Arnat kristumiut ataqqisassaapput
’Angutaasusi nuliasi silalimmik inooqatigisigik, pisattatut qajannarnerusutut [arnatut, NV] iliorlugit, ataqqisigillu.’ — 1 PÎTRUSE 3:7.
1, 2. (a) Sooq Jesusip puilasuliap eqqaani arnamik Samariamiumik oqaloqateqarnera tupaallaataava? (Aamma ilanngussaq takuuk.) (b) Jesusip arnamut Samariamiumut oqaluussinermigut suna takutippaa?
UKIUP 30-p u.n.k. naajartulernerani ulloq qiteraraa illoqarfiup Sykarip ungasinngitsuani Jesusip arnat qanoq iliorfigineqartussaanerat takutippaa. Ullaap tungaa tamaat Samariap nunataatigut qattunertuukkut pisulluni angalasimavoq, taamaammallu puilasuliaq tikikkamiuk qasuvoq, kaalluni imerusullunilu. Puilasuliap eqqaanut ingittorlu arnaq Samariamiu imertarluni tikiuppoq. ’Immisinnga,’ Jesusip arnaq oqarfigaa. Arnap tupigutsappasilluni qiviarsimassavaa, imalu aperaluni: ’Sooq juutiullutit uannut immiseqqusinnaavit, uangalu Samariamiut ilagigaannga?’ Kingusinnerusukkut ajoqersugai nerisassarsiniareerlutik tikiukkamiuk tupaallapput takugamikku Jesusip ’arnaq oqaloqatigigaa’. — Juánase 4:4-9, 27.
2 Arnap aperineranut ajoqersukkallu tupaallannerannut suna pissutaava? Arnap Samariamiuunera, juutillu Samariamiunik peqateqarumaneq ajornerat. (Juánase 8:48) Aammali alla ajoqersukkat tupaallannerannut pissutaasimannguatsiarpoq. Taamanikkut juutit ajoqersuisuisa maligassarsiaat pissutaallutik angutit arnanik kikkut tamarmik takkuanni oqaloqateqarnissaminnik nangartarneqartarsimapput.a Jesusili isertuarani arnamut unneqqarissumut taassumunnga oqaluussivoq, allaat Messiasiunini taassumunnga qulaarlugu. (Juánase 4:25, 26) Jesusip taamaalilluni takutippaa ileqqunit Biibilimik tunngaveqanngitsunit, aamma arnanik nikaginnittunit, killilersorneqartikkumanani. (Mákorse 7:9-13) Akerlianilli, iliuutsimigut ajoqersuutimigullu Jesusip takutippaa arnat ataqqinnittumik iliorfigineqartussaasut.
Jesusip arnat qanoq pisarsimagai
3, 4. (a) Jesusip arnaq atisaminik attuisoq qanoq pivaa? (b) Jesus angutinut kristumiunut, ingammik nakkutilliisunut, qanoq maligassiuilluarpa?
3 Jesusip inunnut allanut misiginneqataassusia arnanut iliorfiginninneratigut ersertarpoq. Ilaanni arnap ukiuni aqqaneq-marlunni aaqartuarsimasup inuppassuit akornanni Jesus ujarpaa. Nappaammigut ileqqussatigut minguttuujuvoq, taamaattumillu tamaaniittussaanngivikkaluarluni. (3 Moses 15:25-27) Neriuutaarulluinnaqqagamili inuppassuit akornisigut qerlertoruulluni Jesusip tunuanut pivoq. Atisaatigut attoramiuk ingerlaannaq ajorunnaarpoq! Naak Jesus Jairusikkunnukaraluarluni, pania napparsimasorujussuummat, unippoq. Nukik imminit anisoq malugalugu imminik attuisoq qinilerpaa. Arnap annilaanganermit sajoqaluni qanillivaa saavanullu pallorluni. Inuit akornanniinnera imaluunniit akuerineqarani atisaminik attuinera pillugu Jesusip oqalorujuffigaa? Naaggaluunniit! Inussiarneqaluni paasinnippaloqalunilu oqarfigaa: ’Panik-aa, uppernerpit annaappaatit.’ Jesusip arnamik toqqaannartumik ’panik’-mik taasinera tamanna kisiartaavoq. Taamatut taaneqarnini arnap toqqissiallaatigisimassaqaa! — Matîuse 9:18-22; Mákorse 5:21-34.
4 Jesusip Mosesip inatsisaasa tunuliaqutaat eqqarsaatigaa. Mosesip inatsisaasa anersaavat tunuliaqutaasoq eqqarsaatigaa nalunagulu naakkinninnissaq misiginneqataanissarlu pisariaqartut. (Naleqqiuguk Matîuse 23:23.) Arnap atugarisimasai neriuutaarulluinnarnartut eqqarsaatigai uppernerminillu iliuuseqarnera puiornagu. Taamaalilluni angutinut kristumiunut, ingammik nakkutilliisunut, maligassiuilluarpoq. Arnap kristumiup inuttut ajornartorsiulersup imaluunniit ajornakusoortumik misilinneqaataasumillu atugaqalersup oqaasiisa iliuusiisaluunniit tunuliaqutarisaat utoqqaanertat eqqarsaatiginiartariaqarpaat pissutsillu pissutiginiakkallu eqqumaffigisariaqarlugit. Tamakkuninnga tamanik paasiniaanerup immaqa ersersissavaa naammagittarneq, paasinninneq naakkinninnerlu pisariaqartut, unnersuussineq oqaaqqissaarinerlu pinnatik. — Ussatit 10:19; 16:23; 19:11.
5. (a) Juutit ajoqersuisuisa maligassarsiaat qanoq ilillutik arnanik killilersuippat? (Takuuk ilanngussaq.) (b) Kikkut siullersaallutik Jesusimik makissimasumik takunniittuuppat tamatuminngalu nalunaajaatiginnillutik?
5 Arnat Jesusip nunarsuarmiinnerani inuusut juutit ileqqutoqaasa killilersuutaat pissutaallutik eqqartuussinermi ilisimannittutut nalunaajaasinnaatitaanngillat.b Ukiumili 33-mi u.n.k. nisanip 16-iani ullaakkut Jesus toqusunit makititaasimatsiartoq qanoq pisoqarsimasoq eqqarsaatigeriassagit. Kikkut Jesus makititaasimasoq takoqqaarpaat ajoqersukkallu allat Naalakkamik makissimaneranik nalunaajaaffigalugit? Arnat toqunissaa tikillugu kikiattugaaffiata eqqaaniissimasut. — Matîuse 27:55, 56, 61.
6, 7. (a) Jesus arnanut ilivermukartunut qanoq oqarpa? (b) Jesusip ajoqersugai angutit arnat oqaluttuaannut aallaqqaammut qanoq qisuariarpat, tamannalu qanoq ilinniarfigisinnaavarput?
6 Sapaatip-akunnerata ulluisa siullianni ullaakkut Maria Magdalene arnallu allat ilivermukarput Jesusip timaa tipigissunik tanikkiartorlugu. Iliveq imaqanngimmat Mariap Peter Johannesilu arpalluni oqarfigiartupallappai. Arnat allat uninngaannarput. Sivitsunngitsoq inngilip saqqummerfigai oqaluttuullugillu Jesus makititaasimasoq. ’Aallarasuarlusi ajoqersugai oqarfigiartorsigik,’ inngilip oqarfigai. Arnat taakku tuaviorlutik oqariartortillugit Jesusip nammineq saqqummerfigai, oqarfigalugillu: ’Qatanngutikka oqarfigiartorsigik.’ (Matîuse 28:1-10; Mákorse 16:1, 2; Juánase 20:1, 2) Inngilip saqqummersimanera nalullugu aliasoqalunilu Maria Magdalene ilivermut imaqanngitsumut uterpoq. Tassani Jesusip saqqummerfigaa, kiisamilu ilisarilermani oqarfigaa: ’Qatanngutikka oqarfigiartukkit: Pavunnalerpungagooq Ataatannut Ataatassinnullu, Guutinnut Guutissinnullu.’ — Juánase 20:11-18; naleqqiuguk Matîuse 28:9, 10.
7 Peter, Johannes ajoqersukkamiluunniit angutit ilaat Jesusip saqqummerfigeqqaarsimasinnaagaluarpaa. Taarsiulluguli arnat taakku makissimanerminik takunneqqaartuutippai tamatuminngalu ajoqersukkaminut angutinut nalunaajaassutiginnitsillugit. Angutit taakku aallaqqaammut qanoq qisuariarpat? Ima oqaluttuarineqarpoq: ’Oqaasiili taakkua oqatsiaataannaatippaat upperinagillu.’ (Lúkarse 24:11) Imaassinnaava arnaanerat pissutigiinnarlugu nalunaajaanerat upperiuminaatsikkaat? Taamaassimappat, piffissap ingerlanerani Jesusip toqusunit makissimaneranut uppernarsaatissarpassuaqalerput. (Lúkarse 24:13-46; 1 Korintumiut 15:3-8) Ullumikkut angutit kristumiut anersaakkut qatanngutimik arnat paasisimasaannik suusupaginnittanngikkunik silatusaassapput. — Naleqqiuguk 1 Moses 21:12.
8. Jesusip arnanik iliorfiginneriaatsimigut suna takutippaa?
8 Jesusip arnanik iliorfiginnittarsimanera misissorlugu killitsinnartorujussuuvoq. Misiginneqataasumik aalajaalluinnartumillu arnat iliorfigisarsimavai, pingaartinniarpallaassanagit imaluunniit nikassaavigissanagit. (Juánase 2:3-5) Juutit ileqqutoqaat arnanik ataqqinassusiiaasut Guutillu oqaasiinik atortussaajunnaarsitsisut tunuartittarsimavai. (Naleqqiuguk Matîuse 15:3-9.) Arnat ataqqinnittumik iliorfigineratigut Jesusip Jehova Guutip taakkuninnga qanoq iliorfiginneqqusinera qulaarpaa. (Juánase 5:19) Jesus taamaalilluni angutinut kristumiunut kusanarluinnartumik maligassiuivoq. — 1 Pîtruse 2:21.
Jesusip arnat pillugit ajoqersuutai
9, 10. Jesus qanoq ililluni juutit ajoqersuisuisa maligassarsiaasa arnanut isiginninnerannut akerliusumik iliorpa, farisiiarillu avinneq pillugu apeqqutaannut qanoq akiva?
9 Jesusip juutit ileqqutoqaat akerlilerlugit arnat iliuutsimiguinnaanngitsoq aammali ajoqersuutimigut ataqqinnittumik pivai. Assersuutigalugu, avinneq allasiornerlu pillugit qanoq ajoqersuuteqartoq misissoriartigu.
10 Avinneq pillugu Jesus ima aperineqarsimavoq: ’Inuup nulii suna nalinginnaq patsisigalugu avikkuniuk iluarpa?’ Akissutaa Markusip ima oqaluttuaraa: ’Nuliaminik [uersanngitsumik, tassa allasiunngitsumik] avittoq allamik nuliaruni taanna arnaaneraa. Arnallu uini avissimallugu allamik uinikkuni angunnuneqarpoq.’ (Mákorse 10:10-12; Matîuse 19:3, 9) Oqaatsit paasiuminartut taakku atorlugit arnat ataqqinassusiannik pingaartitsinini ersersippaa. Qanoq ililluni?
11. Allamik allasiornerunngitsumik pissuteqarluni avittoq pillugu Jesusip oqaasiisigut suna erserpa?
11 Siullermik, ’suna nalinginnaq patsisigalugu avittoq’, tassa allamik allasiornerunngitsumik patsiseqartumik avittoq, (Matîusip ivangkiliua naapertorlugu) eqqaagamiuk Jesusip ersersippaa aappariinneq suusupagisassaanngitsoq imaaliallaannarlu kipititassaanngitsoq. Soorpianngitsut, soorlu arnap nerisassiornermini pikkorliornera imaluunniit angummik allamik oqaloqateqarnera, pissutigalugit avinneq juutit ajoqersuutaanni akuerisaavoq. Allaammigooq angut arnamik nuliaminit ajuutiginartinnerusaminik nassaaruni avissinnaatitaavoq! Biibilimik misissueqqissaartartoq ima oqarpoq: „Jesus taamatut oqaaseqarnermigut, . . . arnanik illersuivoq aappariinnerup inissisimaffissavianut inissinnissaa ujartoramiuk.“ Tassa aappariinneq ataavartuusussaavoq, aaqqissuussaalluni arnap toqqissisimaffigisinnaasaa. — Mákorse 10:6-9.
12. Nuliaminut ajortuliorluni arnaaneqartoq pillugu Jesusip oqaasii qanoq ilillutik nutaajuppat?
12 Aappassaanik, angut allasiortoq eqqaagamiuk Jesusip juutit eqqartuussiviini suusupagisaasumut isuma nutaaq saqqummiuppaa — angutip nuliaminut ajortuliorluni allasiornera. The Expositor’s Bible Commentary-mi ima nassuiaateqarpoq: „Juutit ajoqersuutaat naapertorlugit arnaq allasiortoq uiminut ajortuliortarpoq; angullu angutip allap nulianik kinguaassiuutitigut atoqateqarnermigut uiusumut ajortuliortarpoq. Angulli qanorluunniit iliorluni allasioraluaruni nuliaminut ajortuliortutut isigineqanngisaannarpoq. Jesusip, uiusoq ileqqussatigut nuliaatulli pisussaaffilerneratigut, arnap inissisimaffia naleqartillugulu ataqqinassuseqartippaa.“
13. Qanoq ililluni Jesusip takutippaa kristumiut aaqqissuussaanneranni avinneq eqqarsaatigalugu angutinut arnanullu najoqqutaq ataaseq atuuttoq?
13 Pingajussaanik, arnaq uiminit avittoq Jesusip eqqaagamiuk arnap uiminik allasiortumik avissinnaatitaanera akuersaarpaa — taamaaliorneq taamanikkut juutit inatsisaasa atuunneranni ajornartitaagunanngilaq nalinginnaananili.c Oqartoqartarsimavoq ’arnaq akuersiseqqaarlugu akuersiseqqaarnaguluunniit avinneqarsinnaasoq, angulli aatsaat akuersiseqqaarlugu avinneqarsinnaalluni’. Jesusili naapertussagaanni kristumiut aaqqissuussaaneranni angummut arnamullu assigiimmik najoqqutassaqarpoq.
14. Jesusip ajoqersuutaatigut suna erserpa?
14 Jesusip ajoqersuutaani ersarilluarpoq arnanut ajunngitsussaq eqqumaffigineqarluinnartoq. Taamaattumik tupinnanngilaq arnat ilaat Jesusimut taama asannittuliortarsimatigimmata, allaat namminneq pigisaminnik taanna pisariaqartitaanik isumassortarsimallugu. (Lúkarse 8:1-3) ’Ajoqersuutiga uanga piginngilara,’ Jesus oqarsimavoq, ’aallartitsisimali pigaa.’ (Juánase 7:16) Jesusip ajoqersuinermigut Jehovap arnanik asannittumik isumassuissusia ersersittarsimavaa.
’Ataqqisigik’
15. Uiusup nuliaminik iliorfiginninnissaa pillugu apustili Peter qanoq allassimava?
15 Apustilip Peterip Jesusip arnanut iliorfiginneriaasia qanimut takusimavaa. Ukiut 30-t missaanniittut qaangiuttut Peterip nuliaasut asannittumik unnersuutereerlugit ima allappoq: ’Taamattaaq angutaasusi nuliasi silalimmik inooqatigisigik, pisattatut qajannarnerusutut [arnatut, NV] iliorlugit, ataqqisigillu saammaannermik inuunerup pianik kingornusseqataasutut itillugit, qinusarnisi akornuseqqunagit.’ (1 Pîtruse 3:7) ’Ataqqissagaat’ oqarami Peterip suna pivaa?
16. (a) Taggit griikerisooq „ataqqinninneq“-mik nutserneqartoq qanoq isumaqarpa? (b) Jesus qaqqami naalannarsisitaanerani Jehovap qanoq ataqqinartippaa, tamannalu sumik ilinniarfigaarput?
16 Qinerlerfissiaq ataaseq naapertussagaanni taggit griikerisooq ’ataqqinninneq’-mik nutserneqartoq (timēʹ) isumaqarpoq „aki, nali, ataqqinaat“. Oqaatsip griikerisuup tamatuma naggueqatai nutserneqarsimapput „tunissutit“-mik aamma „naleqangaartoq“-mik. (apustilit suliait 28:10, NV; 1 Pîtruse 2:7, NV) Allamik ataqqinninneq qanoq paasisariaqarnersoq paasinarsivoq oqaatsimik Peterip allakkami aappaanni kapitali 1-imi, versimi 17-imi, atuineratigut. Jesusip naalannarsisitaanera innersuussutigalugu tassani ima oqarpoq: ’Tassa Guutip Ataatap ataqqinartillugu naalannartimmagu, taassumunnga pimmat naalannangaartorsuarmit nipi imaattoq: „Tassa ernera asanartoq nuannarisara.“’ Jesusip naalannarsisitaanerani Jehovap ernini ataqqinartippaa taassuminnga iluarinninini ersersillugu, Guutilu taamaaliorpoq allat tusaatillugit. (Matîuse 17:1-5) Taamaattumik angutip nuliaminik ataqqinnittup nuliani nikassaavigineq ajorpaa ammullu isigissanagu. Oqaatsimigulli iliuutsimigullu — angerlarsimaffimminni avataanilu — takutittarpaa nuliani assut pingaartillugu. — Ussatit 31:28-30.
17. (a) Sooq nuliaasoq ataqqineqartussaava? (b) Sooq angut misigisussaanngila Guutip isaani arnamit naleqarnerulluni?
17 Ataqqinninneq taama ittoq Peterip oqarneratut kristumiut uiusut nuliaminnut tutsittussaavaat. Inussiarnisaarnerinnarmit pinnani nuliaasulli taamatut pineqartussaaneranik tunngaveqarluni. Sooruna nuliaasut taamatut ataqqineqartussaasut? Peterip nassuiaaneratut uiusut ’saammaannermik inuunerup pianik kingornusseqatigisussaammatigik’. Ukiuni hundredelinni siullerni angutit arnallu Peterip allaffigisai tamarmik Kristusimik kingornusseqateqarnissaminnik qaaqqusaapput. (Rûmamiut 8:16, 17; Galâsiamiut 3:28) Ilagiinni tamarmik assigiimmik akisussaaffeqanngikkaluarput, tamarmilli qilammi Kristus peqatigalugu naalakkersuilersussaallutik. (sarĸúmersitat 20:6) Ullumikkut Guutip innuttaanut ilaasut amerlanerit nunarsuarmi inuunissamik neriugisaqarmata angut kristumiu kukkulluinnassaaq isumaqaruni ilagiinni immikkut pisinnaatitaaffeqartitaanerunini pissutigalugu Guutip isaani arnamit naleqarnerulluni. (Naleqqiuguk Lúkarse 17:10.) Angutit arnallu Guutip saavani assigiimmik anersaakkut inissisimaffeqarput, Jesusimmi toqunermigut pilliutaa angutinut arnanullu assigiimmik periarfissiivoq — ajortip toqullu perloqqussutaannit aniguinissamik, naassaanngitsumik inuulernissamik neriugisaqarluni. — Rûmamiut 6:23.
18. Peterip oqaasii naapertussagaanni suna pissutigalugu uiusup nuliani pinngitsoorani ataqqisariaqarpaa?
18 Uiusup nuliaminik ataqqinninnissaanut pissutaasoq pingaartoq alla Peterip aamma taavaa: ’Qinusarnisi akornuseqqunagit.’ Oqaatsip ’akornuserpaa’-mik nutserneqartup nagguigaa oqaaseq griikerisooq (e[n]gkopʹtō), isumaqavissoq „kipivaa“. Vinep Expository Dictionary of New Testament Words-ia naapertussagaanni oqaaseq taanna atorneqartarpoq „inunnik akornusersuilluni aqqusinermik aserorterinermut, imaluunniit aqqusinermik assiaqusersueriataarnermut“. Taamaammat uiusup nuliaminik ataqqinninngitsup immaqa paasilissavaa qinnutimi Guutillu akornanni assiaqutaqartorlusooq. Immaqa angut misigilersinnaavoq Guutimut palligunnissaminut qinngaqqunnarluni, imaluunniit Jehova tusaajumanngissinnaavoq. Erseqqeqaaq angutit arnanut iliorfiginneriaasiat Jehovap eqqumaffigisorujussuugaa. — Naleqqiuguk Upputit 3:44.
19. Qanoq ilillutik angutit arnallu ilagiinni kiffartoqatigiillutillu ataqqeqatigiissinnaappat?
19 Ataqqinninnermik ersersitsinissaq uiusut kisimik pisussaaffiginngilaat. Soorlu uiusoq nuliaminik asannittumik pingaartitsisumillu iliorfiginninnermigut taassuminnga ataqqinnittussaasoq, taamatut nuliaasoq uiminik ataqqinnittuusariaqarpoq taassumunnga naalatsigitinnermigut pingaartitsilluinnarnermigullu. (1 Pîtruse 3:1-6) Aammalu apustilip Paulusip kristumiut oqaappai ’ataqqeqatigiinnissaannik’. (Rûmamiut 12:10) Tamanna angutinut arnanullu assigiimmik oqaassutaavoq, ilagiinni ataqqeqatigiilluni kiffartoqatigiinnissamik. Taamaappat arnat kristumiut siuttuusut oqartussaassusiannut ataqqinninngitsumik oqqarissaarniartarnavianngillat. Akerlianilli utoqqaanertanik tapersuiumassapput suleqateqatiginnillutillu. (1 Korintumiut 14:34, 35; Eprîarit 13:17) Kristumiut nakkutilliisut ’arnat utoqqaat anaanatut pissavaat, arnat inuusuttut qatanngutitut tamatigut minguillutik’. (1 Timûtiuse 5:1, 2) Utoqqaanertat silatusaassapput kristumiutut qatanngutimik arnat oqaasissaannut tusaaniartassagunik. Qatanngut arnaq teokratiimik siulersorneqarnermik eqqumaffiginnippat ataqqinnittumillu apeqquteqarpat, imaluunniit malugineqartariaqartumik tikkuagaqarpat, utoqqaanertat nuannaarlutik suliassaq imaluunniit ajornartorsiut suliariumassavaat.
20. Biibilimi allassimasut naapertorlugit arnat qanoq pineqartussaappat?
20 Ajortip Edenimi atuutilerneraniilli arnat kulturit ilarpassuini nikanartumik inissisimaffeqartinneqartarsimapput. Tamannali Jehovap aallaqqaammulli arnanut taakkununnga siunertarinngilaa. Arnanut isiginninneq sumilluunniit tunualiaqutaraluarpat, Allakkani Hebriiarisuuni aamma Allakkani Griikerisuuni takutinneqarpoq arnat ataqqinnittumik pineqartussaasut. Tamanna Guutimit pisinnaatitaaffigaat. (wE 15/7 95)
[Quppernerup ataani ilanngussat]
a The International Standard Bible Encyclopedia ima nassuiaateqarpoq: „Arnat qaaqqusanik angutinik nereqateqarneq ajorsimapput, angutillu arnanik oqaloqateqarnissaat iluarineqartarsimanngilaq. . . . Ingammik kikkut tamarmik takkuanni arnamik oqaloqateqarneq assuarnarluinnartutut isigineqartarsimavoq.“ Juutit Misjna-anni, oqaaseqaatinik juutit ajoqersuisuisa ajoqersuutaannik tunngaveqartunik imalimmi, ima siunnersuuteqarpoq: „Arnanik oqaloqateqarpallaartarniaqinak. . . . Angut arnamik oqaloqateqarpallaartartoq imminut ajunaarutissarsiortarpoq Inatsisinillu atuarnissani sumiginnartarpaa naggataatigullu anniarfimmut pisussaalluni. — Aboth 1:5.
b Atuakkami Palestine in the Time of Christ-imi ima allassimasoqarpoq: „Arnaq ilaatigut inussiamut naligitinneqapajaartarsimavoq. Uimi toquneranut uppernarsaasuusinnaatitaanermi saniatigut eqqartuussinermi ilisimannittutut nalunaajaasinnaatitaasimanngilaq.“ Mosesimik allakkat pingajui 5:1 innersuussutigalugu Misjna-mi ima nassuiaateqarpoq: „’Ilisimannittutut uppernarsaaneq’ [pillugu inatsik] angutinut atuuppoq arnanut pinnani.“ — Shebuoth 4:I.
c Ukiuni hundredelinni siullerni oqaluttuarisaanermik allattartoq juutiusoq Josefus allassimavoq kunngip Herodesip qatanngutaata Salomep uini allagartamik avissutissamik nassissimagaa, tamannalugooq juutit inatsisaannut naapertuutinngilaq. Angummi (kisimi) juutini taamaaliorsinnaatitaavoq. — Jewish Antiquities, XV, 259 [vii, 10].
Qanoq akissavit?
□ Suut takutippaat Jesusip arnat ataqqinnittumik pisarsimagai?
□ Arnat naleqassusiat Jesusip qanoq ililluni ataqqivaa?
□ Sooq uiusup nuliani ataqqisariaqarpaa?
□ Kristumiut tamarmik allanik ataqqinninnissaminnut sumik pisussaaffeqarpat?
[Qupp. 18-mi assiliartaq]
Arnat Guutimik mianerinnittut nuannaarutigisaminnik siullersaallutik Jesus makissimasoq takusimavaat, taakkulu Jesusip qatanngutiminut angutinut qanoq pisoqarsimaneranik oqaluttuartippai