Ilaqutariinni upperisarsiornikkut avissaarsimasuni Guutimik mianerinninnikkut naalanneq

„TIMIKKUT patinneqarnermit annernarneruvoq. . . . Timikkut unatagaangaarsimasutut misigivunga, kialuunniilli takusinnaanngilaa.“ „Ilaannikkut inuunera ima aliasuutigisartigaara suna tamaat taamaatilluinnarusuttaraluarlugu . . . imaluunniit qimaaginnarusullunga angerlaqqinnangalu.“ „Ilaannikkut eqqarsarluarsinnaasanngilanga.“

Oqaatsit misigissuseqarpaluttut tamakku isumatsassimangaarnermut kiserliornermullu ersiutaapput. Inuit aapparminnit ilaquttaminnilluunniit oqaatsitigut nakuusernermik — soorlu pasilliutitigut, sioorasaarutitigut, atequpalaasitigut imaluunniit nipangersimanikkut „sorsunnermi nillertumi“ periaatsinik — pineqartartut taama misigisarput. Inuit taakkorpiaat aapparisaminnit qanigisaminnilluunniit aamma timikkut nakuuserfigineqarajuttarput. Suna pillugu ilaat taama ajortigisumik pineqartarpat? Upperisarsiornikkut assigiinngissutsit pissutigalugit. Atukkat taamaakkaangata ilaqutariinni upperisarsiornikkut avissaarsimasuni inuusut Jehovamik pallorfiginninneq ilumut unamminiarnartuutittarpaat. Taamaattoq kristumiut amerlasuut ajornartorsiuteqangaaraluarlutik Guutimik mianerinninnikkut naalattuartarput.

Qujanartumik ilaqutariit upperisarsiornikkut avissaarsimasut tamarmik iluanni pissutsit taama naalliunnartigisanngillat. Kisianni ajoraluartumik ilaannikkut taamaattoqartarpoq. Illit ilaquttannit ajortumik pineqartarpit? Taamaappat qularnanngitsumik aappat angajoqqaatilluunniit ataqqissallugit ajornarsorissavat. Nuliaaguit meraaguilluunniit taama atugaqarlutit angerlarsimaffimmi upperisarsiornikkut avissaarsimasumi qanoq ilillutit Guutimik mianerinninnikkut naalanneq ersersissinnaaviuk? Allat qanoq ilillutik ikiuussinnaappat? Guutillu atukkat tamakku qanoq isigai?

Naalanneq sooq taama ajornartigaa?

Silarsuarmi namminissarsiorneq qujasuissuserlu namminerlu naammalluinnanngissuserput pissutigalugit Guutimik mianerinninnikkut naalanneq unamminiarnartuusarpoq tamaviaarnartoq. Satanip tamanna nalunngilaa nikallornissarpullu siunertarisarlugu. Tamanna anguniarlugu ilaannikkut ilaquttavut najoqqutassianik Guutimeersunik pingaartitsinngitsut atorsinnaasarpai. Kristumiut ilaquttaminnit uppinngitsunit anersaakkut ileqqussatigullu allaanerulluinnartunik najoqqutassiaqarput, taamaattumillu ileqqussat sammisassallu eqqarsaatigalugit isumaqatigiinngissuteqarsinnaasarpoq. (1 Pîtruse 4:4) Peqqussut manna maleruarniarlugu aalajangersimagaanni: ’Taartup piinik inerititaqanngitsunik suliaqartut peqatiginaveersigik’, immaqa ilaquttanit kristumiutut najoqqutassat taamaateqqullugit tatineqartarpoq. (Evfisumiut 5:11) Taakkua isaanni kristumiup iliuuserisai tamarmik eqqunngillat. Upperisarsiornerput pisuutittarpaat. Anaanaasup meeqqani napparsimammata uini ikioqqulluni qinnuigigamiuk ima mitallersumik akineqarpoq: „Upperisarsiornerit piffissaqarfigigukku meeqqatittaaq paarissallugit piffissaqassagaluarputit. Ikiortariaqanngilatit.“ Oqaatsit tamakkua Guutimik mianerinninnikkut naalanneq artornartissinnaavaat.

Ilaannikkut Biibilimi allassimasunut akerliunngikkaluartut pillugit isumaqatigiinngissuteqartoqarsinnaavoq. Ilaqutaqaraannili akisussaaffeqarportaaq naammassineqartariaqartunik. „Eqqarsaatigigaangakku ataatama qanoq iliorfigisaraatigut ajuusaarutigisaqaara, paasisimavarami kiserliortutut misigigami taamaaliortoq,“ Connie taama oqarsimavoq. „Assortuinera pissutigalugu ataataga kamaatilerajuppara. Imminut oqarfiginiartarpunga upperisarput akerlilersoramiuk taamalu sakkortutigisumik qisuariarluni pissuteqartariaqartoq. Silarsuup matuma ilumut Satan naalagaraa.“ Susan uppinngitsumik aappaqartoq ima oqarpoq: „Aallaqqaataani uiga qimakkusuppara, maannakkulli taamaaliorusunnanga. Paasilerpara Satanip atoraa misileqqullunga.“

Satanip aapparmut uppertumut pikkorluttutut misigititsinera naaffeqanngitsutut issinnaavoq. Immaqa uppertoq ullualuit ingerlaneranni aapparminit oqarfigineqanngivippoq kiserliortorujussuullunilu. Tamanna imminut tatiginermut aserornarpoq, uppertullu Guutimik mianerinninnikkut naalanneranut misiliutaalluni. Meeqqat aamma misigissutsikkut timikkullu qasusoorsinnaapput. Assersuutigalugu inuusuttut pingasut Guutimut kiffaasut kristumiut ataatsimiinnerinut aalajaallutik najuuttarput naak angajoqqaavisa tamanna akerlerigaat. Taakkua ilaat maanna tamakkiisumik oqaluussisartuusup manna miserratiginngilaa: „Ilutsinni imaqanngitsutut misigisarluta misigissutsikkut qasusoorsimaqaagut. Sinissinnaasanngilagut; aliasuttaqaagut.“

Guutip sumik piumaffigaatigut?

Guutimut naalanneq tamatigut pingaarnerpaasariaqarpoq, arnallu kristumiup ilaqutariit ittuannut pissutsinut naapertuuttumik naalannera Jehovap inatsisaanut naapertuuttariaqarpoq. (apustilit suliait 5:29) Naak tamanna piuminaassinnaagaluartoq ajornanngilaq. Nuliaasoq Jehovamut ikioqqujuartariaqarpoq. Guutip kissaatigaa ’imminut pallorfiginnittut anersaakkut ittumik ilumoortumillu pallorfigissagaanni’, tusarnaassagaanni siulersuinerminullu naalatsigitillutik. (Juánase 4:24) Eqqortumik isumaqaruni Guutip oqaasia tunngavigalugu ilisimasaqarnerminit kajumilluni naalannissaminut kajumissaarneqassaaq. Inuttut atukkavut allanngorsinnaasarput, Jehovali oqaasialu allanngorneq ajorput. (Malaki 3:6; Jâko 1:17) Jehovap uiusoq ilaqutariit ittuatut akisussaaffeqalersissimavaa, taamaapporlu Kristusip siulersuineranut naalatsigitikkaanni taamaanngikkaanniluunniit. (1 Korintumiut 11:3) Naak nuliaasup tamatigut pinerluffigineqaruni nikanarsarneqarlunilu tamanna akueriuminaatsissagaluaraa atoruminaatsissallugulu, ajoqersugaq Jakob allassimavoq ’ilisimassut pavannga pisoq . . . naalakkumasuusoq’. (Jâko 3:17, NV) Uiusup oqartussaanera paasisinnaallugulu akuerisinnaassagutsigu Guutip anersaava, ingammillu taassuma inerititaasa ilaat, asanninneq, pisariaqarput. — Galâsiamiut 5:22, 23.

Aapparisamut asannikkaanni Guutip aaqqissuussaaneranut naalannissaq piuminarnerussaaq. Evfisumiut 5:33-mi (NV) allassimavoq: „Tamassi nuliasi immissisut asatigisigik; arnalli uini ataqqingaassavaa.“

Jesus eqqarsaatigiuk. Naak oqaatsikkut timikkullu pinerluffigineqaraluarluni allat taamaaqataannik pineq ajorpai assuarnaatsuujuaannarlunili. (1 Pîtruse 2:22, 23) Naakkittaatsumik pineqarneq atorsinnaassagaanni qunusuitsuusariaqarpoq aalajangerluinnarlunilu Ataatani Jehova asasariaqarlugu. ’Asanninneq soraarnavianngilaq.’ — 1 Korintumiut 13:4-8.

Paulusip suleqatini Timoteus eqqaasissimavaa ullutsinnuttaaq naleqqulluartumik: ’Guutimmi anersaamik nangaassutaasumik tuninngilaatigut, kisianni sapiissutaasumik asannissutaasumillu silatusaarutaasumillu.’ (2 Timûtiuse 1:7) Sualungaartumik artornartorsiuteqaraangatta Jehovamut Jesus Kristusimullu asanninnerup Guutimut naalannissatsinnut kajumissisisinnaavaatigut. Isumakkut aalajaatsuugutta patajaalluta suut tamaasa isigisinnaavavut Jehovamullu Jesus Kristusimullu attaveqarnerput pingaarnerpaatut aallussinnaallugu. — Naleqqiuguk Filípimiut 3:8-11.

Nuliaasut uiusullu Guutimik mianerinninnikkut naalannermikkut maligassaalluartut

Ilaannikkut sivisuumik utaqqisariaqartarpugut paasilersinnagu Jehovap qanoq ililluni ajornartorsiutivut anigortissagai. Kisianni qimassanngilaatigut. Arnaq kristumiu Guutimut naalanniarluni ilungersortoq ima siunnersuivoq: „Jehovap ilinnut pisinnaatitai atorluartakkit — ataatsimiinnertigut ataatsimeersuarnertigullu pallorfiginnissinnaaneq, atuaqqissaarneq, oqaluusseqataaneq qinunerlu.“ Angusimasavut piinnarnagit pingaartumilli sukataarnivut Jehovap pilluaqqusarpai. 2 Korintumiut 4:17-imi apustili Paulus ima allassimavoq: ’Naalliussuserpummi sivikitsoq artornanngitsoq naalannassusermik naassaanngitsumik tamaviaarnartumik uuttugassaanngilluinnartumik uatsinnut kinguneqassaaq.’ Versi tamanna eqqarsaatigigutsigu eqqissisarneqarpugut. Arnaq oqaluttuarpoq: „Ilaqutariittut inuunera pitsanngoriartorsimanngilaq, ilaannikkullu eqqarsaatigisarpara Jehovap suliniutikka naammaginerai. Kisianni ajornartorsiutitsigut uinnit iluatitsinerusarama tamanna Jehovap pilluaqqusineratut isigaara. Nalunnginnakku iliuutsikka Jehovamit iluarisaasut ingerlaqqissinnaanissannut nakussatsinneqartarpunga.“

Jehova neriorsuisimavoq sapikkatsinnik misilinneqassanngitsugut. Taanna tatigilluinnarsinnaavarput, sunimmi tamanik ilisimasaqarami immitsinnillu nalunnginnerulluta. (Rûmamiut 8:35-39; 11:33; 1 Korintumiut 10:13) Pissutsini artornartuni Jehova qinnuigigaanni iluaqutaasaqaaq. Anersaavanit siulersorneqaqqulluta qinusinnaavugut, ingammik ajornartorsiut aalajangersimasoq qanoq iliuuseqarfigissallugu imaluunniit qanoq qaangersinnaassallugu nalugaangatsigu. (Ussatit 3:5; 1 Pîtruse 3:12) Pisariaqartunik naammagittarnissat, imminut naalakkersorsinnaanissat maniguunnissallu qinnutigiuartakkit. Tussiaasiortoq ima allassimavoq: „[Jehova], qaarsora, pallittaalisara, aniguisitsisiga.“ (Tussiaat 18:3) Ilaqutariinni avissaarsimasuni inuusut oqaatsit tamakku eqqaamallugit nakussatsissutigisinnaavaat.

Pingaartuuvorli aappariinneq pilluarnartunngortinniarlugu tamaviaarnissaq. Jesusip siulittuutigisimavaa nutaarsiassaq nuannersoq assortuutilersitsiumaartoq, qinusinnaavugulli isummavut iliuutsivullu tamatumunnga pissutaaqqunagit. (Matîuse 10:35, 36) Aappariinni ajornartorsiutit millisinneqarsinnaasarput aapparminut pinassanani ilassiornikkut. Naak uppertoq kisimi eqqortumik iliuuseqaraluartoq, taamaaliornerata ajornartorsiutit sualuttumik isumaqatigiinngissuteqalernissamut assortuunneqarnissamullu ineriartornissaat pinngitsoortissinnaavaa. Naammagittarneq asanninnerlu, ’inussiarnissuseq ilalaarlunilu naalliussinnaaneq’ pingaaruteqaqaat. — 2 Timûtiuse 2:24.

Apustili Paulus ima allassimavoq: ’Tamanut tamalaasutut ippunga, ilaat annaakkumagaluarlugit.’ (1 Korintumiut 9:22) Tamatumunnga assingusumik uppertumut ilaannikkut pisariaqarsinnaavoq ilaquttani ilagisinnaajumallugit piffissaqarniarnissaq, taamaattorli kristumiutut akisussaaffini sumiginnarnagit. Sapinngisamik aappani peqatigisariaqarpaa kristumiutullu taanna isumagalugu. Taamaaliornikkut Guutimut naalanneq ersersittarpaa.

Nuliaasoq Guutimik mianerinnittoq maniguuttorlu naapertuussaruni misiginneqataallunilu Guutimut naalanneq sapersaatigissangilaa. (Evfisumiut 5:22, 23) Oqaaserisaaruni, ’tarajorsimasunik’ oqaaseqarluni, akersuunnerit pinngitsoortissinnaavai. — Kulorsamiut 4:6; Ussatit 15:1.

Biibilimi oqaaqqissaarneqarpugut saqitsaannerit tunuartittaqqullugit erniinnarluinnaq kajumilersitsisumillu oqaaseqarluta eqqissisitseqqulluta, ’narrutsassinitsinnilu’ sineqqunata. (Evfisumiut 4:26, 29, 31) Taamaaliussagutta maniguulluta Jehova annertoqqutigisariaqarparput taassumannga nakussatsinneqarumalluta. Nuliaasoq kristumiu miserratiginninnani maniguulluni ima oqarpoq: „Ilungersorlunga qinoreerama Jehovap anersaavata ikiorpaanga uiga asaneroqqullugu.“ Guutip oqaasiani ima oqaaqqissaaruteqarpoq: ’Ajortumik iliortoq ajortumik akileqinasiuk. . . . Ajortumut ajunngitsoq sakkugalugu ajugaaniarit.’ (Rûmamiut 12:17-21) Siunnersuummik pitsaasumik tamatuminnga maleruaaneq Guutimik mianerinninnikkut naalannermut ersiutaavoq.

Meeqqat Guutimik mianerinninnikkut naalattut

Ilissi meeqqat ilaqutariinni upperisarsiornikkut avissaarsimasuni inuususi Jehovap ima siunnersorpaasi: ’Angajoqqaasi tamatigut naalassigik, tamanna Naalakkap iluarimmagu.’ (Kulorsamiut 3:20) Naalakkap Jesus Kristusip tamaani eqqaaneqarnera takutippaa angajoqqaat killeqanngitsumik oqartussaassuseqanngitsut. apustilit suliait 5:29-mi allassimavoq ’Guuti inunnit naalattariaqarnerusoq’, tamanna aamma kristumiunut inuusuttunut pingaaruteqarpoq. Ilaannikkut ilissi inuusuttuususi Biibili naapertorlugu eqqortuusut ilisimasasi tunngavigalugit aalajangigassaqartassaasi. Immaqa eqqunngitsumik pallorfiginninnermut attuumassuteqartoq peqataaffigiumanngikkussiuk pillarneqarsinnaagaluarpusi. Naak tamanna nuanninngikkaluartoq tupallersaatigalugulu nuannaarutigisinnaavarsi nalunagu Guutip isaani eqqortuliortusi naalliullusi. — 1 Pîtruse 2:19, 20.

Najoqqutassianit Biibilimeersunit siulersorneqarassi immaqa angajoqqaasilu isumaqatigiinngissuteqarpusi. Kisianni angajoqqaasi akerarinngilasi. Naak anaanarsi ataatarsiluunniit Jehovamut kiffaanngikkaluartut tunniulluinnarsimasut eqqortumik ataqqineqartariaqarput. (Evfisumiut 6:2) Salomon ima oqarsimavoq: „Tusaaniaruk ataatat inuunermut pinngorfiit, anaanallu utoqqaasoq sumiginnaqinagu.“ (Ussatit 23:22) Paasiniarsiuk taakkua angajoqqaatut qanoq aliasuutigitigigaat ilissi taakkua isaanni eqqumiitsumik upperisaqalerassi. Ammasumik attaveqatigiinneq ’qanilaarsuserlu’ pingaartorujusuupput. (Filípimiut 4:5) Inuusuttut kristumiut najoqqutassiat Biibilimeersut aalajangiuttariaqarpaat, aammalu ’ajornanngippat sapinngisamik inuit tamaasa eqqissiveqatiginiartariaqarlugit’. (Rûmamiut 12:18) Maannakkut angajoqqaasi naalattarussigik Jehovamut takutissinnaavarsi taassuma naalagaaffianut naalallusi innuttanngorusuttusi.

Allat qanoq ikiuisinnaasut

Kristumiut ilaqutariinni upperisarsiornikkut avissaarsimasuni inuusut uppeqatiminnit paasineqartariaqarlutillu ikiorneqartariaqarput. Tamanna oqaatsinit makkunannga paasinarsivoq: „Sapersisitaalluinnartutut neriuutaarulluinnartutullu misigivunga, namminerlu qanoq iliornissama allallu kialuunniit qanoq iliornissaata tamanna allanngortissinnaanngilaa. Tatigisariaqarpara Jehovap piumasaa ilaqutariinnitsinni arlaatigut piumaartoq.“

Kristumiut ilagiissaat anersaakkut nunataavoq naggorissoq qatanngutigisanik peqateqarfiusinnaasoq. Arnaq eqqaaneqareersoq oqarpoq soorlu ’silarsuit marluk assigiinngitsut inuuffigalugit: aappaa inuuffigisariaqagara, aappaalu inuuffigerusuttara’. Qatanngutigiittut asanninneq ikiortigalugu ikinngutivut misilinneqangaartut qasusuissinnaapput qanorluunniillu atugaqaraluarlutik Guuti kiffartorfigiuarsinnaallugu. Qinnunnissaat eqqaamasariaqarparput. (Evfisumiut 1:16) Periarfissaqaraangatta kajumissinartumik tuppallernartumillu oqaaseqarfigisariaqarpavut. (1 Tásalûníkamiut 5:14) Periarfissaqarutta naleqqulluarpallu katerisimaarnitsinnut teokratiimullu tunngasumik sammisassatsinnut qaaqqusinnaavavut.

Guutimut naalannermi pilluaqqussutissat

Ilaqutariinni upperisarsiornikkut avissaarsimasuni inuuguit ullut tamaasa Guutimut naalannissap iluaqutaassusia eqqarsaatigisariaqarpat. Ilungersorlutit tamatuminnga pissuseqarniarit ’qasunatillu’. (Galâsiamiut 6:9) ’Nalunngeqatiginnissutikkut Guutimut ataneq pillugu’ ajornartorsiuteqarutit naapertuilluanngitsuliorfigineqarlutillu ’. . . Guutimi saammaannarsissaatit’. (1 Pîtruse 2:19, 20) Naalattaruit Jehovallu naapertuilluartunik najoqqutassiaasa inatsisaasalu akerlianik iliornatit takutissavat Jehovap aaqissuussaaneranut ilumoorlutit. Kristumiutut iliuutsitit allaat aappavit, meeqqavit angajoqqaavilluunniit annaanneqarnissaannik kinguneqarsinnaavoq. — 1 Korintumiut 7:16; 1 Pîtruse 3:1.

Ilaqutariinni upperisarsiornikkut avissaarsimasuni piumasarisat naammassiniartillugit eqqaamassavat Jehovamut Kristusimullu ilumoortuarnissat qanoq pingaaruteqartigisoq. Ilaqutariinni isumaqatigiinngissuteqaleraangat ilaat aalajangersimasut pillugit nakkaannarsinnaasariaqarpoq, kisianni Guutimut aalajaannini taamaatikkuniuk inuunissaq allaat taamaatissavaa. Apustili Paulus oqarsimavoq: ’Guutip . . . ullut makkua naalerneranni ernermigut oqaluffigaatigut, taanna tamanik kingornussisunngortikkaa, taassumuunalu silarsuaq pinngortikkaa.’ ’Annassimassut taama atsigisoq’ ilumut pingaartikkutsigu naalannissatsinnut kajumissaarneqassaagut. — Eprîarit 1:1, 2; 2:3.

Guutimut naalallutit najoqqutassiat eqqortut aalajangiulluinnarukkit nammineq aappavillu uppinngitsup iluaqutigissavarsi. Ilumoorsutsip ilaqutariit nakussatsissavai. Ussatit 31:11-mi nuliaasoq pikkorissoq ilumoortorlu ima allaatigineqarpoq: „Uiata tamatigorluinnaq tatigisarpaa.“ Minguitsumik iliuuseqartaravit ataqqinnilluarlutillu immaqa uiit uppinngitsup piffissap ingerlanerani Naalagaaffimmik tusarliussaq tusarnaassavaa kiisamilu sallusuissut Guutip oqaasianeersoq ilassillugu.

Aap, Guutimut naalanneq iluaqutaasorujussuuvoq inuunermillu annaassissinnaalluni. Ilaqutariinnissinni taamaannissaa qinnutigisiuk. Taava isumakkut eqqississaasi Jehovalu unnersiutigisinnaallugu. (wE 1/6 95)