Jehova ‘sorsunnermi pisussanik aalajangiisuuvoq’

Ajornar­torsiut 1990-ikkut naalerneranni aallartippoq. Taamani immikkoor­tortaqarfik Frankrigimi naalakkersuisunit eqqortumik tungavis­saqanngitsumik peqquneqarpoq aningaasat 1993-imiit 1996-imut tunissutigineqarsimasut akileraaruser­neqassasut. Frankrigimi eqqartuus­sivinni suliassan­ngortitsigaluaratta taperser­neqanngilagut. Eqqartuus­sivimmi qulliunerusumi ajorsareerluta immikkoor­tortaqarfiup aningaaserivianiittut eurot 4,5 millionit arsaarin­nissutigineqarput. ECHR kisiat periarfis­sarilerparput. Suliarli ECHR-imit aalajangiivigineqar­tinnagu illuatungeriit tamatta ataatsimiigiaq­quneqarpugut, isumaqatigiis­sinnaanersugut eqqartuussiviup peqataatitaa ilagalugu paasiniar­neqassammat.

Ilimagereerparput ECHR-ip peqataatitaata suliaq isumaqatigiis­suteqarnikkut naammas­siniarsarissagaa tatillutalu aningaasat piumasaaqatigineqartut ilaannik akileeq­qussagaatigut. Nalunngilarpulli euromik ataasiin­nannguamil­luunniit akiliineq Biibilimi najoqqutassianik unioqqutitsinerussasoq. Qatanngutit Jehovap peqatigiis­sortaanut tunissuteqarsimapput, taakkualu tunissutaat oqartussaasut susassarin­ngilaat. (Mat 22:21) Eqqartuus­siviulli suleriaasia ataqqillugu najuuppugut.

Ataatsimiinneq eqqartuussiviup ataatsimiit­tarfiisa ilaanni kusanartumi ingerlan­neqarpoq, aallartin­nerlupporlu. Eqqartuus­sivimmit peqataatitap aallarniilluni oqaaseqar­nermini naatsorsuutiginerarpaa Frankrigimi Jehovap Nalunaajaasuisa akileraarutit piumasarineqartut ilaat akilissagaat. Ima apererusoriataarparput: “Nalunngiliuk naalakkersuisut aningaaserivimmi uninngasuutigut eurot 4,5 millioninit amerlanerusut arsaarin­nissutigereeraat?”

Inuttaa tupappaseqaaq. Naalakkersuisut inatsisilerituuisa taamaaliorsimanertik nassuerutigimmassuk taassuma isiginnittaasia allanngorluinnarpoq. Appisaluuppai ataatsimiinnerlu unitseriataarlugu. Paasivara suliap ingerlanera Jehovap naatsorsuutigin­ngisatsinnik allanngor­tilluinnaraa. Nuannaarluta nalerisimaarlutalu anivugut, pisullu upperiuminaatsippagut.

2011-mi juunip 30-anni ECHR-imi eqqartuussisut isumaqatigiil­luinnarlutik uagutsinnik tapersiillutik eqqartuus­suteqarput. Akileraarusiineq atorunnaarsippaat, peqqusippullu naalakkersuisut aningaasat arsaarin­nissutigisimasatik utertissagaat – ernialerlugit! Eqqartuussut oqaluttuarisaanermi pingaarutilik taanna Frankrigimi guutisiorsin­naatitaanitsinnut ulloq manna tikillugu illersor­neqaatigaarput. Piareersarsimanata apereriataarnerput ujaqqatut Goliatimik eqquisutut ippoq: suliap ingerlan­neqarneranut allannguutaal­luinnartumik. Sooq ajugaavugut? Daavip Goliatimut oqarneratut Jehova “sorsunnermi pisussanik aalajangiisuummat”. – Sam 1. 17:45-47.

Eqqartuus­sivitsigut ajugaatin­neqarnerput taannaan­naanngilaq. Ulloq manna tikillugu politikkikkut upperisarsior­nikkullu akerlilersor­neqartilluta nunani 70-ini nunanilu tamalaani arlalinni eqqartuussiviit qullersaat 1.225-eriarlutik Jehovap Nalunaajaasuinik tapersiillutik aalajangiinikuupput. Aalajangiinerit taamaattut tunngaviusumik pisinnaatitaaf­feqarnitsinnut – soorlu upperisarsioqatigiittut inatsisitigut akuerisaasin­naatitaanermut, oqaluus­sisinnaatitaanermut, nunamik pingaar­titsilluni nalliut­torsiornernut peqataajumasan­nginnermut aalersor­tikkuman­nginnermullu – illersuutaapput.

Sooruna New Yorkimi Jehovap Nalunaajaasuisa qullersaqarfiani suligaluarlunga Europami eqqartuus­sivikkoor­titsinermi peqataasunga?

OQALUUS­SISARTUTUT AALLARTITATUT ANERSAALLIT PERORIAR­TORFIGAAKKA

1956-imi inunngorama angajoqqaakka, George aamma Lucille, Gileadimi klassit 12-ssaat naammas­sereerlugu Etiopiami kiffartorput. Biibilimi ‘Fiilippi iivangiiliulersaartoq’ atsiullugu Philipimik atserpaannga. (ApS 21:8) Aappaaguani Jehovap Nalunaajaasui inerteq­qutaalerput. Ukiukik­kaluarlunga eqqaamavara ilaquttakka isertorlutik guutisiortartut. Meeraagama tamanna pissanganartutut isigaara! Ajoraluartumik 1960-imi pisortat pinngitsaalilluta nunamiit aallartip­paatigut.

USA-mi Kansasimut nuuppugut, angajoq­qaakkali oqaluus­sisartutut aallartitatut anersaaqar­tuarput. Anersaakkut ittut inuunerminni pingaar­nerutit­tuarpaat, tamannalu uannut aleqannullu, Judymut, nukkannullu, Lesliemut, ingerlateq­qippaat. Qatanngutikka taakku Etiopiami inunngor­nikuupputtaaq. 13-inik ukioqarlunga imermut morsutsitaavunga. Ukiut pingasut qaangiummata ilaquttakkalu Perumi Arequipamut pisariaqar­titsiffiunerusumut nuuppugut.

1974-imi 18-iinnarnik ukioqarlunga Perumi Immikkoor­tortaqarfimmit qatanngutillu angutit sisamat allat specialpionerin­ngortin­neqarpugut. Andesip qaqqarsuini najugaqarfinnut oqaluus­siffigineqan­ngisaan­nartunut oqaluus­siartor­tinneqarpugut. Tamaani quechuatut aymarátullu oqaasilip­passuit najugaqarput. Angallatigisarput autocamperi angisuujullunilu karsitut iluseqarmat “Noap umiarsuaanik” taaguuteqar­tipparput. Jehovap piitsuus­susermik, nappaatinik toqumillu qanittukkut atuukkun­naarsitsinissaanik Biibilimi allassimaffinnik oqaluus­siffigisatsinnut takutitsisarnerput eqqarsaatigalugu nuannertaqaaq. (Saqq 21:3, 4) Amerlasuut nalunaajaasun­ngorput.

QULLERSAQARFITSINNI KIFFARTULERPUNGA

1977-imi Siulersuisoqatigiinnut ilaasortaq, Albert Schroeder, Perumut tikeraarpoq, kajumis­saarpaangalu USA-mi Betelimut qinnuteqaq­qullunga. Taamaaliorpungalu. Kinguninngua 1977-imi juunip 17-ianni Brooklynimi Betelimi kiffartulerpunga. Ukiuni sisamani tulliuttuni eqqiaanermik aserfal­latsaaliuinermillu aallutaqarpunga.

1978-imi juunimi New Orleansimi Louisian­namiittumi ataatsimeersuar­toqarnerani nunanit tamalaanit peqataaf­figineqartumi Elizabeth Avallone naapippara. Taanna uattulli angajoq­qaamini guutisiornermik salliutitsisuni peroriar­torsimavoq. Elizabeth naapikkakku ukiuni sisamani pioneerioreersimavoq, piffissarlu tamaat kiffartornini ingerlatiin­narusuppaa. Attaveqatigiit­tarpugut sivitsun­ngitsorlu assut asannilersoorpugut. 1979-imi oktobarip 20-anni katippugut Elizabethillu Betelimi kiffartoqatigilerpaanga.

Brooklynimi ilagiinni spaniamiusut oqaasilinni kiffartulerpugut, ilageeqatigullu ilaquttatsitut isigilerpagut. Ukiut ingerlanerini ilagiinni allani pingasuni kiffartorpugut, tamarmillu Betelimi kiffartor­tuarnis­satsinnik tapersersor­tuarsimavaatigut. Tapersersuinerat angajoq­qaattalu utoqqalisut immikkut ikiortariaqarnerisa nalaanni ikinngutit ilaqquttallu iliuuserisimasaat qujamasuutigisaqaagut.

INATSISILERIVIMMI KIFFARTULERPUNGA

Tupaallaatigeqisannik 1982-imi januaarimi Betelimi nutaamik suliassin­neqarlunga inatsisilerivim­miittus­sanngor­tinneqarpunga. Ukiut pingasut qaangiummata qinnuigineqarpunga inatsisilerinermik ilinniarfimmi eqqartuus­sissuserisutut ilinnialis­sasunga. Ilinniarninni paasisakka soqutiginar­tippakka, soorlu Jehovap Nalunaajaasuisa eqqartuus­sivitsigut ajugaasarneri USA-mi nunanilu allani tunngaviusumik kiffaan­ngissus­seqarnermut, inuppassuit taamaat­tussaannartut isigisaannut, qanoq sunniuteqar­tigisimasut. Suliat tamakku ilinniar­nitsinni sukumiisumik eqqartor­neqartarput.

1986-imi 30-nik ukioqarlunga qullersaqarfimmi inatsisilerivimmi nakkutil­liisunngor­tinneqarpunga. Taama inuusutsigalunga tatigineqarnera nuannaarutigaara, aammali misilit­tagakinnera annertuumillu suliassaqarnera imaannaan­ngitsutut isigaakka.

Eqqartuus­sissuserisutut ilinniarnera 1988-imi naammassivara, kisianni ilinniarnerma anersaakkut peqqissutsinnut innarliisimanera maluginian­ngitsoorsimavara. Qaffasin­nerusumik ilinniagaqarneq makitasuun­nguutaasinnaavoq, ilinniarsimal­luarnerummi misigitis­sinnaavaatigut allanit pitsaanerulluta. Ilinnialin­ngikkallarama Jehovamut qanittumik attaveqarsimanittut attaveqaq­qilernissannut Elizabethip ikiorpaanga. Uppernarsarsin­naavara ilisimasaqangaarneq inuunermi pingaar­nerpaajun­ngitsoq. Inuunermi pingaar­nerpaaq tassaavoq Jehovamut qanittumik attaveqarneq aamma taassumunnga innuttaanullu asanningaarneq.

NUTAARSIASSANIK NUANNERSUNIK INATSISITIGUT ILLERSUEQATAASALERPUNGA

Ilinniarnera naammas­sereerlugu Betelimi inatsisilerivimmi suliassat aallutilerpakka, aamma peqatigiif­fitsinnik nutaarsias­sanillu nuannersunik oqaluus­sisinnaatitaanitsinnik inatsisitigut illersueqataasalerpunga. Peqatigiiffipput siumukar­tuarmat suliakka pissanganar­torujus­suupput aammali unamminiar­nartuullutik. Assersuutigalugu 1990-ikkut aallartin­neranni Siulersuisoqatigiit aalajangerput atuagas­siaatitta akeqanngitsumik neqeroorutigineqar­talernis­saannut Betelimi inatsisilerivik najoqqutas­saliussasoq. Atuagas­siaatitsinnik akeqanngitsumik agguaasalernerup kingunerisaanik Betelimi sulineq oqaluus­sinerlu pisariin­nerulerput, ullumik­kumullu allaat akileraar­tarnermut maleruagassat unioqqutin­naveersaar­neqarnerannut iluaqutaalluni. Ilaat isumaqarput taamatut allannguineq aningaasatigut annaasaqataarujus­suassasoq soqutigin­nittullu atuagassianik nunguus­saasalissasut, taamaalillunilu inuit Jehova pillugu ilinniarusuttut ikilissasut. Akerlerluin­naanilli pisoqarpoq. Jehovamik Nalunaajaasut amerlassusaat 1990-ip kingorna marloriaatin­ngorpoq, ullumikkullu nunarsuaq tamakkerlugu inuit anersaakkut inuussutissat akeqanngitsumik pissarsiarisin­naavaat. Nammineerlunga takusimavara peqatigiif­fitsinni allannguutit annertuut Jehovap ikiuineratigut inussiallu aalajaallunilu silatuup ilitsersuineratigut iluatsil­luartartut. – Mos 2. 15:2; Mat 24:45.

Eqqartuus­sivinni oqaaser­neqartartut pissutigiin­narlugit eqqartuus­sivinni ajugaatin­neqarneq ajorpugut. Jehovap kiffaasa pissuseris­suunerat eqqartuussisut oqartus­saasullu maluginiar­tarpaat, tamannalu suliap inerneranut sunniuteqarajuttarpoq. Tamatuma ilumoor­tuunera 1998-imi Siulersuisoqatigiinni ilaasortat pingasut nuliatik ilagalugit Cubami immikkut ataatsimeersuaqataan­neranni takuara. Taakkua inussiar­nersumik ataqqin­nittumillu pissusilersornerat oqartus­saasunik politikkikkut kallunnaveersaar­tuunitsinnik qularun­naarsitsivoq, pisortanik ataatsimeeqateqar­tarnitsinni oqaaserisimasatsinniit sunniuteqar­nerusumik.

Ilaannikkulli ‘nutaarsiassanik nuannersunik inatsisitigut illersuineq aalajangersaanerlu’ taamaallaat eqqartuus­sivilersuus­sinikkut aaqqiivigineqarsin­naasarpoq. (Flp 1:7) Assersuutigalugu Europami nunat ilaanni Koreamilu Kujallermi oqartussaasut sakkutuujuju­manngin­nerput ukiorpassuarni akuersaanngilaat. Korea Kujallermi qatanngutigut 19.000-init amerlanerusut Europamilu 18.000-it missaat sakkutuujujuman­nginnertik pissutigalugu parnaarus­saaqqanikuupput.

Kiisami 2011-mi juulip 7-anni Europami Inuit Pisinnaatitaaffiinik Eqqartuussivik suliami Bayatyan illuatungeralugu Armenia eqqartuus­suteqarpoq. Eqqartuussummi aalajangersar­neqarpoq Europami nunani tamani sakkutuujunissamut taarsiullugu sulisitaasus­saatitaaneq periarfis­saasariaqartoq. Taavalu 2018-imi juunip 28-anni Korea Kujallermi assingusumik aalajangiisoqarpoq. Qatanngutigut inuusuttut sakkutuujoq­quneqaramik tunniutiin­narsimasuuppata eqqartuus­sivinnit taperser­neqartarsimanavian­ngikkaluarpugut.

Qullersaqarfitsinni nunanilu arlalinni immikkoor­tortaqarfitsinni inatsisileriviit guutisiorsin­naatitaanerput oqaluus­sisinnaatitaanerpullu illersor­niarlugit ilungersorlutik sulisarput. Qatanngutigut naalakkersuisunit akerlilersor­neqaraangata eqqartuus­sivitsigut illersuisin­naatitaanerput ataqqinaatitut isigaarput. Kisianni eqqartuus­sivinnit taperser­neqanngik­kaluaraangat­taluunniit eqqartuus­sivikkoor­titsinigut naalakkersuisut kunngillu kiisalu inuiaat oqaluus­siffigineqar­nerannik kinguneqartarput. (Mat 10:18) Eqqartuussisut, oqartussaasut, tusagas­siorfiit inuinnaallu allassimaffiit Biibilimeersut tunngavilersuutigisagut, eqqartuus­sivinni allassimaffinni allassimasut eqqartuus­sivimmilu oqaaseqar­nitsinni tunngavilersuutit isummerfigisariaqar­tarpaat. Taamaalilluni inuit eqqortuliorusuttut Jehovap Nalunaajaasuisa qanoq ittuunerat qanorlu upperisaqarnerat paasisaqarfiginerusin­naasarpaat. Ilaasa Jehova ilisarisimanerorusuler­tarpaat qatanngutaalerlutillu.

QUJANAQ, JEHOVA!

Ukiut 40-t kingulliit nunarsuaq tamakkerlugu immikkoor­tortaqarfiit inatsisitigut apeqqutaalersut pillugit suleqatigisarpakka, aamma peqatigiiffipput sinnerlugu eqqartuus­sivinnut qulliunerusunut arlalinnut qaffasis­sumillu atorfilinnut sassartarpunga. Qatanngutit qullersaqarfitsinni nunarsuarlu tamakkerlugu inatsisilerivinni sulisut asallugillu ataqqingaarpakka. Jehovap pissanganartumik siunertaqarluar­tumillu inuuneqar­tippaanga.

Ukiut 45-t kingulliit Elizabethip ilumoorfigin­nilluni asannillunilu qanorluunniit pisoqaraluaraangat tapersersor­tuarsimavaanga. Taamaannera assut ajasoorutigisarpara, tassami timaata nappaammut akiuussin­naanera sanngiil­linikuuvoq nukissaqarpiarnerlu ajorpoq.

Ukiut ingerlanerini nammineerluta uppernarsivarput nukigut ajugaasar­nigullu uagut piginnaasatsinnik pissuteqan­ngitsut. Daavip oqarneratut ‘Jehova innuttaminut nakuussutaavoq’. (Tuss 28:8) Aap, Jehova ‘sorsunnermi pisussanik aalajangiisuuvoq’.