Inuunerit pitsaanerpaamik atoruk
ATAATAQ illumiippoq, siniffimmiilluni, kræftimillu toqujartorluni. Ernera sannavimmiippoq, ataatamilu sannatai iluarsaallugit. Taamaaliortilluni ataatami tamakku atorlugit sanaarisarsimasai kusanartut eqqarsaatigai. Sannavik illup eqqaaniikkaluartoq nalunngilaa ataatani tamaanga iseqqinngisaannassasoq, sannatillu pikkoriffigilluakkani tigummeqqinnaviarnagit. Piffissaq tamanna qanganngoreerpoq.
Ernerata allassimaffik Nalunaajaasup oqaasii 9:10-miittoq eqqarsaatigaa: „Guutip ilinnut periarfissaasinnaatitai tamaasa atorlugit piginnaanerillu tamaat atorlugu iliorniarit toqusut inaanni ornikkanni suliassaqanngimmat pilersaarusiorfissaqaraniluunniit, ilisimasassanillu ilisimassummilluunniit pissarsiassaqarani.“ Allassimaffik taanna nalunngilluarpaa. Sallusuissut Biibilimiittoq, tassa toqunganeq susinnaajunnaarfiusoq, allanut ajoqersuutigigaangamiuk allassimaffik taanna arlaleriaqaluni atortarsimavaa. Massakkulli Salomonip oqaasiisa tamakkua isumaat aatsaat iluamik paasilerpaa, tassa periarfissaqarallartilluta inuunerput tamakkiisumik nuannaarlutalu atortariaqaripput, piffissaq piginnaaneeruffissarput nalliukkumaarmat.
Inuunerit nuannaarutigiuk
Nalunaajaasup oqaasii-ni tamani Kunngi Salomonip atuartuni inuunerminnik nuannaarutiginninnissaannik kajumissaarpai. Assersuutigalugu kapitali 3-mi oqaatigineqarpoq: „Paasivara inunnut pitsaanerpaassasoq inuunertik atorunikku nuannaarlutik inuulluataarlutillu. Inuk nerillunilu imersinnaappat suleruloornerminilu tamani pilluarluni inuuppat tamannaavortaaq Guutip tunissutaa.“ — Nalunaajaasup oqaasii 3:12, 13.
Solomonip Guutimit isumassarsisitaalluni eqqarsaat una uteqqippaa: „Guutip angut pisuunngortissimappagu periarfissaqartillugulu pisuussutiminik nuannaaruteqarnissaanut, taamalu Guutip pissarsiarititai ilassillugit tigusinnaallugit suleruloornerminilu nuannaaruteqarsinnaalluni - tamannaavoq Guutip tunissutaa.“ — Nalunaajaasup oqaasii 5:18.
Taamatuttaaq inuusuttut kajumissaarpai: „Inuusutsillutit qiimasaarniarit, uummativit nuannarisai malillugit iliortarit; nuannaarniarit inuusunnerpit ulluini, isivillu alianaagisaat malillugit pisarlutit.“ (Nalunaajaasup oqaasii 11:9a) Nuannillaaraaq inuusuttut nukitik tamaasa atorluaraat takullugit! — Ussatit 20:29.
’Pinngortitsisit eqqarsaatiginiaruk’
Soorunami Salomon isumaqanngilaq uummatitsinnut isitsinnullu pilerinartut tamaasa anguniassallugit silatusaarnerusoq. (Naleqqiuguk Juánasip agdlagai sujugdlît 2:16.) Tamanna oqaasiini tulliuttuni ersarippoq: „Eqqaamassavalli qanoq iliorninni [kissaatigisatit naammassiniarlugit iliuutsinni] tamani Guuti akisussaaffigissagakku.” (Nalunaajaasup oqaasii 11:9b) Qassinilluunniit ukioqaraluarutta eqqaamasariaqarparput Guutip inuunerput qanoq atorneripput takusinnaagaa tamannalu tunngavigalugu eqqartuunneqassalluta.
Ila sianiilliornerussusia isummissalluni namminissarsiorluta inuusinnaasugut Guutimillu mianerinninnissaq utoqqalinissatsinnut kinguartissinnaagipput! Inuunerput qaquguluunniit annaasinnaavarput. Taamaanngikkaluarpalluunniit utoqqaligaanni Guutimut kiffartorneq oqinnerulertanngilaq. Tamanna paasisimallugu Salomon allappoq: „Pinngortitsisit eqqarsaatiginiaruk inuusuttuunerpit ulluini, ukiut ima oqaatigiumaakkavit nalliutinnginneranni: „Nuannaarutissarsiffiginngilakka!“ — Nalunaajaasup oqaasii 12:1.
Utoqqaliartortilluni piginnaanikinnerulernarpoq. Taava assersuusiorluni Salomonip utoqqalinerup nassatarisartagai eqqartorpai. Assaat tallillu sajulissapput, nissut sanngiillissapput kigutillu ikilissallutik. Nutsat qeersaalerlutillu saalissapput. Sinik ima ikkatsigilissaaq allaat timmiaaqqat qitivinnerat itissutigisalissallugu. Misigissutit — isigisinnaassuseq, tusaasinnaassuseq, malugissut, naamasinnaassuseq ooqattaarisinnaassuserlu sanngiilliartussapput. Timi sanngiillisarmat uppinnissaq qununarsissaaq aqqutissamilu annilaarnartut allat mersernarsissallutik. Naggataatigullu toqussaagut. — Nalunaajaasup oqaasii 12:2-7.
Ingammik inuusuttuunerminni Pinngortitsisorsuamminnik eqqarsaatiginnissimanngitsunut utoqqalineq alianartuuvoq. Inuunerminnik asuliinnartitsisimagamik utoqqalineq nuannaarutissarsiffiginngilaat. Immaqalu guutiitsutut inuusimaneq timikkut ajornartorsiutinik utoqqalinermi atugarliornerulersitsisunik pilersitsisimasinnaavoq. (Ussatit 5:3-11) Siumut isigileraangamik paasilertarpaat iliveq kisimi utaqqisoq.
Utoqqalinerit pilluaatissarsiffigiuk
Imaanngilarli utoqqaat inuunerminnik nuannaarutiginnissinnaanngitsut. ’Ullut ukiullu amerlasuut inuuffigisassat’ Biibili naapertussagaanni tassaapput Guutimit tunissutit. (Ussatit 3:1, 2) Jehova ikinngutiminut Abrahamimut oqarsimavoq: „Illit utoqqalilluareersimallutit iliverneqarumaarputit.“ (Mosesimik allakkat siulliit 15:15) Utoqqalineq erloqinarsinnaasaraluartoq Abraham ukiuni inuuffigisamini kingullerni nuannaarluni nalerisimaarlunilu kingumut qiviarsinnaasimavoq Guutimut kiffartornermini pisuumik inuuneqarsimalluni. Upperluni Guutip naalagaaffia, ’illoqarfik tunngavilersugaq’, ilimagisimavaa. (Hebræerne 11:10) Taamaattumik „utoqqarsuanngorluni eqqissilluni toquvoq“. — 1 Mosebog 25:8.
Salomon ima oqaassuteqarpoq: „Ukiut inuuffigisatit tamaasa nuannaralugit atorniakkit.“ (Nalunaajaasup oqaasii 11:8) Inuusuttuugaluarutta utoqqaagaluaruttaluunniit nuannaarneq piviusoq Guutimut attaveqarnitsinnut atassuteqarpoq.
Angutip inuusuttup ataatami sannatai piiaatigalugit tamakku tamaasa eqqarsaatigai. Eqqarsaatigivai inuit nalunngisani inuunerminni pitsaanerusumik atugaqarusukkaluartut, nuannaarnermilli piviusumik nassaarsimanngitsut, Pinngortitsisiminnut attaveqannginnamik. Taamaattumik naleqquppoq Salomon inuunermik nuannaarutiginninnissamik kajumissaareriarluni tamaasa ataatsimut katillugit ima oqaatigimmagit: „Taava oqaaserineqartut tamarmik ataatsimut katinneqarsinnaapput imaalillugit: Guuti mianeruuk inatsisaalu maleruarlugit, tamanna inunni ileqqussaammat.” — Nalunaajaasup oqaasii 12:13. (wE 15/8 98)