„Aningaasat suminngaanniit pippat?“
NAPASULIAQ Alapernaarsuiffiup Peqatigiiffiata videofilmiliaanik „Jehovas Vidner og deres organisation“-mik (Jehovap Nalunaajaasui aaqqissuussaanerallu) takunnissimasut assut tupigusuutigisarpaat. Angutit arnallu assigiinngitsunik naggueqartut assigiinngitsunillu tunuliaqutaqartut pissuserissaarlutik qungujulallutillu suleqatigiittut takusinnaavaat. Maluginiarnartulli tassaannaanngillat nuannaarlutik suleqatigiittut tusindelikkuutaat, aammattaaq peqatigiiffiup Brooklynimiittup illorsuarsui, Wallkillimilu New Yorkimiittumi nunaateqarfissui. Videofilmip takutippaattaaq illorsuarni taakkunani teknologi nutaaliaanerusoq atugaasoq — sukkasuumik naqiterineq maskiinallu atuakkanik ungalulersuutit atuagassianik millionilippassuarnik qaammatit tamaasa sanasinnaasut, tupinnaannartumillu qarasaasiatigut atortorissaarutit amerlasuut. Tamakkununnga ilaapput kiffartuussinerpassuit assigiinngitsut.
Napasuliaq Alapernaarsuiffiup allaffeqarfissuanut pulaarsimasut aamma tupigusuttaqaat. Pulaartut malarujussuaqqaarlutik 30-inik quleriiaanik initalik inissiarsuaq tamaat takusinnaasarpaat, inissiarsuaq tamanna illorsuit Jehovap Nalunaajaasuisa 3000-init amerlanerusuut namminneq piumassutsiminnik sulisut ineqarfiisa ilagaat. Napasuliaq Alapernaarsuiffiup Ilinniarfeqarfia Brooklynip avannaa’tungaani 110 kilometerisut ungasissuseqartumiittoq inuppassuit tupigusuutigisarpaat. Sananeqarnera suli ingerlavoq, sulisussanulli 1200-it missaanniittunut inissaqarluni. Tassani ukiut tamaasa ajoqersuiartortitatut ilinniartitaaneq klassini marlunni ingerlanneqartassaaq, nunarsuarmullu oqaluussiffissaminnut aallartinneqartassallutik. Tassanngaanniillu aamma Jehovap Nalunaajaasuisa ilagiivi 10.000-it USA-miittut unnersuunneqartassapput. Nunarsuaq tamakkerlugu aamma immikkoortortaqarfinni allaffiit qanittukkut assigiinngitsunik annertusaaffigineqarsimapput imaluunniit aallartinneqarsimallutik.
Tamakku suliarineqartorpassuit aningaasarpassuarnik pisariaqarput. Taamaattumik inuit ima aperisarput: „Aningaasat suminngaanniit pippat?“ Akissullu imaappoq inuinnarnit ilittut uattullu ittunit pipput. Inunnit nunarsuaq tamakkerlugu kristumiut suliassaannut pingaaruteqartunut Naalagaaffiup oqaluussissutigineqarneranut ajoqersuinissamillu pingaartitsillutillu siuarsaarusuttunit. Taamatulli pilliuteqariaannaassuseq aatsaat pinngilaq.
Itsaq Israelikkut — maligassaalluartut
Ukiut 3500-it matuma siorna tukkorluni tunissutinik pisariaqartitsisoqalersimavoq. Jehovap Moses peqqusimavaa illernartuummik imaluunniit ’tupermik naapeqatigiittarfissamik’ pallorfiginninnermut atugassamik sanassasoq. Sanaartornermut ilitsersuutit Guutimeersut atortussarpassuarnik naleqaqisunik piumasaqarput. Jehovap inassummik matuminnga tunivai: „[Jehovamut] pigititassanik pigisassinnit tunissuteqassaasi. Kikkulluunniit tunniussinissamut kajumittut Jehovamut pigititassanik aggiussissapput.“ (2 Moses 35:4-9) Inuit qanoq qisuariarpat? Ima oqaluttuarineqarpoq: „Uummatimikkullu kajumissisinneqartut tamarmik aggiussipput toqqup naapeqatigiittarfiup sananeqarnissaanut sanaassartaanullu tamanut atisanullu illernartunut atugassanik Jehovamut pigititassanik.“ ’Kajuminnermik tunissutit’ amerlangaarmata allaat ’suliassamut [Jehovap] suliareqqusaanut atussallugit sinnilissuanngorput.’ (2 Moses 35:21-29; 36:3-5) Ilumut ullut tamaasa inuit namminissarsiunngissusertik tukkornertillu takutittarpaat!
Ukiut 500-ngajaat qaangiuttut Israelikkut kaammattoqqinneqarput tukkussusertik takuteqqeqqullugu. Kunngip Davidip Jerusalemimi Jehovap illuliuunnissaanik kissaatigisaa erneratigut Salomonikkut piviusunngortinneqarnialerpoq. David nammineq katersuisimavoq atortussanullu pisariaqartunut annertoorujussuarmik tunniussaqarluni. Allat Davidip maligassiaa malippaat kajumissaarimmat „[Jehovamut] tunissutinik“ tunniussinissamik. Qanoq kinguneqarpa? „Siulersuisut tunisinissaminnut kajumissusiat inuit nuannaarutigaat, tassami [Jehovamut] tunissutitik uummatimikkut kajumillutik tunniummatigik. Aammattaaq Daavip tamanna nuannaarutigaa.“ (1 Israelikkut 22:14; 29:3-9) Sølvi kuultilu kisiisa naatsorsuutigissagaanni ullumikkuusuuppat 300 milliarder koruuninik naleqassagaluarput. — 2 Israelikkut 5:1.
Pisimasuni taakkunani malugisinnaavarput kinaluunniit pinngitsaalineqanngitsoq tunisinissamut. Tamarmik nammineq piumassutsimit tunissutaapput, tunniussaappullu ’uummatimikkut kajuminnermit’. Jehovap kissaatigaa taamaassasoq. Kristumiunut ajornartoortunut aningaasanik pisariaqartitsineqalermat apustili Paulus allappoq tamanna ’erlituup tunissutaatut pissanngitsoq.’ Imalu nangippoq: ’Nungullutik uummatimik pilersaarutigisaannik tunisigilit uumitsannatik ajornartoortitaanatillu, kajumittumik tunisisoq Guutip asammagu.’ — 2 Korintumiut 9:5, 7.
Ullumikkut pisariaqartitsineq
Ullumikkut aamma tunissutinik pisariaqartitsisoqarpa? Aap, pisariaqartitsinerlu annertusiartortuarpoq. Sooq?
Kristumiut ullussani kingullerni immikkut ittumik suliassinneqarsimapput. Jesusip malinnitsini ima peqqusimavai: ’Taamaattumik aallaritsi, inuiaqatigiillu tamaasa ajoqersuganngortissigik ataatap ernerullu anersaallu illernartup aqqanut kuillugit. Ajoqersorsigillu ilissinnut peqqusakka tamaasa maleruaqqullugit.’ — Matîuse 28:19, 20.
’Aaqqissuussaanerup matuma naggatissaa’ qanilliartortillugu piffissaq isumalluutissallu annertoorujussuit atortariaqarput ajoqersuinersuaq oqaluussinerlu naammassineqassappata. Sooq? Guutip naalagaaffianik tusarliussap ’nunap isuanut allaat’ oqaluussissutiginissaanut atatilllugu suliassarpassuit pissutigalugit. (apustilit suliait 1:8) Amerlanerit juutisut ukiuni hundredelinni siullerni inuusutut Biibilimut piginnaaneqartiginngillat. Nunarsuup inuisa ilarpassuisa Biibili naluaat taamaattumillu Guutip oqaasiatut isiginagu. Oqaluussisartut ajoqersorneqartariaqarput nunanullu avinngarusimasunut aallartinneqartariaqarlutik. (Rûmamiut 10:13-15) Eqqarsaatigeriakkillu oqaatsit assigiinngitsorpassuit tassani pineqarmata! Inuit atuarsinnaaneq Biibilimillu atuaqqissaarsinnaaneq aammalu namminneq oqaatsitik atorlugit atuagassiat Biibililersaarutaasut atorfissaqartippaat. Tamarmik annguneqarsinnaassappata anersaakkullu inerikkiartuaarnissaannik taamaalillutillu allanik aamma ikiuisinnaanngornissaannik ikiorneqassappata annertoorujussuarmik aaqqissugaasariaqarpoq. — 2 Timûtiuse 2:2.
Jesus oqarpoq ’naalagaaffimmik nutaarsiassaq nuannersoq oqaluussissutigineqarallassasoq inuit najugaanni tamarsuarmi inuiaqatigiit tamarmik nalujunnaarutissaannik; taavalu naggatissaq nalliussasoq’. (Matîuse 24:14, NV) Taamaattumik piffissanngorsimavoq suliassami tamatumani pingaaruteqartumi sapinngisamik iliornissaq. Tamanna piffissap timikkut pisuussutit naleeruffissaata nalliutinnginnerani piffissatsinnik nukitsinnillu atuiffissatut pitsaanerpaavoq. — Hesekiel 7:19; Lúkarse 16:9.
Aningaasat sumut atorneqartarpat?
Napasuliaq Alapernaarsuiffiup atuagassiat Biibililersaarutaasut oqaatsinut 230-inut, ilanngullugillu tappiitsut satsillugit atuarsinnaasaat, saqqummersittarpai. Tusilartunut videofilmit isiginnaagassat ussersornertallit saqqummersinneqartarput. Oqaatsinullu taakkununnga tamanut nutserisoqarnissaq kukkunersiuisoqarnissarlu pisariaqarput. Suliaq tupinnaannartoq ingerlanneqarpoq, ingammik atuagassiaq Napasuliaq Alapernaarsuiffik, qaammatit tamaasa eqqarsaatigissagaanni oqaatsinut 121-inut, taakkunannga 101-it ataatsikkut, saqqummersarpoq. Pisariaqarporli inuit nunarsuaq tamakkerlugu paasissutissanik assigiinnik atuagassanik pisarnissaat. Ukiut tamaasa pappiaqqanut allanullu atortussanut Naalagaaffimmik tusarliussamut atorneqartartunut, naqitigassanut kassettebåndinut videofilminulluunniit aningaasartuutissat ukiut tamaasa qaffakkiartortarput. Aningaasartuutit tamakku qatanngutinit tunissuteqarsimasunit matussutissinneqartarput.
Oqaluussineq ajoqersuinerlu nunarsuaq tamakkerlugu Jehovap Nalunaajaasuisa ilagiivinit 75.000-init amerlanerusuni ingerlanneqarput. Qatanngutit akornanni ataasioqatigiinnissaq qiimmassaanissarlu pillugit, ilagiit tamarmik ukiumut marloriarlutik ilagiinnut nakkutilliisumik angalasartumik ajoqersorneqarsimasumik pulaarneqartarput. Ataatsimeersuarnerittaaq pingaarutilimmik ilinniartitaaffiusarput. Ataatsimeersuartarfissarsuit attartorneqartariaqarput ataatsimeersuarnissanut uppernikkut pissatsissutaaffioqisunut. Tunissutit tamakkununnga aamma atorneqarnissaat siunertarineqartarpoq.
Ukiumut pingasoriaannarluta ataatsimeersuartarpugut, ilagiinnili sapaatip-akunneranut tallimariarluni ataatsimiinneqartarpoq. (Naleqqiuguk 2 Moses 34:23, 24.) Soqutiginnittorpassuit nutaarsiassamut nuannersumut qisuariarnerisa kingunerisarpaat ukiut tamarluinnaasa ilagiinnik nutaanik tusindelikkuutaanik pilersitsisarneq. Ukiut tamaasa hundredelikkuutaanik naalagaaffilersaarfinnik sanaartorneqartarpoq, allarpassuillu nutarterneqartarlutik allilerneqartarlutilluunniit. Tamanna pisinnaanngorsimavoq Napasuliaq Alapernaarsuiffiup Peqatigiiffiata suliarineqartut tapersersorsimammagit koruuninik millionilippassuarnik atukkiisarnermigut. Aningaasat atorneqartut soorunami kontomut utertinneqartarput ernialerlugit, taavalu atorneqaqqissinnaasarlutik. Taamaakkaluartorli annertusiartortumik pisariaqartitsisoqartuarpoq.
Nunani Europap kangisissortaani Sovjetunioniusimasumut ilaasimasuni, amerliartornermik tupinnartumik pisoqarsimavoq. Nunani tamakkunani oqaluussinerup inatsisitigut akuerisaalernera tusaratsigu nuannaarsimaqaagut. Maanna ajoqersuiartortitat nunanut tamakkununnga aallartinneqarsinnaalersimapput. Nunat ilaanni allaffeqarfinnik nutaanik pilersitsineqarsimavoq, tamatumalu kingunerisaanik nunarsuaq tamakkerlugu namminneq piumassutsiminnik Betelimi sulisut maanna 15.000-iulersimallutik. Soorunamilu inissaannik pisisariaqarpoq imaluunniit sanaartorneqartariaqarluni. Tunissutinik isertitat tamakkununnga pisariaqartunut matussusiinissamut iluaqutaapput.
Suliarujussuit tamakku Satanip anersaapiluisalu arajutsisimanngilaat. Sapinngisartik tamaat Jehovap kiffaanik aalajaatsunik akornusersuiniartuarput ajornartorsiortitsiniarlutillu. (sarĸúmersitat 12:17) Tamatuma kingunerisaanik Guutip innuttaasa oqaluussinissamut Guutillu inatsisai naapertuilluartut naapertorlugit inuunissaminnut pisinnaatitaaffiannik sernissuiniarluni eqqartuussisarnerit amerlisimapput. Aammalu pinngortitami ajunaarnersuit pissutsillu aaqqissuussaaneranni Satanimut atasumi sorsunnerpassuit nassatarisaannik qatanngutinut allanullu ajornartoortunut ikiuutissat pisariaqartinneqartalersimapput. Tunissutigineqartut inuunermut pisariaqartunik pilersuinissamut tamatumunnga iluaqutaasarput.
Jehovamit akissarsiaq
Piffissatsinnik pigisatsinnillu Naalagaaffiup soqutigisaanik siuarsaanissamut naammattorsuarmik tunissuteqartarutta annertuumik pilluaqqusaassaagut. Sooq? Guutip, suut tamarmik Piginnittuata, akissarsisissammatigut. Ussatit 11:25-mi ima allassimavoq: „Pilluaqqussummik tunioraasup tamanna immini pilluaatigaa; imeruersaasoq nammineq imeruersarneqarumaarpoq.“ Sapinngisarput tamaat imminik pallorfiginninnermik siuarsaaniaraangatta Jehovap nuannaarutigisarpaatigut. (Eprîarit 13:15, 16) Israelikkut angeruseq tunngavigalugu inatsisit malillugit tunissuteqartut pillugit Jehova ima oqarsimavoq: „’Pissarsiat qulingi ilanngarnagit aattarniarsigit naalaffiup toqqorsiviinut, uanga illunni nerisassamaateqaqqullugu. Taamaalillusi misilinniarsinga,’ oqarpoq katersaarsuit [Jehovaat]. ’Taava qilaap suppivii ammassavakka pilluaatissiissutinillu killiligaanngitsunik kueraaffigissallusi.’“ (Malaki 3:10) Anersaakkut pigissaarneq ullumikkut Jehovap kiffaasa nuannaarutigalugu atugaat Guutip neriorsuutiminik eqqortitsisimaneranut uppernarsaatissaavoq.
Ullormik annaanneqarfissamik oqaluussissutiginnilluni inunnillu eqqortumik isumalinnik inuunerup aqqutaatigut ikiuilluni suliaq annertooq tamanna piffissanngorpat naammassissaaq. (Matîuse 7:14; 2 Korintumiut 6:2) Naalakkalli ’savaatai allat’ katersorneqaqqaartussaapput. (Juánase 10:16) Pisariaqartorujussuuvoq ullumikkut tamatta unamminiarnartumut tamatumunnga suleqataanissarput. Pilluassaqaagullu silarsuassami nutaami naapertuilluassuseqarfiusumi kingumut qiviarluta ima oqarsinnaalerutta: ’Inaarutaasumik katersuinermi sapinngisara tamaat suleqataavunga.’ — 2 Pîtruse 3:13. (wE 1/12 95)
[Qupp. 30, 31-mi ungalusaq]
Ilaat qanoq tunissuteqartartut
ANINGAASAT NUNARSUARMI TAMARMI SULINERMUT TUNISSUTIT: Amerlasuut aningaasanik naatsorsuutiminni tunissutinik nakkaatitsivimmut „Naalagaaffiup sulinera — Mat. 24:14“-mik allagartalimmut nakkartitassaminnik immikkoortitsisarput. Ilagiinni qaammatit tamaasa tunissutigineqarsimasut Napasuliaq Alapernaarsuiffiup Peqatigiiffianut nassiunneqartarput.
TUNISSUTIT: Aningaasat kajumissutsimit tunissutit toqqaannartumik uunga nassiunneqarsinnaapput: Vagttårnet, Stenhusvej 28, 4300 Holbæk, giro 640-3468. Pinnersaatit allallu nalillit aamma tunissutigineqarsinnaapput. Tunissutaaneralli allakkatigut nalunaarutigisariaqarpoq.
PAARITITSINEQ; Aningaasat isumaqatigiissuteqarnikkut Napasuliaq Alapernaarsuiffiup Peqatigiiffianut paarisassanngortinneqarsinnaapput taamaaliortup toqunissaata tungaanut („tunissutissamaatit“).
SILLIMMASIISSUTIT: ’Inuunermut sillimmasiissutit’ utoqqalinersiutissatulluunniit nammineq katersukkat Napasuliaq Alapernaarsuiffiup Peqatigiiffianut pisassanngortinneqarsinnaapput. Taamaalisoqarniaruni tamatigut Peqatigiiffik ilisimateqqaartariaqarpoq.
BANKKONTOT, PAPPIALAT NALILLIT PIGISALLU AALAAKKAASUT: Bankkontomi uninngatitat, pappialat nalillit pigisallu aalaakkaasut tuniuminartut Napasuliaq Alapernaarsuiffiup Peqatigiiffianut tunniunneqarsinnaapput. Aamma tamatumani Peqatigiiffik ilisimateqqaarneqassaaq.
KINGORNUSSASSAT: Aningaasaatit inatsisinut naapertuuttumik testamentiliornikkut Napasuliaq Alapernaarsuiffiup Peqatigiiffianut kingornussassanngortinneqarsinnaapput — ingammik kingornussassat atsiorlugu uppernarsakkat. Pitsaassaaq Peqatigiiffik immaqalu ilagiit tamatuma kopiianik tunineqassappata. Ilisimatitsissutigisinaavarput Napasuliaq Alapernaarsuiffiup Biibililiornikkut Atuagassialiornikkullu Peqatigiiffia kingornussassat akileraarutitaannik akiliisanngimmat.
PERIARFISSAT ALLAT: (pisussaasutut nalunaarutit allallu): Tunissuteqarnissamut periarfissanik allanik ilagiinni ilaaffigisanni utoqqaanertat paasiniaaffigisinnaavatit.
KAJUMISSUTSIMIT TUNISSUTIT PINEQARPUT Atuagassiaaqqamit Jehovap nalunaajaasui — Ataasiussuseqarlutik Guutip peqqusaanik naammassinnittut-mi ima allassimasoqarpoq:
„[Tamakku] tamarmik kajuminnermit sulisunit akissarsiaqarneq ajortunit suliarineqartarput, taamaalilluni aningaasartuutit sapinngisamik appasitsinneqarlutik. Illumiit illumut angalaarluni oqaluussisarneq atuagassanillu agguaaneq Jehovap Nalunaajaasuisa kajuminnermit akissarsiaqaratik suliarisarpaat. Tamarmik akilersugassatik namminneq akilertarpaat. Utoqqaanertat ilagiinnik nakkutilliisut ilagiinnilu kiffartortut akissarsiaqaratik kiffartuussisarput. Kiffartuussinerminni aningaasaajaatit tamarmik namminneq akilertarpaat.
Siulersuisoqatigiinni ilaasut allallu biibilinik atuakkanillu Biibilimut ilinniutaasunik piareersaanermik naqiterinermillu taamaaqataanillu suliaqartut tamarmik allanik akissarsiaqanngillat kisianni akeqanngitsumik nerisaqarlutillu inigisaqarput namminerisaminnillu pisariaqartitaminnut anginngitsumik qaammammusiaqartarlutik. Aammattaaq allamik atorfeqaratik nakkutilliillutik angalasartut taama ittumik isumagineqartarput. . . .
Jehovap nalunaajaasuisa ataatsimiinnerini tamani, ilagiissiminni aammattaaq ataatsimeersuarnerni, aningaasanut nakkaatitsiveqartarpoq tunisiumasut nakkartitsiffigisinnaasaannik. Aningaasanik katersuisitsineqarneq ajorpoq. Pissarsiamik qulerarterutaannik akileraartaqqusaanngillat ilagiinnullu ilaasortatut akiliummik akileeqqusaanatik.“ — Qupperneq 28.