Sooq Biibili ullumikkut atorluarsinnaasoq

“Allakkat Illernartut . . . Guutimit anersaarfigineqartut tamarmik iluaqutaapput ajoqersuinermut.”— 2 TIMOTHEUSI 3:15, 16.

INUIT kulturinit assigiinngitsorpassuarneersut ukiut hundredelikkuutaat ingerlaneranni Biibili inuunerminnik pitsaanerulersitsinissamut kajumississutigisarsimavaat. Allassimaffimmi qulaani issuarneqartumi nassuiarneqarpoq atuagaq taanna sooq taama sunniuteqarluartigisarnersoq — tassa ilisimassusermik Guutimeersumik imaqarami. Biibili inunnit allanneqaraluarluni Guutip eqqarsaataanik paasissutissiivoq. Biibilimi ima allassimavoq: “[Anersaamit] Illernartumit sunnertillutik inuit Guutimit pisumik oqaaseqartarput.” — 2 Petrusi 1:21.

Siunnersuutit Biibilimiittut minnerpaamik marlutsigut atoriaannaapput. Siullermik, suut pitsaanerusumik inooriaaseqalersitsisarnerat pillugu piviusorsiortumik isiginnittaaseqalersitsisarput. Aappassaanik, taamatut pitsaanerusumik inooriaaseqalernissamut pisariaqartunik allannguinissamut kajumissisitsisinnaapput. Taakku marluk misissoriartigit.

Ilitsersuutit siunertaqarluartunik anguniagaqarnissamut iluaqutaasut

Guuti Biibilimi ima neriorsuivoq: “Ilinniartissavakkit ilitsersorlutillu ingerlavissannik. Siunnersussavakkit, isigiuassavakkillu.” (Tussiaat 32:8) Maluginiaruk Guuti uagutsinnut neqeroortoq siunnersuillunilu ilitsersuinissamik ajornartorsiutinut pissutaasunik paasinninnissatsinnut iluaqutissatsinnik. Ilitsersorneqarsimaneq pissutigalugu anguniagassat suut anguniagarinissaat iluaqutaasinnaanersut nalilerneqarsinnaanngortarpoq, tamannalu inuunitta pingaaruteqanngitsunut atulussinnannginnissaanut illersuutigisinnaavarput.

Assersuutigalugu inuppassuit inuunerminni anguniagarivaat tusaamasanngornissartik pisuunngornissartilluunniit. Imminut ikiorniarnermut naatsorsuussanik atuagarpassuaqarpoq allanik salloqittaanikkut qanoq ililluni ataqqisaalerluniluunniit pisuunngortoqarsinnaaneranut tunngasunik. Biibilimili ima allassimasoqarpoq: “[Sinngagiinneq] . . . piunngitsuuvoq tassaallunilu anorimik tigusiniarsarineq!” (Oqaluussisartup oqaasii 4:4) Aamma: “Aningaasanik nuannarisaqartoq naammatsiffeqanngilaq.” (Oqaluussisartup oqaasii 5:9, The New English Bible) Ullumikkut aamma taamaappa?

Siunnersuutit Biibilimiittut ullumikkut ilumut atorsinnaanerat Akinorip Japanimiup misigisimasaanit erserpoq. Unammillertoqangaaraluartoq anguniakkani anguaa — universitetimi nuimasumi ilinnialerpoq kingornatigullu suliffeqarfimmi tusaamasaalluartumi suliffittaarluni. Suut tamarmik ingerlalluarpasipput. Iluatsilluarninili neriuutigisimasamisut pillualissutiginngilaa. Stressernini qasulluinnarninilu pissutigalugit perululluni napparsimalerpoq. Suliffiani ikinngutai ikiuutaarpianngillat. Isumatsassimangaalerpoq imerajussillunilu allaallu imminornissani eqqarsaatigilerlugu. Taavali Jehovap Nalunaajaasuinit Biibilimik atuaqqissaaqatigineqartalerpoq. Paasisani pissutigalugit inuunermi suut pingaarnerpaanerannik isiginnittaatsini allanngortippaa. Sivitsunngitsoq stresserunnaariartulerpoq. Akinorip, makitassutsimit anguniagaqarusussutsimillu siulersortinnani, ussatip matuma Biibilimiittup ilumuussusia nammineq timimini misigaa: “Uummat eqqissisimasoq timip inuussutigaa.” — Ussatit 14:30, The Holy Bible — New International Version.

Illit inuunermi anguniagassatut pingaarnerpaatut suna isigaajuk? Suna ilinnik ilumoortumik pillualersitsisinnaasoraajuk? Pillualersitsisinnaasoq tassaassava aappariilluarneq? Imaluunniit meeqqavit inuunermi aallartilluartinnissaat? Ikinnguterpassuaqarneq? Inuunermik nuannaarutiginnissinnaaneq? Tamakkuninnga tamanik anguniagaqarneq ajunngilaq. Biibilimi allaat tamakkuninnga anguniagaqarnissaq kajumissaarutigineqarpoq, allassimanngilarli tamanna inuunermut siunertaasoq pingaarneq. Nalerisimaarnartumik inuujumalluni naammassineqartariaqartoq tunngaviusoq Biibilimi uparuarneqarpoq. Ima allassimavoq: “Guuti mianeruuk inatsisaalu maleruarlugit, inuit tamarmik taamaaliortussaapput.” (Oqaluussisartup oqaasii 12:13) Tamanna sumiginnaraanni inuuneq siunertaaruttarpoq, isumatsannartarluni naggataatigullu pakatsinartarluni. Biibilimili ima uppernarsaavigineqarpugut: “Pilluarpoq [Jehovamik] tatiginnittoq.” — Ussatit 16:20.

Biibilip kajumissisitsisinnaassusia

Apustili Paulusi ima allappoq: “Guutip oqaasia uumavoq sunniisinnaassuseqarlunilu.” Panatut ipittutut illuttut kiinalittut inuup eqqarsaataanik siunertaanillu ilorlerpaanik killiisinnaavoq. (Hebræerit 4:12) Biibili inooriaatsitsinnik allannguinissamut nukissaqalissutigisinnaavarput qanorpiaq ittuunitsinnik, qanoq issorinerinnatsinniunngitsoq, paasinninnissamut iluaqutigisaratsigu. Inuit eqqortuliorusuttut paasissavaat immaqa inuunerminni allannguisariaqarlutik. Assersuutigalugu ukiuni hundredelinni siullerni kristumiut Korinthimi ilagiinniittut tillittuusimapput, imerajuttuusimallutik, allasiortuusimallutik assigisaannillu iliuuseqartarsimallutik, Paulusili ima allappoq: “Ilasi taamaassimagaluarput, uffarneqarlusili minguiarneqarpusi . . . [Guutitta] Anersaavatigut.” (1 Korinthimiut 6:9-11) Ullumikkut Jehovap anersaava illernartoq taamatulli sunniisinnaassuseqartigaaq, aamma inunnik kajumissisitsisinnaavoq pisariaqartunik allannguinissamut.

Mario, Europamiuusoq, inuusimavoq peqqarniitsoq marihuanamik pujortartarlunilu tuniniaasartoq. Ilaanni politiip ikiaroornartoq Mariop pigisaa arsaarinnissutigimmagu Mario ima kamaammertigaaq politeeq saassullugu biilialu aserorlugu. Mario aamma suliffissaaleqillunilu akiligassarpassuaqarpoq. Paasilerlugu ajornartorsiutini nammineerluni aaqqissinnaanagit Biibilimik atuaqqissaaqatigiumaneqarami akuersivoq. Piffissap ingerlanerani Mario siumukarpoq isikkorinnerujartorlunilu. Aamma ikiaroornartutortarunnaarpoq ikiaroornartuerniartarunnaarlunilu, aamma nakuusertarunnaarpoq. Qanoq allannguisimatigineranik ilisimannittut ilarpassui tupigusupput. Aqqusinermi unitsittarpaat oqarfigisarlugulu: “Mario, ilisarinngingajavippakkit!”

Inuit Akinoritut Mariotullu ittut suna inooriaatsiminnik allannguissutigisarpaat siunertaqarluartumik pilluarnartumillu inuulerlutik? Erseqqippoq allannguissutigisaat tassaasoq Biibilimik atuaqqissaarnermikkut Guuti pillugu ilisimasaqalernerat. Guuti kisimi siunnersuisinnaavoq maanna inuunermik siunertaqarlualersitsisumik siunissamilu naassaanngitsumik inuunissamik neriuuteqalersitsisumik. Guutip Biibili aqqutigalugu Ataatatut ima oqaluuppaatigut: “Tusaagit, ernera, oqaatsikka ilassiniakkit, taava ukiorpassuarni inuussaatit. . . . Pisukkuit isikkatit akornusersortissaqassanngillat, arpakkuillu naakkiutinngisaannassaatit. Ajoqersuussutit tamatigut aalajangiusimaniakkit, annaanaveersaarniakkit ilinnut inuussutaammata.” (Ussatit 4:10-13) Pinngortitsisumut siunnersortissarsiornermit allanik pitsaanerusoqanngilaq! (wp09 06/01-E)

[Qupp. 7-mi ungalusaq/​assiliartaq]

Siunnersuutit suli atoriaannaasut

Biibili najoqqutassianik paasiuminartunik atorluarsinnaasorujussuarnillu inuunermi sutigut tamatigut najoqqutarisinnaasatsinnik imaqarpoq. Aajuku ilaat:

• Allanut attaveqarluarit

“Inunnut qanorluunniit iliorfigeqqugussi ilississaaq taamatut iliorfigisigit.” — Matthæusi 7:12.

“Allat ilissinnit annerutissigit.” — Filippimiut 2:3.

“Inoroorsaarnissaq pingaartissiuk.” — Romamiut 12:13.

• Ileqqut ajoqutaasut ajugaaffigikkit

“Ilisimasunik peqateqartoq ilisimassuseqalersarpoq, sianiitsunilli ikinnguteqartoq ajortumeertussaasarpoq.” — Ussatit 13:20.

“Ilaginiaqinagit viinnisorpallaartut.” — Ussatit 23:20.

“Narrajasumik ikinnguteqarniaqinak.” — Ussatit 22:24.

• Aappariittut nukittunissarsi sulissutigisiuk

“Tamassi immikkut nuliasi immissisut asasussaavasi, nuliaasullu uini mianerisussaavaa [ataqqingaassavaa, NV].” — Efesosimiut 5:33.

“Atiniarsigit nallittuingaarneq, ajunngissuseq, nikanartinneq, qanilaarneq naammagittassuserlu. Kamageqatigiigitsi isumakkeerfigeqatigiittarlusilu.” — Kolossemiut 3:12, 13.

• Meeqqat ikiorsigit

“Nukappiaraq ingerlavissamigut ingerlaannarnissaanut kajumissaaruk, utoqqaligaluaruniluunniit tamanna nigussanngilaa.” — Ussatit 22:6.

“[Ilissi] ataataasusi, qitornasi narrutsatseqinasigik, perorsartuarsigilli Jehovap ileqqoreqqusai oqaaqqissaarutaalu malillugit.” — Efesosimiut 6:4, NV.

• Oqqannaveersaaritsi

“Akissut sallaatsoq kamannaveersaartitsisarpoq, oqaatsilli ajuallannartut uumitsatsitsisarput.” — Ussatit 15:1.

“[Ataqqeqatigiigitsi] immissinnut akimorniullusi.” — Romamiut 12:10.

Ikinngutigiikkaluarluni pitsaasarpoq allakkatigut isumaqatigiissuteqarneq niuernerup tungaatigut aaqqiagiinngissuteqalertoqaqqunagu. Tamatumunnga tunngatillugu Guutip kiffaa Jeremia ima allappoq: “[Pisiarineranut] uppernarsaat atsiorpara naqissuserlugulu, ilisimannittussallu qaaqqullugit aningaasat uuttuummut uuttorpakka.” — Jeremia 32:10.

• Isumalluartuuneq ineriartortiguk

“Pingaartissigit suut ilumoortut tamaasa, . . . suut asanartut, suut ajunngitsumik oqaatigineqarsinnaasut, tassa suut ajunngitsut nersornartullu.” — Filippimiut 4:8.

Biibilimi mianersoqqussutigineqarpoq nikallornartunik eqqarsaatiginninneq, aamma assuarineqarpoq ‘atugarisanik ajorneraalluni naammagittaalliorneq’. Ima allassimavoq: “Neriunnissinni tipaatsugitsi.” — Judasi 4, 16; Romamiut 12:12.

Najoqqutassianik pitsaasunik taakkuninnga maleruaanerput maanna inuunitsinnik eqqissinartitsillutillu nalerisimaarnarsisitsiinnarani aammali Guutip piumasaqaataanik eqqortitsinissatsinnut iluaqutigissavarput. Biibilimi ima allassimavoq: “Iluartut nuna kingornutissavaat najugaqassallutillu tassani naassaanngitsumik.” — Tussiaat 37:29.

[Qupp. 5-mi assiliartat]

Akinori niuertuugallarami (saamerleq), ullumikkullu nulianilu pilluarlutik sallusuissutinik Biibilimiittunik avitseqatiginnittut