Eqqissinissaq piviusoq kajungeralugulu noqqaassutigiuk!
’Inuunermimmi nuannarinnikkumasup ullussallu ajunngitsut takujumallugit . . . ajortoq nigorlugu ajunngitsuliorli, eqqissinissaq kajungeralugulu noqqaassutigiliuk.’ — 1 PÎTRUSE 3:10, 11.
1. Esajasip oqaasii ilisimaneqarluartut suut piviusunngortinneqarumaarpat?
„SAFFIUSSAVAAT panatik assallatserummut savissaliaralugit, qalugiusatillu saviliaralugit, viinnequtilerissutit; inuiaat panamik imminnut silugutissaassapput, sakkunik atuinissamut sungiusarunnaassallutik.“ (Jesaja 2:4) Naak oqaatsit tusaamasaasut taakku New Yorkimi Naalagaaffiit Peqatigiit qullersaqarfiata eqqaani allanneqarsimagaluartut silarsuaq tamakkerlugu peqatigiiffiit taakkua piviusunngortissinnaanngivippaat. Jehova Guutilli oqaasianut eqquutinngitsoorsinnaanngitsunut ilaagamik nalunaarut tamanna naammassineqarumaarpoq. — Jesaja 55:10, 11.
2. Jesaja 2:2, 3 naapertorlugu ’ulluni kingullerni’ qanoq pisoqassava?
2 Jesaja 2:4-mi allassimasut siulittuummut tupinnartumut ilaapput — siulittuut eqqissinissaq piviusoq pillugu — ukiunilu inuuffigisatsinni eqquukkiartorpoq. Sorsuttoqarunnaarnissaata sakkussiaqarunnaarnissaatalu siulittuutip siuliani ima allassimavoq: „Ullussani kingullerni Jehovap illuata qaqqaa qaqqat kaarfisa qulaanni aalajangersitaajumaarpoq, qattunernillu qutsinnerusunngortitaajumaarpoq; inuiaallu tamarmik tassunga aggiajumaarput. Inuiappassuillu aallarumaarput oqarlutik: ’Qaagitsi, Jehovap qaqqaanut majuarta, Jakobip Guutiata illuanut; aqqutigeqqusaminik ajoqersorumaarpaatigut, aqqusernisigullu ingerlassaagut.’ Inatsisit Zionimit aniumaarmata, Jehovallu oqaasia Jerusalemimit.“ — Jesaja 2:2, 3, NV.
Inuit eqqissisimaartunngorsinnaapput
3. Inuk assortuiumatuugaluartoq qanoq ililluni qanilaartunngorsinnaava?
3 Jehovamit ilinniartinneqarnissaq naalalluni ilassigaanni Kristusilu maligassatut malileraanni eqqarsartaaseq iliuutsillu allanngortarput, taamaalilluni assortuiumatuujusimagaluartoq qanilaartunngortarluni. Tamanna qanoq ililluni pisinnaava? Rûmamiunut agdlagkat 12:2-mi ima allassimavoq: ’Silallu matuma inui ileqqoqatigeqinasigik, allanngoritsili isumassigut nutaanngorlusi, sianigileqqullusiuk sunaasoq Guutip peqqusaa ajunngitsoq iluarisassarlu naammalluinnartorlu.’ Guutip oqaasianik atuaqqissaarnitsigut isumarput nutaanngortissinnaavarput, imaluunniit sammivimmut nutaamut sangutissinnaallugu. Biibilimi aalajangersimasumik atuaqqissaaraangatta Guutip uagutsinnut piumasaanik qanorlu iliortariaqakkatsinnik eqqaasinneqartuartarpugut. — Tussiaat 119:105.
4. Inuk qanoq ililluni eqqissinermik nuannarisaqartunngorsinnaava?
4 Oqaatsit sallusuissutaasut tamakkua eqqarsariaaserput iliuutsivullu allanngortittarpaat. Inunngortittarpaatigut nutaat eqqissinermik nuannarisaqartut kristumiut pissuserilerniagassaattut Paulusip oqaatigisaatut: ’Inutoqaq siornagut angalaaserisarsi iperassagissi, taanna pileritsannernik salloqittaataasunik imminik aserorniartoq; nutaanngortissasusili anersaassigut isumaqaatissigut, inuttaarlu Guuti assilillugu pinngortitaq atissagissi iluartillugu illernartillugulu ilumoornikkut.’ (Evfisumiut 4:22-24) ’Anersaaq isumaqaat’ nutaaq tamanna tassaavoq ilutsinni nukik, nukillu tamanna nakussatsinneqartarpoq Jehovamik, taassuma inatsisaanik najoqqutassiaanillu asanninnitsinnit. Anersaakkut sumi inissisimanitsinnik ilumoortumik takutitsisarpoq. Eqqissinermillu ilaqarpoq.
5. Jesusip ajoqersukkaminut ’inassutaa nutaaq’ qanoq ililluni eqqisseqatigiissitsisinnaava?
5 Taamatut allanngornissamut pisariaqartut Jesusip ajoqersuutaatigut iliuusiisigullu ersarilluarput. Ima oqarpoq: ’Inassummik nutaamik tunivassi, asaqatigeeqqullusi; soorlu uanga asagissi, taamattaaq ilissi asaqatigiissaasi. Matumannga tamarmik ilisarissavaasi ajoqersugarigissi: asaqatigiikkussi.’ (Juánase 13:34, 35) Asanninnerup namminissarsiunngitsup tamatuma Jesusip ajoqersugai ataasiussuseqartilluinnarpai. (Kulorsamiut 3:14) ’Inassut nutaaq’ tamanna aatsaat akuerigaanni maleruaraannilu eqqissineq Guutip neriorsuutigisaa misigineqarsinnaavoq. Ullumikkut taamaaliortoqarpa?
6. Sooq Jehovap nalunaajaasuisa eqqissineq nuannaarutigisinnaavaat silamiunit allaanerullutik?
6 Jehovap nalunaajaasuisa nunarsuaq tamakkerlugu qatanngutigiissuartut peqatigiinnerminni asanninneq tamanna imminnut ersersinniartarpaat; tamanna pissutaavoq politikkikkut imaluunnniit upperisarsiornikkut qanorluunniit tatineqartigigaluaraangamik silarsuarmi akerleriissuteqarnernut akuliutinngisaannarnerannut. Jehovap nalunaajaasui silarsuarmi inuiannit tamaneersuupput, Jehovamillu ajoqersorneqartipput. Ajoqersorneqarnertik tamanna iluaqutigalugu eqqissinermik nuannarisaqartuupput. (Jesaja 54:13) Politikkikkut akerleriissuteqarnernut akuliunneq ajorput. Sorsunnernut qanorluunniit ittunut peqataaneq ajorput. Ilaasa siornatigut kamassarissuusimagaluartut inuunertik allanngortilluinnarsimavaat. Tassaalersimapput kristumiut eqqissinermik nuannarisaqartut Jesusimik malinnittut. Uummatikkut iluunngarlutik Peterip kajumissaarutaa maleruartarpaat: ’Inuunermimmi nuannarinnikkumasup ullussallu ajunngitsut takujumallugit oqqi pitsaalissavaa ajortumeeqqunagu qarlunilu peqquserluttumik oqaloqqunagit, ajortoq nigorlugu ajunngitsuliorli, eqqissinissaq kajungeralugulu noqqaassutigiliuk.’ — 1 Pîtruse 3:10, 11; Evfisumiut 4:3.
Eqqissinermik noqqaassutiginnittut
7, 8. Inunnik sorsukkunnaarsimasunik eqqissinermillu piviusumik noqqaassutiginnilersimasunik assersuutinik taasaqarit. (Allanik nalunngisannik taasaqarit.)
7 Israelimiu, Rami Oved, tamatumunnga assersuutissaavoq. Siornatigut sakkutuunut, peqqarniisaarnianut akiuuttussatut immikkut sungiusarsimasunut, naalagaasimagaluarpoq. Akeqqaminik toqutsinissamut sungiusarsimavoq. Inuiaassutsimik pingaartitsilluinnartuusimavoq — arnamut asasaminut katinnissaminik juutit ajoqersuisuisa akuersiumannginnerat tikillugu. Sooq akuersiumanngillat? Asiameersuummat, juutiunani. Taava sallusuissut Biibilimi ujalerpaa. Jehovap nalunaajaasui attaveqarfigisalerpai. Jehovap nalunaajaasui ilagalugit Biibilimik atuaqqissaartarnermigut paasivaa inuiaassutsimik pingaartitsisutut ingasattajaarniatut ingerlaannarsinnaanani. Kristumiutut asanninnerup nassatarai sorsuttarunnaarneq sakkulisartarunnaarnerlu, inunnillu assigiinngitsunik tamanik nagguilinnik asanninnissamik ilinniarneq. Ullut ilaanni tupaallaatigisaminik inussiarnersumik allagarsivoq ima aallartittunik: „Rami, qatanngutiga!“ Sooq tamanna tupaallaatigaa? Allattoq Palæstinamiuummat, Jehovap nalunaajaasuisa ilaat. „Isumaqarsimagaluarpunga taamaattoqarsinnaanngilluinnartoq,“ Rami oqarpoq. „Palæstinamiummi akeraraakka, maannalu ilaata qatanngumminik taavaanga!“ Ramip nuliatalu maanna Guutip piumasaatut eqqissineq noqqaassutigisarpaat.
8 Georg Reuter, sorsunnersuup aappaani tyskit sakkutuuinut Ruslandimut isaasunut ilaasimasoq, aamma assersuutitut taasinnaavarput. Sorsoqataatilluni Hitlerip silarsuarmut naalagaassuseq pillugu pilersaarutai amiilaarnaannartut pakatsissutigisimavai. Sorsunnerup kingorna angerlarami Jehovap nalunaajaasui ilagalugit Biibili atuaqqissaartalerpaa. Ima allappoq: „Piffissap ingerlanerani ikkussortakkallusooq inissavimminnut inissitsitilerput. Paasilerpara sorsunnersuup aappaani aammik kuisinersuarmut Guuti pisuunngitsoq. Ilinniarpara Guutip silarsuaq tamakkerlugu paratiisimik inunnut naalattunut naassaanngitsumik pilluaqqussutissartalimmik pilersitsinissani siunertarigaa. . . . Hitlerip pingaakujulluni eqqartorsimavaa ’ukiuni tuusintini naalagaaffissani’, ukiuni aqqaneq-marluinnarni atasoq amiilaarnarnerpaamik kingunilimmik! Kristus kisimi — Hitler imaluunniit nunarsuarmi naalakkat arlaannaalluunniit pinnani — nunarsuarmi ukiuni tuusintini naalakkersuinermik pilersitsisinnaavoq.“ Maanna ukiut 50-it sinnerlugit Georg eqqissinermik piviusumik tusarliisutut piffissaq tamaat oqaluussisartuuvoq.
9. Jehovap nalunaajaasuisa Tysklandimi nazistit nalaanni misilittagaasa qanoq takutippaat taakku qunusuillutillu eqqissisimaartuusimasut?
9 Tysklandimi nazistit nalaanni qatanngutitta eqqissinermik nuannarisaqartut akuliukkumannginnertik assuarnaassusertillu ima aalajangiusimalluarsimatigaat ukiut 50-it qaangiunneranni suli nalunaajaataasarluni. Atuagassiaaqqami qanittukkut Holocaust-museet-imit Washingtonimi USA-miittumit saqqummersinneqartumi ima allassimasoqarpoq: „Jehovap nalunaajaasui nazistit naalakkersuinerata nalaani peqqarniitsumik qinugineqarput. . . . Naak pillakkanut inissiarsuarni naalliutsitaasaraluarlutik, peqqarneeqisumik pineqartaraluarlutik, ilaatigullu allaat pillakkatut toqutaasaraluarlutik sapiissuseq [upperisaminnik taamaatitsiumannginnermikkut] ersersittagaat taamanikkut assut ataqqineqalissutigaat.“ Atuagassiaaqqami aamma allassimavoq: „Pillakkanut inissiarsuit aniguisiortorneqarneranni Jehovap nalunaajaasuisa suliartik aniguisut akornanni ingerlatiinnarpaat, tamakkua akornanni uppertunik nassaartorlutik.“
Allanngornissaq annertunerungaartoq
10. (a) Eqqissinissaq piviusoq atuutilissappat allanngorneq suna pisariaqarpa? (b) Tamanna Danielimik allakkani qanoq siulittuutigineqarpa?
10 Tassa imaappa Jehovap nalunaajaasui isumaqartut inuppassuarnik kristumiutut akuliunnaveersaartunngortitsiortornikkut eqqissinermik pilersitsisinnaallutik? Naamik! Silarsuarmi eqqissineqassappat allanngorneq annerujussuaq pisariaqarpoq. Suna? Avissaartuussutaasut, uumissuissutaasut saqitsaassutaasullu tamarmik peerneqartariaqarput Guutip naalagaaffianik Jesusip ajoqersukkaminut qinnutigeqqusaanik taarserneqarlutik. (Matîuse 6:9, 10) Qanoq ililluni piumaarpa? Sinnattukkut Guutimit takorruuisinneqarluni pruffiiti Daniel paasitinneqarsimavoq ulluni kingullerni Guutip naalagaaffiata ’ujaqqatut inuit assaannit pineqarnani kaanngartutut’ inuusaliaq inuiaat nunarsuarmi naalagaaffiinut tamanut assersuutaasoq sequmisissagaa. Ima nalunaarpoq: „Naalagaaffinnguit taakkua kunngii inuutillugit Guutip qilammiusup naalagaaffik qaqugumulluunniit atasussaq pilersikkumaarpaa, kingornalu inuiaat allat naalagaaffimmik pilersitsisinnaassanngillat. Guutip naalagaaffiata naalagaaffiit taakku tamaasa aserussavai sequmisillugit, namminerli soraajuitsumik atassaaq.“ — Daniel 2:31-44.
11. Qanoq ililluni Jehova eqqissisitsiniarluni allannguissava?
11 Sooq silarsuarmi taama annertutigisumik allanngorneqassava? Jehova neriorsuisimammat nunarsuarmik mingutsitsisut aserorterisullu tamaasa piiassallugit. (sarĸúmersitat 11:18) Allanngorneq tamanna pissaaq Jehovap Satanimut silarsuaanullu ajortumut sorsunnerani naapertuilluartumi. sarĸúmersitat 16:14, 16-imi ima allassimavoq: ’Taakkunani [oqaatsini isumassarsiarititaasuni minguttuuni] anersaapiluit nalunaaqqutiliortut anersaartaraat, aallarpullu inuit najugaata tamarmi kunngiinut sorsunnissamut Guutip ajugaqanngitsup ullussarsuani . . . Najukkamullu hebriiarit oqaasiinik Harmagedonimik taaneqartumut katersorpai.’
12. Harmagedonimi qanoq pisoqassava?
12 Harmagedonimi qanoq pisoqassagami? Atomimik ajunaarnersuaq ajunaarnersuarluunniit inuit atornerluinerannik silaatsuliornerannilluunniit pissuteqartoq pinavianngilaq. Aap, Harmagedon Guutip sorsunneraa, sorsunneq sorsunnernik sorsunnermillu pilersitsisunik tamanik piiaasussaq. Tassaassaaq sorsunneq inunnut eqqissinermik nuannarisaqartunut tamanut iluaqutaasumik Guutip eqqissinermik pilersitsiffissaa. Aap, Harmagedon Jehovap siunertaa eqqorlugu takkutissaaq. Akuliunnissaa kingusinaarnavianngilaq. Jehovap pruffiitia Habakkuk isumassarsisitaalluni ima allassimavoq: „Takorluukkammi suli eqquutinngilaq eqquuffissaali qanillivoq, eqquutinngitsuussanngilaq! Nalliutiaanngikkaluarpat utaqqiinnarina, eqquutinngitsoorani piviusunngorumaarmat.“ (Habakkuk 2:3) Inuttut erinitsaqqajaasarnerput pissutigalugu isumaqalersoorsinnaasarpugut Jehovap ullussaa mulusoq, kisianni Jehovap piffissat aalajangersakkani eqqortittarpai.
13. Guutip ajortoq Satan Diaavulu qanoq pissavaa?
13 Taamaalilluni eqqissineq piviusoq pilersinneqassaaq! Eqqissinerli piviusoq atuutilissappat allamik pisoqartariaqarpoq — avissaartuunnermik, uumissuinermik sorsunnermillu pilersitsisoq peerneqartariaqarpoq. Tamannarpiarlu Biibilimi siulittuutigineqarpoq: Satan — kamannermik sorsunnermik kingunilimmik pilersitsisartoq, sallunerit ataataat — itinersuarmut iginneqassaaq. Tamanna apustili Johannesip takorruukkami siulittuutaasumi, sarĸúmersitat 20:1-3-mi ima allaaserineqartumi, takusimavaa: ’Inngililu takuara qilammit aqqartoq, taassuma itinersuarmut matuersaataasoq pigigaa, kalunnersuillu tigumiarigai. Kuukkooriaasarsuarlu tiguaa, taanna pulateriaarsutoqaq, tamassalu Diaavulu Satanilu; qilersorpaalu ukiut tuusintillit qilersugaaqqullugu; itinersuarmullu igippaa matullugulu qulaagullu naqissuserlugu, inuiaqatigiit taassumunnga tammartissaaqqullugit ukiut taakku tuusintillit naammatsitserlugit.’
14. Jehovap Satanimut ajugaalluni akuliunnissaa qanoq oqaatigineqarsinnaava?
14 Takorluugaannaanngilaq. Tamanna Guutip neriorsuutigisimavaa. Biibilimilu allassimavoq Guuti sallusinnaanngitsoq. (Eprîarit 6:18) Assersuutigalugu, Jehova pruffiitini Jeremias aqqutigalugu ima oqarsimavoq: „Uanga [Jehova] tassaasunga nunami unneqqarissoq innarluitsorlu naapertuilluartumillu iliortoq, tamakku iluarigakkit, oqarpoq [Jehova].“ (Jeremia 9:23) Aap, Jehova akuliukkuni innarluitsumik naapertuilluartumik iliussaaq, eqqissinerlu nunarsuarmi atuutilersitassani ilumut iluaraa.
Naalakkap eqqissisitsisup naalagaassusia
15, 16. (a) Kina Jehovap kunngitut toqqarsimavaa? (b) Taassuma naalagaassusia qanoq allaatigineqarsimava, kikkullu tamatumunnga peqataassappat?
15 Guutip naalagaaffimmi ataani eqqissineq pilersippagu kina aqutsissava? Jesus Kristus aqutsissaaq, Jesaja 9:6, 7-imi ’naalakkamik eqqissisitsisumik’ taaneqartoq. Allassimavoq: „Naalungiarmi uatsinnut erniuvoq, erneq uatsinnut tunniussaavoq. Taassuma naalagaassuseq tuimiugissavaa, aterissavaalu Siunnersuisoq nalissaqanngitsoq, Guuti Pissarsuaq, naassaanngitsumik Ataataasoq, Naalagaq eqqissisitsisoq. Naalagaaffia angissaqaaq eqqissinerlu ataavassalluni . . . Katersaarsuit [Jehovaata] ilungersornera taamaalisitsiumaarpoq.“ Aamma tussiaasiortut ilaat Messiasip naalagaassusia eqqissineqarfiusoq pillugu ima allassimavoq: „Iluarneq ulluini inerilluarsimassaaq, pigissaarnerlu angeqisoq atugaassaaq qaammat qaamaneerutserlugu.“ — Tussiaat 72:7.
16 Kristusip qatanngutaasa 144.000-t anersaamik tanitaasut qilammi naalakkersueqatigissavaat. Kristusimik kingornusseqataasussat taakku pillugit Paulus ima allassimavoq: ’Guutip eqqissisaasup Satan isikkassi ataanni aserorterasuassavaa. Naalakkatta Jesusip Kristusip saammaannerata najorlisi.’ (Rûmamiut 16:20) Aap, taakkua qilamminngaaniit Kristusip sorsunnermik pilersitsisumut, Satan Diavulumut, ajugaanissaa peqatigissavaat!
17. Eqqissineq piviusoq anguniarlugu qanoq iliortariaqarpugut?
17 Maanna manna apeqqutaalerpoq: Uagut qanoq iliussaagut eqqissineq piviusoq peqataaffigiumallugu? Naalagaq eqqissisitsisoq ilassissavarput taassumunngalu saalluta. Aatsaat Guutip periaasia malillugu eqqissineq piviusoq piviusunngorsinnaavoq, Guutillu Kristus tanissimavaa eqqissinermik pilersitsisussatut. Tamanna isumaqarpoq Kristus inuiannut ajortilinnut utertitsisutut ilassisariaqaripput. Jesus nammineq ilisimaneqarluartunik oqarsimavoq: ’Silamiummi Guutip ima asatigai ernitui tunniullugu kinaluunniit taassumunnga uppertoq tammaqqunagu, naassaanngitsumilli inuussuteqaqqullugu.’ (Juánase 3:16) Guutimit eqqissisitsisussanngortitatut annaassisussanngortitatullu Kristus Jesusip upperinissaanut piumassuseqarpugut? Qilaap ataani allamik eqqissinermik ataavartumik pilersitsisinnaasoqanngilaq. (Filípimiut 2:8-11) Sooq? Jesus Guutip toqqagarimmagu. Taanna eqqissinermik nalunaarutiginnikkiartortut nunarsuarmi annersaraat. Jesus tusarnaarusuppiuk maligassatullu malikkusullugu?
18. Jesusip Juánase 17:3-mi oqaasii qanoq qisuariarfigisariaqarpavut?
18 Jesus oqarsimavoq: ’Tassaavoq inuuneq naassaanngitsoq: illit ilisaralutit kisivit ilumut Guutiusutit, aallartitallu Jesus Kristus ilisaralugu.’ (Juánase 17:3) Nalunaajaasunik peqateqartaleqqammersusi tamassi eqqorluartumik ilisarsinikkut siumukarnissassinnik kajumissaarniarpatsigit. Jehovap Nalunaajaasuisa ataatsimiinnerinut aggertarnikkut taamaaliortoqarsinnaavoq. Ataatsimiinnerni tamakkunani persuarsiortumik ileqqulersuuteqartoqarneq ajorpoq. Ilinniartitsineqartarporli. Ataatsimiigiartaruit ilisimasannik neriuutinnillu allat oqaluttuunnissaannut kajumississaatit. Aap, aamma illit eqqissinermik Guutimeersumik tusarliisartunngorsinnaavutit. Maannangaaq Jehova Guutimik tunaartarinninnikkut eqqissineq nuannaarutigilereersinnaavat, soorlu Jesaja 26:3-mi New International Version naapertorlugu ima allassimasoq: „Isumamigut uteriarumanngitsoq eqqissinermi naammalluinnartumi atatissavat, tatigimmatit.“ Kina tatigissaviuk? „[Jehova] tatigisiuk soraajuitsumik, [Jehova] qaarsuummat ataavartussaq.“ — Jesaja 26:4.
19, 20. Eqqissinissaq kajungeralugu noqqaassutigigutsigu sumik siunissaqarsinnaavugut?
19 Taamaattumik Guutip silarsuassaani nutaami eqqissineqarfiusumi inuuneq naassaanngitsoq qineruk. sarĸúmersitat 21:3, 4-mi Biibilimi ima neriorsoqqissaarneqarpugut: ’Takussagissi Guutip ineqarfia inunniittoq, taakkunanilu ineqarumaarpoq innuttariumaarlugillu, Guutillu nammineq najorumaarpai; qulliillu tamaasa isaannit allarterumaarpai, toqulu peqarunnaassavoq, aliasuttoqarunnaarlunilu nilliasoqarunnaarlunilu anniartoqarunnaassavoq, siulliit peermata.’ Siunissaq eqqissinartoq taama ittorpiaq maqaasigaajuk?
20 Guutip uagutsinnut neriorsuutai eqqaamakkit. „Qanilaartut nuna kingornutissavaat, pilluangaarlutillu inuussapput. Peqqusersuitsoq malugiuk, assuarnaatsoq isiguuk! Qanilaartoq siunissaqarumaarpoq.“ (Tussiaat 37:11, 37) Ullut pilluarnartut tamakkua nalliuppata, qanortoq ilaagisa, qujamasullutalu ima oqarsinnaagisa: „Kiisami eqqissineqarpoq! Jehova, Guuti eqqissinermik piviusumik tunisisoq, qujanarsili!“ (wE 15/4 97)
Nassuiarsinnaavigit?
□ Qanoq ililluni eqqarsaatitigut iliuutsitigullu allanngortoqarsinnaava?
□ Jehovap nalunaajaasuisa, inuttut ataasiakkaatut peqatigiittullu, qanoq takutissimavaat eqqissineq piviusoq nuannaralugu?
□ Jehovap uumissuinermik sorsunnernillu siuarsaasut tamaasa qanoq iliuuseqarfigissavai?
□ Naalakkap eqqissisitsisup naalakkersuinera inuiannut sunik nassataqassava?
[Qupp. 14-imi assiliartaq]
Esajasip siulittuutaa FN aqqutiginagu, Jehovamilli ajoqersorneqarteunit eq- quukkiartortinneqarpoq
[Qupp. 15-imi assiliartaq]
Angutit uku marluk inuunerminni allannguipput eqqissineq noqqaassutigilerlugu
Rami Oved
Georg Reuter
[Qupp. 16-imi assiliartaq]
Naalakkap eqqissisitsisup naalakkersuinerata ataani eqqissineq piviusoq ataavassaaq