Naalliuutillit qaquguluunniit eqqississappat?

NAALLIUUTIT tamarmik atorunnaarnissaat, ilinnuinnaangitsoq aamma inunnut tamanut, kissaatigissagaluarpiuk? Pisimasut ilaat eqqarsaatigikkit:

Sonia amerlanernit naalliuuteqarnerusimavoq.a Siullermik paasivaa uini ukiuni qulini allasiortarsimasoq. Taava ernera nukarleq HIV-mik tunillatsippoq AIDS-erluni toqulluni. Ukiut marluk tamatuma kingorna ernerata aappaa napparsimalerpoq, erniinnarlu taassuma aamma AIDS toqqutigaa. „Toqujartornerata tungaanut sivisoqaaq,“ Soniap eqqaamavaa. „Isumatsattorujussuuvoq, nutsani katappai isilulerlunilu. Alianartorujussuuvoq.“

Fabianap, Brasiliamiup universitetimi ilinniartup, silarsuarmi innuttaaqatigiissutsikkut naapertuilluanngissutsit isumakuluutigai. Taava nammineq alianartumik eqqorneqarpoq. Qatanngutaa isumatsassimasoq imminorpoq. Fabianap suliffini annaagamiuk ikinngumminit kajumissaarneqarpoq pai-de-santo-mut (angukkuersaartartumut) saaqqullugu, isumaqartoqarmat naalliunnartunit eqqorneqarnera perloqqussummik pissuteqarsimassasoq! Kisianni pai-de-santo-p iluaallatsitsisinngilaa. Akerlianik Fabiana erloqisitaalluni misigivoq, ajornartorsiornermillu sinissaarulluni.

Ana suli meeraalluni naalliuuteqalersimavoq. „Ataatsimik ukioqartunga anaanama qimappaanga, aanama tiguaanga,“ oqaluttuarpoq. Taava Ana pingasunik ukioqartoq aanaava toquvoq. Ana Rio de Janeiromi meeqqanik perorsaavimmut aallartinneqarpoq, 13-inillu ukioqalernini tikillugu tassaniilluni. „Ajortumik pineqartarpugut pikitsitsiumatuunngorpungalu,“ oqarpoq. „Peroriartorninni sunut tamanut akerliusarpunga.“

Inuit tamarmik assigiinngitsutigut naalliuuteqartarput. Aap, ullut tamaasa inuit naalliuutillit tusartarpavut — nutaarsiassanik atuaraangatta, isiginnaaraangatta tusarnaaraangattaluunniit. „Ukiuni makkunani attaveqaateqarluarfiusuni inuuffigisatsinni tusarliussanit nuanniitsunit amerlavallaartunit qimaaniarneq aatsaat taama ajornartigilersimavoq,“ dr. Mary Sykes Wylie taama allassimavoq. „Sorsunnerit, pinngortitami suliffissuaqarfinniluunniit ajunaarnersuit, angallannermi ajunaarnerit, pinerluttuliornerit, peqqarniisaarnerit, kinguaassiuutitigut atornerlunneqarnerit, arneriffigineqarnerit angerlarsimaffinnilu nakuusernerit ukiuni 1900-kkunni makkunani ulluinnarni pisarput atugaaqalutillu.“ Apustili Paulusip piviusorpalaartumik inuit misilittagaat ima allaatigai: ’Pinngortitat tamarmik suli tamassa anersaameqatigiillutik erloqeqatigiissut.’ — Rûmamiut 8:22.

Illimmi? Naalliuuteqarpit? Iluaallatsitsinissaq ilimagisinnaaviuk? Eqqissineq piviusoq misigissaviuk? Soniap, Fabianap Anallu tamarmik tuppallersaat eqqissinerlu piviusut nassaarisimavaat. Ilanngutassiami tulliuttumi tamanna pillugu atuarsinnaavutit.

[Quppernerup ataani ilanngussaq]