Piffissaq aalajangersagaq qanillivoq

JIISUSIP ajoqersugaasa naalliuutit atuukkunnaarnissaat pruffiiti Habakkukitulli erinigaat. Paasitinneqarput Guutip naalagaaffiata nunarsuarmi pissutsit aaqqissagai, ilaannilu Jiisusi ima oqarfigaat: “Oqarfigitigut qaqugu tamanna pissasoq sunalu nalunaaqutaassasoq illit [Guutip naalagaaffiani kunngisut] tikiunnissannut silarsuullu naggatissaanut.” (Matthæusi 24:3) Jiisusi oqarpoq Jehovap Guutip kisimi nalunngikkaa qaqugorpiaq Guutip naalagaaffiata nunarsuarmut tamakkiisumik naalakkersuilernissaa. (Matthæusi 24:36; Markusi 13:32) Jiisusilli allallu siulittuutigaat piffissaq qanillippat nunami qanoq pisoqarumaarnera. — Takuuk talerpiup tungaani ungalusaq.

Aamma illit isumaqarpit pissutsit ungalusami eqqaaneqartut ullumikkut nalinginnaasuusut? Aamma Jiisusip siulittuutigaa silarsuarmi tamarmi ilinniartitsineqarumaartoq. Ima oqarpoq: “[Naalagaaffimmik] iivangkiiliu taanna silarsuarmi tamarmi oqaluussissutigineqassaaq inuiannut tamanut nalujunnaarsillugu, taavalu naggatissaq nalliutissaaq.” — Matthæusi 24:14.

Ullumikkut taamatorpiaq pisoqarpoq. Jehovap Nalunaajaasuisa suliassaq tamanna suliaraat. Jehovap Nalunaajaasuisa 7 millioninit amerlanerusut nunani 236-t missaanniittut Guutip naalagaaffiata suna naammassiumaaraa inoqatiminnut oqaluttuaraat, taakkulu Guutip — naalliuutinik anniaatinillu tamanik atuukkunnaarsitsisussap — uagutsinnut piumasaqaatai naapertuilluartut malillugit inuulernissaannut ikiorpaat. Guutip naalagaaffia pillugu ilinniarnerit ingerlatiinnaruk. Taava qilanaarisinnaavat silarsuarmi naalliuuteqarfiunngitsumi inuunissat — naassaanngitsumik. (wp09 12/01-E)

[Qupp. 8-mi ungalusaq]

Ullussat kingulliit pillugit allassimaffiit

MATTHÆUSI 24:6, 7; SAQQUMMERSITAT 6:4

• Aatsaat taama sorsuttoqartigissaaq

MATTHÆUSI 24:7; MARKUSI 13:8

• Nuna sajorujussuartassaaq

• Kaannersuaqartassaaq

LUKASI 21:11; SAQQUMMERSITAT 6:8

• Nappaassuaqartassaaq toqoraataasunik

MATTHÆUSI 24:12

• Inatsisaatsuliorneq ingasatsikkiartussaaq

• Asanninneq nillertunngussaaq

SAQQUMMERSITAT 11:18

• Nunarsuarmik aseruisoqassaaq

2 TIMOTHEUSI 3:2

• Ingasattumik aningaaseritooqassaaq

• Angajoqqaaminnut naalanngitsoqassaaq

• Ingasattumik namminissarsiortoqassaaq

2 TIMOTHEUSI 3:3

• Asanniuitsoqassaaq

• Amerlasuut saammartitassaanngitsuussapput

• Inuiaqatigiinni qanorluunniit inissisimaffilinnik mamarliisartunik inoqassaaq

• Ajunngitsunut akeraaneq nalinginnaassaaq

2 TIMOTHEUSI 3:4

• Aliikkutassiat Guutiminngarnit soqutigineqarnerussapput

2 TIMOTHEUSI 3:5

• Kristumioqassaaq ilumoortuusaartunik

MATTHÆUSI 24:5, 11; MARKUSI 13:6

• Pruffiitioqqusersut amerlassapput

MATTHÆUSI 24:9; LUKASI 21:12

• Kristumiut ilumoortut malersorneqassapput

MATTHÆUSI 24:39

• Inuit Biibilimi mianersoqqussutinik sumiginnaassapput

[Qupp. 8-mi assiliartaq]

Silarsuarmi tamarmi Jehovap Nalunaajaasuisa Guutip naalagaaffia inunnut allanut oqaluussissutigaat