Nutaarsiassaq nuannersoq inatsisitigut illersorneqarpoq

INUIT illoqarfinnik tunngaviliisalermatali qarmarsualiortoqartarsimavoq. Ingammik itsaq qarmarsuit taamaattut illersuutitut pallittaalisaasimapput. Qarmarsuup qaavaniit illersuisut qarmarsuup saassussisunit aserorneqannginnissaa qajannarsisinneqannginnissaalu illersorsinnaasarsimavaat. Qarmarsuaq illoqarfiup innuttaanuinnaanngitsoq illersuutaasarsimavoq. Inuit illoqarfinnit minnerusunit qanittuneersut qarmarsuup ilua-tungaanut qimarngugajuttarsimapput. — 2 Samuel 11:20-24; Jesaja 25:12.

Jehovap Nalunaajaasui assingusumik qarmaliorsimapput — inatsisitigut qarmamik illersuutaasumik. Innuttaaqatigiit sinnerinit Nalunaajaasut immikkoortinniarlugit qarmaq sanaajunngilaq, Jehovap nalunaajaasuimi inussiarnersutut avammullu sammisutut ilisimaneqarput. Qarmap innuttaasut tamarmik nalinginnaasumik inatsisitigut pisinnaatitaaffii nakussatsippai. Aammattaaq qarmap taassuma Jehovap Nalunaajaasuisa naqisimaneqaratik Guutimik pallorfiginninnissamut inatsisitigut pisinnaatitaaffiat illersorpaa. (Naleqqiuguk Matîuse 5:14-16) Pallorfiginnittaasiat Guutillu naalagaaffia pillugu nutaarsiassamik nuannersumik oqaluussisinnaatitaanerat illersorpaa. Qarmaq tamanna suua, qanorlu sananeqarsimava?

Illersuutaasumik inatsisitigut qarmaliortoqarpoq

Naak Jehovap nalunaajaasui nunani amerlanerni upperisarsiornikkut kiffaanngissuseqaraluartut, sumiiffiit ilaanni pissutissaqanngitsumik saassunneqartarsimapput. Katersuussinnaatitaanertik illumiilluunniit illumut oqaluussisinnaatitaanertik saassunneqaraangat eqqartuussisunut suliassanngortittarpaat. Silarsuaq tamakkerlugu eqqartuussinerit Jehovap Nalunaajaasuinut tunngasut tuusintilikkuutaajupput.a Tamatiguunngitsoq ajugaasarsimapput, eqqartuussisulli minnerusut akerliusumik aalajangiigaangata eqqartuussisunut qulliunerusunut suliassanngortitseqqikkajupput. Qanoq kinguneqartumik?

Ukiut 1900-kkut ingerlanerini inatsisitigut ajugaanerit nunani amerlasuuni pisimasut najoqqutassanngortorpassuarnik pilersitsisimapput tamatuma kingorna eqqartuussinerni Jehovap Nalunaajaasuisa innersuussutigisimasaannik. Qarmami ujaqqat assigalugit aalajangiinerit tamakkua Jehovap Nalunaajaasuinut iluaqutaasut inatsisitigut qarmanngorsimapput illersuutaasut. „Qarmap“ najoqqutassanngortunik qarmagaasup tamatuma qaavaniit Jehovap Nalunaajaasuisa upperisarsiornikkut pallorfiginninnikkullu kiffaanngissuseqarnertik illersorpaat.

Murdockip Commonwealth of Pennsylvaniamik suliassanngortitsinera, 3. maaji 1943-mi USA-mi eqqartuussisut qullersaasa aalajangiiffigisaat, tamatumunnga assersuutissaalluarpoq. Suliassiissutigineqartumi tamatumani apeqqut pineqartoq unaavoq: Jehovap Nalunaajaasui upperisarsiornikkut atuagassiaatitik agguaanniarlugit niuertutut allagartamik peqqaartariaqarpat? Jehovap Nalunaajaasuisa tamanna pisariaqannginnerarlugu aalajangiusimavaat. Oqaluussisarnerat niuernermut tunngasuunngilaq — taamaanngisaannarsimallunilu. Aningaasatigut iluanaarniarneq siunertarinngilaat, nutaarsiassalli nuannersup oqaluussissutiginissaa siunertaraat. (Matîuse 10:8; 2 Korintumiut 2:17) Murdock pillugu suliami Jehovap Nalunaajaasui taperserneqarput. Eqqartuussisut aalajangiipput upperisarsiornikkut atuagassianik agguaassiniartut niuertutut allagartamik akileraartariaqarnerat inatsimmut tunngaviusumut akerliusoq.b Aalajangiineq tamanna pingaarutilimmi najoqqutassanngorpoq, Jehovap Nalunaajaasuisalu kingorna suliassani iluatsittumik tamanna aalajangiisussatut atorsimavaat. Murdock pillugu suliami eqqartuussineq inatsisitigut qarmami illersuutaasumi ujaraalerpoq qajannaatsoq.

Suliat taamaattut nalinginnaasumik upperisarsiornikkut kiffaanngissuseqarnermut illersuutaaqataasimapput. USA-mi innuttaasut pisinnaatitaaffiinik illersuinermi Jehovap Nalunaajaasuisa peqataasimanerat pillugu University of Cincinnati Law Review allappoq: „Jehovap Nalunaajaasui inatsisip tunngaviusup nassuiarneqarnerani annertuumik sunniuteqarsimapput, ingammik oqaaseqarsinnaatitaanermut upperisarsiornermullu kiffaanngissuseqarnerup illersorneqarnerani killit neruttorneqarnerisigut.“

Qarmaq qajannaallisinneqarpoq

Inatsisitigut ajugaanerit tamaasa qarmaq qajannaannerulersarpoq. 1990-ikkunni aalajangiinerit Jehovap nalunaajaasuinut kiffaanngissuseqarnermillu asannittunut allanut tamanut silarsuarmi tamarmiittunut iluaqutaasut ilamininngui misissoriartigik.

Grækenland. 25. maaji 1993-imi Europami Inuit Pisinnaatitaaffii Pillugit Eqqartuussisut aalajangiipput Grækenlandimi innuttaasut upperisartik pillugu allat oqaluttuussinnaassagaat. Suliami Minos Kokkinakis, taamaanikkut 84-inik ukiulik, pineqarpoq. Jehovap nalunaajaasuisa ilaattut Minos Kokkinakis 1938-miilli 60-it sinnerlugit tigusaasarsimavoq griikerillu eqqartuussisuinut 18-eriarluni sassartinneqarsimalluni. Piffissami tamatumani ukiut arfinillit sinnerlugit parnaarussaaqqasimavoq. Ingammik griikerit inatsisaat 1930-ikkunneersoq upperisarsiornikkut ilassarsiornermik inerteqqutaatitsisoq naapertorlugu eqqartuunneqartarsimavoq. 1938-miit 1992-imut Jehovap nalunaajaasuisa 20.000-ingajaat tigusaasarsimanerannut inatsit tamanna pisuusimavoq. Europami Inuit Pisinnaatitaaffii Pillugit Eqqartuussisut aalajangiinerat naapertussagaanni griikerit oqartussaasuisa Minos Kokkinakisip upperisarsiornikkut kiffaanngissuseqarnera ajoqusersimavaat, ajoquserneqarsimasutullu 100.000-koruuningajannik taarsiiffigineqartussanngortinneqarpoq. Eqqartuussisut aalajangiinerminni nalunaarput Jehovap Nalunaajaasui „upperisarsioqatigiiusut ilisimaneqarluartut“. — Takuuk Napasuliaq Alapernaarsuiffik 1. februaari 1994-imoortumi quppernerit 23-28.

Mexico. 16. juuli 1992-imi Mexicomi upperisarsiornikkut kiffaanngissuseqarnermut pitsaaqutaasumik annertuumik alloriartoqarpoq. Ulloq tamanna Upperisarsiornikkut Peqatigiit Pisortatigoortumillu Upperisarsiornerit pillugit Inatsit nutaaq atulerpoq. Inatsit tamanna naapertorlugu upperisarsiornikkut peqatigiit inatsisitigut akuerisaasinnaapput nalunaarsorneqarunik. Tamatuma siorna Jehovap Nalunaajaasui, nunami tassani upperisarsiortutulli allatut, inatsisitigut akuerisaanatik tamaaniipput. 13. apriili 1993-imi Jehovap Nalunaajaasui nalunaarsorneqarumallutik qinnuteqarput, taavalu 7. maaji 1993-imi upperisarsiornikkut peqatigiittut marluttut inatsisitigut nalunaarsorneqarput, tassa La Torre del Vigía, A. R.-itut aamma Los Testigos de Jehová en México, A. R.-itut. — Takuuk Vågn op! 22. juuli 1994-imoortoq, quppernerit 12-14.

Brasilia. Novembari 1990-imi Brasiliap Inuiaqatigiinnut tunngasutigut National Institutiata Napasuliaq Alapernaarsuiffiup Peqatigiiffiata immikkoortortaqarfia nalunaarfigaa Betelimi, Jehovap Nalunaajaasuisa immikkoortortaqarfianni, nammineq kajumissutsimik sulisut siunissami oqaatsimik kiffartuuteqartutut isigineqarunnaassasut taamaattumillu nunami suliffeqarnermut inatsisip ataaniilissasut. Tamanna Jehovap Nalunaajaasuisa suliassanngortippaat. 7. juuni 1996-imi naalagaaffiup inatsisilerituuata allaffianut Brasíliamiittumut inatsisitigut siunnersortit aalajangerpaat Betelimi sulisut upperisarsiornikkut aaqqissuussamut akuerisaasumut ilaasortaasutut isigineqaannassasut, silamiutut suleqataasutut isigineqaratik.

Japan. 8. marsi 1996-imi Japanip eqqartuussisuisa qullersaat ilinniartitaanermut upperisarsiornikkullu kiffaanngissuseqarnermut tunngasumik nunami innuttaasut tamarmik iluaqutissaannik aalajangiipput. Eqqartuussisut isumaqatigiillutik aalajangerpaat Kobep Teknikkimik Atuarfia inatsisinik unioqqutitsisimasoq Kunihito Kobayashi paanninnermik timersornermut peqataajumannginnera pillugu anisissimagamiuk. Japanimi upperisarsiornikkut kiffaanngissuseqarnerup inatsisitigut qulakkeerneqarnera tunngavigalugu eqqartuussisut qullersaasa tamanna siullerpaamik aalajangiinerivaat. Nalunngeqatiginnissutsini Biibilimit ilinniartitaasimasoq naapertorlugu Jehovap nalunaajaasua inuusuttoq taanna isumaqarpoq paanninnermik timersoriaaseq Biibilimi najoqqutassiamut Jesaja 2:4-mi nassaarineqarsinnaasumut naapertuutinngitsoq: „Saffiussavaat panatik assallatserummut savissaliaralugit, qalugiusatillu saviliaralugit viinnequtilerissutit; inuiaat panamik imminnut silugutissaassapput, sakkunik atuinissamut sungiusarunnaassallutik.“ — Takuuk Vagttårnet 1. novembari 1996-imoortumi, quppernerit 19-21.

9. februaari 1998-imi Tokyomi nunap immikkoortuani eqqartuussisut eqqartuussummik pingaarutilimmik allamik aalajangiipput, tamatumani Misae Takeda, Jehovap nalunaajaasuusoq, Biibilip ’aammik nereqqusinani’ inatsisaanut naapertuutinngitsumik nakorsartikkusunngitsoq taperserneqarluni. (apustilit suliait 15:28, 29) Tamanna eqqartuussisut qullersaannut suliassanngorteqqinneqarpoq, siunissallu takutikkumaarpaa eqqartuussisut qullersaasa nunap immikkoortuani eqqartuussisut aalajangigaat atuutitiinnassaneraat.

Filippinerit. 1. marsi 1993-imi Filippinerit eqqartuussisuisa qullersaat isumaqatigiillutik aalajangiipput Jehovap Nalunaajaasuinut iluaqutaasumik, Jehovap nalunaajaasui inuusuttut erfalasumik ilassinnikkumanatik ataqqinnittumik itigartitsisimanertik pillugu atuarfimmit anisitaasimanerat pillugu suliassanngortinneqarsimasumut tunngasumi.

Jehovap Nalunaajaasuinut iluaqutaasumik eqqartuussinerit tamarmik „ujaraapput“ inatsisitigut qarmamik qajannaallisitsisut Jehovap Nalunaajaasunuinnaanngitsoq, inuilli tamarmik pisinnaatitaaffiinik, illersuisut.

Qarmaq isumannaallisinneqarpoq

Jehovap Nalunaajaasui nunani 153-ini inatsisitigut nalunaarsorneqarsimapput, taakkunanilu upperisarsioqatigiittut akuerisaasutut allatulli eqqortumik kiffaanngissuseqarput. Ukiuni qulikkuutaani Europap Kangiani Sovjetunioniusimasumilu malersorneqareerlutik inerteqqutaareerlutillu Jehovap Nalunaajaasui maanna inatsisitigut akuerisaalersimapput nunani makkunani: Albaniami, Georgiami, Hvideruslandimi, Kasakhstaniami, Kirgisistaniami, Rumæniami, Slovakiami, Tjekkiami Ungarnimilu. Nunalli ilaanni, Europami nunat killiit eqqartuussisorissaartut ilaanni aamma, ullumikkut Jehovap Nalunaajaasui pisinnaatitaaffinnik erliguunneqarput pisinnaatitaaffiinilluunniit arsaarniarlugit siorasaarneqarsimallutik. Akerlilersuisut Jehovap Nalunaajaasui ilungersorlutik eqqorniarsaraat ’ ajunaartinniarlugit inatsisit tunngavigisuusaarlugit ’. (Tussiaat 94:20) Jehovap Nalunaajaasui tamakkununnga qanoq qisuariartarpat?c

Nunani tamani Jehovap nalunaajaasuisa oqartuussaasut suleqatigerusuppaat, aammattaarli upperisamik ingerlannissaanut inatsisitigut kiffaanngissuseqarneq kissaatigaat. Upperilluinnarpaat inatsisit tamarmik inatsisitigulluunniit aalajangiinerit tamarmik Guutip peqqussutaanik — ilaatigut nutaarsiassamik nuannersumik oqaluussinissamik peqqussutaanik — inerteqqusisut atortussaanngitsut. (Mákorse 13:10) Oqartussaasut isumaqatigalugit aaqqissuussisinnaanngikkaangamik upperisaminnik ingerlatsinertik Guutimeersoq illersorniarlugu suliassanngortitseqqissinnaanermut periarfissat tamaasa atortarpaat. Jehovap nalunaajaasuisa Guutip neriorsuutaa manna tatigilluinnarpaat: „Sakkut ilinnut sakkuaatissatut saffiukkat atorsinnaassuseqassanngillat.“ — Jesaja 54:17. (wE 1/12 98)

[Quppernerup ataani ilanngussat]

[Qupp. 22-mi ungalusaq]

Jehovap nalunaajaasuisa pisinnaatitaaffii illersorneqarput

Jehovap nalunaajaasuinik malersuinerup kingunerisimavaa taakku nunarsuaq tamakkerlugu eqqartuussisunut naalakkersuisunilu atorfilinnut sassartinneqartarsimanerat. (Lúkarse 21:12, 13) Pisinnaatitaaffitik inatsisitigut illersorniarlugit qasusuissimapput. Jehovap Nalunaajaasuisa nunani amerlasuuni eqqartuussivinni ajugaasarsimaneri inatsisitigut kiffaanngissuseqarnerannut taamaalillunilu makkununnga pisinnaatitaafiinut illersuutaaqataasimapput:

◻ tuniniaasartunut killilersuutaasunit killilersorneqaratik illumiit illumut oqaluussisinnaanerat — Murdockip Commonwealth of Pennsylvaniamik suliassanngortitsinera, USA-mi eqqartuussisut qullersaat (1943); Kokkinakisip Grækenlandimik suliassanngortitsinera, Europami Inuit Pisinnaatitaaffii Pillugit Eqqartuussisut (1993).

◻ pallorfiginninniarlutik naqisimaneqaratik katersuussinnaanerat — Manoussakisip allallu Grækenlandimik suliassanngortitsinerat, Europami Inuit Pisinnaatitaaffii Pillugit Eqqartuussisut (1996).

◻ qanoq ilillutik ilerasuuteqaratik erfalasumik inuiaqatigiissutsikkulluunniit ilisarnaatinik allanik ataqqinnissinnaanerlutik aalajangersinnaanerat — West Virginia State Board of Educationip Barnettemik suliassanngortitsinera, USA-mi eqqartuussisut qullersaat (1943); Filippinerini eqqartuussisut qullersaat (1993); Indiami eqqartuussisut qullersaat (1986).

◻ sakkutuujujumanngissinnaanerat, kristumiutut nalinngeqatiginnissutsiminnut akerliummat — Georgiadisip Grækenlandimik suliassanngortitsinera, Europami Inuit Pisinnaatitaaffii Pillugit Eqqartuussitut (1997).

◻ nakorsartinnermik nalunngeqatiginnissutsiminnut akerliunngitsumik qinersisinnaanerat — Malettep Shulmanimik suliassanngortitsinera, Ontariomi, Canadami eqqartuusseqqittarfik (1990); Napasuliaq Alapernaarsuiffiup E.L.A.-mik suliassanngortitsinera, Puerto Ricosimi eqqartuussisut qullersaat, San Juan (1995); Fosmirep Nicoleaumik suliassanngortitsinera, New Yorkimi, USA-mi eqqartuusseqqittarfik (1990).

◻ upperisartik Biibilimeersoq naapertorlugu qitornaminnik perorsaasinnaanerat, avinnermi angajoqqaatut oqartussaanermik kia tigusinissaanut sunniuteqanngitsumik — St-Laurentip Soucymik suliassanngortitsinera, Canadami eqqartuussisut qullersaat (1997); Hoffmannip Østrigimik suliassanngortitsinera, Europami Inuit Pisinnaatitaaffii Pillugit Eqqartuussisut (1993).

◻ inatsisitigut peqatigiiffeqarsinnaanerat ingerlatsisinnaanerallu upperisarsiortut akuerisaasut allat akileraartarnikkut iluaqutissartaasa assinginik atuisinnaallutik — Unnerluussisussaatitaasut Haringimik suliassanngortitsinerat, New Yorkimi, USA-mi eqqartuusseqqittarfik (1960).

◻ Jehovap nalunaajaasui piffissartik tamaat immikkut ittumik kiffartortut, akileraarnermut inatsisit upperisarsiortunut allanut atuuttut naapertorlugit akileraartarnerat — Brasiliap Inuiaqatigiinnut tunngasutigut National Institutia, Brasília, (1996).

[Qupp. 21-mi assiliartaq]

Minos Kokkinakis nulianilu

[Qupp. 21-mi assiliartaq]

Kunihito Kobayashi

[Qupp. 20-mi suminngaanneernera]

The Complete Encyclopedia of Illustration/J. G. Heck