Jehovap Nalunaajaasuisa Jiisusi upperaat?

JIISUSIMIK UPPERINNINNEQ PINGAARUTEQARPOQ

Anders: Aluu Tom. Takoqqinnissat qilanaaralugu.

Tom: Aamma uanga qilanaarlunga.

Anders: Atuagassiat normui kingulliit nassarpakka, aajuku Napasuliaq Alapernaarsuiffik aamma Vågn op! pissatit. Atuarukkit nuannarissagunarpatit.

Tom: Qujanaq. Qujanartoq ullumikkut alakkartutit, apeqqutissaqarama.

Anders: Aperiinnarit.

Tom: Ippassaaniuna suleqatiga oqaloqatigalugu oqarama atuagassiat ilinnit pisakka soqutiginartillugit. Taannali oqarpoq atuassanngikkikka Jehovap Nalunaajaasuisa Jiisusi upperinngimmassuk. Ilumoorpa? Suleqatiga oqarfigaara tullianik pulaaruit aperiniarlutit.

Anders: Qujanartoq uannut tamanna apeqqutigigit. Inuummi upperisaa paasiumagaanni inuk pineqartoq aperalugu pitsaanerpaasarpoq, ilaa?

Tom: Taama eqqarsarlunga.

Anders: Ilumoortormi imaappoq: Jehovap Nalunaajaasuisa Jiisusi upperilluinnarpaat. Isumaqarpugut Jiisusimik upperinnittut kisimik annaanneqarsinnaasut.

Tom: Aap, taamatut eqqarsarpunga, suleqatigali oqarmat Jiisusi upperinngikkissi apererusutsappunga. Tamannami eqqartornikuugunanngilarput.

Anders: Ajorinngikkukku allassimaffiit Jiisusimik upperinninnerup pingaaruteqarneranik ersersitsisut atuarsinnaavavut. Jehovap Nalunaajaasuisa oqaluussinerminni allassimaffiit taakku atortarpaat.

Tom: Ajunngilaq.

Anders: Siulliussinnaavavut Jiisusip oqaasii Johannesi 14:6-imi allassimasut. Oqaatsit taakku Jiisusip apustilimi ilaannut oqaatigisaasa ilagaat. Ima allassimavoq: “Jiisusip oqarfigaa: ‘Uanga aqqutaavunga sallusuissutaallungalu inuussutaallungalu; uakkuinnaq Ataatamut pisoqarsinnaavoq.’” Allassimaffik taanna naapertorlugu taamaallaat Guutimut Ataatamut qanoq saaffiginnittoqarsinnaava?

Tom: Jiisusikkut.

Anders: Ilumoorputit. Jehovap Nalunaajaasuisa tamanna upperilluinnarpaat. Tassami Guutimut qinugaangatta Jiisusip aqqani qinusarpugut.

Tom: Sunaaffa.

Anders: Aamma allassimaffik alla atuarsinnaavarput, tassa Johannesi 3:16. Allassimaffik tamanna pingaaruteqangaarpoq. Jiisusip nunami inuunera kiffartorneralu pillugit allassimasut tamaasa naatsumik oqaatigissagaanni versi ataaseq taanna atuaannarneqarsinnaavoq. Illit atuarusuppiuk?

Tom: Ilaana. Allassimavoq: “Guutimmi silarsuaq ima asatigaa ernituani tunniussimallugu taassumunnga uppertoq kinaluunniit tammaqqunagu naassaanngitsumilli inooqqullugu.”

Anders: Qujanaq. Tusarnikuuiuk?

Tom: Aap, oqaluffimmi tusartarpara.

Anders: Allassimaffik taanna ilisimaneqarluarpoq. Maluginiaqqissaaruk Jiisusi qanoq oqarnersoq. Oqarpoq Guutip asagamisigut naassaanngitsumik inuulersinnaatikkaatigut — aatsaalli sugutta?

Tom: Uppertuugutta.

Anders: Aap. Uani pineqarpoq Ernituamut, Jiisusimut Kristusimut, upperneq. Jiisusimut upperneq naassaanngitsumik inuunissamut periarfissiisoq atuagassiami uani tunniussanni qupperneq 2-mi erseqqissaarneqarpoq. Napasuliaq Alapernaarsuiffik-up siunertaanut ilaasutut kajumissaarutigineqarpoq “Jiisusip Kristusip, uagut naassaanngitsumik inuulersinnaaniassagatta inuunerminik pilliutiginnittup Guutillu naalagaaffiani maanna kunngitut naalakkersuisup, upperfigineqarnissaa”.

Tom: Sunaaffa, atuagassiaatissinni takuneqarsinnaavoq Jehovap Nalunaajaasuisa Jiisusi upperigaat.

Anders: Ilumut.

Tom: Soormiuna inuit oqartartut Jiisusi upperinngikkissi?

Anders: Tamatumunnga arlalinnik pissuteqarsinnaavoq. Inuit ilaasa tusakkatik oqaatigiinnartarpaat. Imaassinnaavorluunniit palasimit eqqunngitsumik paasitinneqarsimasut.

Tom: Immaqa inuit ilaat isumaqarput Jiisusi upperinngikkissi Jiisusip Nalunaajaasuinik taaguuteqarnasi Jehovap Nalunaajaasuinik taaguuteqarassi.

Anders: Aap, aamma taamaassinnaavoq.

Tom: Soormiuna Jehova taama eqqartortigisarissi?

‘AQQIT ILISIMALERSIPPARA’

Anders: Siullermik oqaatigerusuppara Guutip aqqata, Jehovap, atorneqarnissaa pingaartikkipput, soorlu Guutip ernerata Jiisusip pingaartikkaa. Malugiuk Jiisusip Ataataminut qinnutaa Johannesi 17:26-mi allassimasoq. Atuarusuppiuk?

Tom: Aap. “Aqqillu taakkununnga ilisimalersippara ilisimalersikkumaarlugulu, asannissuseq uannut asannissuserisat taakkunaneeqqullugu uangalu taakkunaneeqqullunga.”

Anders: Qujanaq. Malugiuk Jiisusi oqartoq Guutip aqqa ilisimalersikkini. Sooq taamaaliorsoraajuk?

Tom: Asuki.

Anders: Apeqqut taanna akissutissarsiumallugu immaqa allassimaffik alla atuarsinnaavarput. Apustilit Suliaat 2:21 eqqarsaatigaara. Ima allassimavoq: “Kinaluunniillu Naalakkap aqqanik torlorfiginnittoq annaanneqarumaarpoq.” Annaanneqassagaanni Naalakkap, tassa Jehovap, aqqanik torlorfiginninneq pisariaqarsimappat tamanna Jiisusip nalusimanavianngilaa, ilaa?

Tom: Soorunami.

Anders: Tassa Jiisusip ajoqersukkami Guutip aqqanik ilisimanninnerat atuinerallu pingaartippaa tamannami annaanneqaatigisinnaammassuk. Tamannalu Jehovamik taama eqqartuitigisarnitsinnut pingaarnerpaat ilagaat. Isumaqarpugut Guutip aqqata ilisimaneqalersinnissaa allallu Guutip aqqanik torlorfiginnissinnaaqqullugit ikiornissaat pingaaruteqartoq.

Tom: Kisiannimi inuit Guutip aqqa nalugaluarlugu atortanngikkaluarlugulu Guuti eqqartoraangamikku kina pineqarnersoq nalussanngilaat.

Anders: Aap, tamanna ilumoortortaqarpoq. Qanorli ateqarnerluni ilisimalersikkamiuk Guutip imminut qanittumik attaveqalernissarput ajornannginnerulersippaa.

Tom: Tassa qanoq?

Anders: Assersuuteqariarta: Mosesi qanoq ateqarnersoq ilisimasariaqanngikkaluarparput. Angutitut Immap Aappalaartup ernginik avissaartitsisutut imaluunniit angutitut Inatsisinik Qulinik tunineqartutut taaneqaannarsimasinnaagaluarpoq. Aammami sooq Noap aqqa ilisimassavarput? Umiarsualiortutut aamma ilaquttaminik uumasunillu annaassisutut allaatigineqaannarsimasinnaagaluarpoq. Allaammi Jiisusi Kristusi qilammiit aqqartutut ajortivut pillugit toqusutut ilisimaneqaannarsimasinnaagaluarpoq, ilaa?

Tom: Immaqa.

Anders: Guutilli inuit taakkua aqqi ilisimalersippai. Taakkua aqqi ilisimagatsigit oqaluttuat killitsinnarnerulerput. Mosesi, Noa Jiisusilu naapissimanngisaannaraluarlutigit aqqisa ilisimanerat pissutigiinnarlugu ilisarisimasutut ippavut.

Tom: Taamatut eqqarsaatiginikuunngilara, taamaappasipporli.

Anders: Tamannalu Jehovap Nalunaajaasuisa Guutip aqqanik eqqartuisarnerannut pissutaasut ilagaat. Kissaatigaarput inuit upperilissagaat Jehova tassaasoq Guuti kinaassusiliviusoq qanittumik attaveqarfigisinnaasartik. Imaanngilarli uagut annaanneqarnissatsinnut tunngatillugu Jiisusip pingaaruteqarnera pingaartinngikkipput. Immaqa tamatumunnga erseqqissaataasoq allassimaffik suli alla atuarsinnaavarput.

Tom: Qaami.

Anders: Johannesi 14:6 atuareerparput. Tassani aamma allassimavoq Jiisusi oqartoq nammineq ‘aqqutaallunilu sallusuissutaallunilu inuussutaalluni’. Versit tamatuma siuliisa ilaat, tassa Johannesi 14:1, maluginiarsinnaavarput. Versip tamatuma naggataatungaani Jiisusi qanoq oqartoq atuassaviuk?

Tom: Aap. Allassimavoq: “Guutimut upperitsi, uannullu upperitsi.”

Anders: Qujanaq. Taanna tunngavigissagaanni isumaqarpit Jehova upperigaanni Jiisusi upperineqarsinnaanngitsoq?

Tom: Naamik, Jiisusimi oqarpoq imminut aamma Guutimut uppertuusariaqartugut.

Anders: Ilumoorputit. Isumaqataassagunarputit Guutimut Jiisusimullu uppertuunerarneq naammanngitsoq. Tassami inooriaatsitsigut ersersittariaqarparput ilumut uppertuulluta.

Tom: Ilumut.

Anders: Taavami inuup Guutimut Jiisusimullu ilumut uppertuulluni qanoq ersersissinnaavaa? Immaqa tamanna ulloq alla eqqartorsinnaavarput.a

Tom: Ajorinngilara.