„Jehovap isaani naleqarpunga!“
’ULLUNI kingullerni ajornartuni’ makkunani Jehovap kiffaasa aalajaatsut ilarpassui imminut nikaginermik akiortuagassaqarput. (2 Timûtiuse 3:1) Tamanna tupaallaatigisariaqanngilarput, Satanimmi ’qoqassiiniarnerinut’ ilaavoq misigilersinniassalluta asaneqanngitsugut, allaat Pinngortitsisumit asaneqanngitsugut. (Evfisumiut 6:11) Naleqqulluartumik Napasuliaq Alapernaarsuiffik 1. apriili 1995-imoortoq imaqarpoq ilanngutassianik ima qulequtalinnik: „Guutip isaani erlinnartuuvutit“ aamma „Asanninnermut ajunngitsuliornermullu kajumissaaqatigiinneq — qanoq ililluni?“. Ilanngutassiani taakkunani eqqaasinneqarpugut Jehovap suliniutivut pingaartikkai. Qujamasullutik allagaqarsimasunit issuaanerit matuma kingulianiipput:
„Ukiuni 27-ni Jehovamut nalunaajaasuuffigisanni atuagassiamik aatsaat taama maluginiartitaqartigaanga. Atuarakkit qianngitsoorsinnaasimanngilanga — ilanngutassiat taakku assorsuaq katsorsaatigaakka. Maanna Jehovamit ilumut asaneqartutut misigaanga. Soorluli tassa oqimaatsorsuaq tuinnit peerneqartoq.“ — C. H.
„Ullormi ataatsimi atuagassiaq taanna sisamariarlunga atuarpara. Ingammik nuannaarutigaara ilanngutassiami nalorninaatsumik oqaatigineqarmat isumaqarutta naleqarnata, sallumik paasitinneqarsimasugut. Ilanngutassiaq paarsisutut pulaartarninni oqaluussininnilu atortassavara.“ — M. P.
„Satan allaat Jehovamik asannittut naleqanngitsutut asaneqanngitsutullu misigilersinniarlugit assut ilungersuuteqarsimavoq. Uannut qiimmaallannaqaaq ’inussiap aalajaallunilu silatuup’ eqqaasimmatigut qanoq Jehovap asatigigaatigut allaallu iliuutsivut annikitsunnguugaluit pingaartittarai. Misigissutsit ilanngutassiami eqqartorneqartut ukiorpassuarni pigisimavakka. Jehovamit asaneqarnissannut qinngaqqunnartutut misigiuarsimavunga, taamaattumik taassumunnga kiffartorninni ilungersorsuataartarsimavunga, asanninnermut tamatumunga qinngaqqunnarunnaarniarlunga. Taamaaliortarpungali imminut ajorineq kanngusunnerlu pissutigalugit. Nalunaaquttap-akunneri qanorluunniit amerlatigisut oqaluussinermut atoraluaraangakkit, imaluunniit inuit qanorluunniit amerlatigisut ikioraluaraangakkit, misiginngisaannarsimavunga naammattoq. Naammassisinnaanngisakka kisiisa isiginiartarsimavakka. Maanna Jehova asanninneq pissutigalugu kiffartorfigilerakku upperaara nuannarigaa tulluusimaarutigigaangalu. Tamanna pissutigalugu taassumunnga asanninnerulerpunga suliniuteqarusunnerulerlungalu. Massakkut Jehovamut kiffartorninni nuannaarneq annertoorujussuaq misigisarpara.“ — R. M.
„Ilanngutassiat taakkua atuarsimasannit tamanit pitsaanersaallutillu, ineriartornarnersaallutillu, aap, torrallataanersaapput. Ingerlaannaq uummammik killiipput. Ukiuni 55-ini Napasuliaq Alapernaarsuiffik atuartarsimavara, ilanngutassiarpassuaqartarsimavorlu pingaartinnartunik. Normulli tamatuma isumakuluutivut ’naleqanngitsutullu’ aamma ’asaneqanngitsutut’ kiisalu Jehovamit asaneqarnissatsinnut qinngaqqunnarunnaanngisaannartussatut misiginerput millisinniarlugit allaaserineqartartorpassuusimasut tamaasa akimorpai. Ilanngutassiat taakku anersaakkut ikiuutissamik anersaakkut qatanngutitta pisariaqartilluinnagaannik imaqarput. Paarsisutut pulaartarninni ilanngutassiat taakku atortualernissaat eqqarsaatigaara.“ — F. K.
„Sallusuissummiiginnarniarluni nukissaqarniarneq imminut ataqqinngippallaartortatsinnut allaallu imminut maajugisutut misigisortatsinnut ajornakusoorsinnaasaqaaq. Ilanngutassiaq tamanna ingerlaannaq uummammik killiivoq, misiginneqataanerlu paasinninnerlu ersersitaa annertooq tarnutitut eqqissisaasutut katsorsaasutullu ipput. Napasuliaq Alapernaarsuiffik-mi oqaatsit taama ittut atuarlugit tuppallernaqaaq, qularunnaarnarlunilu Jehovap paasigaatigut. Qujanaq eqqaasikkatsigut Jehovap innuttani imminut pisuutinneq, kanngusunneq siooranerlu aqqutigalugit iliuuseqartinniarsarinngikkai. Aningaasatigut ajornartorsiutit ilaqutariinnilu napparsimasoqarnera pissutigalugit kingullertigut oqaluussinermut peqataanera annertuumik killilerneqarsimagaluartoq maanna iliuuserisinnaasakka nuannaarutigaakka. Aap, asanninneq pissutigalugu iliuuseqaraangama oqaluussinermi nuannaarneq annerpaaq misigisarpara.“ — D. M.
„Ilanngutassiaq ’Guutip isaani erlinnartuuvutit!’ atuarlugu naammasseqqammerpara. Immikkoortut tamarmik qullilinartortaqarput. Ilaqutariinnit asanninnermik ersersitserpiarneq ajortuneersuuvunga. Nikagineqarlungalu, qinngasaarneqarlungalu asissorneqartarsimavunga. Taamaattumik inuuninni siusissukkut imminut ataqqineq annaasimavara. Misigissutsit taamanerneersut suli takkuttarput atugarliulerninnilu nikallortissinnaasarpaannga. Utoqqaanertatut taamaatittariaqalerama atorsinnaanngilluinnartutunaasiit misigisimavunga — Guutimut, ilaquttannut ilagiinnilu qatanngutinnut. Misigissutsit tamakku ullormit ullormut peerunneq ajorput, ilanngutassiarli piffissaalluartukkut takkuttoq tamanna isumakkut aalajaannerulernissannut iluaqutigaara. Inuuneq isumalluarnerusumik isigilersippaa.“ — D. L.
„Qujanaq ilanngutassiamut ’Guutip isaani erlinnartuuvutit!’-mut. Imminut nikagineq naleqanngitsutullu misigineq artornartoq, meeraagallarama atornerlunneqarsimaninnik pissuteqartut, akiugassaraakka. Eqqarsartaaseq ’mumingasoq’ tamanna Satanip qoqassiiniarnerinut ilaasutut isigissallugu pissusissamisoorluinnarpoq. Allaammi uumassuseqalaaginnarnermik qamitsisinnaavoq. Sallu uannik asaneqanngitsutut misigititsisoq imminut naalakkerlunga ullut tamaasa akiorniartariaqartarpara. Immaqa takorloorsinnaanngilarsiluunniit ilanngutassiaq tamanna uannut qanoq pingaaruteqartigisimasoq.“ — C. F.
„Ullumikkut qatanngutit eqqumaffiginerulersimavaat Jehovap kissaatigigaa kiffartorfigissagitsinni asanninneq pissutigalugu, pinngitsaalineqartutut tatineqartutullu misigineq pissutiginagit. Jehovap pissusia asannittoq, innuttaminik ataasiakkaanik inuttut soqutiginninnera asannittumillu uagutsinnik isumassuinera eqqarsaatigeqqissaarlugit nutaannguallannarlunilu kajumissinaqaaq. Tamanna eqqarsaatigalugu amerlasuut ilanngutassiaq ’Guutip isaani erlinnartuuvutit!’ tiguniariarlugu pingaartitsinermik ersersitsipput. Ilanngutassiat taakkua amerlasuut Jehovamut qaninnerulernissaannut aqqutissiuussissasorinarput. Misiginneqataassutsimut qajassuussissutsimullu ’napasuliami’ ilanngutassiani kingullerni ersersinneqartunut nuliaralu qujamasunnerput ersersikkusupparput. Ilagiinnut tikeraaraangatta ilanngutassiat taakku atorluarniartassavavut.“ — Nakkutilliisumit angalasartumit.
„Ukiuni 30-ngajanni atuartartorisimavassinga, aatsaalli taama isumassarsinartigalunilu ineriartornartigisumik atuarpunga. Allassimaffiit kimittuut pillaqqissumillu atorneqartut sallut misigissutsinni toqqortaasut piiarnissaannut iluaqutigaakka. Tamannalu ilutigalugu Jehovamut qaninnerulersippaannga. Ukiorpassuarni imminut pisuutinneq pissutigiinnarlugu Jehova kiffartorfigisimavara. Utertitsissutip Guutillu asanninnerata nalingat tamakkiisumik paasisimanngilara. Ilanngutassianut paasisimasaqarpasissumik eqqarsariaallannartumillu allatanut taakkununnga qujanaq. Neriuppunga taakkununnga assingusunik suli amerlanerusunik atuagassaqartarumaarlunga.“ — M. S.
„Ukiuni 29-ni sallusuissummiissimavunga, eqqaamasaqanngilangali ilanngutassiamik uumatulli qujamasuutigitigisannik misigissutsikkullu attorneqaatigitigisannik. Naak alliartorninni asanninnermik annertuumik ersersitsivigineqarsimagaluarlunga misigiuaannarsimavunga inuunissannut qinngaqqunnarlunga, ingammillu Jehovamut kiffartornissannut qinngaqqunnarlunga. Ilanngutassiaq atuareerakku seeqqummerpunga qiasunngullungalu Jehova qutsavigalugu. Ilanngutassiaq taanna immikkut isigiuaannassavara. Maanna sammivimmit allamit imminut isigilerpunga, paasigakkumi Jehovap isaani erlinnartuullunga.“ — D. B. (wE 15/12 95)