Jehovap nallittuinera ilaarniaruk
’Nallittuigitsi, soorluttaaq Ataatarsi nallittuisoq.’ — LÚKARSE 6:36.
1. Farisiiarit qanoq takutissimavaat naakkittaatsuullutik?
NAAK Guuti assilillugu pinngortitaagaluartugut amerlasuusugut nallittuinera ilaanngitsoortarparput. (1 Moses 1:27) Assersuutigalugu farisiiarit eqqarsaatigikkit. Ataatsitut isigalugit taakkua nuannaarutigisinnaasimanngilaat Jesusip sabbatimi angut toqungasumik assalik ajorunnaarsimmagu. Akerlianik ’toqunnissaanik’ isumalioqatigiilerput. (Matîuse 12:9-14) Arlaanni Jesusip angut tappiilluni erniusimasoq ajorunnaarsippaa, aammaarlutik ’farisiiarit ilaasa’ nuannarisimanngilaat Jesus misiginneqataammat. Akerlianik ima unnerluussipput: ’Inuk taanna Guutimit pinngilaq, sabbat unioqqutikkamiuk.’ — Juánase 9:1-7, 16.
2, 3. Jesus oqarmat: ’Mianersorniaritsi farisiiarit saddukiiarillu seernarsaatissiaannut’, qanoq paasisariaqarpa?
2 Farisiiarit misigittaakkamik Guutimut inunnullu ajortuliorput. (Juánase 9:39-41) Pissutissaqarluarluni Jesusip ajoqersukkani mianersoqquai farisiiarit nuimanerusut aammalu allat, soorlu saddukiiarit, ’seernarsaatissiaannut’. (Matîuse 16:6) Biibilimi seernarsaatissiaq ajortimut ajortunngorsimanermullu assersuutitut atorneqartarpoq. Allatut oqaatigalugu Jesus oqarpoq allakkanik ilisimasut farisiiarillu ajoqersuutaat pallorfiginninnermut minguitsumut mingutsitsisinnaasut. Qanoq? Guutip inatsisai namminneq najoqqutassiatik ileqqulersuutitillu suulluunniit tunngavigalugit isigineqartussaasutut ajoqersuinermikkut, ’inatsisit pisariaqarnerusortaat’, soorlu nallittuineq, sumiginnartillugit. (Matîuse 23:23) Ileqquusut tamakku pissutigalugit Guutisiorneq erloqinartunngorsimavoq.
3 Ernermik tammarsimasumik assersuusiami affaata kingulliani Jesusip juutit upperisarsiornikkut siuttuisa equngasumik eqqarsariaasiat ersersippaa. Ataatap, Jehovamut assersuutaasup, kajumilluni ernini peqqissimisoq isumakkeerfigaa. Angutilli inuusuttup angajua, ’farisiiarinut allakkanillu ilisimasunut’ assersuutaasoq allaanerulluinnartumik isumaqarpoq. — Lúkarse 15:2.
Angajoq kamattoq
4, 5. Sooq ernerup tammarsimasup angajua aamma ’tammarsimava’?
4 ’Ernerali angajulleq narsamiippoq; tikilerlunilu illu pallileramiuk nipilersortut kaavittullu tusarpai. Taava kiffat ilaat qaaqquaa aperalugulu suna pillugu taamaannersut. Taassumalu akivaa: „Nukkat tikimmat; ataatavillu norraq puallarsagaq toqutippaa, peqqissuutillugu kingumut pigamiuk.“ Taava kamalerpoq iserumananilu.’ — Lúkarse 15:25-28.
5 Jesusip assersuusiaani ersarippoq ernerup tammarsimasup saniatigut aamma allamik eqqunngitsuliortoqartoq. Qinerlerfissiami allasimavoq: „Ernerit tamarmik tammarsimapput — aappaa nikanarsagaassutigisaminik naapertuilluanngitsuliorami, aappaa tappiillisitaassutigisaminik imminut iluartuutinniarami.“ Malugissavarputtaaq ernerup tammarsimasup angajua nuannaaqataajumaannanngitsoq, aammali ’kamalersoq’. Griikerit oqaasiata ’kamalerpoq’-mik nutserneqartup nagguia isumaqaannanngilaq narraneq, kisianni ataavartumik isumaqarneq pineqarpoq. Angajulliup qularnanngitsumik sivisuumik uumissorpaa isumaqarlunilu uternerata nalliuttorsiutigineqarnera naleqqutinngitsoq angerlarsimaffini qimassimasariaqanngikkaluarmagu.
6. Ernerup tammarsimasup angajua kikkunnut assersuutaava? Nassuiaruk.
6 Ernerup tammarsimasup angajua Jesusip ajortuliortunut misiginneqataalluni soqutiginninnera pissutigalugu ajuallassimasunut assersuutaalluarpoq. Imminnut iluartuutinniaramik Jesusip nallittuineranit killinneqarneq ajorput ajortuliortorlu isumakkeerfigineqaraangat qilammi tipaatsuttoqarneq peqataaffigiumanagu. Jesusip nallittuinera narrutsaatigingaaramikku ’uummatimikkut ajortumik eqqarsalerput’. (Matîuse 9:2-4) Ilaanni farisiiarit ilaat ima kamatsigilerput angut Jesusip ajorunnaarsissimasaa ’ajallugu anisissimallugu’. Ima paasisariaqarunarpoq juutit ilagiissaannit anisissimagaat. (Juánase 9:22, 34) Ernerup tammarsimasup angajuatut ’iserumanngitsutut’, juutit upperisarsiornikkut siuttuisa killissaanatik ’tipaatsuttut tipaatsoqatigiumanngilaat’. (Rûmamiut 12:15) Jesusip assersuusiani nangillugu ajortumik eqqarsariaasiat ersersinneruaa.
Equngasumik eqqarsariaaseq
7, 8. (a) Angajulliup qanoq takutippaa ajunngitsumik erneruneq qanoq paasisariaqartoq paasisimanagu? (b) Angajulleq ataatarlu qanoq assigiinngissuteqarpat?
7 ’Taamaattumik angutaa anivoq iseqquniarlugu. Angunnili akivaa oqarluni: „Ata, ukiut taama amerlatigisut kiffartuukkikkit inassutitillu saneqqusimanngisaannarlugit, sulilu savaasaaqqamilluunniit tuninngisaannarparma ikinngutikka tipaatsoqatigeqqullugit. Unali ernerit tikimmat pisit uersartunut nungussimallugit, taava taanna pillugu norraq puallarsagaq toqutippat.’ — Lúkarse 15:28-30.
8 Taama oqarami angajulliup takutippaa ernerulluartuuneq qanoq paasisariaqartoq paasisimanagu. Ataatani sulisitsisutut isiginerusimagaa erserpoq oqarfigimmagu ’kiffartuullugu’. Ilumoorpoq erneq taanna angerlarsimaffini qimasimanngisaannarmagu ataatallu inassutai unioqqutinngisaannarlugit. Asanninnerli pissutigalugu naalassimava? Nuannaarneq piviusoq pissutigalugu ataatani kiffartuuttarsimavaa, imaluunniit imminik iluartuutinniarluni isumaqarpa ernerulluni ajunngitsoq ’narsami’ pisussaanermi eqqortinnera piinnarlugu? Ataataminut ilumut tunniusimalluinnaruni, soormi taava ataatamisut isumaqanngila? Sooq nukkani misiginneqatiginngilaa nallittuinissaminut periarfissinneqarami? — Naleqqiuguk Tussiaat 50:20-22.
9. Juutit upperisarsiornikkut siuttuisa qanoq ilillutik angajulleq assigaat?
9 Juutit upperisarsiornikkut siuttuisa angajulleq taanna assigeqaat. Isumaqarput inatsisit naalakkaanni Guutimut ilumoornerusoq. Soorunami naalattariaqarpugut. (1 Samuel 15:22) Taakkuali suliat pingaartippallaarpaat sungiutiinnakkatullu Guuti pallorfigisarlugu, upperluartutut isikkoqarlutik, anersaakkulli ittut pingartinnagit. Ileqqutoqqat pingaartinnerullugit asannissuseqanngillat. Inuinnaat ipertut tummakkamissut naleqartippaat. Asissuillutik taakku ’perloqqusaasutut’ isigaat. (Juánase 7:49) Guutilli qanoq ililluni siuttut taakkua suliaat iluarisinnaassavai uummataat imminit taama ungasitsigippata? — Matîuse 15:7, 8.
10. (a) Sooq Jesusip naleqqulluartumik oqaatsit makku issuarpai: ’Naakkinninneq iluaraara, pilliutilli pinnagit’? (b) Nakkittaassuseq qanoq ilungersornartigaa?
10 Jesusip ilaanni farisiiarit ima mianersoqquai: ’Matuma isumaa ilinniariartorsiuk: „Naakkinninneq iluaraara, pilliutilli pinnagit.“’ (Matîuse 9:13; Hosea 6:6) Farisiiarit salliutinneqartussaanngitsut salliutippaat, naakkinninnginnamik pilliutaat tamarmik asuliinnaapput. Tamanna ilungersunaqaaq, Biibilimi allassimammat ’naakkittaatsut . . . toqutassaasut’. (Rûmamiut 1:31, 32) Taamaattumik tupinnanngilaq Jesus oqarmat upperisarsiornikkut siuttut ataatsitut isigalugit suujunnaarsitaajumaartut. Naakkittaakkamik taama eqqartuunneqarnissaat naleqqulluartuuvoq. (Matîuse 23:33) Taakkuali ilaat immaqa ikiorneqarsinnaapput. Assersuusiani naggaserlugu Jesusip juutit taakkua eqqarsariaasiat allanngortinniarsaraa ataatap angajulliliaminut oqaasii atorlugit. Takoriartigu qanoq ililluni.
Ataataq nallittuisoq
11, 12. Jesusip assersuusiani ataatap qanoq ililluni ernini angajulleq tunngavilersuiffiginiarpaa, qularnanngitsumillu suna pillugu ataatap oqaaseq ’nukkat’ atorpaa?
11 ’Taassumali oqarfigaa: „Ernera uumaa, illit najortuinnarparma, pigisakkalu tamaasa pigaatit. Kisianni nuannaarutigalugu tipaatsuutigisariaqartoq nukkat una toqugaluarluni kingumut uummarmat, tammaraluarlunilu kingumut nanisaammat.“’ — Lúkarse 15:31, 32.
12 Malugeriaruk ataataq oqarmat: ’nukkat’. Sooq? Qularnanngitsumik angajulliup aatsaat erneq tammarsimasoq ’ernerit’-mik taammagu, ’nukara’-mik taanagu. Ersarippoq qatanngutiminut qanittutut misiginngitsoq, taamaattumillu ataatap angajulliliani ima oqarfigaalusooq: ’Tassaaginnanngilaq ernera. Aamma tassaavoq nukkat, uinivit aappillu ilaat. Pissutissaqarluarputit uternera tipaatsuutigissallugu!’ Juutit upperisarsiornikkut siuttuisa Jesusip suna pineraa paasisinnaasariaqaraluarpaat. Inuit ajortuliortut asissugaat tassaapput ’qatanngutaat’. Aap, „nunarsuarmi ima iluassuseqartigisumik inoqanngilaq ajunngitsuliuinnavilluni ajortuliunngisaannarlunilu inuusumik“. (Nalunaajaasup oqaasii 7:20) Juutit nuimasut taamaattumik pissutissaqarluaraluarput tipaatsuutigissallugu ajortuliortut allamut saakkaanngatta.
13. Jesusip assersuusiaa tassanngaannartumik naammat sumik killisiornartumik immitsinnut aperisinnaavugut?
13 Assersuusiaq ataatap angajullermut oqaasiinik killinnartunik tassanngaannaq naggateqarpoq. Soorlulusooq Jesusip tusarnaartini kajumissaarai oqaluttuamik namminneq naggaseeqqullugit. Taamani tusarnaartut angajulliup qisuariarneranik pasitinneqanngillat, namminnerli apeqqut manna eqqarsaatigisariaqarpaat: ’Illittaaq tipaatsussavit qilammi ajortuliortup allamik isumataarnera tipaatsuutigineqarpat?’ Ullumikkuttaaq kristumiutut periarfissaqarpugut suliatsigut apeqqut tamanna akissallugu. Qanoq ililluta?
Guutip nallittuinera ullumikkut ilaarniaruk
14. (a) Qanoq ililluta Paulusip Evfisumiut 5:1-imi oqaaqqissaarutaa maleruarsinnaavarput nallittuineq eqqarsaatigalugu? (b) Guutip nallittuinera pillugu paasinerluineq suna mianersuutigisariaqarparput?
14 Paulusip Efesusimiut ima oqaqqissaarsimavai: ’Taamaattumik Guuti qitornatut asanartutut malinniarsiuk.’ (Evfisumiut 5:1) Kristumiutut Guutip nallittuinera pingaartittariaqarparput, uummatitsinnut ikkullugu namminerlu inuunitsinni ilaarniarlugu. Aammali mianersortariaqarpugut. Guutip nallittuinera paasinerlunneqarsinnaanngilaq isumaqarluta Guutip ajortuliorneq sumiginnassagaa. Ajortuliorneq soqutigingaarnagu pigutta isumaqarlutalu kingusinnerusukkut Guuti isumakkeerfigeqqulluta qinnuigisinnallugu nallittuinera naatsorsuutigalugu, taava Biibilimik allattup Judasip ima eqqartugaatut issaagut: ’Guutitta saammaanneranik kanngunartuliornermut atornerluisut’. (Jûtarse 4) Jehova nallittuisuuvoq, kisianni ajortuliortunik peqqissimiumanngitsunik ’pillaanngitsoorneq ajorpoq’. — 2 Moses 34:7; naleqqiuguk Josva 24:19; 1 Juánase 5:16.
15. (a) Suna pillugu ingammik utoqqaanertat nallittuineq oqimaaqatigiissumik isigiuartariaqarpaat? (b) Piaaraluni unioqqutitsinerit akueriinnartinnagit utoqqaanertat suna noqqaassutiginiartariaqarpaat, sunalu pillugu?
15 Aammali mianersortariaqarpugut akerlianik ingasaassinialinnginnissatsinnut ilumoorlutik peqqissimisimasut Guutillu piumasaatut ajortuliornerminnik aliasuutiginnittut sukannersumik assuarinialeqqunagit. (2 Korintumiut 7:11) Utoqqaanertat Guutip savaataanik isumaginnittussaagamik suut tamaasa oqimaaqatigiissumik isigisariaqarpaat, ingammik pisimasunik naliliissagaangamik. Kristumiut ilagiissaat minguitsuusariaqarput, Biibililu naapertorlugu eqqortuuvoq inuk ’ajortoq piissallugu’, tassa ilagiinnit anisillugu. (1 Korintumiut 5:11-13) Saniatigut pissutissaqaraangat nallittuisariaqarpugut. Piaaraluni ajortuliorneq sumiginnarnagu utoqqaanertat sapinngisamik iliuuseqartarput naapertuilluassutsip iluani asanninneq nallittuinerlu ersersinniarlugit. Biibilimi najoqqutassiaq manna tamatigut eqqaamasarpaat: ’Naakkinnittuliunngitsormi naakkittaatsumik eqqartuunneqassavoq; naakkinnittorli siooranani eqqartuutitikkiartoraraaq.’ — Jâko 2:13; Ussatit 19:17; Matîuse 5:7.
16. (a) Biibili ikiortigalugu takutiguk Jehovap inatsisiminik unioqqutitsisut imminut uternissaat kissaatigigaa. (b) Qanoq ililluta takutissinnaavarput uaguttaaq kissaatigigipput ajortuliortut peqqissimisut tikilluaqqusaasutut misigissasut?
16 Ernermik tammarsimasumik assersuusiap takutilluarpaa Jehovap kissaatigigaa inatsisiminik unioqqutitsisut imminut uternissaat. Taamaaliornissaminnut periarfissaqartuarput annaanneqarsinnaanatik namminneq takutinnissaata tungaanut. (Hesekiel 33:11; Malaki 3:7; Rûmamiut 2:4, 5; 2 Pîtruse 3:9) Ernerup tammarsimasup ataataatut Jehovap utersimasut inuttut ataqqivai ilaquttaminullu ilaasortaavissutut akuereqqilerlugit. Illit tamatumani Jehova ilaartarpiuk? Uppeqatit anisitaasimagaluartoq ilagiinnut ilanngutiteqqinneqarpat qanoq qisuariassavit? Paasereerparput tamanna ’qilammi tipaatsuutigineqartartoq’. (Lúkarse 15:7) Aammali nunami — ilagiinni ilagisanni uummatinnilu — tipaatsuutigineqarpa? Imaluunniit assersuusiami angajullertut ajuallassavit, isumaqarlutit taanna Guutip savaataanit qimatsisimasussaanngikkaluarmat uteruni tikilluaqquneqartariaqanngitsoq?
17. (a) Ukiuni hundredelinni siullerni ilagiinni Korinthimiittumi qanoq pisoqarsimava, Paulusillu qanoq ilitsersorpai pisup iliuuseqarfigineqarnissaanik? (b) Sooq Paulusip unnersuussutai iluaqutaappat, qanorlu ililluta ullumikkut maleruarsinnaavavut? (Aamma takuuk ungaluusaq.)
17 Imminut killisiorniarta Korinthimi ukiumi 55-imi pisimasoq eqqarsaatigalugu. Angutip ilagiinnit anisitaasimasup inuunini kristumiut najoqqutassiaannut iluarsaqqippaa. Qatanngutit qanoq iliortariaqarpat? Allamik isumataarnera nangaassutigalugu taassumunnga ilasseraanngitsuusariaqarpat? Naamik, Paulusip Korinthimiut kajumissaarpai ’isumakkeerfigeqqullugu tuppallersaqqullugulu, aliasuppallaarnermit ajuleqqunagu’. Nangilluni allappoq: ’Taamaattumik oqaaqqissaarpassi asanninnermik aalajangerfigeqqullugu.’ (2 Korintumiut 2:7, 8) Unioqqutitsisut peqqissimisut qinngaqqunnartutut isumatsassimasutullu misigigajupput. Taamaattumik qulakkeertariaqarpaat uppeqatimik Jehovallu asagaatsik. (Jeremia 31:3; Rûmamiut 1:12) Tamanna pingaaruteqarluinnarpoq. Sooq?
18, 19. (a) Ilagiit Korinthimiittut qanoq ilillutik siornatigut asattuussivallaarsimappat? (b) Kristumiut Korinthimiittut naakkittaakkunik qanoq ’Satanimut peqqusersiorfigineqarsinnaappat?’
18 Paulusip Korinthimiut isumakkeerfiginninnissamut kajumissaaramigut ima pissuteqartippai: ’Satanimut peqqusersiorfigeqqunata, tassuma isumaliorneri nalunnginnatsigik.’ (2 Korintumiut 2:11) Paulus qanoq isumaqarpa? Tamanna paasissavarput eqqarsaatigigutsigu tamatuma siornatigut ilagiit Korinthimiittut naveertariaqarsimagai asattuussivallaarlutik angut taaneqareersoq pillarnagu ajortuliortuartimmassuk. Taamaalillutik ilagiit, ingammik utoqqaanertat, Satan ikiorpaat, taassumami ilagiit tusagaanerlutillugu nuannaarutigaa. — 1 Korintumiut 5:1-5.
19 Korinthimiulli maanna ingasaassilerunik peqqissimisorlu isumakkeerfigiumanagu, taava Satanimit allakkut qaninngarneqalissapput. Qanoq? Naakkittaannerat killisseriinnerallu atornerlussinnaavai. Ajortuliortoq peqqissimisoq ’aliasuppallaarnermit ajulerpat’, imaluunniit soorlu Today’s English Version-imi nutserneqartoq ’aliasungaarnermit nakkaannarpat’, utoqqaanertat Jehovamut annertuumik akisussaaffeqassagaluarput. (Naleqqiuguk Hesekiel 34:6; Jâko 3:1.) Pissutissaqarluarluni Jesusip ajoqersukkani mianersoqquai ’ukua mininnguit ilaannik aserorsaagaqaqqunagit’, nangillunilu oqarpoq: ’Mianersoritsi. Qatanngutit ajortuliorpat inerteruk, allamillu isumataarpat isumakkeerfiguuk.’a — Lúkarse 17:1-4.
20. Ajortuliortoq allamik isumataarpat qanoq tamanna qilammi nunamilu tipaatsuutigineqassava?
20 Ukiut tamaasa tuusintilikkutaat pallorfiginninnermut ilumoortumut utertarput Jehovap nallittuinera qujamasuutigalugu. „Eqqaamasinnaanngilara inuuninni maannatut nuannaartigisimanerlunga,’ qatanngut arnaq kristumiu ilanngutiteqqinnini pillugu oqarpoq. Soorunami inngilit tipaatsoqatigaat. Ajortuliortumik allamik isumataartoqaraangat uaguttaaq qilammiittut assigalugit tipaatsoqataasarniarta. (Lúkarse 15:7) Taamaalilluta Jehovap nallittuinera ilaassavarput. (wE 1/10 98)
[Quppernerup ataani ilanngussaq]
a Korinthimi unioqqutitsisimasoq piffissaq sivikitsoq qaangiummat ilagiinnut ilanngutiteqqinneqarsimagunarpoq, tamannali tamatigut maligassatut atorneqarsinnaanngilaq. Pisimasut marluk assigiinneq ajorput. Unioqqutitsisut ilaasa ilagiinnit anisitaagunik erniinnarluinnaq allamik isumataarneq piviusoq ersersittarpaat. Allat aatsaat kingusinnerusukkut taamaaliulersarput. Tamatigut unioqqutitsisup takutilluartariaqarpaa Guutip piumasaatut aliasulluni, ajornanngippallu allamik isumataarnermut naapertuuttumik suliaqartariaqarpoq, ilanngutiteqqinneqarnissaa eqqarsaatigineqassappat. — apustilit suliait 26:20; 2 Korintumiut 7:11.
Uteqqiinissamut
□ Ernerup tammarsimasup angajua juutillu upperisarsiornikkut siuttui qanoq ilillutik imminnut assigiippat?
□ Angajulliup qanoq takutippaa ajunngitsumik erneruneq qanoq paasisariaqartoq paasisimanagu?
□ Guutip nallittuinera malinniassagutsigu ingassaasinerit assigiinngitsut marluk suut pinngitsoortittariaqarpavut?
□ Qanoq ililluta Guutip nallittuinera ullumikkut malinniarsinnaavarput?
[Qupp. 17-mi ungalusaq]
’ASANNINNERMIK AALAJANGERFIGISSAVARSI’
Unioqqutitsisoq anisitaasimasoq allamik isumataarnermik ersersitsisoq eqqarsaatigalugu Paulusip ilagiit Korinthimiittut ima allaffigai: ’Taamaattumik oqaaqqissaarpassi asanninnermik aalajangerfigeqqullugu.’ (2 Korintumiut 2:8) Griikerit oqaasiat uani ’aalajangerfigaa’-mik nutserneqartoq tassaavoq oqaaseq inatsisinut tunngasoq isumaqartoq ’atortuusartutut nalunaarutigaa’ imaluunniit ’akueraa’. Ilagiinnut ilanngutitinneqartoq maanna ilagiinnut ilaasortatut asaneqartutut akuerineqartutullu misigisinnaasariaqarpoq.
Eqqaamaneqartariaqarporli ilagiinniittut amerlanersaasa anisitaasimanermut ilanngutitinneqarnermullu pissutaasut nalugaat. Aamma ilaat immaqa sivisuumik unioqqutitsisimanermit eqqorneqarsimapput immaqalu suli eqqorneqartarlutik. Unioqqutitsisup peqqissimisup ilanngutitinneqarnera nalunaarutigineqarpat, naleqqulluartuussaaq kingorna aatsaat toqqaannartumik oqaloqatigigaanni nuannaarnini ersersippagu.
Kristumiut ilagiissaannut ilaasortatut ilanngutitinneqartunut tikilluaqquneqarneq uppernikkut nakkussatsinnaqaaq. Naalagaaffilersaarfimmi oqaloqatigisarlugit, oqaluussinermi angalaaqatigisarlugit periarfissanilu allani naleqqulluartuni najorlugit qiimmassarsinnaavavut. Taamaalilluta taakku asanninnitsinnut ’aalajangerfigineratigut’ ajortuliorsimanerisa ilungersunarnerat sumiginnanngilarput; inngililli qilammiittut peqatigalugit tipaatsuutigaarput ajortuliorneq taamaatissimammassuk Jehovamullu utermata. — Lúkarse 15:7.
[Qupp. 15-mi assiliartaq]
Angajulliup nukkami angerlamut utersimanera nuannaarutiginngilaa