Jehovap piumasaatut iliorput

Isumakkeerfiginninneq annannissamut aqqutissiuivoq

JAKOBIP erneri qulit Egyptenimi ministeriunerup saani qeqartut ajortumik anngigisaqarput. Ukiorpassuit tamatuma siorna qatanngutertik Josef inussiatut tunisimavaat, ataatartillu oqarfigisimallugu uumasumit nujuartamit toqutaasimasoq. — 1 Moses 37:18-35.

Maanna ukiut 20-t missaat qaangiuttut kaannersuaq pissutigalugu angutit qulit taakkua karrisiniarlutik Egypteniliartariaqalersimapput. Akornutissarsippulli. Ministeriunerup, aamma inuussutissanik nakkutilliisuusup, kilitsissiaanerarpai. Ilaat ataaseq parnaarussaatippaa sinnerilu angerlaqquai nukarlersaallu, Benjamin, aggiuteqqullugu. Taamaaliormata ministeriunerup Benjamin tigusaatinniarlugu iliuuseqarpoq. — 1 Moses 42:1–44:12.

Judali, Jakobip ernerisa ilaat, akerliliivoq. ’Benjamin oqqutinngikkutsigu,’ oqarpoq, ’ataatarput toqussaaq.’ Taava Judap angalaqataasaluunniit ilimaginngisaannik pisoqarpoq. Jakobip erneri kisiisa pinnagit allat tamaasa aneqqoriarlugit ministeriuneq nipituumik qissaserpoq. Eqqisseqqikkamilu oqarpoq: „Uanga Josefiuvunga.“ — 1 Moses 44:18–45:3.

Asattuussineq eqqissiallannerlu

„Ataataga suli inuua?“ Josefip qatanngutissani aperai. Akinngillat. Josefip qatanngutai oqaasissaarupput. Nuannaassappat annilaangassappalluunniit? Tassami, ukiunik 20-nik inuusunnerullutik, angut taanna inussiatut tunisimavaat. Josefip parnaarussaatissinnaavai, inuussutissanik nassartinnagit utertissinnaavai, ajornerusumilluunniit, toqutaatissinnaavai! Pissutissaqarluarlutik Josefip qatanngutissaasa „akineq saperpaat uippallernermit“. — 1 Moses 45:3.

Josefip eqqissisapallappai. „Qaaniaritsi,“ oqarpoq. Naalappaat. Taava oqarpoq: „Uanga Josefiuvunga, qatanngutersi Egyptenimut tunisarsi. Tamannali aliasuutigissanngilarsi kanngusuutiginagulu Guutip inuit inuunerannik annaassiumalluni siuningaatigulli aallartimmanga.“ — 1 Moses 45:4, 5.

Josefip nallittuingaarnera pissutissaqarpoq. Peqqissiminerat malugereersimavaa. Assersuutigalugu qatanngutissani kilitsissiaaneraramigit imminnut ima oqaluuttut tusaavai: „Ilumummi qatanngutitsinnut iliornerput pillugu pisassarput pinialerparput. . . . Tamanna pillugu taama annikilliortitaalerpugut.“ (1 Moses 42:21) Aammattaaq Benjamin taarserlugu Juda inussiatut imminut neqeroorutigereerpoq, angut inuusuttoq ataataminut utersinnaaqqullugu. — 1 Moses 44:33, 34.

Taamaattumik Josef nallittuingaarnissaminut kajumissuseqarpoq. Paasivaa taamaaliornermigut ilaqutariit tamarmiusut annaassinnaallugit. Taamaattumik Josefip qatanngutissani ataataminnut Jakobimut uteqquai oqarfigeqqullugulu: „Ernerit Josef ima oqaqqusivoq: ’Guutip Egyptenimut tamarmut naalaganngortippaanga. Tuaviorlutit uannukarniarit Gosenimilu nunassillutit, illit, ernitit, ernuttatit, savaatitit, ussiutitit pigisatillu tamarmik uannut qanittumiinniassagassi. Tassani inuussutissaqartikkumaarpakkit.’“ — 1 Moses 45:9-11.

Josef anneq

Jesus Kristus Josef annermik taaneqarsinnaavoq, angutimmi taakkua marluk ersarissunik assigiissuteqarput. Josefitulli Jesus qatanngutiminit, Abrahamimut kinguaaqatiminit, ajortumik pineqarsimavoq. (Naleqqiuguk apustilit suliait 2:14, 29, 37.) Angutit taakkua marluullutik tamarmik immikkut atugaat allangorput. Piffissap ingerlanerani Josef inussiaajunnaarluni ministeriuninngorpoq, Faraomut tullersortaalluni. Assingusumik Jehovap Jesus toqumit makitippaa ’talerpimminut’ qutsissisillugu. — apustilit suliait 2:33; Filípimiut 2:9-11.

Josef ministeriunertut karrisiniarlutik Egyptiniliartunut tamanut inuussutissanik agguaassisinnaavoq. Ullumikkut Josef anneq nunarsuarmi kiffaqarpoq aalajaallunilu silatuumik, ’neriffissaat nalliuttaraangat’ anersaakkut inuussutissanik agguaassisartumik. (Matîuse 24:45-47; Lúkarse 12:42-44) Jesusimut orniguttut ’kingorna kaalissanatillu imerusulissanngillat . . . savaaqqap issiavissaarsuup qeqqaniittup paariumaarmagit tasiorlugillu imermik puilasunut inuunerup piinut.’ — sarĸúmersitat 7:16, 17.

Ilinniarfissarput

Josef nallittuinermik nalissaqanngitsumik ersersitsivoq. Eqqartuussisoq sukannersoq inussianngortitsillutik tunisisut pillaqqullugit piumasaqarsinnaagaluarpoq. Akerlianillu misigissutsinit aqunneqartup unioqqutitsinerat isiginngitsuusaarsinnaagaluarpaa. Josef taakkua arlaannaattulluunniit iliunngilaq. Qatanngutissani peqqissimisimanersut paasiniarlugu misilippai. Ilumoorlutik peqqissimisut takugamiuk isumakkeerfigai.

Josef ilaarsinnaavarput. Uagutsinnut ajortuliorsimasoq ilumoorluni uummammigut allanngorpat, isumakkeerfigisariaqarparput. Soorunami misigissutsinit aqunneqarluta sualuttumik ajortuliornerit isiginngitsuusaassanngilavut. Aappaatigulli kamannermik ilumoorluni peqqissimineq takunngitsuussanngilarput. ’Immitsinnut unnerluutissaqaraluarluta kamageqatigiittuarlutalu isumakkeerfigeqatigiittuarta.’ (Kulorsamiut 3:13) Taamaaliortarutta Guuterput Jehova ilaassavarput, taanna ’isumakkeerfiginnittarmat’. — Tussiaat 86:5; Mika 7:18, 19. (wE 1/1 99)