Jiisusip ilaqutai qanoq ilisimasaqarfigaavut?

DECEMBARIMI naalungiaq Jiisusi anaanani Maria ataatassanilu Josefi ilagalugit nersutaatit nerisarfianniittoq takutitassiarineqarnerat takussaasartorujussuuvoq. Kristumiuunngitsorpassuit allaat nersutaatit nerisarfiannut tunngasut isiginnaassallugit nuannarisarpaat. Naalungiaq Jiisusi tupinnanngitsumik uani qitiuvoq, Jiisusilli ilaqutai pillugit Biibili qanoq oqarpa?

Jiisusip ilaqutaanut tunngasut soqutiginartorujussuupput. Jiisusi niviarsiamit Mariamik atilimmit erniugami inuiannut ilannguppoq. Biibili naapertorlugu Guutip anersaami illernartup pissaanera atorlugu Jiisusip inuunera qilammit Mariap illiaanut nuuppaa. (Lukasi 1:30-35) Tupinnartuliornikkut Missiarsi naartorilissallugu Mariap paasigamiuk angut Josefimik atilik pissiaraa, taamaattumillu taanna Jiisusip ataatassiarisussaavaa.

Josefi Marialu kingusinnerusukkut allanik meerartaarput, Jiisusilu taamaalilluni affarmik nukaqalerlunilu najaqalerpoq. Kingusinnerusukkut Nazaretimiut Jiisusi pillugu apeqqutaasa ilaannit tamanna ersersinneqarpoq: „Ilaa sanasumuna ernera? Ilaa anaanaa Mariamik ateqarpoq nukaalu Jaakumik, Josefimik, Siimuumik Judasimillu ateqarlutik? Ilaa najai tamarmik maani najugaqarput?“ (Matthæusi 1:25; 13:55, 56; Markusi 6:3) Oqaatsit taakku paasitippaatigut Jiisusip qanigisai tassaasut angajoqqaavi, nukai sisamat minnerpaamillu najai marluk.

Jiisusilli nukai najaalu Josefimit Mariamillu meerarineqannginneraasunik inoqarpoq. Sooq? New Catholic Encyclopedia naapertorlugu „oqaluffik pilersinneqaramili aalajangiusimaneqarsimavoq Maria niviarsiatoqaasoq. Taamaattumillu Maria allanik meerartaaqqissimanngitsoq qularnannginnerarpaat.“ Qinerlerfissiap taassuma „qatanngut angut“ aamma „qatanngut arnaq“ tassaanerarpai „inuk inuilluunniit upperisarsiornikkut imaluunniit allatut eqqarlit“, imaluunniit eqqarliviit, soorlu illortaat.

Taamatut isumaqarneq pissutissaqarpa? Ilinniut taanna oqaluttuaralugu ingerlateqqinneqartarsimasoq allaat teologit katuullit ilaasa assortorpaat, Jiisusillu nukaqarneranik najaqarneranillu isuma tapersersorlugu. John P. Meier, Amerikami katuullit Biibililiorniaqatigiiffianni præsidentiusimasoq allappoq: „Grækerit oqaasiat qatanngut assersuutitut Testamentitaami atorneqarami, ilaqutariivinnermut tunngatinneqartillugu qatanngutivik arfarmilluunniit qatanngut pineqartarpoq, allamik naamik.“a Aap, Allakkat takutippaat Jiisusi Mariap Josefillu meeraanik nukaqarlunilu najaqarsimasoq.

Jiisusip ilaqutai allat iivangkiiliulersaarutini eqqaaneqarput, Jiisusilli qanigisai isiginiarnerugallassavagut, qanorlu ilinniarfigisinnaanerlugit takussavarput.

[Quppernerup ataani ilanngussaq]