’Nakorsaaffissaq’

Ann kikkut tamarmik ajornartorsiuteqaraangamik saaffigisarpaat, siunnersuutissaqartuaannartuuvormi. Isumamigut aalajasuunngimmat isornaatsuullunilu misigissutsikkut qilerui isertukkat kimilluunniit malugineqarsinnaasimanngillat, ulloq eqqamasaasa nuanniitsut qaffakaattorsuanngornerat tikillugu. Ima oqaluttuarpoq: „Suliffinniillunga tassanngaannaq anniartorujussuanngorlungalu imminut pisuutittorujussuanngorpunga. Imminulluunniit makitatissinnaajunnaangajakkaluarpunga. Ullut arlallit anniarpunga, tassanngaannarlu eqqaamasanni assiliarlusooq takkuppoq — ataatassara uannik ajortuliorfiginnittoq. Uannik pinngitsaaliiffiginnittoq! Ataasiaannaranilu taamaaliorfigisarsimavaanga.“

„NAKORSAAFFISSAQARPOQ.“ (Nalunaajaasup oqaasii 3:3) Annitut meeraanerminni atornerlunneqarsimasut eqqaamasatik ilorliunerusut tamaasa aniatikkaangamikkik ilorraallannerujaartarput.

Qanorli ililluni pinngitsaalisaalluni kanngunartuliorfigitissimaneq taama amiilaarnartigisoq puiorneqarsinnaava? Eqqarsaatigiuk niviarsiaraq ataatami inersimasulluunniit allap nukittuup arneriniarfigippani qanoq ikiortissaqanngitsigisoq. Qimaasinnaanngilaq. Nillianissaminut qunuvoq. Allanullu oqaluttuarissallugu siooragaa. Immaqalu tamanna ilutigalugu atornerluisoq ullut tamaasa qanimut naapittariaqartarpaa, pinngitsuusaartariaqartarlunilu. Tamanna inersimasumut artornassaqaaq, sulili meeqqamut artornarnerussaaq. Taamaattumik isumakkut qimaasariaqarpoq meeqqat eqqarsaataannakkut takorluuisinnaassusiat kimittooq ikiortigalugu. Ajortuliorfigineqarsimanini pisimanngitsuusaartittarpaa, eqqaamasani matoorniartarlugit imaluunniit soqutiginngitsuusaarniartarlugit.

Ilumoorpoq tamatta ilaannikkooriarluta takorusunngisavut imaluunniit tusarusunngisavut matoorniartaratsigik. (Naleqqiuguk Jeremia 5:21.) Piginnaaneq tamanna atornerlunneqartut illersuutitut atortarpaat. Atornerlunneqarnerminni qanoq eqqarsartarlutik ilaasa ima oqaluttuaraat: „Eqqarsaannartarpunga tassamigooq alla taamaaliorfigineqartoq, uanga isiginnaartuuginnartunga.“ „Sinittuusaaginnartarpunga.“ „Niaqorsorlunga kisitsiinnartarpunga.“ — Strong at the Broken Places Linda T. Sanfordimit.

Taamaattumik tupaallannanngilaq atuakkami Surviving Child Sexual Abuse-mi ima oqaatigineqarmat: „Missiliuunneqarpoq atornerlunneqarsimasut 50 procentiisa atornerlunneqarsimanertik nalugaat.“ Ilaasa angutaaserfigineqarnertik eqqaamavaat, kisianni misigissutsit tamatumunnga atatitatik — anniarneq, kamanneq kanngusunnerlu — matoortarlugit.

Matooriniarneq — isumakkut akiuunneq

Pitsaanerunngila atornerlunneqarsimasut eqqaamasatik puiorniaannarpatigik? Qularnanngitsumik ilaat taamaaliortarput; ilaasali eqqaamasatik puiorsinnaanngivittarpaat. Soorlu Job 9:27, 28-mi allassimasoq: „Qungujullunga anniaatiga puiorniarsarigaluarukku naalliuutima tamarmik uterfigiinnassavaanga.“ (Today’s English Version) Eqqaamasanik annilaarnartunik matooriniarneq isumakkut qasunartorujussuuvoq, akiuunneruvoq nungullarnartoq allaat napparsimalissutigineqarsinnaasoq.

Niviarsiaraq inersimasunngoriartortillugu inuunermi tatineqarnerata siornagut pisimasunik matoorisinnaassusia amerlasuutigut sanngiillisikkiartuaartarpaa. Sumininnguit soorlu tipigissaatip tikka kimikitsoq, kiinaq eqqaanartitaq, nipi tupannartoq imaluunniit nakorsamiinneq imaluunniit kigutit nakorsaanniinneq eqqaamasanik annilaarnartunik misigissutsinillu qaffattoortitsissutaasinnaapput.a Taava puiorniarlugit suli ilungersornerulertariaqarpa? Naamik, tamatumuunakkut atornerlunneqarsimanermik kingumut qiviaanissaq iluaallaataasinnaavoq! Arnaq Jillimik atilik ima oqaluttuarpoq: ’Eqqaamasat qaffakaatinneqareeraangamik kimittussusertik katattarpaat. Matoorniarnissaat qaffakaatinneraninngarnit annernarnerujussuuvoq ulorianarneroqalunilu.’

Atornerlunneqarsimanermik imminut miserratiginnikkunnaarnissap naleqassusia

Sooq taamaappa? Ilaatigut pereersimasunik eqqaamanninneq aliasunnermik qaffatsitsisarmat. Aliasunneq tassaagajuppoq timikkut isumakkulluunniit ajoqusigaanermut qisuariarneq; pisut nuanniitsut qaangeriartuaarnissaannut iluaqutigisarparput. (Nalunaajaasup oqaasii 3:4; 7:1-3) Arnaq atornerlunneqarsimasoq aliasussinnaajunnaarsimagaluarpoq; misigisami annilaarnartup imminut miserratiginissaanut aliasunnermilu nununissaanut pinngitsaalineqarsimalluni. Eqqaamasanik matooriniarneq isumakkut anniaateqarneq pissutigalugu timikkut anniaateqarnerup kingorna paatsiveerusimaarujussuarnermik kinguneqarsinnaavoq — misigissuseqanngilluinnarfiusoq. — Naleqqiugk Tussiaat 143:3, 4.

Eqqaamasat qaffakaakkaangata atornerlunneqarsimasut atornerlunneqarsimanertik misigeqqittarpaallusooq. Ilaat allaat meeraanerminnut utersaartutut ittarput. Jillip ima eqqaamavaa: „Qamuuna takorlooraangakku timikkut malunniutai amerlasuutigut malugisarpakka. Eqqaamasakka ilaannikkut ima artornartigisarput niaqulaalersutut misigisarlunga.“ Taava kamanneq meeraanermit nunusimasaq immaqa qaffattarpoq. „Eqqaamasat nikallorujussuartittarpaannga kamatsilertarlungalu,“ Sheila oqaluttuarpoq. Taamatulli pisoqarnerani kamanneq pissusissamisoorluinnarpoq. Aliasunneq aniffissaqalersarpoq, kamannerlu naapertuilluartoq nunusimasaraluaq ersersinneqartarluni! Ajortuliorfigitissimanerit uumissornissaannut pisinnaatitaaffeqarpugut. — Rûmamiut 12:9.

Atornerlunneqarsimasoq oqaluttuarpoq: „Tamaasa eqqaamaqqissaalerakkit assorsuaq iloraallattutut misigaanga. . . . Minnerpaamimmi paasilerpara suna ajornartorsiutigalugu. Eqqarsaatiginissaa artornaraluaqisoq inuunerma ilaa, ilisimanngippallaarakku paasisinnaannginnakkulu, annilaarnarilersimasara eqqaamanninniarnikkut utertinneqartarpoq.“ — The Right to Innocence.

Arnap atornerlunneqarsimanerminik kingumut qiviaaqqinnermiguttaaq ajornartorsiutimi ilaasa aallaavii paasisinnaasarpai. „Ilisimajuaannarsimavara imminut uumissorlungalu kamaallunga, nalulluguli sooq,“ atornerlunneqarsimasoq nassuiaavoq. Pisimasunik kingumut qiviaaqqinnertik ikiortigalugu amerlasuut paasilersimavaat pisuunatik, atornerlunneqarsimallutilli.

Atornerlunneqarsimasut pisimasunik qanoq eqqaamannilluartigineri eqqaamasaasalu qanoq ilungersornartigineri soorunami assigiinngiiaarput. Siunnersuisartorpassuillu isumaqatigiissutigaat pisariaqanngitsoq pisimasut kinguneri aaqqinniarlugit annikitsualuttaat tamaasa ilanngullugit eqqaaniarsarinissaat. Pisimasunik miserratiginiarnagu akuerinninnerinnarluunniit kingunerinik qaangiiniarnermut alloriarnerusinnaavoq annertooq. — Ungaluligaq qupp. 9-miittoq takuuk.

Allanit annertoqqusigaaneq

Meeraaninni atornerlunneqarsimaguit eqqaamasatit avaanngunartut kisimiillutit nammanniarsareqinagit. Misigissutsinik oqaloqatiginnissutiginninneq iluaqutaasarpoq. (Naleqqiuguk Job 10:1; 32:20.) Isumakkut artorsaateqarneq timikkut annertuumik ajoqutigigaanni nakorsamik, siunnersuisartumik imaluunniit isumakkut peqqinnissamut tunngasunik paasisimasaqarluartumik ikiortissarsiortoqarsinnaavoq. Aammalu ikinngutinit qaninnerusanit, aapparisamit, ilaquttanit imaluunniit kristumiunit nakkutilliisunit, misiginneqataallutik ataqqinnillutillu tusarnaarusuttunit, tapersersorneqarneq iluaqutaasaqaaq. „Ikinngutigilluakkama, Juliep, ikiornerpaasimavaanga,“ Janet oqarpoq. „Taassuma pisimasunik oqaluttuarteqattaartuartarpaanga. Misigissutsit pisimasup qaffatsitai taassumunnga aniatissinnaasarpakka. Tusarnaartarpaanga paasinnittumillu qisuariartarluni.“

Allanik tatiginninnermik ersersitsineq ilaatigooriarluni navianaateqarsinnaasarpoq, aammalu misiginarsinnaasarpoq ikiorneqarnissamut qinngaqqunnarluni imaluunniit atornerlunneqarsimanerup oqaluttuarinissaa kanngusuutigisinnaallugu. Ikinngulli ilumoortoq „erniusimavoq annikilliornermi ikiortissaalluni“ periarfissinneqarunilu qularnanngivissumik inersimarpaluttumik qisuariassaaq. (Ussatit 17:17) Oqaluttuarfissannilli peqqissaartumik qinersigit. Isumakuluutitit ataatsikkorsuaq anninnagit annikitsumilli aallartigit. Paasereerukkulu ikinngut misiginneqataasuullunilu oqaatsimigut mianersortuusoq taava oqaluttuunnerusinnaassavat.

Aammattaaq peqqissusermik pingaartitsineq iluaqutaasarpoq. Naammattumik qasuersaartarnissat timivillu aalatinnissaa isumagisaruk. Peqqinnartunik nerisaqartarit. Sapinngisamik pilimanngitsumik inooriaaseqarit. Qiassaqaraangavit nununagu qiasarit. Anniaat qaangerneqarsinnaanngitsutut misiginarsinnaasarpoq, piffissalli ingerlanerani milliartussaaq. Eqqaamajuk atornerlunneqarnerit meeraagallaravit akiuussinnaassuseqanngikkallaravit anigorsimagakku, massakkullu inersimasunngoreerlutit taamani pigisimanngisatit, isumalluutissat nukissallu, pigigakkit. (Naleqqiuguk Korintumiunut agdlagkat sujugdlît 13:11.) Taamaattumik eqqaamasatit annernartut akueriniakkit piunngitsunillu eqqarsaateqarnaveersaartarit. Guutip ilinnik nakussatsitsisinnaanera tatigiuk. Soorlu tussiaasiortoq oqarsimasoq: „Eqqarsaatima eqqissiviilliortileraangannga tuppallersaanerpit nuannaalersittarpaanga.“ — Tussiaat 94:19.

Imminut pisuutinneq kanngusunnerlu qaangerniakkit

Atornerlunneqarsimaneq qaangerniassagaanni pingaaruteqartorujussuuvortaaq imminut avoqqaariunnaarniarnissaq. „Pisuunnginnera allaat maannamut upperiuminaatsittarpara,“ arnaq Rebamik atilik oqarpoq. „Sooq [atornerluisoq] unitsissimannginnerlugu eqqarsaatigisarpara.“

Eqqaamajuk atornerluisut pinngitsaaliissutit ajornerpaat atortarmatigik: oqartussaaneq (’Ataatagaarma!’), sioorasaarineq (’Allanut oqaruit toqussavakkit!’), peqqarniitsumik nakuuserneq allaallu pisuusutut misigititsiniaaneq (’Oqaruit ataata parnaarussaassaaq.’). Ilaalli akerlerluinnaanik iliuuseqartarput kajumissarillaqqissusertik atornerluttarlugu imaluunniit assigiinngitsutigut tukkortarlutik. Ilaasa qaninniarnertik pinnguarnertut ataatatulluunniit nuannarinninnertut isikkoqalersinniartarpaat. „Oqarfigaanga asaqatigiittut taamaaliortartut,“ atornerlunneqarsimasup eqqaamavaa. Taamatut misigissutsikkut pinngitsaaliineq meeraaqqap qanoq ililluni akiorsinnaavaa? (Naleqqiuguk Evfisumiut agdlagkat 4:14.) Aap, meeqqat akiuussinnaassuseqannginnerat kiminneqajanerallu, ’ajussutsikkut merlertuunerat’, atornerlusuisut kannguttaatsumik iluaqutiginiapiluttarpaat. — 1 Korintumiut 14:20.

Taavalu aamma immaqa atorfissaqartissavat imminut eqqaasittassallutit taamanikkut kiminneqajasuullutillu akiuussinnaassuseqarsimanak. Assersuutigalugu, meeraaqqanik ilaqartarit, imaluunniit meeraagallaravit assitit isiginnaartakkit. Aammattaaq ikinngutigilluakkavit qiimmassartarsinnaavaatsit eqqaasittuartarlutit atornerlunneqarsimanerit illit pisuussutiginngikkit.

Taamaakkaluartorli immaqa ilaat arnatut ima oqartutut misigisarput: „Misigissutsit ataatama uanni pilersitai eqqaagaangakkit merianngulertarpunga.“ Ilaasa (misissuinermi ataatsimi 58 procentit) atornerlunneqarnerminni kinguaassiuutitigut perusussuseqalersitaanertik eqqaamasarpaat, tupinnanngitsumillu kanngusuutigisaqalugu. Atuakkamili Surviving Child Sexual Abuse-mi eqqaasitsissutigineqarpoq ’timikkut perusussuseqalerneq attualaarneqarnermut tissassaarneqarnermulluunniit timip qisuariarnerigaa pissusissamisoorluinnartoq’ aammalu meeraq ’tissassaarneqarnerminut tamatumunnga akiuussinnaanngitsoq’. Atornerluisoq pisimasumut akisussaalluinnarpoq. ILLIT PISUUNNGILATIT!

Aammattaaq tuppallersaatigisaruk nalunnginnakku tamatumani Guutip ’assuarnaatsutut peqqusersuitsutullu’ isigigaatit. (Filípimiut 2:15) Qularnanngitsumik piffissap ingerlanerani imminut aserorsartarnerit milliartussaaq, timinnullu nuannarinninnissaq ilikkariartussavat. — Naleqqiuguk Evfisumiunut agdlagkat 5:29.

Angajoqqaannik saammaassinissat

Tamanna ajorunnaariartornermi sapernarnerpaanut ilaasinnaavoq. Ilaat uumisuttorujussuusarput, ilaat akiniaanissamik eqqarsaatersortarput — imaluunniit imminut pisuutittarlutik. Ataaseq ima oqarpoq: „Paatsiveerusimaarlunga nikallortaqaanga uannik ajortuliorfiginnittoq isumakkeerfigisinnaannginnakku, naak isumaqaraluarlunga taamaaliornissara Jehovap naatsorsuutigigaa.“ Ilaasa immaqa imminnik atornerluisimasoq qunugisorujussuanngortarpaat. Allallu anaanartik atornerluinermik isiginninngitsuusaarpat, upperinnikkumanngippat imaluunniit kamalerpat uumissulertarpaat. „Anaanama oqarfigaanga [ataataga] kamagittarfigiinnaqqullugu,“ arnaq narrutsassimaqaluni oqaluttuarpoq.

Kinguaassiuutitigut atornerlunneqarnermut kamaatiginninneq pissusissamisoorluinnarpoq. Ilaqutariiussuserli sakkortoorujussuusinnaavoq, immaqalu angajoqqaannut attaveerulluinnarnissat kissaatiginngilat. Immaqalu allaat saammaassinissat eqqarsaatigaat. Pissutsilli atukkat aalajangiisuusorujussuupput. Atornerlunneqarsimasut ilaatigut atornerlunneqarsimanertik isumakkiiginnarniartarpaat. Atornerluisoq pinngitsuusutut isiginngitsoorumanngikkaluarlugu kamaattuaannarnissaa qunugiuaannarnissaalu kissaatigineq ajorpaat. Ilaasa misigissutsikkut ajukujunnissartik pinngitsoorumanerusarpaat taamaattumillu ’nipangersimaannarnissartik’ naammagiinnarlugu ilaginnaannartarlugu. — Tussiaat 4:5.

Immaqa isummerputit toqqaannartumik, allakkatigut oqarasuaatikkulluunniit taamanikkut pisimasoq angajoqqaannut qulaarukku aatsaat suliassaq isumannaassasoq. (Naleqqiuguk Matîuse 18:15.) Taamaaliussaguilli pisimasup misigissutsikkut qaangingaatsiareersimanissaa imaluunniit taamaaliornikkut puffaleriataarsinnaanerpit akiornissaanut annertoqqutissaqarluarnissat pisariaqarput. Oqalorujunneq iluaqutaanngilaq; taamaattumik aalajangersimanissat, aammali eqqissisimanissat, ilungersuutigiuk. (Ussatit 19:11) Assersuutigalugu, eqqartorsinnaavatit (1) susoqarsimasoq, (2) qanoq ilinnut sunniuteqarsimasoq, aammalu (3) taakkua massakkut qanoq iliornissaat naatsorsuutigigit (assersuutigalugu utoqqatsernissaat, nakorsartinninnut aningaasartuutinnik matusinissaat, imaluunniit ileqqumikkut allanngornissaat). Pisimasup ammasumik saqqumiunneratigut qularnanngitsumik sapilersutut misiginerpit sinnera peersinnaassavat. Immaqalu angajoqqaannut nutaamik attaveqalernermut aqqutissiuisinnaassaaq.

Assersuutigalugu, immaqa ataatavit ilinnik kanngunartuliorfiginnissimanini nassuerutigissavaa pinngitsaalisimanerillu ilumoorluni peqqissimissutigalugu. Immaqalu ileqquni allanngortinniarlugit ilungersuuteqarsimavoq (imerajuttuunerminik katsorsartissimalluni, Bibeli atuaqqissaalersimallugu, allatulluunniit). Immaqalu anaanat isumakkeerfigeqqussaaq ilinnik sernissuisimannginnini pillugu. Ilaannikkut saammaateqatigiilluinnarnermik kinguneqarsinnaasarpoq; tupaallassanngilatilli tamatuma kingorna suli angajoqqaannut akaarinnippallaanngikkaluaruit ingerlaannarlu qanimut attaveqarfigeqqilernissaat orniginngikkaluarukku. Taamaakkaluartorli immaqa arriitsumik ilaqutariittut pissusissamisoortumik attaveqaleqqikkiartorsinnaassaasi.

Aammattaaq pisimasoq atornerluisup ilaquttallu allat nassuerutigiumanngivissinnaavaat. Immaqa appisaluussuataassavaatsit. Imaluunniit suli ajornerusoq: Immaqa paasilissavat ilinnik atornerluisimasoq suli ilinnut uloriartorsiortitsisuusoq. Taamaappallu isumakkeerfiginninnissaq iluaqutaassagunanngilaq, tatigeqatigiiffiusumillu attaveqatigiileqqinnissaq anguneqarsinnaanngivissagunarluni. — Naleqqiuguk Tussiaat 139:21.

Qanorluunniilli pisoqassagaluarpat uumitsassimanerpit qaangiunniarnera piffissami annertuumi ingerlasinnaavoq. Immaqa imminut eqqaasittuartariaqartassaatit naapertuilluassutsip naammassineqavinnissaa Guutip suliassarigaa. (Rûmamiut 12:19) Aammattaaq ikinngutinnut paasinnittumut pisimasup oqaloqatigiissutigineratigut imaluunniit eqqarsaativit allattornerisigut kamannerit annissinnaavat. Guutip ikiuineratigut kamannerit qaangersinnaavat. Piffissap ingerlanerani misigissutsit ajoqutaasut artorsaatigiunnaassaavatit. — Naleqqiuguk Tussiaat 119:133.

Anersaakkut ajorunnaarneq

Misigissutsinut, ileqqunut anersaakkullu peqqissutsimut sunniutaasinnaasut tamaasa eqqartussagaluarutsigik maani inissaqarnavianngillat. Naammallili oqarutta Guutip oqaasia ikiortigalugu ’isumakkut nutaanngorsarneq’ ajorunnaarnissamut iluaqutaasorujussuussasoq. (Rûmamiut 12:2) Isumavit anersaakkut eqqarsaatinik immerneratigut inuuninnilu anersaakkut suliniuteqarluarnikkut ’siuninniittut isattorniakkit’. — Filípimiut 3:14; 4:8, 9.

Atornerlunneqarsimasut ilarpassuisa Tussiaatit atuarlugit assut tuppalliutigisarpaat. Bibelimili najoqqutassianik pimoorullugu maleruaaniarneq iluaqutissarfilliulluarnerpaasarpoq. Piffissap ingerlanerani aappariittut ajornartorsiutisi milliartussapput. (Evfisumiut 5:21-33) Ileqqut aserornartut soraarsinnaapput. (1 Korintumiut 6:9-11) Kinguaassiuutitigut misigissutsit pissusissamisuunngitsut nungussinnaapput. (Ussatit 5:15-20; 1 Korintumiut 7:1-5) Aammattaaq inunnut allanut attaveqarneq iluarsisinnaavoq ileqqussatigullu killissanik aalajangersimasunik pilersitsisoqarsinnaalluni. — Filípimiut 2:4; 1 Tásalûníkamiut 4:11.

Ataaseq qularnaappoq: Atornerlunneqarsimaneq qaangerumagaanni aalajangerluinnarsinnaassuseq annertuumillu ilungersorneq pisariaqarput! Kisianni Tussiaat 126:5-imi neriorsoqqissaarneqarpugut: „Qianngarmik siaruarterisut katersuiumaarput qiimmattarlutik.“ Eqqaamajuttaaq Guutip ilumoortup, Jehovap, ajunnginnissat soqutigimmagu. „[Jehovap] qanippai neriuutaarussimasut, annaattarpai sapiissuseerutitaasimasut.“ (Tussiaat 34:19) Arnaq atornerlunneqarsimasoq ima oqaluttuarpoq: „Paasigakku Jehovap misigissutsikka tamaviisa nalunngikkai isumassoraangalu — isumassugarilluinnaraanga — kiisami ilukkut eqqissivunga.“

Guutitta asannittup, Jehovap, isumakkut eqqissinerinnarmiunngitsoq pissaqartippaatigut. Silarsuarmik nutaamik naapertuilluassuseqarfiusumik, meeraanermi eqqaamasapilunnik tamanik piiaaffigilluinnagassaminik, neriorsorpaatigut. (sarĸúmersitat 21:3, 4; takujuttaaq Jesaja 65:17.) Neriuutip tamatuma ajorunnaarluinnariartuaarninni atatillutillu nakooqusissavaatit. (gD 8/10 91)

[Quppernerup ataani ilanngussaq]

[Qupp. 9-mi ungalusaq]

Ajorunnaarnissamut alloriarnerit

□ Atornerlunneqarsimanermut kingumut qiviarneq

□ Aliasunnermik nununnginneq

□ Ikinngummik paasinnittumik oqaloqateqartarneq

□ Pisuusutut misiginermik kanngusunnermillu ajugaaffiginninneq

□ Angajoqqaanik saammaassineq

□ Bibelimi najoqqutassanik maleruaanikkut ileqqunik ajoqutaasunik taamaatitsineq

□ Kinguaassiuutitigut misigissutsinik pissusissamisuunngitsunik aaqqiineq

□ Inuttut ileqqussatigullu sianisuunik imminut killilerneq

□ Guutimut kristumioqatinullu qanimut attaveqariartuaarneq

[Qupp. 10-mi ungalusaq]

Eqqaamasat qanoq ililluni qaffakaatinneqarsinnaasut

Eqqaamasat aanngasissut sapaatit-akunnialuit, qaammatit ukiulluunniit pisimasup kingorna qaffakaagajunnerusarput, eqqaasallu tamarmik immikkut isumakkut ajornartorsiornermik qaangiuttartumik nassataqartarput. Atuakkami The Right to Innocence-mi eqqaaneqarpoq ilaannikkut „isumaqalernarsinnaasoq ajorsiartoqqilluni. Tassaanngilarli ajorsiartorneq. Tassaavoq pitsanngoriartorneq. Tassami misigissutsit nassuernerillu suli itinerullutillu annernarnerusut qaangerniarnissaannut nukinnik katersuereersimavoq.“ Ajorunnaarnissaq pissutissaqarluarluni tassaalersinnaavoq inuup soqutiginerpaasaa. — Ussatit 18:14.

Atornerlunneqarsimasut allat uummammiuinut tunngasunik atuarneq tusarnaarnerlu atornerlunneqarsimasut ilaasa iluaqutigisimavaat. Aammattaaq eqqaamasat qaffakaatinniarneqarsinnaapput ilaqutariit assiutaannik meeraanermullu eqqaassutissanik isiginnaarnikkut, meeraanermi ornittakkanik takusaanikkut, ikinngutinillu qanigisanillu isumassuisunik oqaloqateqarnikkut. Misigissutsinik allattuineq iluaqutaasartorujussuuvoq. Ilaasa atornerlunneqarnerminni eqqaasatik allattortarpaat. Allat atornerluisiminnut allallutik misigissutsitik aniatittarpaat — nassiutinngikkaluarlugit. Taamaaliornikkut eqqaajortukkat amerlisarput. Qinuneq ikiuutaavortaaq kimittooq. Tussiaasiortutut qinusoqarsinnaavoq: „Misissuiffiginnga, Guuti, ilisariullu uummatiga, misilinnga, eqqarsaatikka ilisariniakkit. Alapernaasinnga iluaatsut aqqutaannik atuaanersunga, ingerlatinngalu aqqutikkut itsarsuarli ittukkut.“ — Tussiaat 139:23, 24. (gD 8/10 91)