Meeqqat naalannermik ilinniarnissaat pingaaruteqarpa?
„ANGAJOQQAAT meeqqanit naalattuninngarnit nammineersinnaasunik meeraqarusunnerupput.“ New Zealandimi kisitsit atorlugit nassuiaanernik misissuineq pillugu aviisimi ilanngutassiap qulequtaa taama nipeqarpoq. Taassuma ersersippaa „apersorneqartut 22 procentiinnaat isumaqartut perorsaanerup siunertarissagaa meeqqat naalannermik ilinniartinnissaat“. Misissuinerup aamma takutippaa ullutitsinni angajoqqaat isumaqartut pingaaruteqanerungaartoq meeqqat pissuserissaarnermik, nammineersinnaanermik akisussaanermillu ilinniartinnissaat.
Imminuinnaq eqqarsaatiginerup imminuinnarlu isumaginerup nalaani matumani tupaallannanngilaq inuit amerlanersaat naalannissamut isumalluarpalunngitsumik isiginnittaaseqarmata takusinnaanagulu meeqqat oqarfigineqarnertik malillugu iliornissaannik ilinniartinnissaat qanoq pingaaruteqartigisoq. Meeqqalli naalattuunermik ilinniarnissaannik isuma tamanna ittangalluinnartutut ullutsinnullu tulluangilluinnartutut isigineqassava? Imaluunniit meeqqanut iluaqutaasinnaava ilinniarfiusinnaallunilu? Pingarnerusumillu: Jehova Guutip, ilaqutariit aaqqissuussaanerannik pilersitsisup, angajoqqaanut naalattuuneq qanoq isumaqarfigaa, naalattuunerlu sunik iluaqutissartaqarpa? — Apustilit Suliaat 17:28; Efesosimiut 3:14, 15.
„Tamanna iluarpoq“
Ukiuni hundredelinni siullerni Efesosimi ilagiinnut kristumiunut apustili Paulusi allappoq: „Qitornaasusi, angjoqqaasi naalassigit Naalakkami, tamanna iluarmat.“ (Efesosimiut 6:1) Taamaattumik meeqqat naalattuunissaannut pissutaasut pingaarnerpaartaat tassaavoq suup iluartuuneranut suullu eqqortuuneranut Guutip maleruagassiaanut naapertuunnera.
Tassunga atatillugu malugivarput Biibilimi allaaserineqartoq angajoqqaat asannittut perorsaanerat pinnersaanertut ittoq, „nigaliliaq kusanartoq niaqormiussaq qungatsinnilu ujamiliussassat“, ’Naalakkami iluarinartoq’. (Ussatit 1:8, 9; Kolossemiut 3:20) Akerlianik angajoqqaanut naalannginneq Guutimit iluariasaajunnaarnermik kinguneqartarpoq. — Romamiut 1:30, 32.
„Atugarissaaqqullutit“
Paulusi iluaqummik naleqangaartumik naalannerup kingunerisinnaasaanik taasaqaqqippoq: „’Ataatat anaanallu ataqqikkit!’ Tassa inassut neriorsuutitalik siulleq: ’atugarissaaqqullutit inuummersoqqullutillu nunami.’“ (Efesosimiut 6:2, 3; 2 Mosesi 20:12) Angajoqqaanut naalanneq qanoq iluaqutaasinnaava?
Soorunami angajoqqaat meeqqaminnut naleqqiullutik utoqqaassersertik misilittakkatillu iluaqutigisarpaat. Angajoqqaat immaqa qarasaasialerinermik allanillu atuarfimmi ilinniarneqartartunik ilisimasaqarpallaanngillat, inuunerli nalunnginneruaat ulluinnarnilu ajornartorsiutit qanoq qaangernissaat ilisimanerullugu. Akerlianilli inuusuttut oqimaaqatigiissaarisumik eqqarsariaaseq ukioqqortusiartortilluni pigilertagaq amigatigaat. Taamaattumik aalajangiigaangamik tuaviorpallaarlutik aalajangiingajupput ilagisartakkallu ajortut sunniinerinut nakkaannajasarlutik. Pissutissaqarluni Biibilimi allassimavoq: „Sianiissuseq nukappissap uummataanut qilersugaavoq.“ Sianiissuseq taamaattoq qanoq ikiorserneqarsinnaava? „Unataatip anusinngorsaataasup tamanna taassumannga peersissinnaavaa.“ — Ussatit 22:15.
Naalattuunerup iluaqutaanera angajoqqaat meeqqallu attaveqartigiinnerinnaannut tunnganngilaq. Innuttaaqatigiit ingerlalluarsinnaassappata aaqqiagiinnginnertaqanngitsumik sunniuteqarluartumillu suleqatigiittoqartariaqarpoq; naalattuunissarlu pisariaqarluinnarpoq. Aamma aappariit akuersaartuunerisa eqqisseqatigiinneq, ingerlalluarneq pilluarnerlu kingunerisarpaat, allallu pisinnaatitaaffiinut misigissusiinullu piumasaqarpallaarneq misigittaatsuunerlu taamatut kinguneqartarani. Suliffik ingerlalluassappat sulisut naalattuusariaqarput. Naalakkersuisut inatsisiliaannut aalajangersagaannullu naalattuugaanni pillagaanngitsuuinnarani aammali isumannaatsuunissaaq illersorneqarnissarlu anguneqasinnaapput. — Romamiut 13:1-7; Efesosimiut 5:21-25; 6:5-8.
Inuusuttut oqartussaasunut naalakkumanngitsut innuttaaqatigiinni aaqqiagiinngissuteqarajupput. Akerlianik meeraanerminniilli naalannermik ilinniarsimasut inuunertik tamaat iluaqutigisarpaat. Taamaattumik iluaqutaaqaaq meeraalluni naalannermik ilinniarneq.
Naalattuunermut akissarsiassaq angingaartoq
Naalattuuneq ilaqutariinni inuunermilu eriagisassanut allanut attaveqarlualissutaaginnanngilaq, aammali attaveqarnerit tamarmik pingaarnersaasa — tassa Pinngortitsisumut attaveqarnerup — ineriartortinnissaannut tunngavissaalluni. ’Pinngortitsisorsuartut’ aamma ’inuunerup pilerfiatut’ Jehova Guutip naalattuulluinnarnissarput eqqortumik pisassaraa. — Oqaluussisartup oqaasii 12:1; Tussiaat 36:10.
Oqaaseq ’naalanneq’ assigiinngitsunik oqaasertalerlugu 160-inik amerlanerusunik Biibilimi atorneqarpoq. Aammattaaq Guutip inatsisaaanut, inassutaanut, peqqussutaanut aalajangersagaanullu, tamarmik naalatsigitinnissamik piumasaqartunut, innersuussuteqarpoq. Qularutissaanngilluinnarpoq Guutimut iluarisaassagutta naalattuuneq pisariaqartutut isigigaa. Aap, naalattuuneq pisariaqarluinnarpoq Jehovamut ajunngitsumik attaveqarnerput ineriartortissagutsigu. (1 Samueli 15:22) Ajoraluartumik inunnguuseralugu naalannissarput ajornarnerutittarparput naalannginnissarput ajornannginnerutillugu. „Inuit inuusunnerminniit ajortuinnarnik eqqarsaateqartarput.“ (1 Mosesi 8:21) Taamaattumik naalattuuneq inuuneq tamaat ilinniagassaavoq meeraanermiinnaanngitsoq. Angingaartumik akissarsinassaaq.
Eqqaamajuk Paulusip oqarnera angajoqqaanut naalannissaq marlunnik neriorsuutitaqartoq: „Atugarissaaqqullutit inuummersoqqullutillu nunami.“ Neriorsuut taanna Ussatit 3:1, 2-mi imatut allassimavoq: „Ernera, ajoqersuutikka puigorniaqinagit, inassutikkalu uummatinni pigiliutikkit; taakkuami ullunik ukiunillu amerlasuunik inuuffissaqartissavaatsit annerusumillu pilluaateqalersillutit.“ Naalattuunermut akissarsiaq angingaartoq tamanna tassaavoq maannakkut inuttut Jehovamut attaveqarneq inuunerlu naassaanngitsoq silarsuassami nutaami eqqissinartumi. — Saqqummersitat 21:3, 4. (wE 1/4 01)
[Qupp. 15-mi assiliartat]
Naalattuuneq ilaqutariinni, suliffimmi Jehovamullu ajungitsumik attaveqalersitsisarpoq