oqaaseq ’kipilerneq’ atorneqarmat erserpoq qamannga pisumik kissaateqarneq erinisungaarnerlu pineqartut. (Naleqqiuguk Tussiaat 84:3.) Aap, Jehovap erinisulluni makinnissaq utaqqivaa — aalajaatsut toqusimasut, eqqaamasamini inuusullusooq, takoqqissallugit qilanaaqaaq. — Matîuse 22:31, 32.

Jesus makinnissamik paasissutissiivoq

3, 4. (a) Jesus qanoq ililluni makinnissamik neriuut pillugu tamakkiisumik paasissutissiisimava? (b) Sooq Jesus anersaatut, inuttut timilittut pinnani, makitinneqarsimava?

³ Upperluartut itsaq inuusimasut, soorlu Job, makinnissaq pillugu killilimmik paasisaqarsimapput. Aatsaat Jesus Kristus neriuummik nuannersumik tamatuminnga tamakkiisumik paasissutissiivoq. Nammineq tamatumani pingaaruteqarluinnarnini erseqqissarpaa oqarami: ’Ernermut uppertoq naassaanngitsumik inuussuteqarpoq.’ (Juánase 3:36) Sumi taama inuusoqarumaarpa? Uppernermik ersersitsisut amerlanerpaartaat nunarsuarmi inuussapput. (Tussiaat 37:11) Jesusilli ajoqersukkani ima oqarfigai: ’Siooraqinasi, savarpannguususi ukorsii, Ataatassi iluarimmagu naalagaaffik ilissinnut tunniukkumallugu.’ (Lúkarse 12:32) Guutip naalagaaffia qilammiippoq. Taamaattumik neriorsuut tamanna ima paasisariaqarpoq ’savarpannguit’ anersaatut qilammi Jesus najulerumaaraat. (Juánase 14:2, 3; 1 Pîtruse 1:3, 4) Ila neriuutissaq nuanneq! Jesusip apustilimut Johannesimut saqqummersippaa ’savarpannguit’ taakku 144.000-iinnaassasut. — sarĸúmersitat 14:1.

⁴ 144.000-it taakku qanoq ilillutik qilammi naalannassuseq angussavaat? Jesusip ’inuussut aserujuissullu iivangkiiliukkut qaamasumut pisippai’. Aanni atorlugu qilammut ’aqqummik nutaasumik uumanartumillu atoqqaartitsivoq’. (2 Timûtiuse 1:10; Eprîarit 10:19, 20) Siullermik Biibilimi siulittuutigineqartutut toquvoq. (Jesaja 53:12) Taava apustili Peterip kingusinnerusukkut oqaatigisaatut ’Jesus taanna Guutip makitippaa’. (apustilit suliait 2:32) Jesusili inuttut makitinneqanngilaq. Nammineq ima oqarsimavoq: ’Neqissaq tunniussassara tassa uiniga, silamiut inuutissallugit tunniussassara.’ (Juánase 6:51) Inuttut timini atoqqissimagaluaruniuk pilliut tamanna naleqarunnaassagaluarpoq. Taamaattumik Jesus ’toqutaagaluarluni uinikkut uummartitaavoq anersaakkut’. (1 Pîtruse 3:18) Taamaalilluni Jesus ’savarpannguanut’ ’utertitsissummik naassaanngitsumik pissarsisitsivoq’. (Eprîarit 9:12) Inuiaat ajortillit utertinniarlugit inuttut naammalluinnartutut inuunermi nalinga Guutimut sassaappaa, 144.000-illu siulliullutik tamanna iluaqutigisimavaat.

5. Ukiuni hundredelinni siullerni Jesusip ajoqersugai sumik neriuutissaqartinneqarpat?

⁵ Jesus kisimiunngitsoq qilammi inuunissamut makitinneqarsimavoq. Paulusip kristumioqatini Romamiittut allaffigisimavai anersaamit illernartumit tanitaagamik tassaalersut Guutip qitornai Kristusillu kingornusseqatissai tanitaanertik aalajangiukkunikku naggatissamut aalajaallutik. (Rûmamiut 8:16, 17) Paulus aamma nassuiaavoq: ’Ilanngutillutami toquagut assigalugu ikkussugaagutta, taava taamaassaaguttaaq makinneragut assigalugu.’ — Rûmamiut 6:5.

Makinnissamik neriuut illersorneqarpoq

6. Sooq Korinthimi makinnissamik upperisaq assortorneqarsimava, apustililu Paulus qanoq qisuariarpa?

⁶ Makinnissamik neriuut kristumiut upperisaanni ’ajoqersuutaasut aallaqqaataannut’ ilaavoq. (Eprîarit 6:1, 2) Taamaattoq ajoqersuut tamanna Korinthimi assortorneqarpoq. Ilagiit tassaniittut ilaasortaasa ilaat, qularnanngitsumik griikerit isumaliutersuutaannit sunnerneqarlutik, oqartarput ’toqusut makiffissaqannginnerarlugit’. (1 Korintumiut 15:12) Apustili Paulusip tamanna tusaramiuk makinnissamik neriuut, ingammik kristumiut tanitaasut neriuutigisaat, illersorpaa. Paulusip oqaasii Korintumiunut agdlagkat sujugdlît kapitali 15-imi allassimasut misissorneroriartigik. Soorlu allaaserisami siulianiittumi kajumissaarutigineqartoq iluaqutaassaaq kapitali naallugu atuareersimagutsigu.

7. (a) Paulusip suna nassuiarniarpaa? (b) Kikkut Jesus makissimasoq takusimavaat?

⁷ Korintumiunut agdlagkat sujugdlît kapitali 15-imi versini marlunni siullerni Paulusip eqqartugassani oqaatigaa: ’Eqqaasinniarpassi, qatanngutikka, iivangkiiliumik ilissinnut oqaluutigisannik; tamanna pigilerparsi, tamannalu attavigaarsi, tamannalu annassutigaarsi . . . kisiannimi asuliinnaanngitsumik upperussi.’ Kristumiut nutaarsiassaq nuannersoq aalajangiutinngikkunikku sallusuissut asuliinnaq ilassisimassavaat. Paulus ima nangippoq: ’Namminermi pigiligara siulliullugu ilissinnut pisippara imaattoq: Kristus ajortivut pillugit toqusoq allakkat eqqorlugit, ilisaasorlu ullullu pingajuanni makittoq allakkat eqqorlugit, Kefasillu takugaa, kingornalu taakkua aqqaneq-marluk. Kingornalu qatanngutit 500-nit amerlanerusut ataatsikkut takuaat; taakkua ilaat amerlanerusut suli inuupput, ilaalli sinippaarput. Kingornalu Jakobip takuaa, kingornalu apustilit tamarmik. Tamarmilli kingornatigut uangattaaq inorluni erniusutut illunga takuara.’ — 1 Korintumiut 15:3-8.

8, 9. (a) Makinnissamik upperisaq qanoq pingaaruteqartigaa? (b) Qularnanngitsumik pisimasumi sumi Jesus ’qatanngutinut 500-nit amerlanerusunut’ takutissimava?

⁸ Nutaarsiassamik nuannersumik akuerinnissimasunut apeqqutaanngilaq Jesusip makissimanera upperissanerlugu upperissannginnerluguluunniit. Takunnittorpassuit uppernarsarsinnaavaat ’Kristus ajortitik pillugit toqusoq’ kingornalu makissimasoq. Taakkua ilagaat Kefas, Peteritut ilisimaneqarnerusoq. Peterip assut tuppallersaatigisimassavaa Jesus imminut takutimmat, naak unnuami killuutigineqarfigisaani tigusaaffigisaanilu Jesus miserratigisimagaluarlugu. ’Aqqaneq-marluk’, tassa apustilit eqimattatut isigalugit, aamma Jesusimit makissimasumit pulaarneqarput — qularnanngitsumik misigisaq tamanna ikiortigalugu siooranertik qaangersinnaasimavaat Jesusillu makissimanera nakimaallutik nalunaajaassutigisinnaalerlugu. — Juánase 20:19-23; apustilit suliait 2:32.

⁹ Kristus aamma inuppassuarnut, ’qatanngutinut 500-nit amerlanerusunut’, takutissimavoq. Galiliiamiinnaq taama amerlatigisunik ajoqersugaqarmat immaqa tassani pineqarpoq Matîuse 28:16-20-mi oqaluttuarineqartoq, Jesusip ajoqersuganngortitseqqusinerani pisoq. Takunnittut taakku kimittuumik nalunaajaasimasapput. Ukiumi 55-imi Paulusip Korinthimiittut allakkaminik siullernik allaffigimmagit taakkua ilaat suli inuupput. Malugeriarulli ilaat toqoreersut pillugit allassimammat ’sinippaartut’. Taamani suli qilammi inuunissamik akilerneqarnissaminnut makitinneqarsimanngillat.

10. (a) Jesusip ajoqersukkat kingullermik naapimmagit qanoq pisoqarpa? (b) Jesus Paulusimut ’inorluni erniusutut ittumut’ takutittoq qanoq paasisariaqarpa?

¹⁰ Jesusip makissimaneranik uppernarsaasinnaasoq alla tassaavoq Jakob, Josefip Mariallu, Jesusip anaanaata, ernerat. Jesus makinngikkallarmat Jakob suli uppertunngorsimagunanngilaq. (Juánase 7:5) Jesusili imminut takutereermat uppertunngorpoq immaqalu qatanngutimi allat isumataarnissaannut peqataalluni. (apustilit suliait 1:13, 14) Jesusip kingullermik ajoqersukkat naapikkamigit peqquai ’nalunaajaaqqullugit . . . nunap isuanut allaat’. (apustilit suliait 1:6-11) Kingusinnerusukkut Saulusimut Tarsusimeersumut kristumiunik malersuisumut takutippoq. (apustilit suliait 22:6-8) Jesus Paulusimut ’inorluni erniusutut ittumut’ takutippoq. Soorlulusooq Paulus tanitat makinnissaannut piffissanngornissaa ukiunik hundredelinnik arlalinnik sioqqullugu anersaakkut inuunissamut makereersimasoq Naalagaq naalannartitaasoq takusinnaallugu. Misigisaq tamanna pissutigalugu Saulusip kristumiut ilagiissaannut ilaasortanik malersuisarnini toqutitsisarninilu ingerlaannaq taamaatippai; malunnangaartumik allanngorpoq. (apustilit suliait 9:3-9, 17-19) Saulus tassaalerpoq apustili Paulus, kristumiut upperisaannik illersuisut malunnaateqarnerpaat ilaat. — 1 Korintumiut 15:9, 10.

Makinnissamut upperisaq tunngaviuneruvoq

11. Paulusip qanoq ililluni ’toqusut makiffissaqannginnerarlugit’ oqaluttut ilumuunnginnerarpai?

¹¹ Tassa Jesusip makissimanera ilumut pisimavoq uppernarsarneqarluarlunilu. ’Kristusili toqusunit makittoq oqaluussissutigisaasarmat qanormi taava ilasi oqartarpat toqusut makiffissaqannginnerarlugit?’ Paulus taama aperivoq. (1 Korintumiut 15:12) Qulartut taakku isumamikkut makinnissaq qulariinnanngilaat, ammasumilli uppinnginnertik eqqartortarlugu. Paulusip takutippaa eqqarsaataat tunngavissaqanngitsut. Oqarpoq Kristus makissimanngippat kristumiut tusarliussaat salluussagaluartoq, Kristusillu makissimaneranik nalunaajaasut tassaassagaluartut ’Guutimik nalunaajaasut sallusut’. Kristus makissimanngitsuuppat Guuti utertitsissummik tunineqarsimassanngikkaluarpoq; taava kristumiut ’suli ajortiminniissagaluarput’. (1 Korintumiut 15:13-19; Rûmamiut 3:23, 24; Eprîarit 9:11-14) Kristumiut ’sinippaartut’, ilaatigut uppernertik pillugu toqunneqarsimasut, piviusumik neriuutissaqaratik toqusimassagaluarput. Inuunermit matumannga allamik neriuutissaqanngitsuuppat kristumiut ajorluinnartunik atugaqassagaluarput! Asuliinnaq naalliussimassagaluarput.

12. (a) Paulus oqarami Kristus toqumut ’sinippaartunut naaqqaataalersimasoq’ suna oqaatigimisaarpaa? (b) Kristusip qanoq ililluni makinnissaq ajornarunnaarsissimavaa?

¹² Taamaattoqanngilarli. Paulus ima nangippoq: ’Maannali Kristus toqusunit makissimavoq.’ Aap, allaat ’sinippaartunut naaqqaataalerpoq’. (1 Korintumiut 15:20) Israelikkut naalallutik nunap inerititaasa naaqqaataat Jehovamut tunniukkaangatigik, Jehovap pilluaqqusarpai annertuumik inerititaqartillugit. (2 Moses 22:29, 30; 23:19; Ussatit 3:9, 10) Kristus ’naaqqaat’-mik taagamiuk Paulusip oqaatigimisaarpaa allattaaq ’katersugassat’ toqusunit qilammi inuunissamut makitinneqarumaartut. ’Toqumi inukkut pinngormat,’ Paulus nangippoq, ’aammattaaq toqusut makiffissaat inukkut pinngorpoq. Soorlumi Adamimi tamarmik toqusut, taama Kristusimi tamarmik uummartitaassapput.’ (1 Korintumiut 15:21, 22) Jesusip makinnissaq ajornarunnaarsissimavaa inuttut naammalluinnartumik inuunini utertitsissutitut tunniukkamiuk taamaalilluni inuiaat ajortimut toqumullu inussiaanermit aniguisinneqarnissaannut periarfissillugit. — Galâsiamiut 1:4; 1 Pîtruse 1:18, 19.a

13. (a) Qilammi inuunermut makinneq qanga aallartippa? (b) Sooq tanitat tamarmik ’sinippaassanngillat’?

¹³ Nangilluni Paulus allassimavoq: ’Nungullutik tulleriissusertik missiliorlugu: naaqqaataasoq tassa Kristus; tulliussapput Kristusip pigisai, tikiuppat.’ (1 Korintumiut 15:23) Kristus ukiumi 33-mi makitinneqarpoq. Ajoqersugaali tanitaasut — ’Kristusip pigisai’ — Jesusip kunngitut najuutilernerata, Biibilip siulittuutai naapertorlugit 1914-imi pisimasup, kinguninngua tikillugu utaqqisariaqarput. (1 Tásalûníkamiut 4:14-16; sarĸúmersitat 11:18) Taavami najuunnerani suli inuusut? Paulus ima nassuiaavoq: ’Ata, anngigisamik oqarfigissavassi: tamatta sinippaassanngikkaluarpugut, kisianni tamatta allanngortinneqassaagut, tassanngaannaq, uisoriinnaq, qarlortaat kingullissaq pilerpat, qarlortarumaarpormi, toqusullu aserujuitsuullutik makissapput, uagullu allanngortinneqarumaarpugut.’ (1 Korintumiut 15:51, 52) Ersarippoq tanitat tamarmiunngitsoq ilivermiillutik makinnissaq utaqqisariaqaraat. Kristusip najuunnerani toqusut tassanngaannaq allanngortinneqassapput. — sarĸúmersitat 14:13.

14. Tanitat ’toqumut kuisittarnerat’ qanoq paasisariaqarpa?

¹⁴ Paulus taava aperivoq: ’Susarpammi taava toqusut pillugit kuisittartut? Toqusut makittoqassanngippata sullutik toqusut pillugit kuisittarpat? Sooq uaguttaaq ulloq tamaat [navianartorsiortuaannarnerpugut?]’ (1 Korintumiut 15:29, 30) Paulus isumaqanngilaq inuusut toqusimasut taarserlugit kuisittut, soorlu Biibilimik nutsikkat ilaasa taama ersersimisaaraluaraat. Kuisissagaanni ajoqersugaasariaqarpoq kristumiu, toqusimasullu ajoqersuganngorsinnaanngillat. (Juánase 4:1) Paulusip kristumiut taamani inuusut eqqartorpai, ilarpassui immisulli ’ulloq tamaat navianartorsiortuartartut’. Kristumiut tanitat ’Kristusip toquanut kuisimapput’. (Rûmamiut 6:3) Tanitaaleramilli inuunermut Kristusip toquneranut assingusumik toqunissamik kingunilimmut ’kuisimappullusooq’. (Mákorse 10:35-40) Qilammi inuunermut makinnissaq neriuutigalugu toqujumaarput. — 1 Korintumiut 6:14; Filípimiut 3:10, 11.

15. Navianartut suut Paulusip immaqa atortariaqarsimavai, qanorlu ililluni makinnissaq upperalugu tamakku anigorsinnaasimavai?

¹⁵ Paulus nassuiaavoq nammineq ima navianartorsiortigisimagami allaat ima oqarsinnaalluni: ’Ullut tamaasa toqulerpunga.’ Ingassaassisutut avoqqaarineqarumanani ima nangippoq: ’Ilumut ilissi nersornaatigigassi Kristus Jesusimi Naalakkatsinni.’ The Jerusalem Bible naapertorlugu versi tamanna ima nutserneqarpoq: „Ullut tamaasa toqu ajapeqqasarpara, qatanngutikka, ilissinnillu Kristus Jesusimi Naalakkatsinni tulluusimaarutiginninnikkut tamanna uppernarsarpara.“ Navianartorsiortarnerminut assersuutitut versi 32-mi eqqaavaa ’Efesusimi nersutit qaasuttut paasimallugit’. Romamiut akuttunngitsumik paannititsivinni pinerluttuliortut uumasunut qaasuttunut pisittarpaat. Paulusip eqqortumik oqaatigalugu uumasut qaasuttut akiortariaqarsimagunigit, aatsaat Jehovap ikiuineratigut aniguisinnaasimassaaq. Makinnissaq neriuutiginagu inuunermik taama navianartoqartigisumik qinersineq silatusaarnerussanngilaq. Siunissami inuunissamik neriuuteqanngikkaanni annikilliornernik atuisarneq Guutimullu kiffartorluni pilliuteqartarneq siunertaqanngilluinnassaaq. ’Toqusut makissanngippata, „nerillutalu imeqisa, aqagu toqussagatta“’, Paulus oqarsimavoq. — 1 Korintumiut 15:31, 32; aamma takuuk Korintumiunut agdlagkat áipait 1:8, 9; 11:23-27.

16. (a) Oqariaaseq ’nerillutalu imeqisa, aqagu toqussagatta’ immaqa sumik aallaaveqarpa? (b) Taama eqqarsarneq sooq navianarpa?

¹⁶ Paulusip immaqa Jesaja 22:13 issuarpaa, tassani Jerusalemimiut naalanngitsut suut tamarmik siumut aalajangeriigaanerannik isumaat allaatigineqarmat. Immaqaluunniit epikuriiarit eqqarsaatigai, taakkua toqup kingorna inuuneqarnermik neriuut ajattormassuk isumaqaramillu inuulluataarneq inuunermi pitsaanerpaasoq. Kikkulluunniit Paulusip eqqarsaatigigaluarpagit, isuma manna: ’Nerillutalu imeqisa’ silamiorpaluttuuvoq. Taamaattumik Paulus ima mianersoqqusivoq: ’Tammarnaveeritsi; ajortut ikinngutigalugit ileqqut ajunngitsut aserortarput.’ (1 Korintumiut 15:33) Makinnissamik upperinnikkumanngitsut ilagisaraanni navianarsinnaavoq. Ajortumik ilagisaqarneq kinguneqarsinnaasimavoq ajornartorsiutinik Paulusip ilagiinni Korinthimiittuni iliuuseqarfigisariaqagaanik, soorlu kinguaassiuutitigut kanngunartuliornermik, avissaartuunnernik, eqqartuussinernik aammalu Naalakkap unnukkorsiortitsineranik ataqqinninnginnermik. — 1 Korintumiut 1:11; 5:1; 6:1; 11:20-22.

17. (a) Paulusip Korinthimiut qanoq iliornissaannut kajumissaarpai? (b) Apeqqutit suut suli akineqanngillat?

¹⁷ Taamaattumik Paulusip Korinthimiut pitsaasumik kajumissaarpai: ’Iluamik silattorniaritsi ajortuliorasilu, ilaasa Guuti ilisarinngimmassuk; pakatseqqullusi taama oqarpunga.’ (1 Korintumiut 15:34) Makinnissamut ajortumik isiginninneq pissutigalugu ilaat anersaakkut sianigisaqanngillat, aalakkoortutut illutik. Taakku itertariaqarput eqqumajuartariaqarlutillu. Ullumikkuttaaq kristumiut tanitaasut anersaakkut eqqumajuartariaqarput silamiut qularajuttumik eqqarsariaasiinit sunnerneqarumanatik. Qilammi inuunissamik neriuutertik aalajangiuttariaqarpaat. Sulili apeqqutissaqarpoq — taamanikkut Korinthimiunut ullumikkullu uagutsinnut. Assersuutigalugu ima aperisinnaavugut: 144.000-it qanoq ittumik timeqarlutik qilammut makissappat? Allallu millionilippassuit suli iliverniittut qilammilu inuunissamik neriuutissaqanngitsut qanoq pissappat? Makinneq taakkununnga qanoq nassataqassava? Allaaserisami tulliuttumi Paulusip makinnissamik nassuiaanerata sinnera sammissavarput. (wE 1/7 98)

[Quppernerup ataani ilanngussaq]

Eqqaamavigit?

□ Jesus makinnissaq pillugu qanoq paasissutissiisimava?

□ Kikkut uppernarsarsinnaasimavaat Kristus makissimasoq?

□ Sooq makinnissamik ajoqersuut qularineqarsimava, Paulusillu tamanna qanoq qisuariarfigaa?

□ Sooq makinnissamik upperisaq kristumiunut tanitanut pingaaruteqarluinnarpa?

[Qupp. 15-imi assiliartaq]

Jairusip pania toqusut makitinneqarsinnaanerannut uppernarsaataavoq

[Qupp. 16, 17-imi assiliartaq]

Kristumiut aalajaatsut makinnissamik neriuutissaqarsimanngitsuugunik uppernertik pissutigalugu toqunerat siunertaqarsimassanngikkaluarpoq