„Pilluarput anersaakkut pisariaqartitaqarnerminnik miserratiginninngitsut“

TIMMISSAT ullaaralaakkut iteraangamik, qarlorlutik aallartittarput kingornalu nerisassarsioriartortarlutik. Unnukkut siniffigisartakkaminnut utertarput, qarloqqilaariarlutillu eqqissisarput. Ukiup ingerlanerani piffissami aalajangersimasumi nuliarlutillu manniliorlutillu piaqqaminnik allisaasarput. Uumasut allat taamatulli siumut nalunanngereertigisumik periaaseqartarput.

Uagut inuit allaaneruvugut. Ilumoorpoq nerisartugut, sinittartartugut kinguaassiortartugullu, amerlanersattali inuuneq piumasaqarfiginerusarpaat. Ilisimarusupparput sooq piunerluta, inuunerup siunertaa paaserusupparput siunissamullu neriuuteqarusulluta. Taamatut itinerusumik pisariaqartitaqarneq ersiutaavoq uagut inuit pinngortitat allat piginnaaffiginngisaannik piginnaaneqarnitsinnut — anersaakkut ittunik paasinnissinnaanitsinnut imaluunniit paasinnikkusussuseqarnitsinnut.

Guuti assilillugu pinngortitaq

Sooq inuk anersaakkut ittunik pisariaqartitaqarnersoq Biibilimi ima nassuiarneqarpoq: „Guutip inuk pinngortippaa imminik assililluni; Guuti assilillugu pinngortippaa. Pinngortippai tassaatillugit angut arnarlu.“ (1 Mosesi 1:27) „Guuti assilillugu“ pinngortitaanerput isumaqarpoq inunnguuseralugu naammalluinnanngitsuunerput pissutigalugu kukkusaraluarluta pissusiisa ilai ersersissinnaagivut. (Romamiut 5:12) Assersuutigalugu nutaanik pilersitsisinnaanitta saniatigut naapertuilluarnermik misigissuseqarlutalu ilisimassuseqarlutalu asanninnermik namminissarsiunngitsumik ersersitsivigeqatigiissinnaavugut. Aammattaaq pereersut eqqarsaatigisinnaavavut siunissamullu pilersaarusiorsinnaalluta. — Ussatit 4:7; Oqaluussisartup oqaasii 3:1, 11; Mika 6:8; Johannesi 13:34; 1 Johannesi 4:8.

Anersaakkut ittunik sammisaqarnissamik pisariaqartitsinerput erseqqissinerpaavoq inunnguuseralugu Guutimik pallorfiginnikkusunnitsigut. Pinngortitsisumut qanittumik attaveqarnissarput pisariaqartipparput, pisariaqartitallu tamatuma eqqortumik matussuserneratigut aatsaat piviusumik ataavartumillu nalerisimaarsinnaavugut. „Pilluarput anersaakkut pisariaqartitaqarnerminnik miserratiginninngitsut,“ Jiisusi oqarpoq. (Matthæusi 5:3, NV) Pisariaqartitaq taanna eqqortumik matussuserniarlugu Guuti pillugu sallusuissutit — kinaanera, najoqqutassiai inunnullu siunertaa — sumi paasisinnaanerlugit ilisimasariaqarparput. Sallusuissutit taakkua sumi paasisinnaavavut? Biibilimi.

„Oqaatsitit sallusuissutaapput“

Apustili Paulusi ima allappoq: „Allakkat Guutimit anersaarfigineqartut tamarmik [Guutip sunniineratigut isumassarsiarititaasut, NV] iluaqutaapput ajoqersuinermut, uppernarsaanermut, ilitsersuinermut iluarnermullu perorsaanermullu.“ (2 Timotheusi 3:16) Paulusip oqaasii Jiisusip Guutimut qinnummi oqaasiinut ukununnga naleqqupput: „Oqaatsitit sallusuissutaapput.“ Ullumikkut nalunngilarput ’oqaaseq’ tassaasoq Biibili, upperisarpullu najoqqutassiallu inuunitsinni malitavut tassunga naleqquttuunersut misissorutsigik silatusaassaagut. — Johannesi 17:17.

Upperisarput Guutip oqaasianut naleqqiukkaangatsigu, itsaq Berøamiut ilaartarpavut. Taakkua Paulusip ilinniartitsissutai Allakkanut Illernartunut naleqqunnersut qulakkeertarpaat. Tamanna pillugu isornartorsiorneqarnatik isiginnittaasertik pillugu Lukasimit nersualaarneqarput, taanna ima allappoq: „Oqaaseq kajumeqalutik ilassivaat, ullullu tamaasa Allakkat misissuiffigisarpaat paasiniarlugu ilumut taamaannersut.“ (Apustilit Suliaat 17:11) Ullumikkut upperisarsiornikkut ajoqersuutit ileqqussatigullu najoqqutassiat assigiinngilluinnartut amerlaqaat, taamaattumik pingaaruteqarpoq Berøamiut iluasaarnerarneqartut ilaarnissaat.

Anersaakkut sallusuissutaanersoq aamma paasineqarsinnaavoq inunnut qanoq sunniuteqartarnerata malugineratigut. (Matthæusi 7:17) Assersuutigalugu sallusuissut Biibilimeersoq malikkaanni uiulluarnerusariaqarpoq, ataataalluarnerusariaqarpoq, nuliaalluarnerusariaqarpoq anaanaalluarnerusariaqarluniluunniit. Tamanna ilaqutariit pilluarnerulissutigissavaat tamarmillu nalerisimaarnerulissutigissallugu. „Pilluarput Guutip oqaasianik tusartut toqqorlugulu,“ Jiisusi oqarpoq. — Lukasi 11:28.

Jiisusip oqaasii Ataataata qilammiusup itsaq Israelikkunnut oqaasiinut ukununnga eqqaanarput: „Uanga tassa [Jehova], Guutit, iluaqutaasunik ilinnik ajoqersuisoq, illit ingerlavigisassakkut ingerlatitsisoq. Ilumulli inassutikka tusaaniarsimagaluarukkit taava eqqississutissat ilissagaluarpoq kuussuartut, iluassutsillu immap malingisut.“ (Esaja 48:17, 18) Qularnanngivissumik ajunngissusermik naapertuilluarnermillu nuannarisaqartut tamarmik asannittumik kajumissaarut taamaattoq kajumississutigissavaat.

Ilaasa „siutimik tusarnarisaat“ tusarusunnerusarpaat

Israelikkut upperisarsiornikkut salluliuutinit tammartitaasimammata Guutip asannittumik taama kajumissaarpai. (Tussiaat 106:35-40) Uaguttaaq salluliuutit mianersorfigisariaqarpavut. Paulusi kristumiuunerartut pillugit ima allappoq: „Ullussani nalliuttussani inuit ajoqersuut peqqissinartoq naammagiunnaarumaarpaat, namminneq iluarisaminnik amerlaqisunik ajoqersuisussarsiumaarput siutimik tusarnarisaat tunngavigalugu. Sallusuissut tusarumajunnaarumaarpaat oqaluttuatoqqallu sammisarilerlugit.“ — 2 Timotheusi 4:3, 4.

Upperisarsiornikkut siuttuusut ’inuit siutaasa tusarnarisaat’ tusartittarpaat iliuutsit eqqunngitsunik kissaatigisaqalersitsisut, assersuutigalugu aappariinnerup avataatigut atoqatigiittarnerit, anguteqatinoortarnerit, arnaqatinoortarnerit imerajuttuunerillu, isiginngitsuusaarnerisigut. Biibilimi erseqqissarneqarpoq tamakkununnga akuersaartut taamaaliortartullu ’Guutip naalagaaffia kingornussarsiarissanngikkaat’. — 1 Korinthimiut 6:9, 10; Romamiut 1:24-32.

Qularutissaanngilaq Biibilimi najoqqutassiat malinniaraanni sapiissuseqartariaqartoq, ingammik illaruaatigisaagaanni. Maleruarnissaalli ajornanngilaq. Jehovap Nalunaajaasuisa ilarpassui siornatigut ikiaroortartuusimapput, imerajuttuusimapput, inupilunnut ilaasimapput, tillittartuusimapput, sallutuujusimapput inuunerluttuusimallutillu. Kisianni Guutip oqaasia uummammiliuppaat, anersaallu illernartup ikiuineratigut inuunertik allanngortillugu ’Jehovap piumasaa malillugu inuusinnaalerlutik’. (Kolossemiut 1:9, 10; 1 Korinthimiut 6:11) Guutimik eqqisseqateqaleramik isummamikkuttaaq eqqissipput, aamma soorlu takussagipput siunissamut piviusumik neriugisaqalerput.

Guutip naalagaaffianik neriuut

Biibilimi neriorsuutigineqarpoq Guutimut naalattut eqqissineq ataavartoq misigiumaaraat. Neriorsuut tamanna Guutip naalagaaffia aqqutigalugu piviusunngussaaq. „Naalagaaffiit tikiulli, piumasat qilammisut nunamissaaq pili,“ Jiisusi qinnummi najoqqutassiami ataatarpuumi qinuvoq. (Matthæusi 6:10) Aap, Guutip piumasaata nunami pinissaa Guutip naalagaaffiata kisimi qulakkeersinnaavaa. Sooq? Guutip nunamut eqqortumik kisimi oqartussaanini akitsisisikkuniuk naalagaaffik qilammiittoq taanna Jiisusi Kristusimit siulersorneqartoq sakkugisussaammagu. — Tussiaat 2:7-12; Danieli 7:13, 14.

Jiisusi Kristusip Guutip naalagaaffiani kunngitut Guutimut naalattut inussiaataanernit tamanit, ilaatigut ajortimit Adamimeersumit tamatumalu kingunerisaanik nappaatinit toqumillu, aniguisissavai. Saqqummersitat 21:3, 4-mi ima allassimavoq: „Guuti ineqarfeqalerpoq inunni . . . Qulliillu tamaasa isaannit allarterumaarpai, toqulu peerukkumaarpoq, aliasuttoqarunnaarlunilu nilliasoqarunnaarlunilu anniartoqarunnaassaaq siulliit peermata.“

Nunami naassaanngitsumik eqqissineqassaaq. Sooq tamanna qularinngissinnaavarput? Akissutaa Esaja 11:9-mi atuarsinnaavarput, tassani Guutip naalagaaffiani innuttaasut pillugit ima allassimavoq: „Ajortumik iliortoqarnanilu ajoqusiisoqassanngilaq uanga qaqqanni illernartumi tamarmi, [Jehovamik] ilisimasaqarnerup nuna tamakkerumaarmagu soorlu ermit matoqqagaat immap naqqa.“ Aap, taamanikkussamut nunami inuit tamavimmik Guuti pillugu eqqorluartumik ilisimasaqassapput naalassallugulu. Siunissamut neriuut qamuuna nuannaajallannarpoq, ilaa? Nuannaajallannarigukku pingaaruteqarpoq ’Jehovamik ilisimasaqarneq’ pingaaruteqartoq pissarsiariniarlugu iliuuseqarnissat.

Guutip naalagaaffianik tusarliussaq ammaffigaajuk?

Guutip naalagaaffia atorlugu Saatanip piliai Guutip sequmisissavai inuillu najoqqutassiaminik naapertuilluartunik ilinniartillugit. Taamaattumik tupaallannanngilaq Naalagaaffik taanna Jiisusip ajoqersuutaani pingaarnersaammat. Taanna ima oqarpoq: „Guutip naalagaaffianik iivangkiiliu illoqarfinni allanissaaq tusarliussassaraara; tamanna pillugu aallartitaavunga.“ (Lukasi 4:43) Kristusip ajoqersukkani peqquai tusarliussaq taanna oqaluussissutigissagaat. (Matthæusi 28:19, 20) Ima oqarpoq: „Naalagaaffimmik iivangkiiliu taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq.“ (Matthæusi 24:14) Naggatissarlu qanilliartorasuarpoq. Taamaattumik pingaaruteqarpoq inuit eqqortuliorusuttut nutaarsiassamut nuannersumut, inuunerminnik annaassisinnaasumut, tusarnaarnissaat!

Albertip, allaaserisap matuma siuliani eqqaaneqartup, Guutip naalagaaffianik tusarliussaq tusarpaa nuliani erninilu Jehovap Nalunaajaasuinik Biibilimik atuaqqissaaqatigineqartalermata. Aallaqqaammut Albert upperiuminaatsitsivoq. Allaat palasi nuliaminut ernerminullu pulaaqquaa Jehovap Nalunaajaasui ’qulaajarniassammagit’. Palasili akuliukkumanngilaq. Taamaattumik Albert aalajangerpoq Biibili pillugu oqaloqatigiinnerit ilaannut tusarnaarniarluni Jehovap Nalunaajaasuisa upperisaat kukkunersiorniarlugu. Taamatut oqaloqatigiittut ataasiarluni tusarnaareerlugit, ilikkagaqarusussuseqarluni atuaqqissaaqatigiinnermut peqataasalerpoq. Sooq isummaminik allanngortitsinerluni kingusinnerusukkut ima nassuiarpaa: „Taannarpiaq ujartuarsimavara.“

Naggataatigut Albertip anersaakkut pisariaqartitani matussuserpaa, tamannalu peqqissimissutiginngisaannarpaa. Sallusuissut Biibilimeersoq paasigamiuk inuunini naallugu paaserusutaminik paasisaqarpoq — siunissamut neriuuteqalerpoq aamma naapertuilluanngissutsip ajortunngorsimanerullu innuttaaqatigiinnik sunniisimangaartup qanoq piiarneqarsinnaanera nassuiaatissarsivaa. Sallusuissutit Biibilimeersut ilisimaleramigit qamuuna eqqissivoq. Aamma illit anersaakkut pisariaqartitatit matussuserneqarpat? Soormi minutsialunnguit atorlugit apeqqutit qupperneq 6-imi ungalusamiittut atuarukkit? Paasisaqarnerorusukkuit Jehovap Nalunaajaasuisa nuannaarlutik ikiussavaatsit. (wE 7/1 05)

[Qupp. 6-mi ungalusaq/​assiliartat]

ANERSAAKKUT PISARIAQARTITATIT MATUSSUSERNEQARTARPAT?

Anersaakkut ittunik paasissutissinneqartarnerit naammagisimaarpiuk? Kajumissaarpatsigit apeqqutit tulliuttut atuaqqullugit eqqortumillu akisinnaanerlugit misilillugu.

□ Guuti kinaava, qanorlu ateqarpa?

□ Jiisusi Kristusi kinaava? Sooq toqusariaqarpa? Toqunera qanoq iluaqutigisinnaaviuk?

□ Diaavulu piua, piuppallu suminngaaneerpa?

□ Toqugutta qanoq pissaagut?

□ Guutip nunarsuaq inuillu sumik siunertaqarfigai?

□ Guutip naalagaaffia sunaava?

□ Suna eqqortuunersoq sunalu eqqunngitsuunersoq pillugit Guuti qanoq najoqqutassiaqarpa?

□ Guutip uiusoq nuliaasorlu ilaqutariinni qanoq inissippai? Najoqqutassiat Biibilimeersut suut ilaqutariinnik pilluarnerulersitsippat?

Akissutaat nalornigukkit atuagassiaaraq Guutip sumik piumaffigaatigut? pisinnaavat. Atuagassiaaraq taanna Jehovap Nalunaajaasuinit saqqummersinneqartoq, oqaatsini 300-ngajanni pineqarsinnaavoq. Tassani tunngaviusut 16-it sammineqarput apeqqutillu qulaani eqqaaneqartut Biibili tunngavigalugu akineqarlutik.

[Qupp. 4-mi assiliartat]

Uumasut pisariaqartinngisaannik inuit anersaakkut pisariaqartitaqarput

[Qupp. 7-mi assiliartaq]

Guutip naalagaaffiata Missiarsikkoortup eqqissineq ataavartoq atuutitilissavaa