Puilasunut inuussutaasunut siulersorneqarnissamut qinngaqqunnanngitsuutitaasut
’Savaaqqap paarissavai puilasunullu inuussutaasunut ingerlatissallugit [siulersussallugit, NV].’ — SAQQUMMERSITAT 7:17.
1. Kristumiut tanitat kikkuunerat Guutip oqaasiani qanoq erserpa, Jiisusillu taakkua sumik akisussaaffilerpai?
GUUTIP oqaasiani erserpoq kristumiut tanitat Kristusip nunarsuarmi soqutigisaanik isumaginnittut tassaasut „inussiaq aalajaallunilu silatooq“ (NV). Kristusip „inussiaq“ taanna 1918-imi misissuiffigigamiuk paasivaa aalajaatsuusoq ’piffissaq eqqorlugu nerisassanik tunisisarmat’. Taamaattumik Naalakkap, Jiisusi Kristusip, taanna „pigisaminut tamanut paarsisunngortippaa“. (Atuaruk Matthæusi 24:45-47). Taamaalillutik tanitat — nunarsuarmiitillutik qilammilu kingornussarsinnginnerminni — Jehovamik pallorfiginnittunik allanik kiffartuussipput.
2. Jiisusip pigisaanut ilaasut suuppat?
2 Naalagaq nammineq piumasani naapertorlugu pigisaminik atuisinnaatitaavoq. Jiisusi Kristusip Jehovamit kunnginngortitaasutut pigisaanut ilaasut tassaapput Guutip naalagaaffiata nunarsuarmi soqutigisai tamarmik. Taakkua ilagaat amerlangaartut apustilip Johannesip takorruukkamini takusai. Johannesip taakku ima allaatigai: „Takuat, inuppassuit amerlangaaramik kisinneqarsinnaanngitsut, inuiaqatigiinnit naggueqatigiinnillu inuiannillu immikkullu oqaasilinnit tamanit pisut, issiavissaarsuup sioraani Savaaqqallu saavani qeqarput qaqortunik atisaqarlutik palmillu avalequtaannik tigumiaqarlutik.“ — Saqqummersitat 7:9.
3, 4. Amerlangaartunut ilaasut sunik immikkut pisinnaatitaaffeqarpat?
3 Amerlangaartut taakkua Jiisusip ’savanik allanik’ taasaanut ilaapput. (Johannesi 10:16) Nunarsuarmi paratiisiusumi naassaanngitsumik inuunissartik neriuutigaat. Qularutiginngilaat Jiisusip ’puilasunut inuussutaasunut siulersorumaaraatik’, aamma Guutip ’qulliit tamaasa isiminnit allarterumaarai’. Taamaattumik ’atisatik Savaaqqap aavanut eqqiarpaat qaqortitillugit’. (Saqqummersitat 7:14, 17) Jiisusip utertitsissutitut pilliutaa upperaat taamaalillutillu Guutip isaani ’qaqortunik atisaqarlutik’. Aaperaatut Guutip ikinngutaasut naapertuilluartuutitaapput.
4 Savat allat amerlangaartut amerliartuinnartut naapertuilluartutut Guutimit isigineqaramik pissutsit aaqqissuussaanerata maanna atuuttup annikilliornartussarsuarmi piuneerunneqarnerani aniguinissartik neriuutigisinnaavaat. (Jaaku 2:23-26) Jehovamut palligussinnaapput eqimattatullu Harmagedonimi aniguinissamik nuannersumik neriuuteqarlutik. (Jaaku 4:8; Saqqummersitat 7:15) Namminersorlutik kiffartunngillat, kunngimilli qilammiusumit taassumalu qatanngutaanit tanitanit nunarsuarmiittunit siulersorneqarlutik kiffartornissartik kajumigaat.
5. Amerlangaartunut ilaasut Kristusip qatanngutaanik tanitanik qanoq tapersersuippat?
5 Kristumiut tanitat Saatanip silarsuaanit sakkortuumik akerlilersorneqarsimapput sulilu sakkortuumik akerlilersorneqarumaarlutik. Suleqatiminnilli amerlangaartunit tapersersorneqarnissartik naatsorsuutigisinnaavaat. Kristumiut tanitat maanna ikittuinnaasut, amerlangaartut ukiut tamaasa hundredetusindilinnik amerlisarput. Tanitat namminneq ilagiit kristumiut silarsuaq tamakkerlugu 100.000-it missaannittut tamarluinnaasa nakkutigisinnaanngilaat. Savat allat tanitanik tapersersueriaasiisa ilagaat angutit amerlangaartunut ilaasut piumasaqaatinik Biibilimeersunik eqqortitsisut ilagiinni utoqqaanertatut kiffartortarnerat. Taakkua kristumiunik millionilinnik ’inussiamut aalajaallunilu silatuumut’ isumagisassanngortinneqartunik isumaginneqataapput.
6. Savat allat kristumiunik tanitanik tapersersuinerat siulittuummi sorlermi siulittuutigineqarpa?
6 Savat allat kristumiunik tanitanik tapersersuinerat pruffiitimit Esajamit ima siulittuutigineqarpoq: „Egypteni pisoorsuaq [Egyptenimi sulisut akilerneqanngitsut, NV], Nubia pigissaartoq, Sabamiut angutitaat anguterujussuit ornissavaatsit ilinnit pigineqalerlutik, malissavaatsit.“ (Esaja 45:14) Ullumikkut kristumiut nunarsuarmi inuunissamik neriugisallit tanitat taakkualu siulersuisoqatigiivi assersuutaasumik malippaat siulersuinerallu naapertorlugu iliorlutik. „Sulisut akilerneqanngitsut“ kajumillutik uummatikkullu iluunngarlutik nukitik aningaasaatitillu atortarpaat silarsuaq tamakkerlugu oqaluussineq Jiisusip ajoqersukkaminut tanitanut nunarsuarmiittunut suliassiissutigisaa tapersersorniarlugu. — Apustilit Suliaat 1:8; Saqqummersitat 12:17.
7. Amerlangaartut sunissamut ilinniartinneqarpat?
7 Amerlangaartunut ilaasut qatanngutiminnik tanitanik tapersersuiitigalutik innuttaaqatigiinnut nutaanut Harmagedonip kingorna atuutilersussanut tunngaviliinissamut ilinniartinneqarput. Tunngavik taanna qajannaatsuusariaqarpoq, tunngaviusullu Naalakkamik siulersuinera naapertorlugu iliorumasariaqarlutillu iliorsinnaasariaqarput. Tamarmik immikkut kunngimit Jiisusi Kristusimit atorneqarsinnaanerminnik uppernarsaanissamut periarfissinneqarput. Maannalu uppernerminnik ilumoorfiginninnerminnillu uppernarsaanermikkut ersersitsipput silarsuassami nutaami Kunngip unnersuussutaanik maleruaajumanerminnik.
Amerlangaartut uppernerminnik uppernarsaapput
8, 9. Amerlangaartunut ilaasut uppernerminnik qanoq uppernarsaappat?
8 Savat allat kristumiut tanitat ilagiissaannut ilaasut arlalitsigut uppernerminnik uppernarsaasarput. Siullermik, Guutip naalagaaffia pillugu nutaarsiassamik nuannersumik oqaluussissutiginninneq tapersersorpaat. (Matthæusi 24:14; 28:19, 20) Aappassaanik, Siulersuisoqatigiit siulersuinerannut kajumillutik naalatsigitipput. — Hebræerit 13:17; atuaruk Zakaria 8:23.
9 Pingajussaanik, amerlangaartut qatanngutiminnik tanitanik tapersersuipput Jehovap najoqqutassiai naapertuilluartut malillugit inuunermikkut. ’Asanninnermik, nuannaarnermik, eqqissinermik, kamajasuunnginnermik, inussiarnisaarnermik, ajunngitsuunermik, unneqqarissusermik [uppernermik, NV], qanilaarnermik imminullu naalakkersinnaanermik’ ineriartortitsinissartik ilungersuutigaat. (Galatiamiut 5:22, 23) Ullumikkut pissuserineqartussat taakku pingaartinneqarpiarneq ajorput, ’uinngulli suliai’ iliuuserineqarnerusarlutik. Amerlangaartunut ilaasut ’kinguaassiuutitigut inuunerlunnerup, mingunnartuliornerup, ileqqorlunnerup, guutipilussiornerup, ilisiinnerup, akerariinnerit, saqitsaannerup, sinnganerup, kamajassutsip, namminissarsiornerup, assuariinnerit, immikkoorniarnerup, qinngarsuinerit, imerajunnerup, inuulluarumatuallaarnerit tamakkualu taamaaqataasa’ pinaveersaarnissaat aalajangiusimavaat. — Galatiamiut 5:19-21.
10. Amerlangaartunut ilaasut suna aalajangiusimavaat?
10 Naammalluinnanngitsuugatta kristumiunit pissuserineqartussanik pitsaasunik anersaakkut inerititaqarnissaq, uinngup suliaanik pinaveersaarinissaq Saatanillu silarsuaanit tatineqarnermik akiuinissaq unamminiarnartuusinnaavoq. Taamaakkaluartorli inuttut sanngiissutit, assigiinngitsutigut sapersarneq imaluunniit timikkut pisinnaasat killeqarnerat uagutsinnik uppernikillisitsisinnaasut Jehovamulluunniit asanninnikillisitsinnaasut pissutigalugit nikallunnginnissarput aalajangiusimavarput. Nalunngilarput Jehova neriorsuisimanermisut iliorumaartoq — tassa amerlangaartut annikilliornartussarsuarmi aniguisissagai.
11. Saatanip kristumiut uppernerat sanngillisinniarlugu periaatsit suut atortarpai?
11 Sulili mianersorpugut nalunnginnatsigu akeravipput tassaasoq Diaavulu, taannalu imaaliallaannaq uniinnarnavianngilaq. (Atuaruk 1 Petrusi 5:8). Taassuma tunussisut allallu aqqutigalugit isumaqalersinniarpaatigut ajoqersuutit maleruakkavut eqqunngitsuusut. Amerlanertigulli periaaseq tamanna iluatsinngitsoortarsimavoq. Aamma malersuineq eqqarsaatigalugu taama pisoqartarsimavoq. Akerlilersuisut oqaluussineq akornusersortaraluaraat malersorneqartut uppernerat nakussatsinneqaannartarpoq. Taamaattumik Saatanip periaaseq upperisatsinnik sanngiillisitseriaannaanerusorisani atornerujartuinnarpaa: Ilaannikkut nikallungasarnerput ajukkuttarnerpullu atornerluttarpaa. Kristumiut siulliit navianartoq tamannarpiaq pillugu ima mianersoqquneqarput: „Isiginiarsiuk taanna [Kristusi] ajortuliortunit taama assortorneqartigigaluarluni ilalaaginnartoq [pinertusaartoq, NV].“ Sooq? „Qasuleqqunasi nikalloqqunasilu.“ — Hebræerit 12:3.
12. Siunnersuutit Biibilimiittut nikallortunut qanoq iluaqutaasarpat?
12 Illit Jehovamut kiffartorunnaarnissat ilaannikkut kissaatigisarpiuk? Ilaannikkut misigisarpit sumulluunniit atorsinnaanak? Taamatut misigisaruit, misigissutsit tamakku Jehovamut kiffartorninnut akornutissatut Saatanimut atorteqinagit. Peqqissaartumik Biibilimik atuaqqissaarneq, qamannga pisumik qinusarneq, ataatsimiigiartuarneq uppeqatinillu peqateqartarneq ’qasulinnginnissannut’ iluaqutigissavatit. Jehovap imminut kiffartortut neriorsorpai nutaanik nukinissasut. Neriorsuut tamanna upperisinnaavarput. (Atuaruk Esaja 40:30, 31). Kristumiutut sammisassat ulapputigikkit. Piffissaajarnartunik aliikkutaqarnaveersaarit piffissarlu allanik ikiuinermut atorlugu. Taava nikallungagaluarlutit pinertusaarsinnaassaatit. — Galatiamiut 6:1, 2.
Annikilliornartussarsuarmit aniguineq silarsuassamullu nutaamut iserneq
13. Harmagedonimi aniguisut sunik suliassaqassappat?
13 Harmagedonip kingorna naapertuilluanngitsut makittut kisissaanngitsut Jehovap aqqutigeqqusaasa ilinniarnissaat pisariaqartissavaat. (Apustilit Suliaat 24:15) Jiisusip utertitsissutitut pilliutaa pillugu paasitinneqartariaqarput, aap, pilliut iluaqutigissagunikku tamatuminnga paasitinneqaannaratik tamatuminnga upperinninnissamik ilinniartinneqartariaqarput. Upperisarsiornikkut paasinnittaatsit eqqunngitsut isummiussimasatik akuersaarunnaarluinnartariaqarpaat inooriaaserisimasartillu inooriaaseriunnaartariaqarlugu. Inuttut pissutsip nutaap kristumiunut ilumoortunut ilisarnaataasup atinissaa ilinniartariaqarpaat. (Efesosimiut 4:22-24; Kolossemiut 3:9, 10) Harmagedonimi aniguisut suliassarpassuaqassapput. Eqqarsaatigeriaruk Jehovamut taamatut kiffartorneq qanoq nuannertigissasoq, silarsuarmit ajortumit maanna atuuttumit tatineqarnani inunnillu allamut saasaarisoqarnani!
14, 15. Annikilliornartussarsuarmi aniguisut naapertuilluartullu makititaasut suut oqaloqatigiissutigisinnaavaat?
14 Aammattaaq inuit Jiisusip nunarsuarmi inuunera sioqqullugu aalajaallutik Jehovamut kiffartortut ilinniagassarpassuaqassapput. Paasissavaat Missiarsi neriorsuutigisaasoq kinaanersoq. Taakkua taassuma tikiunnissaa qilanaarisimavaat, takunngisaannarluguli. Taamanikkulli inuugallaramik ersersippaat Jehovamit ilinniartinneqarusullutik. Takorlooriaruk taakkuninnga ikiuinerup immikkut pisinnaatitaaffiullunilu qanoq nuannertiginissaa — assersuutigalugu Danieli nassuiaallugu siulittuutit paasinagit allagai qanoq ilillutik eqquussimanersut! — Danieli 12:8, 9.
15 Taamaalillutik makititaasut ilinniarfigilluarsinnaassavaatigut, kisianni aamma soorunami uagut taakkununnga apeqqutissarpassuaqassaagut. Pisimasut Biibilimi eqqaaneqartut, erseqqissumilli allaaserineqanngitsut, pillugit sukumiinerusumik oqaluttuussinnaavaatigut. Eqqarsaatigeriakkit Jiisusi pillugu paasissutissat taassuma eqqarlianit Johannesimit Kuisisumit namminermit paasisinnaasavut! Nalunaajaasut aalajaatsut taakku aqqutigalugit paasisavut pissutigalugit qularnanngitsumik Guutip oqaasianik massakkornit suli paasinninnerulissaagut. Jehovamut kiffaasut aalajaatsut Jiisusi sioqqullugu toqusut aamma amerlangaartunut ilaasut naggatissap nalaani toqusut ’ajunnginnerusumik makititaassapput’. Silarsuarmi Saatanimit naalakkersorneqartumi Jehovamut kiffartulerput. Silarsuassamili nutaami pissutsini pitsaanerungaartuni kiffartoqqilerneq taakkununnga qanoq nuannertigissava! — Hebræerit 11:35; 1 Johannesi 5:19.
16. Siulittuutit naapertorlugit ullormi eqqartuussiffimmi susoqassava?
16 Ullup eqqartuussiffiup ingerlanerani mappersakkat mapperneqarumaarput. Taamanikkussamut inuusut tamarmik immikkut naassaanngitsumik inuulernissamut qinngaqqunnanngitsutut qinngaqqunnartutulluunniit eqqartuunneqarpata mappersakkat taakkua Biibililu tunngaviussapput. (Atuaruk Saqqummersitat 20:12, 13). Ullup eqqartuussiffiup naalernerani kikkut tamarmik Jehovap qilammi nunamilu kisimi oqartussaaneranik akerleriissummi sumi inissisimanerminnik ersersitsinissamut periarfissaqarluareersimassapput. Guutip naalagaaffianut naalatsigitissappat „puilasunullu inuussutaasunut“ Savaaqqamut siulersortillutik, imaluunniit Guutip naalagaaffianut naalatsigitikkumanatik tamatuminnga akerlilersuissappat? (Saqqummersitat 7:17; Esaja 65:20) Taamanikkussamut nunarsuarmiittut tamarmik, ajortimit kingornussamit avatangiisinilluunniit ajortunit sunnerneqarsimanatik, namminneq aalajangernissaminnut periarfissaqareersimassapput. Kialuunniit Jehovap inaarutaasumik eqqartuussinerata eqqortuunera apeqqusersinnaassanngilaa. Ajortut kisimik naassaanngitsumik suujunnaarsitaassapput. — Saqqummersitat 20:14, 15.
17, 18. Kristumiut tanitat savallu allat ullormi eqqartuussiffissami sunissartik nuannaarlutik qilanaaraat?
17 Ullumikkut kristumiut tanitat naalagaaffimmik piginnilernissamut qinngaqqunnanngitsuutitaasut ullormi eqqartuussiffissami naalakkersueqataanissartik qilanaaraat. Immikkut pisinnaatitaaffigisaat nuanningaarami! Tamatuminnga neriuuteqarnertik apustilip Petrusip taamanikkut kristumiunut kajumissaarutaanik matuminnga malinninnissaminnut kajumississutigaat: „Suli ilungersornerullusi qaaqquneqarnersi qinerneqarnersilu aalajangersarniarsigit; taamaaliorussi naakkiutinngisaannassaasi. Taavalu Naalakkatta annaassisittalu Jiisusi-Kristusip naalagaaffiata ittuinnartup matua qiversimalluni ilissinnut ammajuaannassaaq.“ — 2 Petrusi 1:10, 11.
18 Savat allat qatanngutitik tanitat peqatigalugit qilanaarput taakkuninngalu tapersersuinissartik aalajangiusimallugu. Ullumikkut Guutip ikinngutigimmatik Guutimut kiffartornerminni tamaviaarusupput. Ullup eqqartuussiffiup ingerlanerani piumaqalutik uummatikkullu iluunngarlutik Guutip aaqqissuussaanik tapersersuissapput, puilasunut inuussutaasunut Jiisusimit siulersorneqaatigalutik. Taava naggataatigut maani nunarsuarmi naassaanngitsumik Jehovamut kiffartornissamut qinngaqqunnanngitsuutitaassapput! — Romamiut 8:20, 21; Saqqummersitat 21:1-7. (w08 01/15-E)
Eqqaamavigit?
• Jiisusip pigisaanut ilaasut suuppat?
• Amerlangaartunut ilaasut qatanngutitik tanitat qanoq tapersersorpaat?
• Amerlangaartut suna qilanaarisinnaavaat, kiffartornerlu suna maanna immikkut pisinnaatitaaffigaat?
• Ulloq eqqartuussiffissaq illit qanoq isigaajuk?
[Qupp. 26-mi assiliartaq]
Amerlangaartunut ilaasut atisatik Savaaqqap aavanut eqqiarpaat qaqortitillugit
[Qupp. 28-mi assiliartaq]
Aalajaatsunit makititaasunit suut paasissallugit qilanaaraagit?