Guuti upperfigisarput ilisarisimavarput?
TYSKLAND-IMI inuit pingasuugaangata marluk Guuti upperaat. Tyskilli tusindit sinneqartut Guuti upperfigisartik pillugu oqaluttuaqquneqaramik tamangajammik assigiinngitsunik akissuteqarput. „Tysklandimi Guutimik paasinneriaatsit inuit namminneq assigiinngitsiginerattulli assigiinngitsigaat,“ tusagassaqartitsivimmi FOCUS-imi taama allassimavoq. Soorunami Guutimut upperneq nersornartuuvoq, ajuusaarnartuuvorli inuit ilaasa Guuti upperfigisartik ilisarisimanngimmassuk.
Guutip qanoq ittuuneranik nalornineq Tysklandimiinnaanngitsoq, aammali Europami sumi tamani siumugassaavoq. Tuluit Nunaanni, Hollandimi Østrigimilu misissuinerup takutippaa nalinginnaasumik isumaqatigiissutaasoq Guuti „qutsinnerussaartuusoq imaluunniit paasiuminaatsuusoq nassuiarneqarsinnaanngitsoq“. Ingammik inuusuttunut — allaat Guutimut uppertunut — paasiuminaatsuuvoq.
Guuti ilisarisimaviuk?
Inummik nalunnginneraaneq inuttullu ilisarisimasaqarneq assigiinngissuteqarput. Inummik nalunnginneraaneq tassaavoq soorlu nunami allami kunngimik, timersullammammik filmiliaritittartumilluunniit piunerinik ilisimanninneq. Inuttulli ilisarisimasaqarneq allaanerujussuuvoq. Tassa imaappoq inuup qanoq ittuunera, pissusia misigissusaalu ilisimallugit, suut iluarinerai iluarinnginneraalu, siunissamilu qanoq pilersaaruteqarnera ilisimallugu. Inummut ilisarisimanninneq inuttaanut qanimut attaveqalersitsisarpoq.
Inuit tusindillit paasisimavaat erseqqilluanngitsumik Guutimik takorluuinerinnaq — piuneranilluunniit ilisimanninnerinnaq naammanngitsoq. Taakku Guuti ilisarisimalerniarlugu iliuuseqarsimapput. Ilungersornerat akilerneqarsimava? Angutip Tysklandip avannaani najugallip, Paulimik atillip, amerlasuut assigalugit Guuti upperaa, aalajangersimallunili ilisarisimanerulerumallugu iliuuseqarniarluni. Oqarpoq: „Guuti ilisarisimallualerniarlugu piffissaqarlunilu ilungersortariaqarpoq, akilersinnaavorli. Pinngortitsisumut qanimut attaveqarluni inuuneq oqinneerarsuanngortarpoq.“
Guuti ilisarisimanerulerumallugu ilungersorneq piffissamillu atuineq akilersinnaava? Akissutaa allaaserisami tulliuttumik atuaruk.
[Qupp. 3-mi issuagaq]
Inummik nalunngisaqarneq inuttullu ilisarisimasaqarneq assigiinngissuteqarput