Ajortoq uumiginiartigu

JEHOVA Guutiuvoq illernartoq. Itsaq taaneqarsimavoq „Israelip Illernartua“-nik, taassumalu Israelikkut minguitsuunissaannik peqqusimavai. (Tussiaat 89:19) Innuttani qinikkani ima oqarfigisimavai: „Illernartuussaasi uanga illernartuugama.“ (3 Moses 11:45) ’Jehovap qaqqaanut majuarusuttoq’ kinaluunniit ’pinngitsuusariaqarpoq assammigut minguitsuullunilu uummammigut’. (Tussiaat 24:3, 4) Tamanna tassaaginnanngilaq ajortumik iliornaveersaarneq. Aamma tassaavoq ’ajortumik uumiginninneq’ — Ussatit 8:13.

Jehova asannittumik iliorluni inatsisinik sukumiisunik atuutilersitsisimavoq Israelikkut eqqunngitsoq ilisimallugulu ingalassimaniassammassuk. (Rûmamiut 7:7, 12) Inatsisit tamakku ileqqussatigut najoqqutassanik erseqqissunik imaqarput. Allasiorneq, anguteqatinoorneq arnaqatinoornerlu, qanigisamik atoqateqarneq uumasunillu atoqateqarneq — tamakku tamarmik illernanngitsutut anersaakkut mingutsinnartutut saqqummiunneqarput. (3 Moses 18:23; 20:10-17) Tamakkuninnga ajorluinnartunik iliortut inuiannit Israelikkunnit piiagaasarput.

Ilagiit kristumiunik tanitanik ilaasortallit tassaalermata ’Israel Guutip pigisaa’, taakkuttaaq ileqqussatigut najoqqutassanik tunineqarput. (Galâsiamiut 6:16) Kristumiuttaaq ’ajortoq uumigisussaavaat’. (Rûmamiut 12:9) Jehovap Israelikkunnut oqaasii uku aamma taakkununnga atuupput: ’Illernartuussaasi, uanga illernartuugama.’ (1 Peter 1:15, 16) Iliuutsit illernanngitsut, soorlu kinguaassiuutitigut kanngunartuliorneq, allasiorneq, anguteqatinoorneq arnaqatinoornerlu, uumasunik atoqateqarneq qanigisanillu atoqateqarneq, ilagiinnik kristumiunik mingutsitsissutaaqqusaanngillat. Ileqqunik tamakkuninnga soraarussiumanngitsut Guutip naalagaaffianut isersinnaanngillat. (Rûmamiut 1:26, 27; 2:22; 1 Korintumiut 6:9, 10; Eprîarit 13:4) ’Ullussani kingullerni’ makkunani najoqqutassiat taakkuusut ’savanut allanut’ atuupput. (2 Timûtiuse 3:1; Juánase 10:16) Tamatuma kingunerisaanik kristumiut tanitat ’savallu allat’ inuttut minguitsutut peqqissutullu Guutimik aqqa ateqaatigisinnaavaat Jehovap Nalunaajaasuisut. — Jesaja 43:10.

Ilagiit minguitsuutillik

Tamatumunngali akerliusumik silarsuarmi kinguaassiuutitigut kanngunartuliornerit qanorluunniit ittut akueriinnarneqartarput. Kristumiut ilumoortut allaanerugaluarlutik puiortariaqanngilaat ullumikkut Jehovamut kiffartortut ilarpassui silarsuarmi inuunikuummata. Amerlasuut Guuterput illernartoq nalugallaramikku timimik ajortillip kissaataasa takorluugaasalu naqisimanissaannut pissutissaqarsorisimanngillat, ’maajunnartuliortarlutik qussalaatsuliortarlutillu’. (1 Pîtruse 4:4) Silamiut ajortunngorsimasut ileqqupilui maajunnartut eqqartoreerlugit apustili Paulus ima oqarsimavoq: ’Taamaattunillu ilaqarsimagaluarpusi.’ Imali nangippoq: ’Uffarsimavusili [illernartitaallusilu] iluartuutitaallusilu Naalakkap Jesusip aqqagut Guutittalu anersaavagut.’ — 1 Korintumiut 6:11.

Oqaasii taakkua assut tuppallernarput! Inuk qanorluunniit siornatigut inooriaaseqarsimagaluartoq Kristus pillugu nutaarsiassaq nuannersoq inuunerminut sunniutileraangat allanngortarpoq. Uppernermik takutitsisalersarpoq Jehova Guutimullu tunniulluinnarluni. Ileqqussatigut minguitsumik inooriaaseqalersarpoq, Guutip isaani minguitsunngorluni. (Eprîarit 9:14) Siornatigut ajortuliarisimasai isumakkeerfigineqartarput, taamaalillunilu ’siunerminiittoq isattorsinnaalersarlugu’.a — Filípimiut 3:13, 14; Rûmamiut 4:7, 8.

Jehovap David inuarsimanerminik allasiorsimanerminillu peqqissimissutiginnittoq isumakkeerfigisimavaa, aamma Manasse kanngunartumik guutipilussiorsimanerminik annertuumillu aammik kuisisimanernimik peqqissimissutiginnittoq isumakkeerfigisimavaa. (2 Samuel 12:9, 13; 2 Israelikkut 33:2-6, 10-13) Qujamasuutigilluinnarsinnaavarput uaguttaaq peqqissimigutta aammalu ilumoorluta maniguullutalu imminut palligukkutta isumakkeerfigeriaannaagaatigut. Naalli Jehovap David Manasselu, angutit marluk taakku — Israelikkut ilanngullugit — isumakkeerfigisimagaluarai ajortuliamik kingunipiluinit eqqorneqanngitsuunngillat. (2 Samuel 12:11, 12; Jeremia 15:3-5) Taamatuttaaq Jehovap ajortuliortut peqqissimisut isumakkeerfigisaraluarai iliuuserisimasaat avaqqunneqarsinnaanngitsunik kinguneqarsinnaapput.

Kingunerit avaqqussassaanngitsut

Assersuutigalugu, oqarta inuup tamalikalluni inuusimasup AIDS-ertup sallusuissut ilassigaa inuuninilu allanngortillugu Jehovamut tunniulluinnartoq kuisillunilu. Maanna tassaalerpoq kristumiu anersaakkut minguitsoq Guutimut attaveqartoq siunissamillu nuanningaartumik neriugisaqartoq; sulili AIDS-erpoq. Siornatigut inooriaaserisimasami kingunerisaanik, alianartumik avaqqussassaanngitsumilli, naggataatigut nappaatini toqqutigisinnaavaa. Kristumiut ilaasa siornatigut kanngunaqisumik inooriaaseqarsimanertik allatigut sivisuumik kingunipilutsissinnaavaat. Immaqa kuisinnerminnit ukiorpassuit qaangiunneranni, immaqa allaat aaqqissuussaanerup matuma atuunnera tamaat, inooriaaserisimasaminnut kanngunartumut timimikkut ussernartorsioqqajaajuarnertik akiortuagassarissavaat. Amerlasuulli Jehovap anersaavanit ikiorneqarlutik iluatsitsisimapput. Taamaattorli akiuuttuartariaqarput. — Galâsiamiut 5:16, 17.

Taamaattut ussernartorsiornitik akiorsinnaajuartillugit ajortuliornaveersaarsinnaasarput. Sulili timikkut artornartunik akiugassaqartuartillutik ilagiinni akisussaaffinnik anguniagaqarnaveersaassagunik silatusaassapput. (1 Timûtiuse 3:1) Sooq? Nalunnginnamikku utoqqaanertat ilagiinni annertuumik akisussaaffeqartut. (Jesaja 32:1, 2; Eprîarit 13:17) Nalunngilaat utoqqaanertat ilaatigut mianernartunik suliassinneqartartut. Aamma minguttuumik timikkut akiugassaqartuartumut asannittuliornerunanilu silatusaarnerunavianngilaq akisussaaffimmik taama annertutigisumik anguniagaqarnissaq. — Ussatit 14:16; Juánase 15:12, 13; Rûmamiut 12:1.

Angummut kuisinngikkallarami meeqqanik atornerluisarsimasumut kingunipiluit allat atuussinnaapput. Sallusuissut ilikkaramiuk peqqissimivoq isumataarlunilu, taamatut ingasattumik ajortuliortarnini ilagiinnut eqqunnagu. Taava immaqa siumukarlualerpoq, ajornartorsiutini eqqunngitsoq anigorluinnarlugu allaallu ilagiinni akisussaaffimmik angunigaqarusulerluni. Taavami meeqqanik atornerluisarsimasutut najukkamini suli tusaamasaaguni? Taamaakkuni ’assuarnaatsuussava . . . ilaginngisatsinni allaat unnersiutigisaasoq’? (1 Timûtiuse 3:1-7, 10; Títuse 1:7) Naamik, taamaannavianngilaq. Taamaattumik ilagiinni immikkut pisinnaatitaaffeqarnissamut piukkunnarnavianngilaq.

Kristumiu tunniulluinnarsimasoq ajortuliorpat

Jehovap nalunngilaa sanngiissuteqartugut allaallu kuisereernerup kingorna ajortuliortoorsinnaasugut. Apustili Johannesip nalimini kristumiut ima allaffigisimavai: ’Tamakkuninnga ilissinnut allappunga ajortulioqqunasi; ajortuliortoqaraluarpallu Ataatami illersuisoqarpugut, Jesus Kristusimik iluartuusumik, taannalu ajortitta matoorneqaatigaat, uaguinnaanngitsummi, silarsuarmiuttaaq tamarmik.’ (1 Juánase 2:1, 2) Aap, Jehovap kristumiut ajortuliortoortut Jesusip pilliutaa tunngavigalugu isumakkeerfigisarpai — ilumoorlutik peqqissimippata eqqunngitsumillu iliornertik soraaruppassuk.

Ukiuni hundredelinni siullerni Korinthimi ilagiinni tamatumunnga assersuutissaqarpoq. Ilagiinni nutaani taakkunani qanigisamik atoqateqartoqartarsimanera apustili Paulusip tusarsimavaa, ilagiillu ilitsersuuppai angut pineqartoq ilagiinnut ilaasortaajunnaarsissagaat. Kingusinnerusukkut ajortuliortup ajortuliani peqqissimissutigai, Paulusillu ilagiit kajumissaarpai taanna ilaasortaalerseqqeqqullugu. (1 Korintumiut 5:1, 13; 2 Korintumiut 2:5-9) Taamaalilluni Jehovap asannittumik tunniusimanerata katsorsaasinnaassusiatigut Jesusillu pilliutaata utertitsissutaasup nalingatigut angisuukkut angut ajortuliaminik piiaaffigineqarpoq. Ullumikkuttaaq taamatut pisoqarsinnaavoq. Taamaakkaluartorli inuk kuisissimasoq ingasattumik ajortuliorsimasoq peqqissimillunilu Jehovamit isumakkeerfigineqareeraluartoq ajortuliornerata kingunipilui atuutiinnarsinnaapput. — Ussatit 10:16, 17; Galâsiamiut 6:7.

Assersuutigalugu, niviarsiaq tunniulluinnarsimasoq kanngunartuliorsimasoq peqqissimisorujussuuvoq ilagiillu ikiuineratigut anersaakkut peqqisseqqilluni. Taavami kanngunartuliorsimanermi kingunerisaanik naartulersimappat? Iliuuserisimasaa pisuulluni inuunera avaqqunneqarsinnaanngitsumik allanngorluinnartussanngussaaq. Immaqaluunnit angut allasiorsimasoq peqqissimivoq ilagiinnillu anisitaanani. Aappaali pisuussuteqanngitsoq Biibili tunngavigalugu avissinnaatitaavoq, immaqalu taamaaliornissani qinerpaa. (Matîuse 19:9) Taamaaliorpat taava uia Jehovamit isumakkeerfigineqareeraluarluni ajortuliami kingunerisai ilungersornartut inuunini naallugu atortariaqassavai. — 1 Juánase 1:9.

Taavami angutip asanninngitsuliungaarluni nuliani qimappagu arnamut allamut katinnissani siunertaralugu? Immaqa kingorna peqqissimivoq ilagiinnullu ilaasortanngorteqqinneqarluni. Piffissap ingerlanerani siumukaqqilerpoq ’inersimassummullu ingerlalluni’. (Eprîarit 6:1) Nulianili siulleq aappaqanngittuartillugu ilagiinni akisussaaffinnik tigusinissamut pisinnaatitaalernavianngilaq. Tassami ’ataatsimik nuliaqanngilaq’ nuliaminit siullermit avissimanini Biibilimi tunngavissaqanngimmat. — 1 Timûtiuse 3:2, 12.

Tamakkua tamarmik sooq kristumiut ajortumik uumiginnilerniarnissaannut pissutissaalluannginnerpat?

Meeqqanimmi atornerluisut?

Taavami kristumiu inersimasoq kuisimasoq meeqqamik kinguaassiuutitigut atornerluisimappat? Ajortuliaq ima ajortigaa Jehovamit isumakkeerfigineqanngisaannassalluni? Naamik. Jesus oqarsimavoq ’anersaamut illernartumut assortuilluni mitallersoq’ isumakkeerfigineqarsinnaanngitsoq. Paulusilu oqarsimavoq sallusuissut nalunngikkaluarlugu piaaraluni ajortuliortuartoq ajortit pillugit pilliutissaarutissasoq. (Lúkarse 12:10; Eprîarit 10:26, 27) Biibilimili sumiluunniit oqaatigineqanngilaq kristumiu inersimasoq meeqqamik — qanigisaminik allamilluunniit — kinguaassiuutitigut atornerluisoq isumakkeerfigineqarsinnaanngitsoq. Uummammit pisumik ilumoorluni peqqissimiguni inooriaatsinilu allanngortillugu isumakkeerfigineqarsinnaavoq. Taamaakkaluartorli pissusipalaaq ineriartortissimasani suli akiortuarallassavaa. (Evfisumiut 1:7) Immaqalu kingunipilui avaqqussassaanngitsut atorallassavai.

Imaassinnaavoq atornerluisimasoq nunami najugarisamini inatsisit naapertorlugit parnaarussassanngortitaasoq allatigulluunniit pineqaatissinneqartoq. Tassuunakkut ilagiinnit sernissugaanavianngilaq. Taamaattorli angutip sanngiissutsi ilungersornartoq kingorna pissutsinut sunniuteqartussaq saqqummiussimavaa. Malunnarpat peqqissimisoq kajumissaarneqassaaq anersaakkut siumukarniarnissaminik, tamatumalu kingorna oqaluussinermut peqataalernissaminik, teokratiimik atuarfimmi atualernissaminik kiffartornermullu tunngasumik ataatsimiinnerni ilinniartitsinerunngitsunut peqataasalernissaminik. Taamaakkaluartorli tamanna isumaqanngilaq ilagiinni akisussaaffinnik tigusinissaminut piginnaassuseqalersoq. Tamatumunnga Biibilimi sunik pissutissaqarpa?

Siullermik, utoqqaanertaq ’killeerutiuitsuusariaqarpoq’, tassa imminut naalakkersinnaassuseqartariaqarpoq. (Títuse 1:8) Arlaannarpulluunniit tamakkiisumik imminut naalakkersinnaassuseqanngikkaluarpoq. (Rûmamiut 7:21-25) Kristumiulli inersimasup tunniulluinnarsimasup meeqqamik kinguaassiuutitigut atornerluilluni ajortuliornermigut takutippaa timikkut pissusissamisuunngitsumik sanngiissuteqarluni. Pissutsit piviusut takutippaat inersimasut taamaattut ataasiaannaratik meeqqamik atornerlueriaannaasartut. Soorunami meeqqamik atornerluisimasut tamakkeratik taamaalioqqittarput, amerlasuulli eqqarsaatigalugit taamaappoq. Ilagiillu uummatinik atuaasinnaannginnamik aalajangersinnaanngilaat kina meeqqanik atornerlueqqeriaannaasoq kinalu taamaanngitsoq. (Jeremia 17:9) Taamaattumik Paulusip Timoteusimut unnersuussutaa ingammik kristumiut inersimasut meeqqamik atornerluisimasut eqqarsaatigalugit atortussaavoq: ’Assannik patigassaraluatit pinasuarpallaassanngilatit, allalu ajortuliaasigut peqatigeqinagu.’ (1 Timûtiuse 5:22) Meeqqavut sernissorneqaqqullugit angut meeqqanik atornerluisarsimasutut ilisimaneqartoq ilagiinni akisussaaffinnik tigusinissaminut piginnaassuseqalersinnaanngilaq. Aamma pioneerinngorsinnaanngilaq allatulluunniillu piffissaq tamaat kiffartortunngorsinnaanani. — Naleqqiuguk najoqqutassiaq 2 Moses 21:28, 29-miittoq.

Immaqa inuit ilaat ima aperiumassapput: ’Aamma allatigut ajortuliorsimasut peqqissimisimasullu kingorna ajortuliortooqqeriataarsinnaannginnamik?’ Taamaalisoqartareersimavoq, pissutsilli assigiinngitsut eqqarsaatigineqartussaapput. Assersuutigalugu, inersimasut inersimasoqatiminnut qaninniartut itigartitsisinnaassuseqarput. Meeqqalli uukapaatikkuminarneroqalutillu, puussaruminarneroqalutillu qunutikkuminarnerujussuupput. Biibilimi oqaatigineqarpoq inuusuttuaqqat, imaluunniit meeqqat, „sianiissusermik“ pigisaqartut. (Ussatit 22:15; 1 Korintumiut 13:11) Jesusip meeqqat maniguussutsimut minguissutsimullu assersuutigisimavai. (Matîuse 18:4; Lúkarse 18:16, 17) Meeqqat minguissusiannut ilaavoq misilittagaqanngilluinnarnerat. Meeqqat amerlanersaat ammasuupput, nuannaartitserusussuseqarlutik taamaalillutillu inersimasumit peqqusersusaartumit nalunngisaminnit tatigisaminnillu atornerlunneqarnissamut nakutikkuminarnerullutik. Taamaattumik ilagiit meeqqanik sernissuinissaminnut Jehovamit akisussaatinneqarput.

Meeqqat perorsarluagaasut angajoqqaaminnut, utoqqaanertanut inersimasunullu allanut naalannissartik ataqqinninnissartillu ilikkartarpaat. (Evfisumiut 6:1, 2; 1 Timûtiuse 5:1, 2; Eprîarit 13:7) Meeqqat naalatassamissut isigisaasa ilaasa meeqqat tatiginninnerat minguitsoq tamanna atornerlullugu kinguaassiuutitigut kanngunartuliornermut akuersiinnartitsissutigissappassuk maajunnartuliornerussaaq ingasalluinnartoq. Taamatut kinguaassiuutitigut atornerlunneqarsimasut tamatuma misigissutsikkut kingunipilui ukiorpassuarni artorsaatigisarpaat. Taamaammat meeqqamik atornerluisoq ilagiinnit sakkortuumik perorsaatissinneqassaaq. Ilagiinni akisussaaffeqarpat tamanna sernissorneqassanngilaq, ilagiilli minguitsuutinneqarnissaat pingaarnerutinneqassalluni. — 2 Korintumiut 5:6; 2 Pîtruse 3:14.

Meeqqamik atornerluisimasoq ilumoorluni peqqissimiguni Biibilip najoqqutassiaanik atuinerup silatusaarnerussusia paasissavaa. Ajortumik uumissuinissani ilikkarluinnaruniuk iliuuserisimasani ajorilluinnassavaa ilungersorlunilu ajortuliani nangeqqinnaveersaassallugu. (Ussatit 8:13; Rûmamiut 12:9) Kiisalu Jehovap asanningaassusersua qujamasuutigalugu ajortuliortutut peqqissimisutut Guuterput illernartoq kiffartuuttuarsinnaassavaa „peqqusersuitsut“ nunarsuarmi naassaanngitsumik inuulerumaartussat akornanniinnissani neriugalugu. — Ussatit 2:21. (wE 1/1 97)

[Quppernerup ataani ilanngussaq]

[Qupp. 28-mi issuagaq]

Naak Jehovap isumakkeerfigereeraluaraatik ajortuliortut peqqissimisut avaqqunneqarsinnaanngitsumik kingunipilutsitsisinnaapput