Ateq upperisamut ilumoortumut sammisoq

„JESUS taassumalu aava annaassissutaasoq upperinngilarsi,“ arnaq Jehovap nalunaajaasuisa ilaannut taama oqarsimavoq. Angullu ima oqarsimavoq: „Immissinnut Jehovap Nalunaajaasuinik taasarpusi, uangali Jesusip nalunaajaasoraanga.“

Jehovap Nalunaajaasuisa Jesusimut uppinnginnerannik taassuminngaluunniit naammattumik pingaartitsinnginnerannik isuma nalinginnaasorujussuuvoq. Pissutsilli piviusut qanoq ippat?

Ilumoorpoq Jehovap Nalunaajaasuisa Guutip aqqa, Jehova, assut pingaartimmassuk.a Itamar, Jehovap nalunaajaasuisa ilaat Brasiliamiu, ima oqaluttuarpoq: „Guutip aqqa ilikkarakku inuunera allanngulerpoq. Atuaqqaarakku soorlumi tassa itisoorujussuarmik sininninnit itertinneqarlunga. Jehovap aqqata aalaterlungalu uummatikkut killippaanga; misigissutsikkut ilorlerpaakkut attorpaanga.“ Oqatsinili ima ilavai: „Aammattaaq uummatiga Jesusimut asanninnermik ulikkaarluinnarpoq.“

Aap, Jehovap Nalunaajaasuisa akueraat inuuneq naassaanngitsoq angujumagaanni ’Guutip ernerata aqqanut uppertariaqartoq’, tassa Jesusip aqqanut. (1 Juánase 5:13) Oqariaaserli ’Jesusip aqqani’ qanoq paasisariaqarpa?

Jesusip aqqa qanoq isumaqartoq

’Jesusip aqqani’ oqariaatsillu allat tamatumunnga assingusut Kristumiut Allagaataanni Griikerisuuni, tassa „Testamentitaaq“-mi, tamani nassaassaapput. Oqaaseq „ateq“ Jesusimut atatillugu 80-it sinnerlugit atorneqarpoq; apustilit suliáinik agdlagkat-niinnaq 30-t missaanni atorneqarpoq. Ukiuni hundredelinni siullerni kristumiut Jesusip aqqani kuisittarsimapput, taassuma aqqani ajorunnaarsitsisarsimallutik, taassuma aqqani ajoqersuisarsimallutik, taassuma aqqanik torlorfinnittarsimallutik, taassuma aqqa pillugu naalliuttarsimallutik taassumalu aqqa naalannartittarsimallugu. — apustilit suliait 2:38; 3:16; 5:28; 9:14, 16; 19:17.

Biibili pillugu qinerlerfissiat ilaat naapertussagaanni griikerit „ateq“-mut oqaasiat Biibilimi atorneqakulasoq „atip imarisaanut tamanut tunngatinneqartarpoq, soorlu oqartussaassutsimut, inuttut pissutsimut, inissisimaffimmut, ataqqinassutsimut, pissaanermut, pingaarnerussutsimut il. il., atermi pineqartunut tamanut“. Taamaattumik Jesusip aqqa ataqqinassutsimut oqartussaassutsimullu annertuumut Jehova Guutip taassumunnga tunniussimasaanut tunngavoq. Jesus nammineerluni ima oqarsimavoq: ’Qilammi nunamilu piginnaaneq tamarmi uannut tunniussaavoq.’ (Matîuse 28:18) Peterip Johannesillu angut nukillaarsimasoq ajorunnaarsereeraallu juutit upperisarsiornikkut siuttui apeqqutiminnut matumunnga sukannersumik akeqqusimapput: ’Qanoq ittumik pissaaneqarlusi kialu aqqagut taamaaliorpisi?’ Peterip oqartussaassutsimut pissaanermullu Jesusip aqqanut atasumut uppernini sapiilluni ersersippaa akilluni oqarami angut ’saavanni qeqartoq Jesus Kristusip Nazaretimiup aqqagut ajorunnaarsimasoq’. — apustilit suliait 3:1-10; 4:5-10.

Jesusimut kaasarimulluunniit upperneq?

Jesusilli aqqanut upperneq ajornakusoornartunik nassataqartussaasimavoq. Jesusip siulittuisimaneratut taassuma ajoqersugai ’inuiaqatigiinnit tamanit uumissorneqassapput taassuma aqqa pillugu’. (Matîuse 24:9) Soorooq? Jesusip aqqa Guutip naalaganngortitaatut, kunnginut kunnginngortitaatut, inuiaat tamarmik naalatsigitiffissaattut inissisimaffianik ersersitsimmat, inuiaallu taamaaliornissaminnut piareersimanatilluunniit piumassuseqaratik. — Tussiaat 2:1-7.

Jesusittaaq nalaani upperisarsiornikkut siuttut Jesusimut naalatsigitinnissartik kissaatiginngilaat. Ima oqarsimapput: ’Allamik kunngeqanngilagut, kaasari kisiat kunngigaarput,’ taamaalillutillu Guutip ernera ajattorlugu. (Juánase 19:13-15) Kaasarip aqqanut — pissaaneranut oqartussaassusianullu — naalagaaffissuanullu upperput. Allaat inissisimaffitsik atorfitsillu pigiinnarsinnaaqqullugit Jesusip toqutaanissaa aalajangiuppaat. — Juánase 11:47-53.

Jesusip toqunerata kingorna ukiuni hundredelinni ingerlasuni kristumiuunerartorpassuit juutit upperisarsiornikkut siuttuisut isummertalerput. Kristumiuunerartut tamakkua naalagaaffiup pissaaneranut oqartussaassusianullu upperput tamatumanilu akerleriinnernut peqataasarlutik. Assersuutigalugu, ukiut hundredellit 11-ssaanni oqaluffeqarfik sakkutuut suffeqanngitsut aaqqissuuteriarlugit militia Christi-mik (sakkutooqqinnernik kristumiunik) pilersitsereersorlu „naapertuilluartumik sorsunnissamut akisussaaffik kristumiuuneraqatigiinni silamiutut pissaanilinnut arsaarinnissutigineqarpoq sakkutooqqinnerillu kristumiut ikiortigalugit oqaluffeqarfimmit tiguneqarluni“. (The Oxford History of Christianity) Kiisalu oqaluttuarineqarpoq paavit nalunaarusiaasa ilaannit ilerfiarnernut peqataasartut amerlanersaat isumaqalersinneqarsimasut ilerfiaqataanermikkut ’Guutimut isumaqatigiissuteqarsimasut Paratiisimilu inissamik qulakkeerisimasut’.

Immaqa inuit ilaat akerliliiumassapput oqarlutik naalakkersuinermut naalagaaffiillu sorsunnerinut peqataajutigaluni Jesusimik ilumoorfiginnittoqarluarsinnaasoq. Isumaqarput kristumiut ajussutsimik akiuinissaq pisussaaffigigaat sumiluunniit nassaassaagaluarpat, aamma sorsunnermik nassataqassagaluarpalluunniit. Kristumiulli siulliit qanoq isumaqarpat?

Atuagassiami The Christian Century-mi allaaserisami ilaatigut ima allassimasoqarpoq: „Kristumiut siulliit sakkutuujuneq ajorput.“ Nassuiarneqarpoq ukiuni qulini, ukiuni 170-imit 180-imut, kristumiut sakkutuujusarsimanerannut takussutissaqanngilluinnartoq. Allaaserisami nangilluni allassimavoq: „Kristumiut sakkutuujujumannginnertik arriitsuinnarmik soraarukkiartuaarsimavaat.“

Tamanna qanoq kinguneqarpa? „Kristumiussutsip sorsunnermut isiginnittaatsimigut kristumiuunngitsunit allaanerussuteqannginnini tusagaanerluutiginerpaalersimagunarpaa,“ allaaserisami allassimavoq. „Kristumiut Annaassisumut saamasumut upperneraatigalutik upperisarsiornikkut inuiaassutsikkullu sorsuunnernik tapersersuilluinnartarnerat uppernermut assut aseruutaasimavoq.“

Kristumiunik siullernik malinnittut

Kristumiut siulliit maligassiaat pitsaasoq malissallugu ullumikkut kristumiunut ajornanngila? Ukiuni hundredelinni makkunani Jehovap nalunaajaasuisa takutissimavaat tamaaliornissaq ajornanngitsoq. Tamanna pillugu Holocaust Educational Digest-imi aaqqissuisoq ima allappoq: „Jehovap nalunaajaasua kinaluunniit sorsunnermut peqataajumanngilluinnarpoq. . . . Silarsuarmi pissaanillit tamarmik upperisarsioqatigiinnut taakkununnga ilaasimasuuppata . . . sorsunnersuup aappaa pinngisaannarsimassagaluarpoq.“

Aammattaaq nunani ataasiakkaani, soorlu Irlandimi Avannarlermi, akerleriissuteqarnerit pillugit taama oqartoqarsinnaavoq. Ukiualuit matuma siorna Jehovap nalunaajaasuisa ilaat Belfastimi naaggaartut najugaqarfianni illumiit illumut angalaarluni oqaluussisimavoq. Pulaagaasa ilaata paasigamiuk Nalunaajaasoq taanna siornatigut katuuliusimagaluartoq, aperisimavaa: „Katuuliugallaravit IRA-mik [Irish Republican Army] tapersersuisuuit?“ Nalunaajaasup nalunngilaa angut nakuuserniarsinnaasoq, tassami sakkulisarluni katuullimik aallaannikkiartoruttortoq tigusarineqarsimavoq tigummineqarallarsimanerminillu iperagaaqqammerluni. Taamaattumik Nalunaajaasoq ima akivoq: „Maannakkut katuuliunngilanga. Jehovamut nalunaajaasuuvunga. Kristumiutut ilumoortutut inuk kinaluunniit imaluunniit naalakkersuisut kikkulluunniit sinnerlugit inummik toqutsinngisaannassaanga.“ Taava pulaagaata assammippaa oqarlunilu: „Inuarneq tamatigut eqqunngitsuliorneruvoq. Ilissi ajunngitsumik suliaqarpusi. Tamanna ingerlatiinnarsiuk.“

Jesusimut upperneq qanoq isumaqartoq

Jesusilli aqqanut upperneq sorsukkumannginnerinnaanngilaq. Kristusip inassutai tamaasa naalattariaqarput. Jesus ima oqarsimavoq: ’Inassutikka malikkussigik ikinngutigissavassi,’ inassutaasalu ilaat tassaavoq asaqatigiissasugut. (Juánase 15:14, 17) Asanninnerup allanut ajunngitsuliornissatsinnut kajumissisittarpaatigut. Nagguigisaq, upperisaq inuttullu atugarisat pillugit paqumisunnerit tamaasa peertarpai. Jesusip takutippaa tamanna qanoq pisartoq.

Jesusip nalaani juutit Samariamiunik iluaaginnittuupput. Jesusili arnamik Samariamiumik oqaloqateqarpoq, arnap allarpassuillu Jesusip aqqanut uppertunngornerannik kinguneqartumik. (Juánase 4:39) Jesusilu oqarpoq ajoqersukkani aamma pilluni nalunaajaassasut ’Jerusalemimi Judeamilu tamarsuarmi Samariamilu nunallu isuanut allaat’. (apustilit suliait 1:8) Tusarliussaa inuunartoq juutinuinnaanngitsoq tusarliunneqassaaq. Taamaattumik Peter peqquneqarpoq sakkutuut Romamiut naalagaat Kornelius pulaassagaa. Naak allamik nagguilinnut pulaarnissaq juutinit akuerineqarsinnaanngikkaluartoq Guutip Peter paasitippaa ’inuk kinaasorluunniit nalinginnaasumik mingunnartumilluunniit taassanngikkaa’. — apustilit suliait 10:28.

Jehovap nalunaajaasui Jesus ilaarlugu inunnik kikkunnilluunniit ikiuiumasarput, amikkut qalipaataat, upperisaat nagguialluunniit apeqqutaatinnagit, annassut Jesusip aqqagut pisoq pillugu ilinniartinniarlugit. Jesusip aqqanut uppernerminnit killinneqarlutik tamanut ’nassuerutigisarpaat Jesus Naalagaasoq’. (Rûmamiut 10:8, 9) Kajumissaarumavatsigit taakkua ikiuiniarnerat ilasseqqullugu Jesusip aqqanut uppernissat ilinniarsinnaaqqullugu.

Jesusip aqqata nersorinninnermik, ataqqinninnermik naalannermillu pigisaqalersittariaqarpaatigut. Apustili Paulus ima oqarsimavoq: ’Jesusip aqqani seeqqut tamarmik qilammi nunamilu nunallu ataani ittut seeqqumiassapput, oqqallu tamarmik Jesus Kristus nassuerutigissavaat Naalagaasoq, Guuti Ataataq naalannarseqqullugu.’ (Filípimiut 2:10, 11) Inuit amerlanersaasa Jesusip naalagaassusianut naalatsigitinnissartik kissaatiginngikkaluarpaat, Biibilimili takutinneqarpoq piffissaq kikkut tamarmik naalagaassutsimut tamatumunnga naalatsigitittariaqalerfissaat, imaluunniit suujunnaarsitaasariaqalerfissaat, nalliutingajalersoq. (2 Tásalûníkamiut 1:6-9) Taamaattumik Jesusip inassutaanik tamanik maleruaanikkut taassuma aqqanut uppertunngornissamut piffissanngorpoq. (wE 1/12 98)

[Quppernerup ataani ilanngussaq]

[Qupp. 6-mi assiliartaq]

Inuit millionilikkuutaat Jesusip aqqani toqutsisarsimapput toqutaasimallutilluunniit

[Qupp. 7-mi assiliartaq]

Jesus paqumisunngilaq. Illimmi?