Jehovap piumasaatut iliorput

Ataataq isumakkeerfiginninnissaminut piareersimasoq

OQALUTTUALIAAQQAT allanneqarsimasut pitsaanersaattut taaneqarsimavoq, pissutissaqarluartumik. Ataatap ernerminut tammaraluartumut asanninneranik Jesusip assersuusiaata Guutip ajortuliortunut peqqissimisunut naakkinnissusianut itsuartortippaatigullusooq.

Tammaraluartoq naneqqinneqartoq

Angut marlunnik erneqarpoq. Nukarliup oqarfigaa: ’Pigisannit agguutissarsiassannik tuninnga, toqunissat utaqqinagu.’ Angutaata akueraa, pigisamilu pingasorarterutai — ernermi marluk nukarlersaata inatsisitigut pissarsiassai — tunniullugit. (5 Moses 21:17) Inuusuttup pigisani katersupallappai nunamullu ungasissumut aallarluni, tassanilu inuunerlulluni pigisani atulussinnarpai. — Lúkarse 15:11-13.

Taava kaannersuaqalerpoq. Inuusuttup kaangaarami puulukinik paarsisuunissani akueraa — suliaq juutimut nikanartoq. (3 Moses 11:7, 8) Nerisassakilliungaarami allaat puulukit nerisassaat illigisalerpai! Naggataagulli inuusuttoq silattuaqilerpoq. ’Ataatama kiffartortorpassui neqissaqangaartut, uangali perlingajalerpunga,’ eqqarsarpoq. ’Nikuillunga ataataga ornissavara, ajortuliannillu anngiiaaffigalugu kiffartortaasalu ilaattut ittunngorlunga.’a— Lúkarse 15:14-19.

Inuusuttoq angerlamut uterpoq. Qularnanngilaq isikkua allanngorsimassaqisoq. Taamaakkaluartoq angutaata ’suli ungasissumiittoq’ ilisaraa. Nalligeqalugu ernini arpalluni ornippaa, ’eqippaa kunillugulu’. — Lúkarse 15:20.

Taamatut asannittumik tikilluaqqusaanini pissutigalugu angut inuusuttoq ajornannginnerusumik anngiiarsinnaavoq. ’Ataataq,’ oqarpoq, ’qilammut ilinnullu ajortuliorpunga, kingorna ernernik taaneqarneq qinngaqquppunga; kiffartortivit ilaattut itinnga.’ Angutaata kiffani qaaqquai peqqusillunilu: ’Annoraaq pitsaaneq aasiuk atitillugulu, assammiulersiullu aloquserlugulu; norrarlu puallarsagaq aallugu toqussiuk, nerillutalu tipaatsutta, ernera una toqugaluarluni kingumut uummarmat, tammaraluarlunilu kingumut nanisaammat.’ — Lúkarse 15:21-24.

Pitsaalluinnartunik nerersuartoqalerpoq nipilersornertalimmik qitinnertalimmillu. Ernerup angajulliup narsaammiit uterami nipiliortut tusalerpai. Paasigamiuk qatanngunni utersimasoq tamannalu nuannannersuarmut peqqutaasoq kamalerpoq. ’Ata, ukiut taama amerlatigisut kiffartuukkikkit inassutitillu saneqqussimanngisaannarlugit, sulilu savaasaaqqamilluunniit tuninngisaannarparma ikinngutikka tipaatsoqatigeqqullugit,’ angumminut naammagittaalliorpoq. ’Unali ernerit tikimmat pisit uersartunut nungussimallugit, taava taanna pillugu norraq puallarsagaq toqutippat.’ ’Ernera uumaa,’ angutaata sallaatsumik akivaa, ’illit najortuinnarparma, pigisakkalu tamaasa pigaatit. Kisianni nuannaarutigalugu tipaatsuutigisariaqarpoq nukkat una toqugaluarluni kingumut uummarmat, tammaraluarlunilu kingumut nanisaammat.’ — Lúkarse 15:25-32.

Sumik ilinniarfigisinnaagipput

Jesusip assersuusiaani ataataasoq Jehova Guutimut naakkinnittumut assersuutaavoq. Ernertut tammaraluartutut inuit ilaasa Guutip innuttaani toqqissisimaneq qimattarpaat kingusinnerusukkulli utertarlutik. Taamaattut Jehovap qanoq isigai? Ilumoorlutik peqqissimillutik Jehovamut utertut qularissanngilaat ’unnerluutiginnittanngitsoq soraajuitsumik, kamassimajuaannarnanilu’. (Tussiaat 103:9) Assersuummi ataataasup ernini arpalluni tikilluaqqujartorpaa. Taamatuttaaq Jehova ajortuliortunut peqqissimisunut isumakkeerfiginnikkusuinnarani aamma ’isumakkeerfiginnittartuuvoq’ ’isumakkeerfiginnittuarlunilu’. — Tussiaat 86:5; Jesaja 55:7; Sakarja 1:3.

Jesusip assersuusiaani ataataasup ilumoorluni asanninnerata erneq uternissaminut sapiissuseqartippaa. Unali eqqarsaatigeriaruk: Qanoq pisoqarsimassagaluarpa ataataasup nukappiaq ajattorsimagaluarpagu uteqqeqqunagulu kamalluni nilliasimagaluarpat? Taamatut qisuariarsimagaluarpat qularnanngilaq nukappiaq uteqqinngisaannassagaluartoq. — Naleqqiuguk 2 Korintumiut 2:6, 7.

Ataataasup silatusaarluni ernini aallalermat uteqqinnissaanut aqqutissiuussimavaa. Ilaannikkut ajortuliortut peqqissiminngitsut utoqqaanertanit ilagiinnit anisinneqartariaqartarput. (1 Korintumiut 5:11, 13) Taamaalioraangamik ajortuliortut uteqqinnissaannut aqqutissiuussinnaavaat siunissami ilannguteqqinnissamut iliuuserisassat asannittumik tikkuarnerisigut. Uummammit pisumik kajumissaarutit taamaattut eqqaamallugit anersaakkut tammaraluartut amerlasuut peqqissiminissaminnut Guutillu innuttaanut uteqqinnissaminnut kingusinnerusukkut kajumissisimapput. — 2 Timûtiuse 4:2.

Aamma erneq utermat ataataasoq naakkittarnermik takutitsivoq. Nukappiaq ilumoorluni peqqissimisoq ingerlaannaq paasivaa. Ajortuliai tamaasa paasiniaqqaarnagit utimut tikilluaqquaa — nuannaarlunilu taamaaliornini ersersillugu. Kristumiunut maligassaalluarpoq. Tammaraluartoq nanineqaraangat nuannaartariaqarpugut. — Lúkarse 15:10.

Ataataasup iliuuserisaasa ersarissumik takutippaat ernermi uternissaa utaqqisimagaa. Soorunami tamanna Jehovap innuttaminit qimagussimasunut kipisangaarneranut tarraannaavoq. Taanna ’tammarsimasoqaqqusinngilaq, tamaasali allamik isumataaqqullugit’. (2 Pîtruse 3:9) Taamaattumik ajortuliaminnik peqqissimissuteqartut qularutigissanngilaat ’ullunik inuummarissiviusunik Jehovap’ pilluaqqujumaaraatik. — apustilit suliait 3:19. (wE 1/9 97)

[Quppernerup ataani ilanngussaq]