’Upperluta saqivugut takunninnata’
’Upperlutami saqivugut takunninnata.’ — 2 KORINTUMIUT 5:7.
1. ’Upperneq malillugu saqineq’ qanoq paasisariaqarpa?
JEHOVAP oqaasiani ilitsersuutigineqartut naapertorlugit qinugaangatta takutittarparput uppissuseqarluta. Uppernerput aamma ersertarpoq Guutip naalagaaffia pillugu inunnut allanut oqaluussisaleraangatta. Inuunerpullu Jehovamut tunniulluinnaratsigu takutipparput ’takunninnata upperluta saqinissarput’ kissaatigigipput, tassa uppernermit siulersortilluta inooriaaseqarusulluta. — 2 Korintumiut 5:7; Kulorsamiut 1:9, 10.
2. Sooq ilagiit sammisartagannut peqataasarneq uppissuseqarnermik uppernarsaataasariaqanngila?
2 Upperluta saqissagutta uppernerput tunngaveqarluartariaqarpoq. (Eprîarit 11:1, 6) Inuit amerlasuut Jehovap nalunaajaasui kajungeraat ileqqussatigut qutsisumik najoqqutassiaat asaqatigiinnerallu pissutigalugit. Tamanna ajunngikkaluarpoq, isumaqartariaqanngilarli inuit taakku uppissuseqartut. Allat immaqa uppissuseqarluartumik aappaqarput angajoqqaaqarlutilluunniit taamaattumillu ilaannikkut asasamik sammisartagaannut peqataasarlutik. Soorunami uppissusilimmik ilaqutaqarnerup angerlarsimaffimmut sunniuteqarnera pilluaqqussutaavoq, tamatumali inuup nammineq Guutimut asanninnera uppissuseqarneralu taarsersinnaanngilaa. — Lúkarse 10:27, 28.
3. (a) Tunngaveqarluartumik uppissuseqassagutta suna qulakkeertariaqarparput? (b) Suna pillugu ilaasa Biibilip Guutimit isumassarsiarititaanera uppernarsipallannerusarpaat?
3 Upperluta saqigutta qularinngilluinnarparput Biibili tassaasoq Guutip oqaasia. Takussutissarpassuaqarpoq Biibili ilumut Guutimit isumassarsiarititaasoq.a (2 Timûtiuse 3:16) Tamatuminnga qularunnaarsinneqassaguit takussutissat qanoq amerlatigisut pisariaqarpat? Tunuliaqutarisat tamatumunnga aalajangiisuusinnaavoq. Inuup allap naammagisaa allamut naammanngitsoorsinnaavoq. Inuit ilaasa naak uppernarsaaterpassuarnik takutinneqarluarlutik akueriumanngilaat. Sooq? Pilerigisat uummammiugisaat pissutaasinnaapput. (Jeremia 17:9) Taamaattumik naak inuup Guutip siunertaa soqutigigaluarlugu, immaqa uummataata silamiunit iluarineqarnissaq kissaatigaa. Immaqa inooriaaseq Biibilimi najoqqutassiarineqartunut akerliusoq taamaatikkusunngilaa. Inulli ilumut sallusuissummik kaakkuni, imminut ilumoorfigiguni maniguuttuugunilu, paasiumaarpaa Biibili Guutip oqaaserigaa.
4. Uppissuseqalissagaanni suna pisariaqarpa?
4 Amerlasuutigut inuit peqqusersuitsut ikiorneqarlutik Biibilimik atuaqqissaartut qaammatialuinnannguit qaangiunneranni paasisarpaat Biibilip tatigilluinnarnissaanut naammattunik pissutissaqartoq. Inuit eqqortumik pissuteqartut uummatertik tamaat ammartarpaat, taamaalillutillu qamuuna eqqarsaataat, kissaataat pissutiginiagaallu ilikkagaannit ilusilersorneqartarlutik. (Tussiaat 143:10) Rûmamiunut agdlagkat 10:10-mi allassimavoq ’uummatikkut’ uppertoqartartoq. Uummammiugisat ilorlerpaat uppernikkut ersertarput; aammali inooriaatsikkut nalunaatsumik ersertarput.
Noap uppernerata tunngaveqarluartup iliuuseqartippaa
5, 6. Noap uppernera sumik tunngaveqarpa?
5 Noa tunngaveqarluartumik uppissuseqarsimavoq. (Eprîarit 11:7) Uppernerminut suna tunngavigaa? Noap Guutip oqaasia pigisimavaa, allakkatiguunngitsoq, kisianni tusarsimasamigut. Mosesimik allakkat siulliit 6:13-imi ima allassimasoqarpoq: „Taava Guuti Noamut oqarpoq: ’Aalajangerpunga pinngortitat uumassuseqartut tamaasa nungutinniarlugit, ajortuliornerisigut nunarsuaq iluaatsuliornermik ulikkaarmat.’“ Jehovap Noa nalunaarfigaa umiarsualiussasoq, annikitsualuillu tamaasa ilanngullugit umiarsualiornissaanik ilitsersuullugu. Taava Guuti ima nangippoq: „Nunarsuarmi ulersuartitsiumaarama uumassuseqartut qilaap ataaniittut tamaasa nungutillugit; nunarsuarmiittut tamarmik nungutitaassapput.“ — 1 Moses 6:14-17.
6 Tamatuma siorna siallersimanerpa? Biibilimi eqqaaneqanngilaq. Mosesimik allakkat siulliit 2:5-imi allassimavoq: „Guuti [Jehova] suli nunamut siallertitsinngi[laq].“ Tassaavorli Mosesip ukiut hundredellit arlallit tamatuma kingorna inuusup pissutsinik allaatiginninnera, imaanngilaq Noap nalaani pissutsit, kisianni tamakku sioqqutsingaarlugit. Soorlu Mosesimik allakkat siulliit 7:4-mi allassimasoq Jehovap sialuk eqqartorpaa, Noallu paasisimagunarpaa tamanna qanoq isumaqartoq. Taamaattoq takusinnaasat Noap upperneranut aalajangiisuunngillat. Apustili Paulus allassimavoq Noa ’takussaanngikkallartut pillugit Guutimit oqaaseq pigigaa’. Guuti Noamut oqarsimavoq nunarsuarmut ’ulersuartitsiumaarluni’, imaluunniit Ny Verden-nutsikkami quppernerup ataani ilanngussami allassimasutut ’qilaap imarsua’ nunarsuarmut nalliutitikkumaarlugu. (1 Moses 6:17) Noap nalaa tikillugu inuiaat oqaluttuarisaaneranni taamaattoqarsimanngisaannarpoq. Pinngortitarsuarli Noap takusinnaasaa tamarmi uppernarsaataavoq Guuti piumasani malillugu qanorluunniit iliorsinnaasoq — taamaattumillu aamma aseruisumik nunarsuaq ulersuartissinnaagaa. Noa upperluni umiarsualiorpoq.
7. (a) Guutip piumasaqaataanik iliussaguni Noap suna paasisariaqanngilaa? (b) Noap uppernerata eqqarsaatiginera qanoq iluaqutigisinnaavarput, inuillu allat qanoq ilillutik uppernerput iluaqutigisinnaavaat?
7 Guutip Noa oqarfiginngilaa qaqugu ulersuaq takkutissasoq, Noalli tamanna suliaminik paamaarussinissaminut aammalu umiarsualiornermik oqaluussinermillu tunulliutitsinissaminut patsisiginngilaa. Guutip siusinaarluni Noa oqarfigaa qaqugu umiarsuarmut ikissasoq. Tamatuma pinnginnerani „Noa Guutip peqqusineratorluinnaq iliorpoq“, taama allassimavoq. (1 Moses 6:22) Noa uppernini malillugu, takusani malinnagit, saqivoq. Taassuma taamaaliorsimanera uagut assut qujamasuutigisinnaavarput, taassumami uppernera pisuulluni uagut ullumikkut inuuvugut. Aammattaarli uagut nammineq uppernerput siunissami atugassatsinnut, meeqqatta avatangiisittalu atugassaannut assut sunniuteqarsinnaavoq.
Abrahamip uppernera
8, 9. (a) Abrahamip uppernera sumik tunngaveqarpa? (b) Jehova qanoq ililluni Abrahamimut ’saqqummersimava’?
8 Maligassaalluartoq alla sammeriartigu, tassalu Abraham. (Eprîarit 11:8-10) Abrahamip uppernerminut suna tunngavigaa? Urimi Kaldæamiittumi avatangiisii tassaapput guutipilussiorneq pigisalerinersuarlu. Sunniinerilli allat Abrahamip isumaanik ilusilersuisuupput. Abrahamip nalaani aamma Noap ernera Sem ukiuni 150-ini inuuvoq. Qularnanngitsumik taanna attaveqarfigisimavaa. Abrahamip qulakkeerluinnarsimavaa Jehova tassaasoq ’Guuti qutsinnerussaartoq, qilammik nunamillu pinngortitsisoq’. — 1 Moses 14:22.
9 Aamma alla Abrahamimut assut sunniuteqarsimavoq. Jehovap ’Abraham saqqummerfigisimavaa Mesopotamiamiitillugu, Haranimi nunaqanngikkallarmat, oqarfigisimallugulu: „Aallarit nunannit eqqarlinnillu nunamut ilinnut takutitassannut.“’ (apustilit suliait 7:2, 3) Jehova qanoq ililluni Abrahamimut ’saqqummersimava’? Nalunanngilaq Abrahamip Guuti toqqaannartumik takusimanngikkaa. (2 Moses 33:20) Immaqali Jehova Abrahamimut takutissimavoq sinnattukkut, takorruukkakkut naalannartukkut imaluunniit inngili Jehovap aallartitaa aqqutigalugu. (Naleqqiukkit 1 Moses 18:1-3; 28:10-15; 3 Moses 9:4, 6, 23, 24.) Qanorluunniit ittumik Jehova Mesopotamiami Abrahamimut saqqummersimagaluarpat, Abrahamip nalunngilaa Jehovap immikkut ittumik pilluaqqusaatissagaani. Abraham uppernini malillugu saqisimavoq.
10. Jehovap qanoq ililluni Abraham uppernikkut nakussatsippaa?
10 Abraham nuna Guutip tunniukkumasaa pillugu annikitsualuit tamaasa ilisimanngikkaluarlugit upperpoq. Aamma qaqugu nuna pigilissanerlugu nalugaluarlugu upperpoq. Upperpoq nalunnginnamiuk Jehova Guutiusoq Ajugaqanngitsoq. (2 Moses 6:3) Jehovap oqarfigisimavaa kinguaaqalissasoq, Abrahamilli ilaannikkut eqqarsaatigisarpaa tamanna qanoq ililluni pissanersoq. Utoqqalisimavormi. (1 Moses 15:3, 4) Jehovap Abraham uppernikkut nakussatsippaa tuperminit aneqqugamiuk qilammullu qiviarluni sapinngippat ullorissat kiseqqugamigit. „Taama amerlatigissapput kinguaassatit,“ Guuti oqarpoq. Tamanna Abrahamip itisuumik attorneqaatigaa. Soorunami ulloriarpassuarnik tupinnangaartunik tamakkuninnga Pinngortitsisup neriorsuutini eqquutitissinnaavaa. ’Abrahamip Jehova upperaa.’ (1 Moses 15:5, 6) Tusakkami iluarinarnerat pissutigiinnarlugu uppinngilaq; tunngaveqarluartumik uppissuseqarpoq.
11. (a) Guuti neriorsuimmat Sara utoqqalisimagaluarluni ernertaarumaartoq Abrahamip qanoq qisuariarfigaa? (b) Abrahamip ernini Morijap qaqqaanukaateriarlugu pilliutigisussanngoramiuk qanoq uppissuseqartigaa?
11 Abraham 100-t missaannik ukioqartoq nulialu Sara 90-it missaannik ukioqartoq, Jehovap Abrahamip Sarallu ernertaarnissaannik neriorsuut uteqqippaa. Abrahamip atukkatik piviusorsiorluni eqqarsaatigai. ’Guutip unnersuutaa uppinnginnermit qularnartinngilaa, kisianni uppernermigut pissatsippoq Guuti naalannartillugu; nakimatiginngilluinnarpaalu taassuma unnersuunni naammassisinnaagaa.’ (Rûmamiut 4:19-21) Abrahamip nalunngilaa Guutip neriorsuutaa naammassinngitsoorsinnaanngitsoq. Kingorna Guutip qinnuigimmani ernini Morijap nunaanukaateriarlugu pilliutigeqqullugu, upperluni naalappoq. Tatigilluinnarpaa Guutip tupinnartuliornikkut taassuminnga ernertaartitsisimasup aamma uummarteqqissinnaagaa neriorsuutini allat ernermut taassumunnga atatillugu neriorsuutigisimasani eqqortinniarlugit. — Eprîarit 11:17-19.
12. Abraham qanoq sivisutigisumik uppernini malillugu saqisimava, nukittuumillu uppissuseqaramik taanna ilaqutaalu qanoq akilerneqarumaarpat?
12 Abrahamip uppernera pisukkut ataasiinnakkut ersinngilaq, inuuneratigulli tamatigut uppernermit siulersorneqartukkut erserpoq. Abraham nammineq inuutillugu Guutip neriorsuutigisamik kingornussitinngilaa. (apustilit suliait 7:5) Taamaakkaluartorli utaqqikatalinngilaq Urimullu Kaldæamiittumut uternani. Ukiuni hundredeni toqussi tikivillugu nunami Guutip ornitsissimasaani tuperni najugaqarpoq. (1 Moses 25:7) Taanna nulialu Sara, ernerat Isak kiisalu ernutaat Jakob pillugit Eprîarinut agdlagkat 11:16-imi ima allassimasoqarpoq: ’Taamaattumik Guutip nikaginngilai Guutiannik taaneqartissalluni, illoqarfimmik inissioreeramigit.’ Aap, naalagaaffiup Messiasikkoortup oqartussaaffigisaani nunarsuarmi inissaqartippai.
13. Ullumikkut Jehovap kiffaasa kikkut takutittarpaat Abrahamitut uppissuseqarlutik?
13 Ullumikkut Jehovap innuttaasa akornanni Abrahamitut ittoqarpoq. Taakkua ukiorpassuarni uppernertik malillugu saqisimapput. Guutimit nakussatsinneqarlutik akornutit qaqqatut ittut anigortarsimavaat. (Matîuse 17:20) Nalugaluarlugu qaqugorpiaq kingornussassaminnik Guutip tunissagaatik uppernikkut aalajaattuarput. Nalunngilaat Guutip oqaasia kukkusinnaanngitsoq, Guutillu nalunaajaasuinut ilaasinnaanertik immikkut pisinnaatitaaffissuartut erlinnartutut isigaat. Aamma illit taamatut misigippit?
Uppissuseq Mosesimik iliuuseqartitsisoq
14. Mosesip uppernera qanoq tunngavilerneqarsimava?
14 Uppernikkut maligassaalluartoq alla tassaavoq Moses. Taassuma uppernerata suna tunngavigisimavaa? Tunngavik naalungiarsuuneraniilli pilersinneqarsimasoq. Faraop paniata Moses Nilenip sinaani papyrusimik kooriliamiittoq nassaarigamiuk ernermisut tigusimavaa; Mosesilli anaanaviata, Jokebedip, naalungiarsuunerani paaqqutaraa. Qularnanngitsumik Jokebedip ajoqersorluarsimavaa Jehovamillu asannissuseqalersillugulu Jehovap Abrahamimut neriorsuutaanik pingaartitsilersissimallugu. Kingorna Faraop inoqutaanut ilaasutut Moses ’Egyptenimiut ilisimatuussusiannik tamanik ajoqersorneqarpoq’. (apustilit suliait 7:20-22; 2 Moses 2:1-10; 6:20; Eprîarit 11:23) Naak Moses nuimasumik inissisimaffeqaraluarluni Guutip innuttai inussiaasut eqqarsaataani pingaarnerpaapput.
15. Mosesip Jehovap innuttai iligilermagit qanoq kinguneqarsimava?
15 Mosesip 40-nik ukioqarluni Egyptenimiu toquppaa Israelikkut ilaat naapertuilluanngitsumik pineqartoq illersorniarlugu. Pisimasup tamatuma takutippaa Mosesip Guutip innuttai qanoq isigigai. Aap, ’uppernikkut Moses alligami Faraop paniata erneranik taaqqujunnaarpoq’. Egyptenimiut kunngikkormiuinut ilaasutut ’nuannaarneq naajasoq ajortip pia’ uninngavigiinnarnagu uppernerata Guutip innuttaanut atugarliortitaasunut ilaasutut imminut isigilersippaa. — Eprîarit 11:24, 25; apustilit suliait 7:23-25.
16. (a) Moses Jehovamit sumik suliassinneqarpa, qanorlu ililluni Guutimit ikiorneqarpa? (b) Mosesip suliassani naammassinialeramiuk uppernera qanoq erserpa?
16 Mosesip nunaqqatini aniguisikkusoqai, piffissarli Guutip aalajangigaa suli nalliutinngilaq. Moses Egyptenimit qimaasariaqarpoq. Aatsaallu ukiut 40-t missaanniittut qaangiummata Jehovap inngili aqqutigalugu Moses peqquaa Egyptenimut utissasoq Israelikkullu Egyptenimit siulersussagai. (2 Moses 3:2-10) Moses qanoq qisuariarpa? Jehovap Israelikkunnik aniguisitsisinnaaneranik qularinninnermik ersersitsinngilaq, namminerli inuttut Guutip imminut suliassiissutaanut naammanngitsutut misigivoq. Jehovap Moses pisariaqartitaanik qiimmassarpaa, uppernikkullu nakussatsinneqarpoq. (2 Moses 3:11–4:17) Egyptenimut uterpoq, tassanilu arlaleriarluni Farao ornillugu mianersoqqusarpaa Israelikkut Jehovamik pallorfiginnikkiartorlutik aallarnissaannik akuersiumannginnini pillugu perlussiortinneqarnissaanik. Perluit taakku Mosesip nammineerluni pilersissinnaanngilai. Uppernini malillugu, takusani malinnagit, saqivoq. Jehova taassumalu oqaasii upperai. Faraop Moses sioorasaartarpaa, taamaakkaluartorli Moses uppernermigut nikallujuittuarpoq. ’Uppernikkut Egypten qimappaa kunngip kamannissaa ersissutiginagu, takussaanngitsoq isigalugulusooq iperarnaveersaaramiuk.’ (Eprîarit 11:27) Moses naammalluinnartuunngilaq; kukkusarpoq. (4 Moses 20:7-12) Guutimilli suliassinneqarnermi kingorna uppernini inuunermini tamatigut siulersortigaa.
17. Noa, Abraham Mosesilu uppernertik malillugu saqigamik, naak Guutip silarsuassaa nutaaq takunngikkaluarlugu, qanoq iluaqutigiumaarpaat?
17 Qanortoq tamatta immikkut Noatut, Abrahamitut Mosesitullu uppissuseqarta. Taakkua Guutip silarsuassaa nutaaq takunngilaat. (Eprîarit 11:39) Taakkua nalaanni piffissaq Guutip aalajangigaa suli nalliussimanngilaq; siunertaata immikkoortui allat suli naammassineqarsimanngillat. Guutilli oqaasianut uppernermikkut sanngiilliulinngillat, aqqilu inuunerup atuagaani Guutimi allassimapput.
18. Qilammi inuunissamut qaaqquneqarsimasut sooq uppernertik malillugu saqisariaqarsimappat?
18 ’Guutip ajunnginnerusoq siumut uatsinnut qinereerpaa,’ apustili Paulus taama allassimavoq. Tassa Paulusitut qilammi Kristus peqatigalugu inuusussatut qaaqquneqarsimasunut ajunnginnerusumik siulittuisimavoq. (Eprîarit 11:40) Ingammik taakkua eqqarsaatigalugit Paulus Korintumiunut agdlagkat áipait 5:7-imi ima allassimavoq: ’Upperlutami saqivugut takunninnata.’ Allassimaffiup allanneqarnerata nalaani taakkua arlaannaataluunniit qilammi akissarsiassaq pisimanngilaa. Akissarsiassartik piviusumik takusinnaanngilaat, kisianni tunngaveqarluartumik upperaat. Kristus toqusunit makititaasimavoq qilammi inuunermut makititaasussat naaqqaataattut; qilaliannginneranilu inuit 500-nit amerlanerusut takusimavaat. (1 Korintumiut 15:3-8) Uppernermik tamatuminnga inuunertik aqutsissallugu pissutissaqarluarput. Uaguttaaq uppernerput malillugu saqinissatsinnut pissutissaqarluarpugut.
19. Eprîarinut agdlagkat 1:1, 2 naapertorlugu kina aqqutigalugu Guutip oqaluffigisimavaatigut?
19 Ullumikkut Jehova orpikkap ikumasup eqqaani Mosesimut oqalunnermini iliorsimanermisut inngili aqqutigalugu innuttaminut oqalunneq ajorpoq. Ernini aqqutigalugu oqaluffigisimavaatigut. (Epr. 1:1, 2) Taanna aqqutigalugu oqaaserisimasani Biibilimi allanneqartissimavai oqaatsinullu nunarsuarmi sumi tamaani atorneqartunut nutsertissimallugit.
20. Sooq Noamit, Abrahamimit Mosesimillu peqarneruvugut?
20 Noap, Abrahamip Mosesillu pigisimasaannit annerusumik uagut peqarpugut. Guutip oqaasia tamaat pigaarput — ilarujussualu eqquutereersimavoq. Angutit arnallu misilinneqartaraluaqalutik Jehovamut nalunaajaasutut aalajaattuarsimasut pillugit Biibilimi allassimasut tamaasa eqqarsaatigalugit Eprîarinut agdlagkat 12:1-imi ima allassimasoqarpoq: ’Uaguttaaq oqilaaqutaasut tamaasa ajortilu uatsinnik ninniortitseqqajaaginnartoq iperartigik, nikallujuerlutalu arpanniarta assoruunnitsinni uatsinnut siunertarititaasumi.’ Uppernerput taamaattussaannartut isigissanngilarput. ’Ajorti uatsinnik ninniortitseqqajaaginnartoq,’ tassaavoq uppernermik amigaateqarneq. Upperneq nukittooq attattuaannarumallugu ilungersorluta akiuuttariaqarpugut. (wE 15/1 98)
[Quppernerup ataani ilanngussaq]
a Takuuk atuagaq Bibelen — Guds ord eller menneskers?, Napasuliaq Alapernaarsuiffiup Peqatigiiffianit naqiterneqartoq.
Uteqqiinissamut apeqqutit
□ ’Upperneq malillugu saqineq’ qanoq paasisariaqarpa?
□ Noap uppernerminik ersersitsisimanera qanoq ilinniutigisinnaavarput?
□ Abrahamip uppernerminik takutitsisimanera qanoq iluaqutigisinnaavarput?
□ Sooq Moses Biibilimi uppernermik ersersitsinikkut maligassaalluartutut tikkuarneqarpa?
[Qupp. 10-mi assiliartaq]
Abraham uppernini malillugu saqisimavoq
[Qupp. 10-mi assiliartaq]
Mosesip Aronillu uppernertik takutissimavaat Faraomut sassaramik