Nalerisimaarneq anguneqarsinnaava?

“Nalerisimaarnerup angut piitsoq pisuunngortittarpaa; nalerisimaannginnerup angut pisooq piitsunngortittarpaa.” — Benjamin Franklin.

USSAMMUT tamatumunnga naapertuuttumik inuppassuit ilikkarsimavaat nalerisimaarneq pisiarineqarsinnaanngitsoq. Taamaattumik tupinnanngilaq silarsuarmi pigisaqarnerunissamik, angusaqarnerunissamik imaluunniit allat inooriaasiattut inooriaaseqarnissamik kissaateqartitsiniaasumi nalerisimaalernissaq ajornarpasimmat! Ataani allassimasut arlaannit sunnerneqarsimavit?

• Aalajangersimasumik pisinikkut aatsaat nalerisimaarnerup anguneqarsinnaaneranik oqariartuutilinnik ussassaaruterpassuaqarpoq.

• Suliffimmi atuarfimmiluunniit angusaqarluarusuttoqartarnera pissutigalugu allat sapinngisaat tunngavigalugit illit imminut nalilerusuttarnerit.

• Inuit illit taakku pillugit iliuuserisannik pingaartitsinnginnerat.

• Ikinngutivit illit piginngisannik pigisaqarnerat.

• Inuunermi apeqqutinut pingaarutilinnut akissutissaqartitsinnginnerit.

Taamaattunik unamminiagassaqartillugu nalerisimaalertoqarsinnaava? Apustili Paulusi allappoq ‘misilittagaqareersimalluni’ taamaattoq nalerisimaarluni. Pissaqarluartarsimavoq pissakittarsimallunilu. Ikinngutiminit nuannarineqarpoq, allanilli mitaatigineqarpoq. Allapporli qanorluunniit atugaqaraluaruni ‘ilikkarsimallugu pigisami naammaginissaat’. — Filippimiut 4:11, 12.

Nalerisimaartutut misiginermik anguniagaqarsimanngitsut nalerisimaarneq naluaat, Paulusilli allanneratut tamanna ilikkarneqarsinnaavoq. Siunnersuutit tallimat Guutip oqaasianeersut, Biibilimeersut, nalerisimaalernissamut iluaqutigisinnaasavut maanna misissussavavut.