Sinnganeq pillugu ilisimasariaqakkat
SINNGANEQ sunaava? Tassaavoq misigissuseq sakkortooq inummik ernumalersitsillunilu, nikallortitsillunilu kamalersitsisartoq. Suliffitsinni uagutsinnit iluatsitsinerusoqaraangat sinnganeq misigisinnaasarparput. Imaluunniit ikinnguterput nersualaarneqarnerugaangat immaqa sinngasarpugut. Sinnganerli tamatigut ajortuua?
Inuit sinngasut unammillerneqartut pasinneqqajaasarput. Itsaq Israelimi kunngi Saul tamatumunnga assersuutissaavoq. Sakkuminik tigumiussisini, David, aallaqqaammut asagaluarpaa, allaat qaffatsillugu sakkutuunut naalaganngortillugu. (1 Samuel 16:21; 18:5) Ullulli ilaanni kunngip Saulip tusaalerpai arnat Davidimik unnersiutiginnittut ima erinarsorlutik: „Saulip 1000-it ajugaaffigai, Daavilli 10.000-it ajugaaffigai.“ (1 Samuel 18:7) Tamanna Davidimut attaveqarluarnerminut Saulip sunniuteqartittariaqanngikkaluarpaa. Ajuallaatigaali. „Ulloq taanna aallarnerfigalugu Saulip Daavi sinngagilerpaa.“ — 1 Samuel 18:9.
Inuup usoruttup inunnik allanik ajoqusiinissani immaqa kissaatiginngikkaluarpaa, ikinngutimili iluatsitsinera kamaatigisarlugu taassumatullu piginnaaneqarusukkaluarluni imaluunniit atugaqarusukkaluarluni. Sinnganerli tassaavoq misigissuseq sakkortunerujussuaq. Inuup sinngasup sinngagisani ajunngitsumik isertuuttarpaa imaluunniit ajortumit eqqugaanissaa kissaatigisarlugu. Sinngasup ilaannikkut misigissutsini toqqorsimasinnaaneq ajorpai. Isertornani allanik ajoqusiiniarsinnaavoq, soorlu kunngip Saulip David toqunniaraluarsimagaa. Allaat ilaanni ’David iikkamut paagunniarlugu’ naakkiaraluarsimavaa. — 1 Samuel 18:11; 19:10.
’Uangali sinngatuujunngilanga,’ immaqa oqarumassaatit. Soorunami sinnganerup inuunerit aquttussaanngilaa. Tamattali annerusumik minnerusumilluunniit sinnganermit nalaanneqartarpugut — nammineq sinnganitsinnit allanilluunniit sinngagineqarnermit. Naak allat sinnganerat malugipallattaraluarlugu nammineq sinnganerput miserratigisinnaasarparput.
Sinngatussuseq
Inuup ajortillip pissusiisa Guutip oqaasiani, Biibilimi, oqaluttuarineqarneranni sinnganeq pissutigalugu ajortuliat erseqqissarneqarajuttarput. Kainimik Abelimillu oqaluttuaq eqqaamaviuk? Adamip Evallu erneri marluk taakkua Guutimut pilliuteqarput. Abel taamaaliorpoq inuugami uppertoq. (Eprîarit 11:4) Guutip nunarsuaq eqqarsaatigalugu siunertaminik angingaartunik naammassinnissinnaassusia upperaa. (1 Moses 1:28; 3:15; Eprîarit 11:1) Abelip aamma upperaa Guutip inuit uppertut nunarsuassami paratiisiusumi inuunermik akilerumaarai. (Eprîarit 11:6) Taamaattumik Abelip pilliutaanik iluarinninnini Guutip ersersippaa. Kainip qatanngunni ilumut asasimagaluaruniuk Guutimit pilluaqqusaanera nuannaarutigissagaluarpaa. Kainili „ajuallappoq kiinarlerlunilu“. — 1 Moses 4:5.
Guutip Kain ajunngitsuliornissaanik kajumissaarpaa aamma taanna pilluaqqusaasinnaaniassammat. Taava ima mianersoqquaa: „Imaannginnerpa ajunngitsulioraangavit nakimanak niaqqut makitissimasarit, ajunngitsuliunngikkaangavilli ajorti matup killingani qamasartoq? Ajortip naalagaaffigiumagaluarpaatit, illilli taassumunnga naalagaassaatit.“ (1 Moses 4:7) Ajoraluartumilli Kainip sinngalluni kamannini ’naalagaaffiginngilaa’. Tamatumannga killinneqarluni qatanngutini naapertuilluartumik inuusoq toquppaa. (1 Juánase 3:12) Taamanimiilli akersuunnerit sorsuunnerillu inuit millionilikkuutaat inuunerannik akeqarsimapput. „Sorsunnernut pissutaanerpaanut ilaasut tassaannguatsiarput annertunerusumik nunaqalerusunneq, pisuujunerulerusunneq, pissaaneqarnerulerusunneq imaluunniit toqqissisimanerulerusunneq“, The World Book Encyclopedia-mi taama allassimasoqarpoq.
Kristumiut ilumoortut silarsuarmi maani sorsunnernut peqataaneq ajorput. (Juánase 17:16) Ajoraluartumilli kristumiut ataasiakkaat ilaannikkut oqaatsikkut akersuutilersoorsinnaasarput. Ilagiinniittut allat akerleriittunik illersuippata tamanna oqaatsikkut akersuunnersuanngorsinnaavoq ajoqutaasoq. ’Sorsunnerit akerariinnerillu ilissinni suminguku pisut?’ Biibilimik allaqataasut ilaat, Jakob, uppeqatiminut taama aperisimavoq. (Jâko 4:1) Apeqqutini tamanna nammineq akivaa pigisaleritussusiat eqqaajutigalugu oqarluni pilerigisaqartuaannartut, imaluunniit sinngajuaannartut. (Jâko 4:2) Aap, pigisaleritussuseq pilerigisaqartuaannarnermik pitsaanerusunillu atugaqartunik sinngaginninnermik kinguneqarsinnaavoq. Tamanna pissutigalugu inuup „sinngariartarnera“ Jakobip mianersoqqussutigaa. — Jâko 4:5, NV.
Sinnganeq eqqartussallugu sumut iluaqutaagami? Unneqqarinnissatsinnut allanullu pitsaanerusumik attaveqalernissatsinnut iluaqutigisinnaavarput. Aamma tamanna iluaqutigalugu paasinninnerulersinnaavugut, akaarinninnerulersinnaalluta isumakkeerfiginnissinnaanerulerlutalu. Tamanilli pitsaanerpaamik, Guutip asannilluni annaassissutissiaanik inuttullu ajortulioriartarnermit aniguisitsinissaanik inuup pisariaqartitsilluinnarnera erseqqissarneqarpoq. — Rûmamiut 7:24, 25.
Silarsuaq ajortilittut sinngasoqarfiunngitsoq
Immaqa inuit isaannit isigalugu silarsuaq ajortilittut sinngasoqarfiunngitsoq piviusunngorsinnaanngilluinnartutut isikkoqarsinnaavoq. Atuakkiortoq Rom Landau ima oqarsimavoq: „Ilisimassutit ukiorpassuarni katersorneqarsimasut, filosoffit psykologillu oqaaserisimasarpassui ilanngullugit, sinnganermik naalliuutilinnut unnersuussutitaqanngillat. . . . Nakorsat ilaannik inummik sinngatuumik ajorunnaarsitsisoqarnikuunerpa?“
Guutilli oqaasiani neriorsuutigineqarpoq silarsuarmi nutaami sinnganerup guutiitsorpalaartup atuuteqqinngisaannarfigisassaani inuttut inuuneq naammalluinnartoq. Aammalu silarsuassami nutaami tamatumani eqqissineq inunnit pissutsimik ajortumik tamatuminnga ersersitsisartunit akornusersorneqarnavianngilaq. — Galâsiamiut 5:19-21; 2 Pîtruse 3:13.