Anersaakkut siumukartuarit!
Ulloq Kuisiffipput Nuannaarluta Eqqaamajuartariaqarparput. Ullormimi Tamatumani Allat Takkuanni Nassuerutigaarput Guuti Kiffartuunniarlugu Taassumunnga Tunniulluinnarsimalluta.
INUPPASSUIT tamanna anguniarlugu ilungersungaarsimapput. Ukiorpassuarni ileqqupilugisimasatik taamaatissimavaat, ikinngutipilugisimasatik qimallugit, eqqarsartaatsit pissutsillu sungiutiinnakkat allanngortillugit.
Naak kuisinneq nuannersumik pingaartumillu pisimasuugaluartoq, tassaannaavoq aallartinneq. Apustili Paulus kristumiut kuisimasut Judæamiittut ima allaffigai: ’Taamaattumik Kristusimik ajoqersuutaasut aallaqqaataat qaangiinnarlugit inersimassummut ingerlaniarta.’ (Eprîarit 6:1) Aap, kristumiut tamarmik ’apuuttariaqarput ataasiussusissamut, uppeqatigiillutik Guutillu erneranik ilisarseqatigiillutik, angut inersimasoq nallersimallugu, Kristusip tamakkigaasa angissusiat nallersimallugu’. (Evfisumiut 4:13) Aatsaat inersimalluarnissaq tikillugu siumukartuarutta ’uppernikkut aalajangersinnaavugut’. — Kulorsamiut 2:7.
Ukiuni ikittuni kingullerni pallorfiginnittut tunniulluinnarsimasut nutaat hundredetuusintilikkuutaat kristumiut ilagiissaannut ilanngussimapput. Immaqa illittaaq ilagaatsit. Qatanngutitit ukiuni hundredelinni siullerni inuusut assigalugit anersaakkut ittumik naalungiarsuujuarneq naammaginngilat. Anersaakkut ittumik alliartorusupputit siumukarlutit. Qanorli ilillutit anersaakkut siumukarsinnaavit?
Nammineerluni atuaqqissaartarnikkut siumukarneq
Paulusip kristumiut Filippimiittut ima oqarfigai: ’Imaattorlu qinnutigisarpara: asannissusersi ilisarsinermik sianinernillu tamanik ilaqangaaleriartuinnaqqullugu.’ (Filípimiut 1:9) Eqqortumik ’ilisarsinikkut’ alliartorneq anersaakkut siumukarnissamut aalajangiisuuvoq. ’Guuti Jesusilu ilisariniarlugit’ siumukartumik iliuuseqartuartariaqarpugut. Kuisinnermimi naammassineqanngilaq. — Juánase 17:3.
Qatanngutip arnap kristumiup Alexandramik taasinnaasatta 16-inik ukioqarluni kuisinnermi ukiut qulit kingorna tamanna paasisimavaa. Sallusuissummi perorsarneqarsimavoq, ataatsimiigiartuartarsimalluni aalajangersimasumillu oqaluussinermut peqataasarsimalluni. Ima allappoq: „Qaammatialuit ingerlanerini paasilerpara ajortoqartoq. Aalajangerpunga sallusuissut pillugu misigissutsikka Jehovamullu nalunaajaasuuninnut pissutiginiakkakka peqqissaartumik ilumoortumillu misissorniarlugit.“ Qanoq inerneqarpa? „Sallusuissummiinninnut pissutiginiakkama eqqissiunnaartippaannga. Eqqaamavara alliartorninni ataatsimiinnerit oqaluussisarnerlu pingaartinneqartartut. Soorlulusooq naatsorsuutigineqartoq nammineerluni atuaqqissaartarneq qinusarnerlu eqqarsaatigalugit ileqqut ajunngitsut imminnik pilertartut. Uannimi taama pisoqarsimanngilaq.“
Apustili Paulusip oqaaqqissaarpaatigut ’killigisarput naapertorlugu toraagaq ataaseq ornillugu ingerlaqqulluta’. (Filípimiut 3:16) Siumukarniaraanni aalajangersimasumik periaaseqarneq iluaqutaassaaq. Kuisinnginninni qularnanngitsumik sapaatit-akunneri tamaasa ilinniartitsisoq piukkunnaatilik peqatigalugu Biibili atuaqqissaartarpat. Pingaartitsinerit alliartortillugu qularnanngitsumik sapaatip-akunneranut sammisassassi piareersartalerpatit allassimaffiillu innersuussutigineqartut Biibilimi quppertalerlugit. Kuisereernerpit kingorna suli ’toraagaq ataaseq ornillugu ingerlavit’?
Taamaanngippat pisariaqarsinnaavoq pingaarnersiuillutit tulleriiaarinerpit eqqarsaatigeqqinnissaa qulakkeerniarlugu ’sorliit pingaaruteqarnerunersut misilittarsinnaaqqullugit’. (Filípimiut 1:10, NV) Ullutsinni ulapiffiusuni nammineerluni atuaqqissaartarneq Biibilimillu atuartarneq piffissaqarfigissagaanni imminut naalakkersinnaasariaqarpoq. Kingunerili imminnut akilersinnaapput. Alexandrap misilittagai eqqarsaatigeriakkit. „Ukiuni 20-ni kingullerni sallusuissummiissimaninni ataatsimiigiaannartarsimavunga kiffartornermullu peqataaginnartarsimallunga,“ taama nassuerpoq nangillunilu: „Taamaaliorneq soorunami pingaaruteqaqaaq, paasisimavarali ajornartorsiutit takkukkaangata qasusuisaarnissannut naammanngitsoq. Ajornartorsiutima pissutigaat nammineerlunga atuaqqissaartarsimarpiannginnera, aalajangersimanngitsumillu qarsuppittumillu qinusarsimanera. Maanna paasivara isumaga allanngortittariaqarlugu siunertaqarluartumillu atuaqqissaartarnissannut pilersaarusiortariaqarlunga Jehova ilumut ilisarilersinnaaqqullugu, asasinnaaqqullugu erneratalu pilliutaa pingaartissinnaaqqullugu.“
Nammineerlutit atuaqqissaartarninni sungiussilluarniarlutit ikiorneqartariaqaruit, ilagiinni utoqqaanertat kristumiulluunniit allat inersimalluartut nuannaarlutik ikiussavaatsit. Aamma Napasuliaq Alapernaarsuiffik-mi 1. maaji 1995-imoortumi, 1. septembari 1993-imoortumi aamma 1. juuni 1987-imoortumi allaaserisaqarpoq tamanna pillugu pitsaasunik unnersuussutinik imalinnik.
Guutimut qanillineq pisariaqarpoq
Aamma Guutimut attaveqarnitsinni siumukarniartariaqarpugut. Ilaannikkut tamatumunnga pisariaqartitsineq annertorujussuusinnaasarpoq. Assersuutigalugu Anthony inuusuttuaraalluni kuisissimasoq taaneqarsinnaavoq. „Ilaquttatsinni meeqqanit uanga siulliullunga kuisippunga,“ oqaluttuarpoq. „Kuisereerama anaanama eqitaarujussuarpaanga. Taama pilluartigitillugu takusimanngisaannarpara. Tamarmik nuannaarput, nukittuutullu misigivunga.“ Aammali pitsaanngitsoqarpoq. „Ilagiitsinni sivisuumik inuusuttunik kuisittoqarsimanngilaq,“ Anthony nangippoq. „Taamaattumik usorsisimaangaarpunga. Ataatsimiinnerni oqaaseqaraangama saqqummiussaqaraangamalu tulluusimaartarpunga. Allanit nersorneqarnissara akuerineqarnissaralu pingaartinneruakka Jehovap unnersiutiginissaanit. Qanittumik attaveqarfiginngilara.“
Ilaat immaqa Anthonytut Jehovamut tunniulluinnarsimapput taassuma nuannaartinnissaa pinnagu inuilli nuannaartinniarlugit. Taamaattorli Jehovap naatsorsuutigaa taakkua imminut kiffartorniarlutik neriorsuutertik eqquutissagaat. (Naleqqiuguk Nalunaajaasup oqaasii 5:4.) Tamannali artornarsinnaavoq Guutimut nammineerlutik attaveqanngippata. Anthony oqaluttuarpoq: „Kuisereernerma kingorna nuannaangaarnera sivikippoq. Ukioq ataaseq qaangiutinngitsoq sualuttumik ajortuliorsimavunga ilagiillu utoqqaanertaannit ilungersortumik oqaanneqartariaqarsimallunga. Ajortulioqqittuarama ilagiinnit anisitaavunga. Jehovamut tunniulluinnarsimanerma kingorna ukiut arfinillit qaangiuttut toqutsisimasutut tigusaavunga parnaarussaallungalu.“
Qanoq ililluni Jehovamut qanittumik attaveqarneq ineriartortinneqarsinnaasoq
Kristumiut tamarmik qanorluunniit atugaqaraluarunik qaaqqussut manna Biibilimeersoq ilassisinnaavaat: ’Guutimut palligunniaritsi, taava ilissinnut palligutissavoq.’ (Jâko 4:8) Biibilimi tusarliussaq ilikkaqqaaratsigu qularnanngitsumik Guutimut qanittumik attaveqalersimassaagut. Paasilersimavarput tassaanani Guuti kinaassusiliunngitsoq kristumiuuneraqatigiit pallorfigisartagaat, tassaasorli kinaassusilik atilik, tassa Jehova. Ilikkarsimavarputtaaq Guuti kajumissinartunik pissuseqartoq, tassaalluni „Guuti nallittuisoq, saammaasoq, kamajasuunngitsoq, isumassuingaartoq unneqqaringaartorlu“. — 2 Moses 34:6.
Guuti kiffartorfiginiarlugu tunniulluinnarsimanitsinnik neriorsuuterput eqqortinniarlugu taassumunnga qaninnerusumik attaveqarneq ineriartortittariaqarparput. Qanoq ililluta? Tussiaasiortoq ima qinusimavoq: „Ingerlavigeqqusannik ilinniartinnga, [Jehova], aqqutigeqqusannik ajoqersuunnga!“ (Tussiaat 25:4) Biibilimik Peqatigiiffiullu naqitigaanik Biibililersaarutinik nammineerluni atuaqqissaartarneq ikiortigalugu Jehova ilisarinerulersinnaavarput. Aamma aalajangersimasumik qamannga pisumik qinunikkut saaffiginissaa pingaartorujussuuvoq. „Uummammiugisasi tamaasa taassumunnga saqqummiussigit,“ tussiaasiortup taama kajumissaarpaatigut. (Tussiaat 62:9) Malugilerutsigu qinutivut akineqartut, paasissavarput Guutip inuttut soqutigigaatigut. Tamatuma taassumunnga qaninnerulersissavaatigut.
Aamma misilinneqarnikkut ajornartorsiuteqarnikkullu Guutimut qaninnerulersinnaavugut. Immaqa uppernikkut misilinneqartarpugut unamminiarnartullu allat naammattoortarlugit, soorlu nappaatit, aningaasatigut ajornartorsiutit imaluunniit atuarfimmi suliffimmiluunniit tatineqarnerit. Ilaasa immaqa ulluinnarni sammisassat teokratiimut tunngasut, soorlu oqaluussisarneq, ataatsimiigiartarneq ilaqutariittullu atuaqqissaaqatigiittarneq, artornartippaat. Kisimiillutit ajornartorsiutit tamakku aaqqinniarsareqinagit. Guuti ikiuinissamik qinnuigiuk, siulersuinera unnersuussineralu qinnutigikkit. (Ussatit 3:5, 6) Anersaava illernartoq ilungersuussillutit qinnutigiuk. (Lúkarse 11:13) Misigigaanni Guuti qanoq asannilluni ikiuisartoq taassumunnga qaninnerusutut misiginassaaq. Soorlu tussiaasiortoq David oqartoq: „Misigisiuk takusiullu [Jehova] avaaginnittuusoq. Pilluarpoq taassumani qimarraveqartoq!“ — Tussiaat 34:9.
Anthonymi qanoq ippa? Ima oqaluttuarpoq: „Eqqarsaatigilerpara Jehovap piumasaanik iliornissamut tunngatillugu anersaakkut anguniagaqarsimanera. Eqqarsaatigalugu annernaqaaq. Naalli annernaraluartoq pakatsisimagaluarlungalu Jehovap asanninnera eqqaamavara. Imunga Jehovamut qinisinnaasimanngilanga, taamaaliorpungali. Uummammiugisakka Jehovamut aniatippakka qinnuigalugulu isumakkeerfigeqqullunga. Biibilimik atuaqqittalerpunga, tupigusuutigaaralu puigorsimasakka taama amerlatigimmata Jehovalu pillugu qanoq ilisimasakitsigalunga.“ Anthony suli parnaarussivimmiikkaluarluni Jehovap nalunaajaasuinit eqqaaniittunit ikiorneqartarpoq, anersaakkullu uummaarissiartoqqilluni. Qujamasulluni ima oqarpoq: „Jehova peqatigiissortaalu ikiortigalugit inutoqaq iperarsinnaasimavara, ullullu tamaasa inuttaaq atiniarlugu sulissutigisarpara. Jehovamut attaveqarnera maanna pingaarteqaara.“
Kiffartornermi anersaakkut siumukarneq
Jesus Kristusip ajoqersukkani peqqusimavai ’Guutip naalagaaffianik nutaarsiassaq nuannersoq’ oqaluussissutigeqqullugu. (Matîuse 24:14, NV) Oqaluussisartunngorlaaguit kiffartornermi immaqa misilittagakipputit. Taamaappat qanoq ilillutit siumukarsinnaavit ’kiffartuutigisat naammassisinnaajumallugu’? — 2 Timûtiuse 4:5.
Ilaatigut taamaaliorsinnaavutit oqaluussinermut isumalluartumik isumaqarnerup ineriartortinneratigut. ’Erlinnartutut’, immikkut pisinnaatitaaffittut, isiginissaa ilinniaruk. (2 Korintumiut 4:7, NV) Oqaluussinerup periarfissaqartippaatigut Jehovamut asanninnitta ilumoornittalu takutinnissaannut. Aamma periarfissaqartippaatigut inoqatitsinnik isumassuinissatsinnik. Taamaalilluta namminissarsiornata immitsinnit tunniukkutta nuannaarnermik piviusumik kinguneqarsinnaavoq. — apustilit suliait 20:35.
Jesusip nammineq oqaluussineq isumalluartumik isumaqarfigisimavaa. Guutip oqaasiata ilumoortortaanik allanut oqaluttuussisinnaanini ’nerisassatut’ isigaa. (Juánase 4:34) Allat ikiornissaannut pissutigisani ima oqaatigai, soorlu Matîuse 8:3-mi allassimasoq: ’Piumavunga.’ Inuit Satanip silarsuaani iliorfigineqartarnertik pissutigalugu ’paarinerlugaasut isumakkigaasullu’ Jesusip misiginneqatigai. (Matîuse 9:35, 36) Illittaaq taassumatut oqartarpit ’piumavunga’ inuit anersaakkut taartumiittut Guutillu oqaasianik qaammarsarneqarnissaminnik pisariaqartut ikiorusullugit? Taamaappat Jesusip ima peqqussutaa maleruassallugu kissaatigissavat: ’Taamaattumik aallaritsi, inuiaqatigiillu tamaasa ajoqersuganngortissigik.’ (Matîuse 28:19) Aap, sulineq tamanna peqqissutsit pissutsillu allat atukkatit naapertorlugit sapinngisannik peqataaffigerusussavat.
Aamma anersaakkut siumukarsinnaavutit oqaluussinermut aalajangersimasumik peqataasaruit — ajornanngippat sapaatit-akunneri tamaasa. Aalajangersimasumik peqataasarnerup qununeq ernumanerlu oqaluusseqataavallaanngitsut akornutigisinnaasaat millisissinnaavai. Allatiguttaaq oqaluussinermut aalajangersimasumik peqataasarneq iluaqutigissavarput. Tassuuna sallusuissummik paasisaqarnerput pingaartitsinerpullu allisinneqassapput, Jehovamut tullitsinnullu asanninnerput nakussatsinneqassallutik Guutillu naalagaaffianik neriuuterput aallulluarsinnaallugu.
Maannakkulli atukkatit oqaluusseqataanissamik periarfissannut akornutaappata? Tamakku allanngortinneqarsinnaanngikkallarpata tuppallersaatigisinnaavat eqqarsaatigalugu uummatikkut iluunngarlutit iliuuseqaruit, Jehovap tamanna naammagissavaa. (Matîuse 13:23) Immaqa allatigut siumukarsinnaavutit, assersuutigalugu oqaluussisartutut piginnaassuseqarnerulerlutit. Ilagiinni Teokratiimik Atuarfik kiffartornermullu tunngasunik ataatsimiinnerit aqqutigalugit tamatumani ajoqersorneqarluartarpugut. Oqaluussisartutut pikkorinnerujartorutta soorunami kiffartornitsinni angusaqarnerullutalu nuannaarnerulissaagut.
Ersarippoq kuisinitta kingorna suli siumukartariaqartugut. Apustili Paulus qilammi naassaanngitsumik inuunissamik neriuutigisani pillugu ima allappoq: ’Qatanngutikka, imminik pillunga isumaqanngilanga tigoreeriga; ataaserli pivara: tununniittut puiorlugit siuninniittullu isatsorlugit tikisassaq arpanniarpara ajugaasup pisassaa Guutip Kristus Jesusikkut pavannga qaaqqusissutaa piniarlugu. Taava inersimasugut tamatta taama isumaqarniarta; sukkullu taama isumaqanngikkaluarussi Guutip tamatuminngattaaq nassuerfigiumaarpaasi.’ — Filípimiut 3:13-15.
Kristumiut tamarmik, qilammi toqujuitsumik inuunissaq imaluunniit nunarsuarmi Paratiisissami naassaanngitsumik inuunissaq neriuutigigaluarunikku, ’siuniminniittut isattortariaqarpaat’, aap, ilungersorlutik inuuneq naassaanngitsoq anguniartariaqarpaat. Kuisinnerit allartissutaavoq pitsak, kisianni aallaqqaataannaavoq. Taamaattumik anersaakkut siumukartuarniarit. ’Silaqarsutsikkut inersimasunngorit’ ataatsimiigiartarnikkut nammineerlutillu atuaqqissaartarnikkut. (1 Korintumiut 14:20) ’Siunersisinnaanngorniaruk silissusia, takissusialu itissusialu kingissusialu.’ (Evfisumiut 3:18) Ullumikkut siumukaruit maannakkut nuannaarneq pilluarnerlu attattuaannarnagit, aammali Guutip silarsuassaani nutaami inuujumaarputit, tassanilu taassuma naalagaaffiata qilammiittup naalakkersuinerata ataani naassaanngitsumik siumukarsinnaajumaarputit. (wE 1/10 98)
[Qupp. 29-mi assiliartaq]
Nammineerluni atuaqqissaartarneq piffissaqarfigissagaanni imminut naalakkersinnaasariaqarpoq
[Qupp. 31-mi assiliartaq]
Oqaluussineq isumalluartumik isumaqarfigigutsigu kiffartornerup nuannaarutiginissaanut ikiussavaatigut