Guutimit eqqissinermik tusarliisutut kiffartorpugut
„Ila tusarningaarami nuannersumik oqariartuuteqartup qaqqani pisuppalua, taassuma eqqissinermik tusarliisup.“ — JESAJA 52:7.
1, 2. (a) Jesaja 52:7-imi siulittuutigineqartutut nutaarsiassaq nuannersoq suna oqaluussissutigineqassava? (b) Esajasip siulittuutaa itsaq Israelikkunnut qanoq isumaqarpa?
NUANNERSUMIK oqaluussissutissaqarpoq! Eqqissineq pillugu nutaarsiassaavoq — eqqissineq piviusoq. Annassummik tusarliussaavoq, Guutillu naalagaaffianut attuumassuteqarluni. Jesaja kapitali 52-mi, versi 7-imi, pruffiitip ukiorpassuit matuma siorna tamanna pillugu allagai atuarsinnaavavut: „Ila tusarningaarami nuannersumik oqariartuuteqartup qaqqani pisuppalua, taassuma eqqissinermik tusarliisup, tusagassanik nuannersunik aatsisup, annaanneqarnermik tusarliisup Sionimullu oqartup: ’Guutit kunngiuvoq!’“
2 Jehovap pruffiitini Esajas isumassarsisillugu oqaatsit taakku allanneqartippai itsaq Israelikkunnut ullumikkullu uagutsinnut iluaqutissatut. Oqaatsit taakku qanoq isumaqarpat? Esajasip taakku allammagit naalagaaffiup avannarliup innuttai, Israelikkuusut, Assyriamiunit tigusatut immaqa aallarunneqareersimapput. Kingorna naalagaaffimmi kujallermi innuttaasut, Judakkut, tigusatut Babylonimut aallarunneqarput. Taakkununnga allanngorfiullunilu aliasuffiusimavoq Jehovamut naalannginnamik taamaattumillu Guuti eqqisseqatiginagu. Jehovap paasitissimavai iluanngitsuliaat tassaasut imminit avissaarsimatitsisut. (Jesaja 42:24; 59:2-4) Esajasili aqqutigalugu Jehovap siulittuutigaa piffissamut aalajangersimasumut Babylonip isaaffissui ammarumaarlugit. Jehovap innuttai aniguisitaallutik aallassapput angerlarlutik Jehovallu naalaffia sanaqqissallugu. Zion pilersinneqaqqissaaq, Jehovamillu pallorfiginninneq ilumoortoq Jerusalemimi pilersinneqaqqikkumaarpoq. — Jesaja 44:28; 52:1, 2.
3. Israelip pilerseqqinneqarnissaanut neriorsuut qanoq ililluni eqqissineqarnissamut aamma siulittuutaava?
3 Aniguisitaanissamik siulittuut aamma eqqissinissamik neriorsuutaavoq. Israelikkut Babylonimit aniguisitaallutik nunamut Jehovap tunniussaanut aallarsinnaalerpata Guutip nallittuineranut allamillu isumataarnerannut takussutissaassaaq. — Jesaja 14:1; 48:17, 18.
„Guutit kunngiuvoq“
4. (a) Ukiumi 537-mi u.n.s. ’Jehova Kunnginngorsimasoq’ qanoq paasisariaqarpa? (b) Qanoq ililluni tamatuma kingorna Jehovap innuttaminut iluaqutaasumik pisut aquppai?
4 Ukiumi 537-mi u.n.s. Jehovap innuttani aniguisimmagit Zionimut eqqortumik ima oqartoqarsinnaavoq: „Guutit kunngiuvoq!“ Soorunami Jehova „naassaanngitsumik kunngiuvoq“. (sarĸúmersitat 15:3, NV) Innuttanili aniguisimmagit kisimi oqartussaanera erseqqissaqqinneqarpoq. Tassaavoq Jehovap nunami naalakkersuisunit pissaaneqarnerpaanit pissaaneqarnerungaarneranut uppernarsaat ersarissoq. (Jeremia 51:56, 57) Jehovap anersaavata sunniineratigut innuttaanut perlulioqatigiinniartut allat aamma akornuserneqarput. (Ester 9:24, 25) Jehovap nammineq kisimi oqartussaalluni piumasami naammassineqartinniarlugu arlaleriarluni akuliuttarpoq Medo-persiamiut kunngii peqataatillugit. (Sakarja 4:6) Taamani pisimasut tupinnangaartut Biibilimi pruffiitinit Ezramit, Nehemiasimit, Haggajimit Zakariasimillu aamma Esterimik allakkat-ni allassimapput. Atuarneri uppernikkut nakussatsinnartorujussuupput.
5. Jesaja 52:13–53:12-mi pisimasut pingaartut suut pineqarpat?
5 Ukiumili 537-imi u.n.s. pisimasoq tamatumalu kingorna pisut aallaqqaataannaapput. Sanaqqinnissamik siulittuutip kingorna kapitali 52-imiittup nanginnerani Esajas Messiasip tikiunnissaa pillugu allappoq. (Jesaja 52:13–53:12) Jehova Messias, Jesus Kristus, aqqutigalugu tusarliussamik aniguisitaaffissamik eqqissinissamillu 537-imi u.n.s. pisimasumit pingaaruteqarnerujussuarmik tusarliussissaaq.
Jehovap eqqissinermik tusarliisua pingaarneq
6. Eqqissinermik Jehovap tusarliisua pingaarneq kinaava, allassimaffillu suna imminut atorpaa?
6 Jehovap pingaartumik Jesus Kristus eqqissinermik tusarliisutut atorsimavaa. Taannaavoq Guutip oqaasia, tassa Jehovap oqaaseqartitaa. (Juánase 1:14) Tamatumunnga naleqquttumik Jesus Jordanip kuussuani kuisereernermi kingorna naalagiartarfimmut Nazaretimiittumut iserpoq, nikuilluni nipituumik Jesaja kapitali 61-miit atuarpoq suna suliassarinerlugu erseqqissarniarlugu. Taamaalilluni paasititsivoq ’iperagaasoqarnissaanik’, tappissisoqaqqinnissaanik Guutimillu iluarisaasoqarnissaanik oqaluussisussatut aallartitaasimalluni. Jesusilli eqqissinermik tusarliussaq kisiat oqaluussissutiginngilaa. Guutip aamma aallartissimavaa eqqissinermik ataavartumik tunngaviliisussatut. — Lúkarse 4:16-21.
7. Guutimit eqqissineq Jesus Kristusikkut piviusunngorsinnaasoq sumik nassataqassava?
7 Jesusip inunngornerani inngilerpassuit savanik paarsisunut Betlehemip eqqaaniittunut takutissimapput, Guutilu unnersiutigaat oqaatsinik ukuninnga: ’Naalannarsili Guuti qutsinnermi; nunamilu inuit Guutip iluarisaasa akornanni eqqissineqarli.’ (Lúkarse 2:8, 13, 14, NV) Guutip ernini aqqutigalugu aaqqissuussineranik uppernertik pissutigalugu Guutimut iluarisaasut akornanni eqqissineqassaaq. Tassa imaappoq naak inuit ajortiliullutik inuusimagaluartut, Guutimut minguitsutut sassarsinnaapput, taassumunngalu ajunngitsumik attaveqalersinnaallutik. (Rûmamiut 5:1) Eqqissineq qamannga pisoq allatigut anguneqarsinnaanngitsoq misigissavaat. Piffissami Guutip aalajangersagaani Adamimit ajortisiatta sunniutaanit tamanit aniguisinneqarumaarpugut — allaat nappaatinit toqumillu. Tappiitsoqarunnaassaaq, tusilartoqarunnaarluni tusiattoqarunnaarluniluunniit. Innarluuteqarnerit pakatsinartut sianissutsikkullu naalliuutit isumatsannartut tamarmik peerneqavissapput. Inuuneq naammalluinnartoq naassaanngitsoq angusinnaalissavarput. — Jesaja 33:24; Matîuse 9:35; Juánase 3:16.
8. Guutimit eqqissinermik kikkut neqeroorfigineqassappat?
8 Eqqissinermik taama ittumik kikkut neqeroorfigineqassappat? Jesus Kristusimut uppertut tamarmik. Apustili Paulus allassimavoq ’Guutip iluarigaa Kristusikkut suut tamaasa imminut saammaannartissallugit [napakkami naalliutsitaaffimmi, NV] aavagut eqissivissiorluni’. Apustili nangippoq saammaannartinneqarneq tamanna ’qilammiittunut’ attuumassuteqartoq, tassa Kristusip qilammi kingornusseqatissai. Saammaannartinneqarneq ’nunamiittunut’ aamma attuumassuteqarpoq, tassa nunami paratiisinngorteqqitami naassaanngitsumik inuunissamut periarfissaqartussanut. (Kulorsamiut 1:19, 20) Aap, Jesusip pilliutaata nalingata iluaqutigineratigut Guutilu uummatikkut naalanneratigut Guuti qanimut ikinngutigilersinnaavaat. — Naleqqiuguk Jâko 2:22, 23.
9. (a) Guutimit eqqissinerput allanut attaveqarnitsinnut qanoq sunniuteqassava? (b) Sumi tamaani ataavartumik eqqissineqarnissaa siunertaralugu Jehovap ernini qanoq oqartussaassulerpaa?
9 Guutimik eqqissineq tamanna pingaarutilerujussuuvoq. Guuti eqqisseqatiginngikkaanni allamut ataavartumik siunertaqartumillu attaveqarnissaq anguneqarsinnaanngilaq. Jehovamik eqqisseqatiginninneq nunarsuarmi piviusumik eqqissinissamut tunngaviuvoq. (Jesaja 57:19-21) Jesus Kristus tulluartumik Naalakkamik eqqissisitsisumik taaneqarsimavoq. (Jesaja 9:6) Taanna aqqutigalugu inuit Guutimik saammaannartinneqarsinnaapput, Naalagaaffimmilu naalakkersuisussatut Jehovap taanna akisussaatippaa. (Daniel 7:13, 14) Jesusip inunnut siulersuilluni naalakkersuinissaanut atatillugu, Jehovap ima neriorsoqqissaarpaatigut: ’Eqqissinerlu ataavassaaq.’ — Jesaja 9:7; Tussiaat 72:7.
10. Eqqissineq pillugu Guutip tusarliussaanik oqaluussinermut atatillugu Jesus qanoq maligassiuisimava?
10 Eqqissinermik tusarliussaq tamanna inuit tamarmik pisariaqartippaat. Jesusip tusarliussamik tamatuminnga oqaluussissutiginnilluni aallussilluarnera maligassiuineruvoq. Jerusalemimi naalaffimmi oqaluussisarpoq, qaqqat sivingarnini, aqqusinerni, puilasup eqqaani arnamut samariamiumut inuillu angerlarsimaffiini. Sumiluunniit inuit suffigisaanni Jesus Guutip naalagaaffianik oqaluussissutiginnilluni periarfissarsiortuartarpoq. — Matîuse 4:18, 19; 5:1, 2; 9:9; 26:55; Mákorse 6:34; Lúkarse 19:1-10; Juánase 4:5-26.
Kristusimik malinnittussatut ajoqersukkat
11. Suliamut sumut Jesusip ajoqersukkani ajoqersorpai?
11 Jesusip ajoqersukkani Guutimit eqqissinermik oqaluussisussatut ajoqersortarpai. Ajoqersugaasa paasisimavaat Jesus tassaasoq Jehovap ’nalunaajaasua ilumoortoq’, taamatullu namminneq assingusumik oqaluussinissamik akisussaaffeqarlutik. (sarĸúmersitat 3:14; Jesaja 43:10-12) Kristus Siulersortimissut isigaat.
12. Oqaluussinerup pingaaruteqarnera Paulusip qanoq erseqqissarpaa?
12 Apustilip Paulusip oqaluussinerup pingaaruteqarnera ima oqarluni erseqqissarpaa: ’Allakkat ima oqaaseqarput: ’kinaluunniit taassumunnga uppertoq pakatisarneqassanngilaq’. Ima oqaatigisariaqarpoq Jesus Kristusimut annassutitut uppertut pakatsisarneqassanngitsut. Kinaluunniit inuiaqatigiissutsikkut tunuliaqutani tunngavigalugu pisinnaajunnaarsinneqanngilaq. Paulusimi ima nangippoq: ’Naligiippummi juutit griikerillu ataaseq tamarmik naalagarimmassuk torlorfigisiminut tamanut pisoorsuusoq. Tassami „kinaluunniit [Jehovap] aqqanik torlorfiginnittoq annakkumaarpoq“.’ (Rûmamiut 10:11-13) Periarfissarli tamanna inuit qanoq ilillutik maluginiassavaat?
13. Inuit tusagassaq nuannersoq tusassappassuk suna pisariaqarpa, ukiunilu hundredelinni siullerni kristumiut pisariaqartitamik tamatuminnga qanoq matusiniarsimappat?
13 Paulus kristumiut tamarmik eqqarsaatigisassaannik apeqquteqarpoq, imatut: ’Qanorli ilillutik upperfiginngisartik torlorfigissavaat? Qanorlu ilillutik oqaluussisoqanngippat tusassappat? Qanorlu ilillutik tusaamanngisartik upperfigissavaat? Qanorlu ilillutik aallartinneqanngikkunik oqaluussissappat? ’ (Rûmamiut 10:14, 15) Kristumiut siulliit pillugit atuaraangatta, takusinnaasarparput angutit arnallu, meeqqat utoqqaallu Jesus apustiliisalu maligassiaat malikkaat. Nutaarsiassamik nuannersumik aallussilluarlutik oqaluussissutiginnipput. Jesusip malinnittaatut inunnut sumiluunniit naapitaminnut periarfissalimmi oqaluussisarput. Kikkulluunniit tamaasa angorusuppaat taamaattumik sumiluunniit illumiillu illumut angalaarlutik oqaluussisarput. — apustilit suliait 17:17; 20:20.
14. Nutaarsiassamik nuannersumik oqaluussisut isigaat takujuminartuusut qanoq paasisariaqarpa?
14 Soorunami tamarmik kristumiunik oqaluussisartunik inussiarnersumik ilassinninngillat. Paulusilli Jesaja 52:7-miit issuagaasa ilumoorneri erserput. Ima aperereerluni: ’Qanorli ilillutik aallartinneqanngikkunik oqaluussissappat?’ Paulus nangippoq: ’Soorlu allassimasoq: „Eqqissinermik nalunaarummik ajunngitsumik oqaluutiginnittut isigaasa ila sakimminassusii.“’ Nutsiinnavillugu ima allassimavoq: ’Ajunngitsumik oqaluutiginnittut isigaasa kusanassusii.’ Ikinnerpaartatta isikkavut kusanartutut pinnersutulluunniit isigigunarpaat. Qanormi isumaqarpa? Oqaluussinermi isikkat atorlugit angalasoqartarpoq. Taamaattumik isikkat inuttaanut sinniisuupput. Qularnanngivippoq ukiuni hundredelinni siullerni amerlasuut nutaarsiassamik nuannersumik apustilinit Jesusillu ajoqersugaanit allanit tusartut isumaqarsimassasut kristumiut siulliit taakkua takujuminartuusut. (apustilit suliait 16:13-15) Aammattaaq Guutip isaani erlinnartuupput.
15, 16. (a) Kristumiut siulliit eqqissinerup tusarliisorigaatsik qanoq takutippaat? (b) Ukiuni hundredelinni siullerni kristumiut assigalugit kiffartornitsinni suup ikiorsinnaavaatigut?
15 Jesusip ajoqersugai eqqissinermik tusarliussisuupput, eqqissisimasumillu saqqummiuttarpaat. Jesusip ajoqersukkani ima ajoqersorpai: ’Illumut sumulluunniit iseraangassi ima oqaqqaartaritsi: „Illu manna eqqissinarsili.“ Tassanilu eqqissinermik pissuseqartoqarpat eqqisseqqussutisi taanna uninngavigissavaa, taamaattoqanngippalli uterfigissavaasi.’ (Lúkarse 10:5, 6) Sjalōmʹ, isumaqartoq „eqqissineq“, juutit ilassinninnermut ileqqutoqarisimavaat. Jesusilli unnersuussutaa isumaqarnerujussuuvoq. Ajoqersugaasa Kristus sinnerlugu oqariartortitatut inuit ’Guutimut saammaannarteqqullugit’ kajumissaartarpaat. (2 Korintumiut 5:20) Jesusip siunnersuutaa malippaat inuillu Guutip naalagaaffianik aammalu taakkununnga qanoq isumaqarsinnaasoq oqaluttuullugit. Tusarnaartut pilluaqqusaassapput, akerlianik tusarliussamik sumiginnaasut akissarsiassamik maangaannartitsissallutik.
16 Ullumikkut Jehovap nalunaajaasuisa kiffartuutertik tamatumunnga assingusumik suliaraat. Nutaarsiassaq nuannersoq inunnut tusarliussaat nammineerlutik suliarinngilaat; Aallartitsisaannit pivoq. Peqquneqarsimapput ingerlateqqullugu. Inuit akuerigunikku pilluaqqusaangaarnermik kinguneqarsinnaavoq. Sumiginnarunikku Jehova Guutimik erneranillu Jesus Kristusimik eqqissineq sumiginnassavaat. — Lúkarse 10:16
Silarsuarmi eqqissisimaffiunngitsumi eqqissisimasut
17. Soqqusaatsuliorfigineqarutta qanoq iliussaagut, aamma sooq?
17 Inuilli qanorluunniit qisuariaraluarpata pingaaruteqarpoq Jehovap kiffaasut immitsinnut eqqaasissalluta eqqissinermik Guutip pianik tusarliisuulluta. Inuit silarsuarmiut immaqa oqqakkumassavaatigut kamaammersinnaallutillu nilliallutik, imaluunniit mitallerlutik sumilluunniit iluarinngisaminnik taakkartuisinnaapput. Siornatigut immaqa uagut aamma taamaassimavugut, maannali allamik inooriaaseqalersimalluta. Silarsuup ilagiunnaarsimavaatigut inooriaasialu malinniarusunngilarput. (Evfisumiut 4:23, 24, 31; Jâko 1:19, 20) Allat qanorluunniit qisuariaraluarpata ilungersorluta unnersuut una malinniassavarput: ’Ajornanngippat sapinngisassinnik inuit tamaasa eqqissiveqatiginiarsigik.’ — Rûmamiut 12:18.
18. Oqartussaassusilik sioorasaarerpasippat qanoq qisuariassaagut, aamma sooq?
18 Kiffartuussinerput ilaatigut ima kinguneqarsinnaavoq inunnik oqartussaassusilinnit ’piumaffigineqarsinnaalluta’ nassuiaqqullugu sooq arlaannik aalajangersimasumik iliornersugut — imaluunniit sooq taamaaliunnginnersugut. Immaqa paaserusuppaat sooq tusarliussaq eqqunngitsumik upperisarsiorneq qulaajarlugu pissutsillu matuma aaqqissuussaanerata naggatissaa eqqartorlugu oqaluussissutigisarneripput. Jesusip maligassiaa ataqqillugu saamasumik ataqqinnittumillu oqalussaagut. (1 Pîtruse 2:23; 3:15) Inuit oqartussaasut immaqa ilagiinni palasinit imaluunniit qullersarisaminnit tatineqartarput. Saamasumik ataqqinnittumillu akinikkut paasitinneqarsinnaapput suliarput taakkununnga inuiaqatigiinnulluunniit ajoqutaanngitsoq. Akerlianik tusarliussatsinnik ilassinnittut ataqqinnittunngortarput, suleqatiginnikkusussuseqarlutik eqqissisimasuullutillu. — Títuse 3:1, 2.
19. Jehovap nalunaajaasui sunngisaannarpat?
19 Jehovap nalunaajaasui nunarsuaq tamakkerlugu silarsuarmi saqitsaannernut akuliunneq ajortutut ilisimaneqartarput. Silarsuarmi naggueqatigiinnikkut, upperisarsiornikkut imaluunniit politikkikkut akerleriissuteqarnernut akuliunneq ajorput. (Juánase 17:14) Guutip oqaasiani ’naalakkersuisunut akimanernut naalattooqquneqaratta’, eqqarsaatiginianngilarpulluunniit pikitsitsinissamut peqataanissarput imaluunniit politikkimut aalajangersimasumut akerlilersuinissarput. (Rûmamiut 13:1) Jehovap nalunaajaasui suliniaqatigiinnut arlaannaannulluunniit pikitsitsiniartunut ilanngutinngisaannarput. Jehovap kiffaminut kristumiunut ileqqoreqqusai eqqarsaatigissagaanni aammik kuiseqataanissarput imaluunniit nakuuserfiginninnissarput takorloorneqarsinnaanngivippoq. Kristumiut ilumoortut eqqissinissaq oqaluutigiinnanngilaat; tusarliussaq oqaluussissutigisartik malillugu inuupput.
20. Eqqissineq pillugu Babylon Angisuup suna takutippaa?
20 Kristumiunut ilumoortunut akerliusumik kristumiuuneraqatigiit upperisarsiornikkut peqatigiiffiisa sinniisui eqqissinermik tusarliussisuusimanngillat. Upperisarsiornerit tamarmik Babylon Angisuumut ilaasut — kristumiuuneraqatigiit kristumiuunngitsullu — inuiaqatigiit sorsunnerinut toqqaannartumik toqqaannanngitsumillu tapersersuisuusimapput imaluunniit siuttuusimallutik. Aammattaaq Jehovamut aalajaallutik kiffaasut malersorneqartippaat allaalluunniit toqunneqartillugit. sarĸúmersitat 18:24-imi Babylon angisooq pillugu oqaatigineqarpoq: ’Taassumanilu pruffiitit iluartullu aavi nunamilu toqutaasut tamarmik aavi nanineqarput.’
21. Jehovap innuttaasa eqqunngitsumillu upperisarsiortut assigiinngissutaat takugaangamikkik eqqortumik isumallit amerlasuut qanoq qisuariartarpat?
21 Kristumiuuneraqatigiinnut Babylon angisuumullu ilaasunut allanut akerliusumik upperisarsiorneq ilumoortoq tassaavoq nukik ineriartornartoq ataasiussuseqartitsisoq. Jesus Kristusip ajoqersukkani ilumoortut pillugit ima oqarpoq: ’Matumannga tamarmik ilisarissavaasi ajoqersugarigissi: asaqatigiikkussi.’ (Juánase 13:35) Asanninnerup tamatuma inunnut inuiaqatigiissutsikkut, aningaasaqarnikkut, naggueqatigiissutikkullu killeqarnerit avissaartitsisartut qaangerluarsinnaavai. Nunarsuaq tamakkerlugu inuit millionilippassuit tamanna maluginiarsimavaat, taamaattumillu Jehovap kiffaanut tanitanut ima oqarlutik: „Ingerlaqatigissavassi tusaratsigu Guutip najoraasi.“ — Sakarja 8:23.
22. Oqaluussineq suli ingerlasussaq qanoq isigaarput?
22 Jehovap innuttaatut naammassineqarsimasut nuannaarutigeqaavut, suliarli suli uninngilaq. Nunaatilik inerittulersuisimaguni inerittussaatinilu ineriartortikkunigit, soorunami katersugassanik katersuileruttorfimmi suliani unitsiinnarnavianngilaa. Katersuiffimmi immikkut annerusumik kipisuitsumillu suliaqarfiusarpoq. Maannakkullu Jehovamik pallorfiginninnermi siornagut taama annertutigisumik pisimanngisaannartumi katersuineqarpoq. Maanna nuannaarfiuvoq. (Jesaja 9:3) Aammali akerlilersuinerit soqutigisaqannginnerlu naammattoortarpavut. Immaqa aamma nappaatit ilungersunartut, ilaqutariinni ajornartorsiutit imaluunniit aningaasaqarnikkut ajornartoorneq misigisinnaavavut. Jehovamulli asanninnitta oqaluussinermut ingerlatittuarpaatigut. Tusagassaq tusarliussarput inuit atorfissaqartippaat. Eqqissinermik tusarliussaavoq. Jesusip oqaluussissutiginninnermi tusarliussaata assigaa, tassa nutaarsiassaq nuannersoq Guutip naalagaaffianik. (wE 15/1 97)
Apeqqutit uteqqiissutit
□ Jesaja 52:7 itsaq Israelimut qanoq eqquuppa?
□ Eqqissinermik tusarliisuulluni pingaarneq Jesusip qanoq ersersippaa?
□ Paulusip Jesaja 52:7 kristumiut suliaannut qanoq attuumassuteqartippaa?
□ Nalitsinni eqqissinermik tusarliisuuneq sumik nassataqarpa?
[Qupp. 13-imi assiliartaq]
Jehovap nalunaajaasui Jesusitulli Guutimit eqqissinermik tusarliisuupput
[Qupp. 15-imi assiliartaq]
Inuit Naalagaaffimmik tusarliussamut qanorluunniit qisuariaraluarpata Jehovap nalunaajaasui eqqissisimasuupput