“Inuppassuit” kikkuuppat?

1. Ukiup 95-p mis­saani apustili Johan­nesi qanoq atugaqarsimava?

UKIUP 95-p mis­saani apustili Johan­nesi erloqinar­tunik atugaqar­poq. Utoq­qaavoq tiguak­katul­lu qeqer­tamit Patmosimit nikeriarsin­naanani apustiliusunilu kisiar­taalersimagunarluni. (Saqq 1:9) Nalun­ngilaa ilagiit akerlilersuisunit tam­mar­tin­niar­neqarlutil­lu avis­saar­tuutitin­niar­neqar­tut. Kristumiut ilumoor­tut nungutitaaq­qajaar­pasis­simasin­naap­put. – Jud 4; Saqq 2:15, 20; 3:1, 17.

2. Saq­qum­mersitat 7:9-14 naaper­torlugit Johan­nesi siunis­saq pil­lugu pis­sanganar­tumik sumik takorruuisin­neqar­pa? (Saq­qaani as­siliaq takuuk).

² Erloqinar­torsior­nermini Johan­nesi siunis­saq pil­lugu pis­sanganar­tumik takorruuisin­neqar­poq. Tas­sani in­ngilit peq­quneqar­put nunarsuup anorai sisamat noqeq­qul­lugit eqimat­tat kif­faasut inaarutaasumik naqis­suser­neqarserlugit. (Saqq 7:1-3) Kif­fat taak­ku 144.000-up­put qilam­milu Jiisusi kun­ngioqatigis­sal­lugu. (Luk 12:32; Saqq 7:4) Johan­nesi aam­ma eqimat­tanik al­lanik takusaqaler­poq, taak­kulu amerlangaarmata oqar­poq ‘takuat’ – tupaal­laatigisamik takusaqarsimanermut ersiutaasoq. Johan­nesimuna suna takugaa? “Inup­pas­suit amerlangaaramik kisin­neqarsin­naan­ngitsut, inuiaqatigiin­nit naggueqatigiin­nil­lu inuian­nil­lu im­mik­kul­lu oqaasilin­nit tamanit pisut, is­siavis­saarsuup sioraani Savaaq­qal­lu saavani qeqar­put.” (Saqqummersitat 7:9-14 atuakkit). Takorlooruk Johan­nesi qanoq nuan­naar­tigisimas­sasoq paasil­lugu siunis­sami inup­pas­suit Guutip akuerisaatut pal­lorfigin­nilerumaar­tut!

3. (a) Sooq Johan­nesip takorruugaa up­per­nitsigut nakus­satsis­sutigisin­naavar­put? (b) Al­laaserisami matumani suut sam­mis­savavut?

³ Qular­nan­ngitsumik takorruugaq taman­na Johan­nesip up­per­neranut nakus­satsis­sutaasimas­saaq. Takorruuk­kap tamatuma eq­quun­nerata nalaani inuugat­ta taman­na up­per­nitsin­nut nakus­satsis­sutaangaar­nerusimas­saaq! An­nikil­lior­nar­tus­sarsuarmit aniguinis­samik nunarsuarmilu naas­saan­ngitsumik inuunis­samik neriuuteqar­tut mil­lionil­lit nalitsin­ni katersor­neqarsimap­put. Al­laaserisami matumani sam­mis­savar­put ukiut 80-it sin­nerlugit matuma sior­natigut ‘inup­pas­suit amerlangaar­tut’ kik­kuuneri Jehovap qanoq in­nut­taminut ilisimaneqalersik­kai. Taava ‘inup­pas­suar­nut’ ilisar­naataasut marluk sam­mis­savavut: (1) amerlas­susii aam­ma (2) nunanit tamalaaneersuuneri. Inun­nut pil­luaq­qusanut taak­kunun­nga ilaaler­nis­samik neriuutil­lit tamarmik up­per­nermik­kut taak­kua marluk sam­mineqar­neri nakus­satsis­sutigis­savaat.

“INUPPASSUIT” SUMI INUUSSAPPAT?

4. Kristumiuunerar­tut sal­lusuis­sut Biibilimeersoq suna paasisiman­ngilaat, tamatumun­ngalu tun­ngatil­lugu Biibilimik Atuaq­qis­saar­tar­tut qanoq paasisaqarsimap­pat?

⁴ Inuit naalat­tut nunarsuarmi naas­saan­ngitsumik inuulerumaar­nerat kristumiuunerar­tuni nalingin­naasumik ajoqersuutigineqar­neq ajor­poq. (2 Kor 4:3, 4) Ul­lumik­kut kristumiuunerar­tut amerlanerit ajoqersuutigisar­paat inuit ajun­ngitsut toqugunik qilalias­sasut. Biibilimil­li Atuaq­qis­saar­tar­tut ikit­tun­nguit, 1800-kkut naaler­neran­ni Napasuliaq Alapernaarsuiffik-mik saq­qum­mersitsisalersut, taman­na ajoqersuutigin­ngilaat. Taak­kua paasivaat Guutip paratiisi nunami pilerseq­qik­kumaaraa inuil­lu naalat­tut maani nunar­suarmi – qilam­miun­ngitsoq – najugaqarumaar­tut. Inuil­li taak­ku naalat­tut kik­kuuneri sivisuumik paasisiman­ngilaat. – Matt 6:10.

5. Biibilimik Atuaq­qis­saar­tar­tut 144.000-nut tun­ngatil­lugu suna up­peraat?

⁵ Biibilimik Atuaq­qis­saar­tar­tut aam­ma paasivaat inuit “akiliun­neqarlutik nunamiik­kun­naarsitat” Jiisusi qilam­mi naalak­kersueqatigis­sagaat. (Saqq 14:3) Inuit taak­ku tas­saap­put kristumiut aal­lus­sil­luarlutil­lu tun­niul­luin­narsimasut nunarsuarmiin­nermin­ni Guutimut aalajaal­lutik kif­far­torsimasut 144.000-t. Taavami ‘inup­pas­suit amerlangaar­tut’ sumi inuus­sap­pat?

6. Biibilimik Atuaq­qis­saar­tar­tut ‘inup­pas­suar­nut’ tun­ngatil­lugu suna up­perisimavaat?

⁶ Johan­nesip takorruuk­kamini takuai “inup­pas­suit” ‘is­siavis­saarsuup sioraani Savaaq­qal­lu saavani qeqar­tut’. (Saqq 7:9) Oqaatsit taak­ku tun­ngavigalugit Biibilimik Atuaq­qis­saar­tar­tut isum­mer­put “inup­pas­suit”, 144.000-t as­sigalugit, qilam­mi najugas­sin­neqas­sasut. 144.000-t aam­ma “inup­pas­suit” tamarmiul­lutik qilam­mi najugas­sin­neqas­sagunik suna as­sigiin­ngis­sutigis­sagamik­ku? Biibilimik Atuaq­qis­saar­tar­tut isumalior­put “inup­pas­suit” tas­saasut kristumiut nunarsuarmiik­kal­laramik Guutimut naalal­luin­nar­tuusiman­ngitsut. Minguitsumik inooriaaseqaraluarlutik ilaat im­maqa kristumiuuneraqatigiit ilagiivinut ilaasor­taajuaan­narsimap­put. Biibilimik Atuaq­qis­saar­tar­tut isum­mer­put taak­ku ilaatigut eq­qor­tulior­taraluarlutik Jiisusimik naalak­kersueqateqar­nis­samut piuk­kun­naateqan­ngitsut. Isumaqar­put Guutimut naam­mat­tumik asan­nin­ngin­namik qilam­mi “is­siavis­saarsuup sioraani” qeqaan­nar­tus­saasut is­siavis­saarsuarmi issianatik.

7. Biibilimik Atuaq­qis­saar­tar­tut naaper­torlugit Kristusip ukiuni 1.000-ni naalak­kersuinerani kik­kut nunarsuarmi inuus­sap­pat, aam­ma aalajaatsut itsaq inuusimasut pil­lugit Biibilimik Atuaq­qis­saar­tar­tut suna up­peraat?

⁷ Taavami kik­kut nunarsuarmi inuus­sap­pat? Biibilimik Atuaq­qis­saar­tar­tut up­peraat 144.000-t ‘inup­pas­suil­lu’ qilam­mi katersor­neqareer­pata inuit mil­lionil­lit al­lat nunarsuarmi inuusin­naatitaas­sasut Kristusil­lu ukiuni 1.000-ni naalak­kersuinerani pil­luaq­qus­sutit nuan­naarutigalugit. Biibilimik Atuaq­qis­saar­tar­tut ilimagin­ngilaat inuit mil­lionil­lit taak­ku Kristusip naalak­kersuinera sioq­qul­lugu Jehovamut kif­far­tulerumaar­tut. Isum­mer­put inuit taak­ku ukiut 1.000-t inger­laneran­ni Jehovap peq­qus­sutaanik ilin­niar­tin­neqarumaar­tut, kingor­nalu Jehovap peq­qus­sutaanik maleruaalersimasut nunarsuarmi naas­saan­ngitsumik inuunis­samik pil­luaq­quneqarumaar­tut, akerlilersuisul­lu suujun­naarsitaajumaar­tut. Aam­ma Biibilimik Atuaq­qis­saar­tar­tut isumalior­put pif­fis­sap tamatuma ingerlanerani inuit ilaat nunarsuarmi ‘naalagarsuar­tut’ kif­far­tulerumaar­tut – itsaq aalajaatsut kristusi sioq­qul­lugu toqusimasut makit­tus­sat ilan­ngul­lugit – ukiut 1.000-t naap­pata im­maqa qilam­miiler­nis­samik akis­sarsisin­neqarumaar­tut. – Tuss 45:17.

8. Eqimat­tat suut pingasut Guutip siuner­taanut ilaatin­neqarsorineqar­pat?

⁸ Tas­sa Biibilimik Atuaq­qis­saar­tar­tut isumaqar­put eqimat­tat pingasuusut: (1) 144.000-t qilam­mi Jiisusimut kun­ngioqataasus­sat; (2) “inup­pas­suit” kristumiut pimoorus­sival­laan­ngitsut qilam­mi “is­siavis­saarsuup sioraani” qeqar­tus­sat; taavalu (3) inuit mil­lionil­lit nunarsuarmi Kristusip ukiuni 1.000-ni naalak­kersuinerani Jehovap peq­qus­sutaanik ilin­niar­tin­neqar­tus­sat.b Pif­fis­sarli Jehovap aalajangigaa nal­lium­mat tamatumun­nga tun­ngatil­lugu sal­lusuis­sutip qaamar­nga qaam­maris­siar­tuler­poq. – Uss 4:18.

SALLUSUISSUTIP QAAMMARNGA QAAMMARIS­SIARTORTOQ

9. (a) “Inup­pas­suit” nunarsuarmiit­tut ‘is­siavis­saarsuup sioraani Savaaq­qal­lu saavani qeqar­nis­saat’ qanoq paasisariaqar­pa? (b) Sooq Saq­qum­mersitat 7:9-p nas­suiar­neqar­nera maan­na paasinar­neruler­pa?

⁹ Johan­nesip takorruugaani “inup­pas­suit” kik­kuuneri 1935-mi paasineqar­poq. Jehovap Nalunaajaasuisa paasiler­paat taak­kua “qilam­mi is­siavis­saarsuup sioraani Savaaq­qal­lu saavani” qeqar­nerat as­sersuutaan­naasoq. Nunarsuarmi inuugaluarlutik “is­siavis­saarsuup sioraani” qeqar­pul­lusooq Jehovap qilam­mi nunamilu kisimi oqar­tus­saaneranik akuerin­nin­nermik­kut Guutimul­lu naalan­nermik­kut. (Es 66:1) ‘Savaaq­qap saavani qeqar­put’ Jiisusip uter­titsis­sutitut pil­liutaanik up­perin­nin­nermik­kut. As­singusumit­taaq Mat­thæusi 25:31, 32-milu al­las­simavoq ‘inuiaqatigiit tamarmik’ – aam­ma inuit ajor­tut – Jiisusip ‘naalan­nas­sutsimi is­siavis­saarsuata saavanut katersuutis­sasut’. Ersarip­poq inuiaqatigiit taak­ku tamarmik qilam­miin­natik nunarsuarmiit­tuusut. Taman­na paasinar­nerungaarami! Paasinarsivoq sooq “inup­pas­suit” qilam­mut makititaanis­saat Biibilimi eq­qaaneqan­ngitsoq. Eqimat­tat ataasiin­naat – tas­sa 144.000-t Jiisusi peqatigalugu ‘nunamut kun­ngiusus­sat’ – naas­saan­ngitsumik qilam­miin­nis­samik neriorsor­neqar­put. – Saqq 5:10, tastamantitâĸ.

10. Sooq Kristusip ukiuni 1.000-ni naalak­kersuinis­saa sioqqullugu “inup­pas­suit” Jehovap peq­qus­sutaanik ilin­niar­tin­neqar­nis­saat pingaaruteqar­pa?

¹⁰ 1935-miil­li Jehovap Nalunaajaasuisa paasivaat Johan­nesip takorruugaani “inup­pas­suit” tas­saasut kristumiut aalajaatsut nunarsuarmi naas­saan­ngitsumik inuunis­samik neriuuteqar­tut. “Inup­pas­suit” an­nikil­lior­nar­tus­sarsuarmit aniguinias­sagunik Kristusip ukiuni 1.000-ni naalak­kersuinerata aal­lar­tin­ngin­nerani Jehovap peq­qus­sutaanik ilin­niar­tin­neqar­tariaqar­put. Kristusip ukiuni 1.000-ni naalak­kersuinera sioq­qul­lugu “pisus­sat suut tamaasa qimarratigisin­naaq­qul­lugit” up­persuseqarluar­tariaqar­put. – Luk 21:34-36.

11. Sooq Biibilimik Atuaq­qis­saar­tar­tut ilaat isumaqarsimap­pat ukiuni 1.000-ni naalak­kersuinerup kingor­na inuit ilaat im­maqa qilam­mi makititaajumaar­tut?

¹¹ Taavami Kristusip ukiuni 1.000-ni naalak­kersuinerata kingor­na nunarsuarmi maligas­siuisuusimasunik qilam­mut makititaasoqas­sava? Taman­na atuagas­siami The Watch Tower-imi februaarip 15-an­ni 1913-imoor­tumi periarfis­satut al­laatigineqar­poq. Eq­qarsar­toqarsin­naagaluar­poq: ‘Sooq itsaq aalajaatsuusimasut taamaal­laat nunarsuarmi makititaas­sap­pat, kristumiul­li al­lat pimoorus­sival­laan­ngitsut qilam­mut makitin­neqas­sal­lutik?’ Taamatul­li eq­qarsar­put imatut kuk­kusumik isumaqaramik: (1) “inup­pas­suit” qilam­mi makititaas­sasut aam­ma (2) “inup­pas­suit” tas­saasut kristumiut pimoorus­sival­laan­ngitsut.

12-13. Qilaliar­nis­samik neriuutil­lit nunamilu inuunis­samik neriuutil­lit suna paasivaat?

¹² Sam­meriik­katsitut 1935-miil­li Jehovap Nalunaajaasuisa ersaris­sumik paasisimavaat Harmagedonimi aniguisus­sat tas­saasut “inup­pas­suit” Johan­nesip takorruuk­kamini takusai. Taak­ku tas­saap­put “an­nikil­lior­titaangaar­nermit aniguisimasut” imatul­lu nipituumik torlulasut: “An­nas­sut Guutitsin­nit is­siavis­saarsuarmi is­siasumit Savaaq­qamil­lu pivoq.” (Saqq 7:10, 14) Aam­mat­taaq Biibilimi ajoqersuutigineqar­poq qilam­mi makititaasus­sat itsaq inuusimasunit aalajaatsunit “ajun­ngin­nerusumik” atugaqarumaar­tut. (Hebr 11:40) Taamaat­tumik tamak­ku paasigamik­kit qatan­ngutit­ta ilungersorlutik inuit nunarsuarmi naas­saan­ngitsumik inuunis­samik neriuuteqaleq­qul­lugit Jehovamut kif­far­tuler­nis­saan­nut kaam­mat­tor­taler­paat.

¹³ ‘Inup­pas­suar­nut’ ilaasut neriuutis­saqaler­ner­tik nuan­naarutigingaar­paat. Paasivaat Jehova aalajangiisar­toq sumi – qilam­mi nunamiluun­niit – kif­fami kif­far­torfigis­sagaan­ni. Qilaliar­nis­samik neriuutil­lit nunamilu inuunis­samik neriuutil­lit paasivaat Jiisusip Kristusip uter­titsis­sutitut pil­liutaanik Jehovap asan­ningaarluni pilersitsineratigut taamatut neriuuteqarsin­naal­lutik. – Rom 3:24.

AMERLASSUSII

14. Sooq amerlasuut 1935-p kingor­na eq­qarsaatigaat “inup­pas­suit” pil­lugit siulit­tuut qanoq eq­quuk­kumaar­nersoq?

¹⁴ Jehovap in­nut­tai 1935-mi eq­qor­nerusumik paasisaqarmata amerlasuut eq­qarsaatigiler­paat nunarsuarmi neriugisal­lit qanoq amerlasoorsuan­ngorumaar­nersut. As­sersuutigalugu Ronald Parkin “inup­pas­suit” kik­kuunersut paasineqarmata aq­qaneq-marlun­nik ukioqar­poq. Ima oqar­poq: “Taamani nunarsuaq tamak­kerlugu oqaluus­sisar­tut 56.000-iin­naap­put, im­maqalu taak­kunani amerlaner­paar­taat tanitaal­lutik. Taamaat­tumik ‘inup­pas­suit’ taak­ku amerlasoorsuusorinan­ngil­lat.”

15. “Inup­pas­suit” katersor­neqar­tut qanoq amerliar­tuin­navis­simap­pat?

¹⁵ Ukiuni qulik­kuutaani tul­liut­tuni ajoqersuiar­tor­titat nunar­pas­suar­nut aal­lar­tin­neqar­talermata Jehovap Nalunaajaasui amerliar­tuin­naler­put. Taava 1968-imi atuagaq sagdlusuíssut inûnigssamut nâgssáungitsumut sangmisoĸ (1973-imi kalaal­lisuun­ngor­tin­neqar­toq) atorlugu Biibilimik atuaq­qis­saaqateqar­taler­neq aal­lar­tip­poq. Sal­lusuis­sut Biibilimeersoq pisariitsun­nguamik nas­suiar­neqar­talermat inuit qanilaar­tut aatsaat taama amerlatigisut soqutigin­niler­put. Ukiut sisamat qaangiuterian­ngitsut inuit 500.000-nit amerlanerusut ajoqersugan­ngorlutil­lu kuisip­put. Latinamerikami nunanilu al­lani ilagiit katuul­lit sun­niutaaruk­kiar­tor­nerat aam­ma Europap Kangiani Afrikamilu nunat ilaan­ni suliat­ta iner­teq­qutaajun­naar­nerat ilutigalugit inuit mil­lionilik­kuutaat kuisip­put. (Es 60:22) Ukiuni kingul­ler­ni inuit Biibilimi ajoqersuutigineqar­tunik ilin­niar­tin­niarlugit Biibililersaarutit sun­niuteqarluar­tut arlal­lit Jehovap peqatigiis­sor­taanit saq­qum­mersin­neqar­put. Ersarip­poq “inup­pas­suit” amerlangaar­tut – ul­lumik­kut 8 mil­lioninit amerlanerusut – katersor­neqareersimalersut.

“INUPPASSUIT” NUNANIT TAMALAANEER­SUUNERI

16. “Inup­pas­suit” sumit pip­pat?

¹⁶ Johan­nesip takorruuk­kani al­laatigigamiuk eq­qaavaa “inup­pas­suit” taak­ku tas­saasut “inuiaqatigiin­nit naggueqatigiin­nil­lu inuian­nil­lu im­mik­kul­lu oqaasilin­nit tamanit pisut”. Pruf­fiiti Zakaria siusin­nerusuk­kut as­singusumik siulit­tuuteqar­poq. Ima al­lap­poq: “Taamaalisuk­kut inuiaat as­sigiin­ngitsut tamarmik angutitaasa ilaasa quliul­lutik angut Judak­kuusoq ataaseq atisaata nuuagut tigul­lugu oqarumaar­put: Ingerlaqatigis­savas­si tusaratsigu Guutip najoraasi.” – Zak 8:23.

17. Inuiaqatigiit tamaasa im­mik­kul­lu oqaasil­lit ikior­niarlugit qanoq ilior­toqar­pa?

¹⁷ Jehovap Nalunaajaasuisa paasivaat inuit as­sigiin­ngitsunik oqaasil­lit katersor­neqas­sap­pata oqaatsit as­sigiin­ngitsor­pas­suit atorlugit nutaarsias­saq nuan­nersoq oqaluus­sis­sutigineqar­tariaqar­toq. Ukiuni 130-nit amerlanerusuni Biibililersaarutinik nutserisarsimavugut, ul­lumik­kul­lu oqaatsinut hundredilik­kuutaanut nutserisar­ner­put oqalut­tuarisaanermi aatsaat taama an­ner­tutigaaq. Ersarip­poq nalitsin­ni “inup­pas­suit” inuian­nit tamaneersut Jehovap tupin­nar­tulior­nik­kut katersorai. Anersaak­kut inuus­sutis­sat oqaatsinut amerlanerusunut nutser­neqar­tar­nerat pis­sutigalugu nunanit tamalaaneersuugaluarlutik ataasius­suseqarlutik Jehovamik pal­lorfigin­neqatigiis­sin­naap­put. Nalunaajaasut aal­lus­sil­luarlutik oqaluus­sisar­nermik­kut qatan­ngutigiit­tul­lu asaqatigiin­nermik­kut ilisimaneqarluar­put. Up­per­nik­kut nakus­satsin­nangaarami! – Matt 24:14; Joh 13:35.

TAKORRUUGAQ TAMANNA UAGUTSINNUT QANOQ ISUMAQARPA?

18. (a) Esaja 46:10, 11 naaper­torlugit sooq tupaal­laatigin­ngilar­put Jehovap “inup­pas­suit” pil­lugit siulit­tuut eq­quutitim­magu? (b) Sooq nunarsuarmi inuunis­samik neriuutil­lit pin­ngitsuugaqar­tutut misigin­ngil­lat?

¹⁸ “Inup­pas­suit” pil­lugit siulit­tuut nuan­naarutigis­sal­lugu pis­sutis­saqarluar­pugut! Jehovap siulit­tuum­mik tamatumin­nga taama tupin­nar­tigisumik eq­quutitsinera tupaal­laatigin­ngilar­put. (Esaja 46:10, 11 atuakkit). “Inup­pas­suit” Jehovamit neriuuteqalersin­neqar­ner­tik qujamasuutigeqaat. Guutip anersaavanik il­ler­nar­tumik tanitaanatil­lu Jiisusi qilam­mi kif­far­toqatigisus­saan­ngin­namik­ku pin­ngitsuugaqar­tutut misigin­ngil­lat. Angutit ar­nal­lu up­perluar­tut Biibilimi eq­qaaneqar­tut tanitanut 144.000-nut ilaan­ngik­kaluarlutik anersaamit il­ler­nar­tumit sun­ner­neqangaarsimap­put. As­sersuutigalugu Johan­nesi Kuisisoq Daavilu. (Matt 11:11; ApS 2:34) Taak­ku al­lar­pas­suil­lu nunarsuarmi paratiisiusumi inuunis­samut makitin­neqas­sap­put. Makitin­neqar­tus­sat tamarmik – “inup­pas­suit” peqatigalugit – Jehovamut taas­sumalu kisimi oqar­tus­saas­susianut aalajaan­ner­tik ersersis­sal­lugu periarfis­saqas­sap­put.

19. Johan­nesip “inup­pas­suit” pil­lugit siulit­tuutaata eq­quutiler­neranit qanoq erser­pa oqaluus­siner­put nukingin­nar­tuusoq?

¹⁹ Inuiaat oqalut­tuarisaaneran­ni aatsaat Guuti inuiaqatigiin­nit tamaneersunik mil­lionilik­kuutaanik katersor­titsivoq. Qilaliar­nis­samik nunarsuarmiluun­niit inuunis­samik neriuuteqaraluarut­ta sapin­ngisamik inuit amerlasuut ‘inup­pas­suar­nut’, ‘savanut al­lanut’, ilaaler­nis­saan­nut ikior­tariaqar­pavut. (Joh 10:16) Qanit­tuk­kut Jehovap an­nikil­lior­nar­tus­sarsuaq nal­liutitis­savaa, naalak­kersuisul­lu up­perisarsior­neril­lu inuian­nik atugarlior­titsisut suujun­naarsis­sal­lugit. ‘Inup­pas­suar­nut’ ilaasut tamarmik im­mik­kut pisin­naatitaaf­ferujus­suaq – nunarsuarmi naas­saan­ngitsumik Jehovamut kif­far­torsin­naaner­tik – qilanaarutigaat! – Saqq 7:14.