’Guuti eqqissisaasup’ naalliuutillit isumagisarpai

BIIBILIMI erseqqissarneqarpoq Davidip itsaq inuusup naalliuuteqarneq nalunngikkaa. Ukiut arlallit qimaasutut inuusimavoq, kunngimit ajortumit naalasseriitsumillu naakkittaatsumik malersorneqartilluni toqunniarneqarluni. Ukiuni atugarliorfiusuni taakkunani David avinngarussimasumi toqqoqqasarpoq. Aammali allamik iliuuseqartarpoq. Ilungersorluni Jehova qinnuigisarpaa ajornartorsiutini pillugit. „Nipituumik [Jehovamut] torlulavunga,“ kingusinnerusukkut taama allassimavoq. „Kappialassutinnik aniatitsiffigaara, annikilliuutinnik eqqartuiffigalugu.“ — Tussiaat 142:2, 3.

Ullumikkut ilaasa David asissorumassavaat Guutimut tatiginninnera pissutigalugu. Isumaqarput qinuneq misigissutsikkut annertoqqutaannaasoq, allakkut iluaqutaanani piffissaajaataannaasoq. Kisianni Davidip Guutimut tatiginninnera asuliinnaasimanngilaq, naggataatigummi akerai ajugaaffigineqarput. Misilittakkani eqqarsaatigalugit David ima allassimavoq: „Nallinnartut torlulammata tusarpai [Jehovap], annikilliuutaannillu tamanit annaallugit.“ (Tussiaat 34:7) Guuti ilumoortoq Davidip saaffigisaa aamma ’Guutimik eqqissisaasumik’ taaneqarpoq. (Filípimiut 4:9; Eprîarit 13:20) Uaguttaaq naalliuuteqarnitsinnit aniguisissanerpaatigut ilorraallatsilluta?

Jehovap soqutigaatit

Jehovap innuttami atugarliorneri isiginngitsuusaanngilai. (Tussiaat 34:16) Kiffami peqatigiittut isigalugit pisariaqartitaat soqutigiinnarnagit aamma imminik mianerinnittut tamaasa ataasiakkaarlugit soqutigai. Jerusalemitoqqami naalaffik atoqqaartinneqarmat Salomonip Jehova qinnuigaa ’kinaluunniit innuttaasa Israelikkut ilaat qamuuna eqqorneqartutut misigisup’ qinnutaa tusartaqqullugu. (2 Israelikkut 6:29) Salomonip paasivaa inuit tamarmik immikkut naalliuuteqartartut. Ilaat timikkut napparsimasarput. Allat misigissutsikkut atugarliortarput. Ilaat asasaminnik toqusoortarput. Suliffissaaleqineq, aningaasatigut ajornartorsiorneq ilaqutariillu iluanni ajornartorsiutit tamarmik ullutsinni nalinginnaaqaat.

Nammineq naalliuutitit atugarliuutitillu eqqarsaatigeriakkit. Immaqa ilaannikkut tussiaasiortutut Daviditut misigisarputit, taanna ima allassimavoq: „Ilimasussimagaluarpunga misiginneqataasussamik, kisianni naami, tuppallersaasussamillu, takkuttoqanngilarli.“ Taamaattoq qularissanngilat Guutip soqutigigaatit, tussiaammimi tamatumani David nangilluni allassimavoq: „[Jehovammi] piitsut tusaajumasarpai, asasini tiguagaasut suusupagisarnagit.“ — Tussiaat 69:21, 34.

Davidip oqaasiisa isumalluarsaarpaatigut inuiaat Pinngortitsisuata naalliuutinit ’tiguagaasut’ qinnutaat tusarumaarai. Aammami naalliuuteqarnerat qisuariarfigisarpaa. Eqqarsaatigeriakkit allassimaffiit Jehovap naalliuuteqartunut misiginneqataaneranik ersersitsisut tulliuttuni issuarneqartut.

„Uillarnerit iliarsuillu naalliutsinngisaannassavasi. Naalliutsikkaluarussigit taakkualu ikioqqullutik nilliaffigippannga nillianerat ilumut tusarumaarpara. Taava kamangaarumaarpunga, panamillu toqorarumaarpassi nuliasi uillarninngortillugit qitornasilu iliarsunngortillugit.“ — 2 Moses 22:22-24.

’Guutip qinikkani ullukkullu unnuakkullu torlorfigisini innarlernaveersissannginnerpai, taakkulu kamajuiffigissannginnerlugit?’ — Lúkarse 18:7.

„Annaatissavai piitsoq ikioqqulluni suaartartoq, annikilliortitarlu ikiortissaaleqisoq. Nallittussavai sanngiitsoq piitsorlu, ajorsartut inuunerat annaatissavaa. Akiliullugit iperagaatissavai qunutitaanermit persuaalliorfigineqarnermillu, inuunerat erlinnangaarmat taassuma isaani.“ — Tussiaat 72:12-14.

„Ilissinnik attuisup uanga isima tappiutaa attorsimassavaa.“ — Sakarja 2:12, NV.

Allassimaffiit ikittut taakkua takutippaat Pinngortitsisitta innuttami atugarissaarnissaat soqutigilluinnaraa. Taamaattumik apustili Peterip kajumissaarutaa manna maleruassallugu pissutissaqarluarpugut: ’Isumakuluutisi tamaasa taassumunnga pisissigik, isumassormasi.’ (1 Pîtruse 5:7) Qanorli ililluni Jehovap naalliuuteqarnitsinni ikiorsinnaavaatigut?

Guutip qanoq ililluni naalliuuteqartut ikiortarai

Soorlu takoreeripput Davidip naalliuuteqaraangami siulersorneqarnissamik ilungersorluni Jehova qinnuigisarpaa. Namminerlu pissutsit iluarsiniarlugit iliuuseqartarpoq silatusaarluni malersortiminit qimaaniartarluni. Taamaalilluni Davidip Jehova tatigalugu namminerlu iliuuseqartarluni naalliuuteqarnini atorsinnaasarsimavaa. Sumik ilinniarfigisinnaavarput?

Atugarlioraangatta ajornartorsiutit aaqqinniarlugit silatusaartumik iliuuseqarneq soorunami eqqunngitsuliornerunngilaq. Assersuutigalugu kristumiu suliffissaaleqiguni suliffissarsiussannginnerpa? Timikkulluunniit nappaateqaruni nakorsiassannginnerpa? Soorunami allaat Jesusip nappaatinik tamanik ajorunnaarsitsisinnaasup misiutigisimanngilaa ’napparsimasut katsorsaasumik pisariaqartut’. (Matîuse 9:12; naleqqiuguk 1 Timûtiuse 5:23.) Ilumoorpoq naalliuutit ilaat peerneqarsinnaanngikkallartut; naammagittarluta atortariaqarpavut. Kisianni kristumiup ilumoortup naalliuutit iluaqutaasutut isigissanngilai, ilaasa isumaqarnerattut. (Naleqqiuguk 1 Kunngit 18:28.) Akerlianik sapinngisamik naalliuutit iliuuseqarfiginiassavai.

Taamaaliortilluni silatussaarnerussaaq tamanna pillugu Jehovamut qinunissaq. Sooq? Siullermik, Pinngortitsisorput annertoqqutigalugu ’sorliit pingaaruteqarnerusut misilittarsinnaavavut’. (Filípimiut 1:10, NV) Assersuutigalugu suliffissarsiorutta Guuti qinnuigalugu tatigigutsigu suliat Biibilip najoqqutassiaanut akerliusut akuerissanngilavut. Aamma aningaasanik asanninneq pissutigalugu ’uppernitta tammarnissaa’ pinngitsoortissinnaavarput. (1 Timûtiuse 6:10) Pingaartunik aalajangigassaqaraangatta — suliffissarsiorneq allalluunniit inuunermik tunngasut pillugit — Davidip kajumissaarutaa maleruartariaqarparput: „Nanertuutigisat [Jehovamut] tunniuguk, taava isumagiumaarpaatit. Iluartoq patajatinngisaannassavaa.“ — Tussiaat 55:23.

Qinunerup aamma isumakkut aalajaatsuutissavaatigut, naalliuuteqaraluarluta tamakkunannga atorsinneqaqqunata. Apustili Paulus ima allassimavoq: ’Suulluunniit pillugit isumakulunnaveeritsi, nungullugillu kissaatigisasi Guutimut nalunaarsigik torlulallusi qinullusilu qujallusilu.’ Sumik kinguneqartumik? ’Eqqissinerup Guutip piata sianinernit tamanit annerungaartup uummatisi eqqarsaatisilu sernigissavai Kristus Jesusimi.’ (Filípimiut 4:6, 7) Aap, eqqissineq, eqqissineq Guutip pia. Eqqissineq tamanna ’sianinernit tamanit annerungaartup misigissutsinit isumatsannartunit erloqisinneqaraangatta aalajaatsissinnaavaatigut. ’Uummaterput eqqarsaativullu sernigissavai’, taamaattumillu piaarpallaartumik sianiitsumillu iliornissaq naalliunnarnerunermik kinguneqarsinnaasoq pinngitsoortissinnaavarput. — Nalunaajaasup oqaasii 7:7.

Qinunerup allatiguttaaq ikiorsinnaavaatigut. Pissutsit atortariaqakkatta ineriartornissaannut sunniuteqarsinnaavoq. Tamatumunnga assersuut Biibilimeersoq eqqarsaatigiuk. Romami parnaarussaatilluni apustili Paulusip kristumioqatini kajumissaarpai qinnuteqqulluni. Sooq? ’Annerusumik oqaaqqissaarpassi taamaalioqqullusi, qilamik ilissinnut utersarneqaqqullunga.’ (Eprîarit 13:19) Paulusip nalunngilaa uppeqatimi kipisuitsumik qinnutaat qaqugu iperagaanissaaminut sunniuteqarsinnaasut. — Filípimiut 22.

Qinnutit naalliuuteqarnitta inerneranut sunniuteqarsinnaappat? Aap. Paasisariaqarparpulli Jehovap tamatigut qinnutit ilimagisatsitut akineq ajorai. Assersuutigalugu Paulus arlaleriarluni ’qisuk uinimminut kapputtoq’ — immaqa isilunnermut tunngasoq — pillugu qinnusimavoq. Naalliuut tamanna ajorunnaarsinnagu Guutip Paulus ima oqarfigaa: ’Saammaannera naammagissavat pissaaneq sanngiitsuni naammatsittarmat.’ — 2 Korintumiut 12:7-9.

Taamaattumik ilaannikkut naalliuutivut peerneqarneq ajorput. Taamaakkaangat periarfissaqartarpugut takutissallugu Pinngortitsisorput tatigalugu. (apustilit suliait 14:22) Aamma qularissanngilarput naak Jehovap naalliuut piinngikkaluaraa ’aniguinissaq aappiullugu pinngortissagaa uagutsinnut artornarunnaarsillugu’. (1 Korintumiut 10:13) Aap, pissutissaqarluartumik Jehova ima allaatigineqarpoq: ’Guuti tamanik tuppallersaasoq, taassuma annikilliutivut tamaasa pillugit tuppallersarpaatigut.’ (2 Korintumiut 1:3, 4) Isumakkut eqqissilluni naammagittarsinnaanermut pisariaqartunik tunisarpaatigut.

Qanittukkut — silarsuaq naalliunnartoqanngitsoq

Pinngortitsisoq neriorsuivoq Naalagaaffini aqqutigalugu inuiaat naalliuutaat atorunnaarsivikkumaarlugit. Qanoq ililluni taamaaliussava? Satan Diaavulu, naalliuutinik pilersitsisoq annerpaaq eqqissinermullu akeraasoq pingaarnerpaaq, Biibilimi ’silap matuma guutianik’ taaneqartoq peerneqarneratigut. (2 Korintumiut 4:4) Erniinnaq taassuma inuiaat pissaaneqarfigiunnaassavai. Peerneqarpat Guutimik mianerinnittut pilluaqquneqangaassapput. Biibilimi neriorsuutigineqarpoq Jehovap ’qulliit tamaasa isaannit allarterumaarpai, toqulu peqarunnaassavoq, aliasuttoqarunnaarlunilu nilliasoqarunnaarlunilu anniartoqarunnaassavoq, siulliit peermata’. — sarĸúmersitat 21:1-4.

Silarsuaq naalliunnartoqanngitsoq upperiuminaappallaarpa? Naalliunnartoqarnera ima sungiusimangaaratsigu atorunnaarnissaat takorlooruminaatsipparput. Guutilli pinngortitsigami inuuneq ersinertaqanngitsoq, isumakuluutertaqanngitsoq, ajunaarnertaqanngitsorlu inuiaannut siunertarisimavaa, siunertaalu naammassineqarumaarpoq. — Jesaja 55:10, 11.

Sonia, Fabiana Analu, ilanngutassiami siullermi eqqaaneqartut, tamarmik taama neriuuteqalersimapput. Ernini marluk AIDS-mit toqummata Soniap neriuut Biibilimiittoq assut tuppallersaatigaa — iluartut iluaatsullu makititaanissaaannik neriuut. (apustilit suliait 24:15) „Ilumoorpoq,“ oqarpoq, „neriuutitta naalliuutit tamaviisa akimorsinnaagai.“

Ana suli meeqqanik perorsaavimmiitsilluni Jehovap nalunaajaasuisa ilaannit pulaarneqarpoq. „Takutippaa Jehovap aqqa Biibilimi allassimasoq, nuannaarnermillu qialerpunga,“ Ana oqaluttuarpoq. „Ikiortissaaleqeqaanga, ilinniarparalu Guuteqartoq uatsinnut soqutiginnittumik.“ Meeqqanik perorsaavik qimareerlugu Anap Biibilimik atuaqqissaaqateqarnissaq akueraa Jehovallu neriorsuutaanik ilikkagaqarnerulluni. Taava inuunini Jehovamut tunniulluinnarpaa imermullu kuisilluni tamanna takutillugu. „Taamanerniilli Jehova qinunikkut tatiguarsimavara, nalunnginnakkulu ikiussagaanga tuppallersaatigisarpara.“

Fabianattaaq naalliuuteqarnermini tuppallersarneqarpoq isumakkullu eqqissilluni Guutip siunissamut neriorsuutai ilikkaramigit. „Sallusuissut Biibilimeersoq ilikkarlugu soorlu tassa inimit taartumit tujorminartumillu anilluni inimullu qaamasumut najoruminartumullu iserluni.“ — Naleqqiuguk Tussiaat 118:5.

Qanorli ililluni qaqugulu nunarsuaq tamakkerlugu eqqissineq piviusoq atuutilissava? Ilanngutassiani tulliuttuni paasissavarput. (wE 15/4 97)

[Qupp. 6-imi ungalusaq]

Naalliuutit assigiinngitsorpassuit

◼ Nunarsuup inuisa 25 procentiisa missaat piitsooqalutik inuupput, inuillu allat millionilikkuutaat inunnut naleqqutinngivissunik atugaqarlutik navianartorsiorlutillu inuusariaqarput.

◼ Meeqqat 200 millionit sinnerlugit nerisassakilliortarput.

◼ Ukiut tamaasa meeqqat tallimat inorlugit ukiullit 3 millionit missaat timminneq toqqutigisarpaat.

◼ 1993-miinnaq inuit 16,5 millionit nappaatit tuniluuttartut toqqutigaat. Nunat ilaanni nappaatit assiigiinngitsumik immikkoortinneqartarmata imaassinnaavoq kisitsisit annerusut.

◼ Naatsorsuutigineqarpoq inuit 500 millionillit misigissutsikkut ajornartorsiuteqartut.

◼ Ukioqatigiinnut allanut naleqqiullugit inuusuttut akornanni imminortartut amerliartuinnarput.

◼ „Kaanneq suliffissaaleqinerlu silarsuarmut kanngunarsaataalersimapput,“ The Unesco Courier-mi taama allassimasoqarpoq. „Silarsuarmi nunat pisuujunersaanni arfineq-marlunni suliffissaaleqisut 35 millioniupput Brasiliamilu 20 millionit suliffeqaraluarlutik qaarsillarlutik nerisinnaanngillat.“

[Qupp. 7-imi assiliartaq]

Qinuneq ikiortigalugu Guutip silarsuassamik naalliunnartoqanngitsumik neriorsuutaa eqqaamajuarsinnaavarput