Akissutit eqqortut sumi nanineqarsinnaappat?
Peqqinnera qanoq illersorsinnaavara?
Ilaqutariittut inuunerput pitsaanerulersinniarlugu qanoq iliorsinnaavunga?
Suliffeqaannarniarlunga periarfissakka qanoq pitsaanerulersissinnaavakka?
IMMINUT tamakku ilaannik aperisarsimavit? Taamaappat atorsinnaasannik akissutissarsivit? Ukiut tamaasa atuakkat assigiinngitsut 2000-it missaat tamakkununnga pingaarutilinnullu allanut siunnersuutitallit saqqummertarput. Tuluit Nunaanniinnaq atuartartut ukiut tamaasa inuunermi unamminiagassat iliuuseqarfiginissaat pillugu atuakkanut 880 million koruunit atortarpaat. USA-mi ukiut tamaasa atuakkat imminut ikiorniarnermut naatsorsuussat 3,4 million koruunit missaannik nalillit tunineqartarput. Taamaattumik illiinnaanngilaq inuunermi ajornartorsiutit qanoq iliuuseqarfiginissaanik pitsaasunik siunnersorneqarusuttoq.
Atuagassiarpassuarni tamakkunani siunnersuutit pillugit atuakkiortoq ima oqarpoq: „Atuakkat nutaarpassuit allataareersut uteqqiinnartarpaat.“ Aap, atuakkani tamakkunani siunnersuutit amerlanerit ilisimassuseq silarsuarmi atuakkat pisoqaanerpaat ilaanniittoq ersersiinnarpaat. Atuakkap taassuma silarsuarmi siammarsimanerpaajunera qularnanngilluinnarpoq. Oqaatsinut 2400-t missaannut tamakkerlugu ilaannaaluunniit nutserneqarsimavoq. Silarsuaq tamakkerlugu 4,6 milliardinit amerlanerusunngorlugu naqinneqarsimavoq. Atuagaq eqqartugarput tassaavoq Biibili.
Biibilimi ima allassimavoq: „Allakkat Guutimit anersaarfigineqartut tamarmik iluaqutaapput ajoqersuinermut, uppernarsaanermut, ilitsersuinermut iluarnermullu perorsaanermut.“ (2 Timotheusi 3:16) Ilumoorpoq Biibili imminut ikiorniarnermut ilitsersuutitut allataanngimmat. Pingaarnertut siunertaa tassaavoq Guutip inunnut siunertaa saqqummersissallugu. Taamaattoq ajornartorsiutit tamatta nalunngisavut qanoq iliuuseqarfiginissaat pillugu tassani paasissutissarpassuaqarpoq, neriorsuutigineqarporlu ilitsersuutigineqartunik siunnersuutigineqartunillu maleruaaneq iluaqutaassasoq. (Esaja 48:17, 18) Biibilimi siunnersuutit atoriaannaasut iluaqutaajuaannassapput, naggueqatigiinnut kikkunnulluunniit ilaagaluaraanni kulturikkullu ilinniagaqarnikkulluunniit qanorluunniit tunuliaqutaqaraluaraanni. Allaaserisap tullia atuarsinnaavat nammineq nalilersinnaaniassagakku peqqinnermut, ilaqutariinnermut suliffeqarnermullu tunngasunut Biibilimi siunnersuutit atorsinnaanersut!