’Anersaanut nikallungasunut’ tuppallersaat

ULLUMIKKUT Satanip silarsuaa ileqqussatigut ’sianigisaarussimavoq’. (Evfisumiut 4:19; 1 Juánase 5:19) Allasiorneq kanngunartuliornerlu sumi tamaani ileqquupput. Nunat ilarpassuini aappariinnerit affaat amerlanerusulluunniit avinnermik kipitinneqartarput. Anguteqammik arnaqammilluunniit atoqateqartarneq annertuumik akuerisaavoq. Kinguaassiuutitigut pinerliineq — pinngitsaaliineq — nutaarsiassanut ilaagajoqaaq. Atoqatigiinnermut tunngasut niuerniutivissuanngorsimapput, aningaasarpassuarnik iluanaarutaasarlutik. — Rûmamiut 1:26, 27.

Maajunnartuliorneq annerpaaq tassaavoq meeqqanik pisuussuteqanngitsunik kinguaassiuutitigut atornerluineq. Satanip silarsuaata ilisimassutaa assigalugu meeqqanik kinguaassiuutitigut atornerluineq tassaavoq ’tarnip pia, anersaapiluup pia’. (Jâko 3:15) Atuagassiami Time-mi allassimavoq USA-ginnarmi ’oqartussaasut ukiut tamaasa ilinniartitsisunit nakorsanillu nalunaarutisisartut 400.000-inik kinguaassiuutitigut pinerluttuliorsimanerit uppernarsarneqarsinnaasut pillugit’. Taamatut atornerlunneqarsimasut inersimasunngoraangamik suli annernaqisunik ikeqartarput, ikillu tamakku piviusuupput! Biibilimi ima allassimasoqarpoq: „Napparsimasoq anersaavata [sianissutsikkut ingerlatigisaa, misigissusii eqqarsaataalu ilorliunerusut] nikallujuitsissinnaavaa, anersaarli nikallungasoq [ajoqusigaasimasoq, nanertisimasoq] kia nammassinnaavaa?“ — Ussatit 18:14, NV.

Guutip naalagaaffia pillugu nutaarsiassaq nuannersoq inunnit qanoq ittunilluunniit ornigineqartarpoq, ilaatigut ’aserorsimasunik uummatilinnit’ aamma ’anersaanit nikallortunit’. (Isaia 61:1-4) Tupinnanngitsumik isumakkut anniaateqartorpassuit kajumissaarummik matuminnga ilassinnissimapput: ’Imerusuttoq aggerli; piumasullu tamarmik imeq inuunartoq akeqanngitsumik piliuk.’ (sarĸúmersitat 22:17) Inuit taakku ilagiinni kristumiuni tuppallersaatissarsisinnaapput. Qiimmattaatigisaqaallu paasillugu naalliuutit qanittukkut qanganngorumaartut. (Jesaja 65:17) Tamannali pitinnagu ’tuppallersarneqartariaqarput’ ikitillu ’mattuseqqasariaqarlugit’. Taamaattumik Paulusip kristumiut naleqqulluartumik oqaaqqissaarsimavai ima: ’Nikallortut tuppallersarsigik, sanngiitsut illersorsigik, tamanullu kamajuillusi.’ — 1 Tásalûníkamiut 5:14.

„Eqqaamasat naqisimasat“

Ukiuni kingulliunerusuni inuit ilaat artorsaateqartalersimapput inuit allat paasiuminaatsitaannik pissuteqartumik. Tassaapput inersimasut ’eqqaamasanik naqisimasanik’ nassuiaatissinneqartut tunngavigalugit meeraagallaramik kinguaassiuutitigut atornerlunneqarsimanerartut.a Ilaat ajortumik pineqarsimanerminnik eqqaamasaqarsimanngikkaluartut tassanngaannaq takorruuisalersimapput ’eqqaasaqalerlutik’ inersimasumik (imaluunniit inersimasunik) meeraagallaramik imminnik atornerluisimasumik. Ilagiit kristumiut iluanniittoqarpa eqqarsaatinik taama ittunik naalliuuteqartumik? Aap, nunat ilaanni kristumiut tunniulluinnarsimasut ilaat assut nanertisimanermik, kamannermik, imminut pisuutinnermik, kanngusunnermik imaluunniit kiserliornermik misigisaqarsinnaasarput. Immaqa Daviditut Guutimit avissaaqqasutut misigisinnaapput imalu nillerlutik: „Sooq taama ungasitsigaat, [Jehova]? Sooq isertorpit ulluni annikilliorfiusuni?“ — Tussiaat 10:1.

„Eqqaasamasat“ tamakku isumakkut peqqissaasunit tamakkiisumik paasineqarsimanngillat. Kristumiulli tunniulluinnarsimasut ilaasa „eqqaamasat“ taama ittut anersaakkut sanngiilliuutigilersinnaavaat. Taamaattumik tamakkua nammanniarneranni tatiginnilluta Guutip oqaasii unnersuunneqarfissarsiorfigisariaqarpavut. Tassami Biibili ’tamanik siuneqartitsisarpoq’. (2 Timûtiuse 2:7; 3:16) Aamma artorsaatillit tamaasa Jehovamut, ’Ataatamut nallittuisumut Guutimullu tamanik tuppallersaasumut’, uppernissaannik ikiortarpai. — 2 Korintumiut 1:3, 4.

Ilumut atornerluineqarsimava?

„Eqqaamasat“ tamakku suunersut qanorlu ilumoortiginersut silarsuarmi akerleriissutaasaqaaq. Jehovap nalunaajaasui ’silarsuarmut matumunnga ilaanngillat’ taamaattumillu isumaqatigiinnginnernut tamakkununnga ilaassanatik. (Juánase 17:16) Nalunaarusiat ilaat naapertussagaanni „eqqaamasat“ tamakku ilumut pisimasuiusut ilaannikkut paasinarsisarsimavoq. Assersuutigalugu, sillimmasiinermik suliaqartup Frank Fitzpatrickip eqqaalermagu palasimit aalajangersimasumit atornerlunneqarsimalluni, inuit hundredengajaat aamma nalunaarsimapput palasimit taassumannga atornerlunneqarsimallutik. Oqaatigineqarpoq palasip atornerluisarsimanini nassuerutigisimagaa.

Malugisariaqarporli amerlasuut ’eqqaamasatik’ uppernarsaatissaqartissimanngimmatigik. Immaqa ilaasa imminnik atornerluisimasoq imaluunniit sumiiffik atornerlunneqarfigisimasartik eqqaamaqqissaarsoraat. Kingusinnerusukkulli uppernarsaatit piviusut takutissimavaat „eqqaamasat“ tamakku piviusuusinnaanngitsut.

Qimaaffissaqarpoq

’Eqqaamasalli’ tamakku pissutigalugit ’anersaat nikallungasut’ qanoq ililluni tuppallersarneqarsinnaappat? Samariamiu tullerminik asannittoq pillugu Jesusip assersuusiaa eqqaamajuk. Angut piiaasunit saassunneqarsimavoq, unatarneqarluni pigisaminillu tilliffigineqarluni. Samariamiu takkukkami angut ikilerneqarsimasoq nalligisorujussuuaa. Angut ikiorniarlugu qanoq iliorpa? Ajortumik pineqarsimaneri tamaaviisa paasiniaqqissaarpai? Imaluunniit piiaasut qanoq isikkoqarnerat paasiniarpaa ingerlaannarlu ujalerlugit? Naamik. Angummi ikilerneqarsimavoq! Taamaattumik ikii mattusersoqqissaarpai asannittuliorlunilu akunnittarfimmut isumannaatsumukaappaa tassani ajorunnaarniassammat. — Lúkarse 10:30-37.

Soorunami timikkut ikit meeraanermilu kinguaassiuutitigut atornerlunneqarsimaneq pissutigalugu ’nikallungasumik anersaaqarneq’ miserratigisassaanngitsumik assigiinngitsorujussuupput. Tamarmilli annertuumik anniaataasarput. Taamaattumik Samariamiup juutimut ikilerneqarsimasumut iliuusii kristumioqatit ’nikallungasumik anersaallit’ qanoq ikiorneqarnissaannik takutitsipput. Asannittumik tuppallersaaneq pitsanngornissaanillu ikuineq sallerpaasariaqarput.

Diaavulup Job aalajaatsoq atugarliortissimavaa, qularnanngitsumik qularinagu misigissutsikkut timikkullu anniaatit assuarnaassutsiminut aserussutigiumaarai. (Job 1:11; 2:5) Taamanimiilli Satanip naalliuutit — toqqaannartumik toqqaanngitsumilluunniit piliarisani — Guutip kiffaasa uppernerannut sanngiillisitsissutigitinniartarsimavai. (Naleqqiuguk Korintumiunut agdlagkat áipait 12:7-9.) Qularutigisinnaanerparput Diaavulup meeqqanik atornerluineq inersimasorpassuillu taamatut atornerlunneqarsimasut nikallungasumik anersaaqarnerat (imaluunniit taamatut atornerlunneqarsimanerminnik ’eqqaamasaminnit’ naalliutsitaanerat) atortarai kristumiut uppernikkut sanngiillisinniarlugit? Jesusip Satanimit persarineqarnermini iliorsimaneratut kristumiu naalliuuteqartoq aalajangersimalluinnarlunili assuarnaassutsiminik attassiinnarniartoq ima oqartarpoq: ’Nigorit, Sataniaa!’ — Matîuse 4:10.

Anersaakkut nukittujuaannarit

Meeraanermi atornerlunneqarsimaneq pissutigalugu anersaakkut misigissutsikkullu ajornartorsiutit qanoq iliorluni nammanneqarnissaannik „inussiaq aalajaallunilu silatooq“ unnersuussisarpoq. (Matîuse 24:45-47) Misilittakkat takutippaat artorsaateqartoq pitsaanerpaamik ikiorneqarsinnaasartoq ’Naalakkap nakuussusia pissaaneqarnersualu’ tunaartarigaangamigit ’sakkutuussutillu tamaasa Guutip pii atisimagaangamigit’. (Evfisumiut 6:10-17) Sakkutuussutinut taakkununnga ilaavoq ’sallusuissut’ Biibilimiittoq, ersersitsisoq Satan tassaasoq akeraanerpaaq taarmillu nammineq tapersersortimilu suliffigisaminnik siaruarterisoq. (Juánase 3:19) Taava ’iluarneq saattuaasaralugu atisariaqarpoq’. Anniaateqartup najoqqutassiat naapertuilluartut maleruarniartariaqarpai. Assersuutigalugu, ilaasa imminnut ajoqusernissartik kanngunartuliornissartillu kajungereqqajaasarpaat; kajungernerilli tamakku nakkaannarfiginagit akiorniarsarigaangamikkik tamatigut ajugaasarput!

Anersaakkut sakkutuussutinut aamma ilaavoq ’iivangkiiliu eqqissinartoq’. Jehovap siunertaanik allanut oqaluussutiginninneq oqaluussisumut tusarnaartumullu nukittorsaataasarpoq. (1 Timûtiuse 4:16) ’Nikallungasumik anersaaqaruit’, tamannalu pissutigalugu nutaarsiassaq nuannersoq oqaluussissutigissallugu ajornakusoortikkukku, kristumioqatinnik peqateqarlutit suliamik pingaartumik tamatuminnga naammassinnittarsinnaavutit. Puioqinagulu ’upperneq eqqornaveeqqutigissagakku’. Jehovap ilinnik asanninnera annaasimasannillu tamanik utertitsinissaa upperiuk. Qularutiginngilluinnarsinnaavallu aamma Jesusip asagaatit, tamannami uppernarsarsimavaa illit pillutit toqunermigut. (Juánase 3:16) Satan sallulluni oqarsimavoq Jehovap kiffani soqutiginngikkai. Salluliuutaasali ajungaartut tamanna ilagiinnarpaat. — Juánase 8:44 naleqqiguk Job 4:1, 15-18; 42:10-15.

Uummatikkut aliasuuteqarnerit pissutigalugu Jehovap ilinnik soqutiginninnera upperiuminaatsikkukku allanik tamatuminnga upperinnilluinnartunik peqateqartarneq iluaqutigissavat. (Tussiaat 119:107, 111; Ussatit 18:1; Eprîarit 10:23-25) Inuunermik akissarsiassannik Satanip arsaarinissaa akuerinaveeruk. Eqqaamajuk ’annassut niaqorornaveeqqutaasoq’ sakkutuussutinut ilaammat; taamaapportaaq ’pana anersaap pia’. Biibili anersaamit illernartumit, Satanip ajugaaffigisinnaanngisaanit, isumassarsiarititaavoq. (2 Timûtiuse 3:16; Eprîarit 4:12) Biibilimi oqaatsit katsorsaataasut misigissutsikkut anniaatit ’nipaallisissinnaavai’. — Naleqqiuguk Tussiaat 107:20; Korintumiunut agdlagkat áipait 10:4, 5.

Nikallujuissinnaaqqullutit nukissannik qinujuarit. (Rûmamiut 12:12; Evfisumiut 6:18) Jesusip misigissutsikkut nanertisimarujussuarnermini uummammit pisumit qinuneq nakussatsissutigisarsimavaa, aamma illit taamaaliorneq iluaqutigisinnaavaat. (Lúkarse 22:41-43) Qinuneq ajornakusoortippiuk? Taamaappat allat qinoqatiserisakkit ilinnillu qinnusseqqusakkit. (Kulorsamiut 1:3; Jâko 5:14) Qinnutitit anersaap illernartup tapersersussavai. (Naleqqiuguk Rûmamiut 8:26, 27.) Soorlu timikkut nappaatit ilaat taamaattut misigissutsikkut ikit itisuut aaqqissuussaanermi matumani katsorsarneqarluinnarsinnaanngillat. Kisianni soorlu Jesusimik pisimasukkut takugipput Jehovap ikiuineratigut nikallujuissinnaavugut taamaalillutalu ajugaalluta. (Juánase 16:33) „Tamatigut tunaarisiuk [Jehova], inuiaqatikka, uummammiugisasi tamaasa taassumunnga saqqummiussigit.“ — Tussiaat 62:9.

Atornerluisimasutut unnerluutigisaasoqaraangat

Inuk meeqqamik kinguaassiuutitigut atornerluisoq pinngitsaaliilluni pinerluttuliortuuvoq taamatullu isigineqartariaqarluni. Meeraanermini atornerlunneqarsimasoq kinaluunniit atornerluisimasumik unnerluussinissamut pisinnaatitaaffeqarpoq. Unnerluussinissarli tuaviupiluutigisariaqanngilaq, ingammik atornerlunneqarsimanermik „eqqaamasat naqisimasat“ kisimik tunngavissarineqarpata. Taamaattoqarnerani pingaarnerpaaq tassa misigissutsikkut pitsanngorsaqqaarnissaq. Pitsannguumineruguni immaqa ’eqqaamasani’ nalilerniarluarsinnaanerulissavai aalajangersinnaalerlunilu iliuuseqarfigissanerlugit imaluunniit naamik.

Assersuutigalugu Donnamik atilik nerisarnermigut ajornartorsiuteqalerami tarnip nakorsaanut — qularnanngitsumik pikkorippallaanngitsumut — ornigussimavoq. Sivitsunngitsoq ataatani imminik atornerluisimasutut unnerluutigaa, taannalu eqqartuussisunut sassartinneqarpoq. Eqqartuussisussanngortitat isumaqatigiissuteqarneq ajulerput, taamaattumik ataataa parnaarussaanngilaq, eqqartuussinerli 600.000 koruuninik aningaasartuuteqarfigaa. Taava tamakkorpassuit pereermata Donnap angajoqqaani oqarfigai isumaqarunnaarluni atornerlunneqarsimalluni!

Silatuumik Solomon ima oqarsimavoq: „Eqqartuussisunut suliassissutiginiarnissaanut nukingerpallaarniaqinak.“ (Ussatit 25:8) Unnerluutigisat suli meeqqanik atornerluisarneranik pasinartoqarpat immaqa mianersoqqusinnaavat. Taamatut pisoqatillugu ilagiinni utoqqaanertat ikiuussinnaapput. Tuaviupiluttumilli aalajangiisoqartariaqanngilaq. Immaqa piffissap ingerlanerani tamatuma puiorneqarnera naammagiinnaleriartussavat. Kissaatigigukkuli unnerluutigisannik ’iveqateqarnissat’ (qisuariarnissaanut qanoq qisuariarnissat piareersimaffigereerlugu), taava tamatumunnga pisinnaatitaaffeqarputit.

Eqqaamasuusisarnerit qaangiukkiartorneranni pissutsinik ajornakusoortunik takkuttoqartarsinnaavoq. Assersuutigalugu, ullut tamaasa takusartakkamit innarlerneqarsimanermik piviusorpaloqisumik eqqaamasuusisoqarsinnaavoq. Tamatuma iliuuseqarfiginissaanut maleruagassaliortoqarsinnaanngilaq. ’Kialuunniit nammagassi nammassavaa.’ (Galâsiamiut 6:5) Ilaannikkut isumaqartoqarsinnaasarpoq qanigisaq imaluunniit ilaqutaq qaninnerpaasaq taamaaliorsimasoq. Eqqaamasariaqarpoq pinerliisimasutut pasisamik kinaassusersiiniarneq eqqarsaatigalugu „eqqaamasat naqisimasat“ ilaat nalorninartoqarsinnaasarmata. Taamaattoqarnerani, atornerluisimaneraanerullu suli uppernarsineqannginnerani, ilaquttanik attaveqarfiginnittuaannarnikkut — akuttunngitsumik pulaartarlugit, allaffigisarlugit imaluunniit sianerfigisarlugit — Biibilip unnersuussutaanik maleruaaniarneq takutinneqarsinnaavoq. — Naleqqiuguk Evfisumiunut agdlagkat 6:1-3.

Utoqqaanertat qanoq iliorsinnaappat?

Utoqqaanertat ilagiinnut ilaasumit meeraanermini atornerlunneqarsimanerminik takorruugaqartartumit imaluunniit taamaaliorneqarsimanerminik eqqaamasuusisumit saaffigineqaraangata amerlanertigut utoqqaanertat marluk tamatuminnga suliaqartussanngortinneqartarput. Utoqqaanertat saaffiginnittoq siullermik inussiarnersumik kajumissaartariaqarpaat misigissutsikkut ajornartorsiutiminik ’iluarsartuussiniarnissaanik’. Meeqqamik atornerluisimasutut unnerluutigineqartut aqqi isertuulluinnarneqartariaqarput.

Utoqqaanertat pingaarnerpaamik paarsisutut sulisussaapput. (Jesaja 32:1, 2; 1 Pîtruse 5:2, 3) Ingammik ’nallittuingaarneq avaaginninnerlu nikanartinnerlu qanilaarnerlu kamajuinnerlu’ pissuseriniartariaqarpaat. (Kulorsamiut 3:12) Asannittumik tusarnaartariaqarput oqaatsillu Biibilimeersut katsorsaataasut atorlugit. (Ussatit 12:18) Utoqqaanertanut, qanoq innertik paasiniarlugu akuttunngitsumik pulaartarlutillu sianertartunut, qujamasunnertik avaanngunartunik eqqaamasuusisartut ilaasa ersersissimavaat. Piffissaq attaveqarnernut taama ittunut atorneqartartoq sivisoorsuusariaqanngilaq, taamaalillunili ersersinneqartarpoq Jehovap peqatigiissortai ataasiakkaanik tamanik isumassuisuusut. Naalliuuteqartut paasigaangamikku kristumiutut qatanngutimik ilumut asagaatik, misigissutsikkut annertungaatsiartumik katsorsarneqaatigisarpaat.

Taavami atornerlunneqarsimasoq aalajangerpat unnerluussiniarluni?b Taava utoqqaanertat marluk najoqqutassaq Matîuse 18:15-imi allassimasoq naapertorlugu unnerluussiniartoq siunnersorsinnaavaat unnerluutigisani nammineerluni saaffigisariaqaraa tamannalu pillugu oqaloqatigalugu. Unnerluutiginnittup unnerluutigisani kiinarsillugu saaffigissallugu misigissutsikkut saperuniuk sianerfigisinnaavaa imaluunniit allaffigisinnaavaa. Taamaalilluni unnerluutigineqartoq periarfissinneqassaaq unnerluutigineqarnermi Jehovamut qinunikkut saqqummiunnissaanut. Immaqa allaat taamaaliorsimannginnerminut uppernarsaatissanik saqqummiussissaaq. Immaqaluunniit nassuissaaq, immaqalu saammaateqatigiinneq anguneqarsinnaassaaq. Taama pisoqarpat pilluaqqusaaneq angingaassaaq! Nassuerpat utoqqaanertat Biibilimi najoqqutassiat naapertorlugit suliassaq iliuuseqarfigisinnaavaat.

Unnerluutiginninneq assortorneqarpat utoqqaanertat unnerluutiginnittoq nassuiaattariaqarpaat iliuuseqaqqissinnaanatik. Ilagiillu unnerluutigineqartoq pisuussuteqanngitsutut isigiuaannassavaat. Biibilimi oqaatigineqarpoq utoqqaanertat akuliussinnaassappata marlunnik pingasunilluunniit ilisimannittoqartariaqartoq. (2 Korintumiut 13:1; 1 Timûtiuse 5:19) Inummit ataatsimit atornerlunneqarsimanerminnik ’eqqaamasaqartut’ arlaliugaluarpataluunniit allanik uppernarsaatissaqanngippat utoqqaanertat tamanna tunngavigalugu aalajangiinissaminnut tunngavissakippallaarput. Taamaappalli imaanngilaq „eqqaamasat“ eqqunngitsutut (imaluunniit eqqortutut) isigineqartut. Utoqqaanertalli taamatut suliaqarnerminni Biibilimi najoqqutassiat malittariaqarpaa.

Unnerluutigineqartorli — pinngitsuuneraraluarluni — ilumut pisuuppat? Aniguilluaannaqaa? Naamerluinnaq! Pisuunera pinngitsuuneraluunniit toqqissilluta Jehovap assaanut iliinnarsinnaavarput. ’Inuit ilaasa ajortuliaat nalunaraanngillat eqqartuussivimmut siuarlutik, ilaasali malinnaasarput.’ (1 Timûtiuse 5:24; Rûmamiut 12:19; 14:12) Ussatit-ni ima allassimasoqarpoq: „Iluartut pisassaraat tipaatsunneq, iluaatsulli neriuutaarunneq.“ „Iluaatsoq toquguni neriuutaaruttussaavoq, inuk ajortoq pilluarnartumik neriuutissaqanngilaq.“ (Ussatit 10:28; 11:7) Naggataatigut Jehova Guuti Jesus Kristusilu naassaanngitsumik atuuttussamik naapertuilluartumik eqqartuussissapput. — 1 Korintumiut 4:5.

Diaavulu assortoruk

Kristumiut tunniulluinnarsimasut timikkut misigissutsikkullu annertuumik naalliuuteqaraluarlutik nikallujuittuaraangamik takutittarpaat ilukkut nakuullutik Guutimillu asannillutik — aamma Jehovap anersaavata nakuussusia ersersinneqartarpoq! — Naleqqiuguk Korintumiunut agdlagkat áipait 4:7.

Peterip oqaasii uku tamatumunnga atatillugu naleqqupput: ’[Satan] assortorsiuk uppernikkut aalajangerlusi.’ (1 Pîtruse 5:9) Tamanna oqitsuinnaanngilaq. Allaat ilaannikkut paasilertuinissaq silatusaartumillu eqqarsarnissaq ajornakusoorsinnaasarpoq. Nikalloqinalli. Ungasinngitsukkut Diaavulu taassumalu peqqusersusaarneri piujunnaassapput. Ilumut manna qilanaareqaarput: ’Qulliit tamaasa isaannit [Guutip] allarterumaarpai, toqulu peqarunaassaavoq, aliasuttoqarunnaarlunilu nilliasoqarunnaarlunilu anniartoqarunnaassavoq, siulliit peermata.’ — sarĸúmersitat 21:3, 4. (wE 1/11 95)

[Quppernerup ataani ilanngussat]