Nalerisimaarnissaq ilikkarpiuk?

1. Nalerisimaarneq qanoq paasisariaqarpa?

NALERISIMAARTUUIT? Inuk nalerisimaartoq Jehovap tunniussai naammagigamigit pilluarlunilu qamuuna eqqissisimavoq. Amigaateqaraluaruni kamannanilu naammagit­taalliunngilaq. Taamaattorli imminut naammagisimaarusaagin­narnavianngilaq. Assersuutigalugu kristumiu Jehovamut kiffartornermi iliuuseqar­nerujumalluni periarfis­sarsiortarpoq. (Rom 12:1; Tim 1. 3:1) Kissaatigisamisulli kiffartoriaaseqarsin­naanngikkuni suli nalerisimaarluni nuannaarlunilu kiffartor­tuassaaq.

2. Nalerisimaan­nginneq qanoq kinguneqarsinnaava?

² Nalerisimaan­nginneq kingunipiloqarsinnaavoq. Naammagin­ninngitsut pilerinartut pisariaqan­ngitsut piumallugit akunnerpassuit sulisarput. Ajoraluartumik kristumiut ilaat amerlan­ngitsut aningaasanik pilerigisamin­nilluunniit allanik tillissimapput. Immaqa eqqarsarsimapput: ‘Tassa pissara’, ‘utaqqikatas­simavunga’, imaluunniit ‘kingusin­nerusukkut utertik­kumaarpakka’. Kisianni tillinneq Jehovamut nikanarsaataavoq. (Uss 30:9) Allat ilagiinni akisussaaf­filerneqarsiman­nginnertik pakatsis­sutigigamikku Jehovamut kiffartorun­naarsimapput. (Gal 6:9) Jehovamut kiffartortoq qanoq taama aalajangersin­naagami? Nalerisimaarun­naarsimanera pissutaasinnaavoq.

3. Filippimiut 4:11, 12 qanoq qiimmaal­lannartumik ilinniarfigaagut?

³ Tamatta nalerisimaarnissaq ineriar­tortissin­naavarput. Apustili Paulusi allappoq ‘qanorluunniit atugaqaraluaraangami nalerisimaar­nissani ilikkarsimallugu’. (Filippimiut 4:11, 12 atuakkit). Parnaarus­saaqqatilluni taama allappoq. Taamaattorli suli nuannaarpoq. “Inuit ikittuinnaat ilisimasaat” – tassa nalerisimaarnissaq – ilikkarsimavaa. Paulusip misigisaanit erserpoq qanorluunniit atugaqaraluarluta nalerisimaarsin­naasugut. Imaanngilarli imaalial­laannaq nalerisimaariaan­naasugut. Ilikkar­tariaqarparpummi. Qanoq ililluta? Pissuserineqartussat nalerisimaarnissap ineriar­tortinnissaanut iluaqutigisin­naasagut sammeriartigit.

QUJAMASUTTUUNEQ INERIAR­TORTIGUK

4. Qujamasunneq nalerisimaarnerup ineriar­tortinnissaanut qanoq iluaqutigaarput? (Tessaluunikamiunut 1. 5:18)

⁴ Inuk qujamasuttuusoq nalerisimaarpoq. (Tessaluunikamiunut 1. 5:18 atuaruk). Assersuutigalugu inuunermi pisariaqartut tunngaviusut naammagigutsigit pilerigisagut eqqarsaatigival­laarnavian­ngilagut. Aamma Jehovamut kiffartornermi maanna iliuuserisin­naasagut qujamasuutigigutsigit ilagiinni akisussaaf­feqarnerulernissaq pingaar­tippallaarnagu sapinngisamik iliornissarput pingaar­tinnerus­savarput. Paasinarluinnarpoq qinunikkut Jehovamut qujasar­nissamut Biibilimi kajumis­saarneqartugut. Qujamasut­tuugutta ‘Guutip eqqissinera inuit paasisin­naasaannit annerungaartoq’ misigisin­naassavarput. – Flp 4:6, 7.

5. Israalikkut qujamasun­nissamut sunik pissutis­saqaraluarpat? (Aamma asseq takuuk).

⁵ Israalikkut inoqajuitsumi misigisaat eqqarsaatigiuk. Egyptenimi nerisar­takkamissut nerisas­saqarusukkamik arlaleriarlutik Jehovamut naammagit­taalliorput. (Mos 4. 11:4-6) Ilumoorpoq inoqajuitsumi inuuneq imaannaan­ngitsoq. Nalerisimaar­nissamut suna iluaqutigisin­naavaat? Jehovap pillutik iliuuserisimasai eqqarsaatigisimassavaat. Egyptenimi inussiatut peqqarniitsumik pineqarmata Jehovap perluit qulit Egyptenimiunut nalliutitippai. Israalikkullu Jehovamit aniguisin­neqaramik “Egyptenimiut pinnersaatinik sølviusunik kuultiusunillu atisanillu piniarfigisimavaat”. (Mos 2. 12:35, 36) Aamma Immap Aappalaartup tungaanut Egyptenimiut sakkutuuinit malersor­neqarmata Jehovap tupinnar­tuliornikkut imaq avissaartippaa. Kiisalu inoqajuitsukkut ingerlaarmata Jehova ullut tamaasa mannamik inuussutigisin­naasaannik pilersitsisarpoq. Taavami sooq naammagit­taalliorpat? Pisariaqar­titaminnik nerisas­saqaraluarlutik Jehovap tunnius­simasaanut qujamasun­nginnamik nalerisimaan­ngillat.

6. Qujamasunnermik qanoq ineriar­tortitsisin­naavugut?

⁶ Qujamasunnermik qanoq ineriar­tortitsisin­naavugut? Siullertut, inuunermi nuannarisatit ullut tamaasa eqqarsaatigisakkit. Immaqa qujamasuutigisin­naasatit marluk pingasul­luunniit allattorsin­naavatit. (Upp 3:22, 23) Aappaattut, qujamasunnermik ersersitsisarit. Allat ilinnut iliuuserisaat pillugit qujaffigisakkit. Pingaarnertut Jehova qutsavigisaruk. (Tuss 75:1) Pingajuattut, qujamasuttut ilagisakkit. Ikinngutigummi qujasuitsuuppata ajortumik sunnertis­sinnaavugut. Qujamasut­tuuppatali isiginnit­taasiat ajunngitsoq qujamasun­neruler­nissatsinnut sunnerneqaatigisin­naavarput. (Mos 5. 1:26-28; Tim 2. 3:1, 2, 5) Qujanissamut periarfis­sarsior­tarutta nalerisimaar­nerulissaagut.

7. Acip qujamasunnini qanoq ineriar­tortippaa, qanorlu kinguneqarpa?

⁷ Aci Indonesiami najugalik qanoq nalaataqartoq eqqarsaatigiuk. Ima oqarpoq: “COVID-19-ip atuunnerani atukkakka uppeqatinnut naleqqiut­talerpakka. Kingunerisaanik nikalloriar­torpunga.” (Gal 6:4) Suna allannguinis­saminut iluaqutigaa? Ima oqarpoq: “Ullut tamaasa Jehovap uannut tunniuttagai eqqarsaatigilerpakka. Aamma eqqarsaatigaakka Guutip peqatigiis­sortaanut ilaanerup pilluaq­qussutissartai. Taava qujamasunnera Jehovamut ersersippara, kingunerisaanillu nalerisimaar­nerulerpunga.” Illit nikallor­nartunik eqqarsartaruit qujamasun­nerulerumallutit immaqa Acitut iliorsin­naavutit!

MANIGUUTTUUGIT

8. Sooq Baruki nalerisimaarunnaarpa?

⁸ Pruffiitip Jeremiap allatsia, Baruki, nalerisimaarun­naarpoq. Imaannaan­ngitsumik suliassaqarpoq. Barukip Jeremia ikiorpaa Israalikkunnut qujasuitsunut pikkunartumik tusarlius­saqarmat. Barukilli suna Jehovap kissaatigigaa eqqarsaatiginagu nammineq kissaatigisani eqqarsaatigineruai. Jeremia aqqutigalugu Jehovap Baruki oqarfigaa: “Illit ujarpat angisooq. Taamaalioqinak!” (Jer 45:3-5) Allatut oqaatigalugu Jehovap oqarfigaa: “Inuunermi maanna atukkatit naammagis­savatit.” Barukip tamanna akueraa Jehovamullu ikinngutaajuarluni.

9. Kristumiup maniguulluni suna eqqarsaatigisariaqarpaa? (Korintimiunut 1. 4:6, 7) (Aamma assit takukkit).

⁹ Kristumiu eqqarsarsinnaavoq ilagiinni aalajangersimasumik immikkut pisinnaatitaaf­feqartariaqarluni. Piginnaasani, tamaviaarnini misilit­tagaqar­niniluunniit pissutigalugu taama eqqarsarsinnaavoq. Imaassin­naavorli akisussaaffik kissaatigisaa allamut tunniun­neqartoq. Kristumiup tamanna pakatsis­sutigiguniuk suna iluaqutigisinnaavaa? Paulusip Korintimiunut qanoq allannera eqqarsaatigeq­qissaarsinnaavaa. (Korintimiunut 1. 4:6, 7 atuakkit). Arlaalluunniit allanit pingaar­nerunngillat. Piginnaanigut kiffartor­nermilu akisussaaffigut tamarmik Jehovamit pipput. Jehovamit tunissutaapput ajunngisaangaarfigim­matigut. – Rom 12:3, 6; Ef 2:8, 9.

10. Maniguunnermik qanoq ineriar­tortitsisin­naavugut?

¹⁰ Jiisusip maligassiaa eqqarsaatigeq­qissaarutsigu maniguunnermik ineriar­tortitsisin­naavugut. Jiisusip apustilit isigaat asattorpai naak Guutip ernerigaluaraani oqartus­saassuseqangaaraluarlunilu. Apustili Johannesi ima allappoq: “Jiisusip Ataatami suut tamaasa assamminut tunniutereerai aamma Guutimeersuunini Guutimukar­tussaaninilu nalunnginnamiuk … ilinniartitami isigaat asattulerpai.” (Joh 13:3-5) Jiisusip immikkut inissisimanini pissutigalugu misigisin­naagaluarpoq isikkani apustilinit asattor­neqassasut. Misigin­ngisaan­narporli ilorrisimaar­narnerusumik inooriaaseqas­salluni. (Luk 9:58) Jiisusi maniguukkami nalerisimaarpoq. Pitsaanerpaamik maligas­sippaatigut. – Joh 13:15.

11. Dennisip maniguunneq nalerisimaar­nissamut qanoq iluaqutigaa?

¹¹ Jiisusip maniguunnermut maligassiaa Dennisip Hollandimi najugallip maleruar­niarsimavaa, tamannali ajornakusoor­tissimavaa. Ima oqarpoq: “Ilaannikkut alla kissaatigisannik akisussaaf­feqaleraangat qamuuna aalater­neqartarpunga eqqarsartarama uanga tamanna akisussaaf­figisus­saagaluarlugu. Taamaaleraangama maniguunnermut tunngasut misissor­tarpakka. JW Library^® app-imi allassimaffiit maniguunnermut tunngasut nassaareriaan­nanngorsimavakka atuaqqin­niassagakkit. Aamma mobilinni maniguunneq pillugu oqalugiaatit aasimavakka, taakkulu tusarnaakulasarpakka.a Paasivara imminut nersornanga Jehovali ataqqinaatis­sinniarlugu iliuuseqar­tuassallunga. Jehovap asannilluni tamatta inuttut ataasiakkaatut suliassit­tarpaatigut, taannali iluatsin­nissaanut isumagin­nittuuvoq.” Atukkatit naammagiun­naarukkit maniguunnermik ineriar­tortitsinissamut iliuuseqarit. Tamanna Jehovamut qanimut ikinnguteqaler­nissannut nalerisimaar­neruler­nissannullu iluaqutigissavat. – Jaak 4:6, 8.

JEHOVAP SIUNISSAMUT NERIORSUUTAI EQQARSAATIGIKKIT

12. Nalerisimaar­nissamut iluaqutigisin­naasatsinnik sunik neriuuteqarpugut? (Esaja 65:21-25)

¹² Jehovap siunissamut neriorsuutai nuannersut eqqarsaatigisarutsigit nalerisimaar­nerulissaagut. Esajap allagaani Jehovap oqarfigaatigut ajornar­torsiutigut paasisin­naallugit, neriorsorpaatigullu taakku aaqqikkumaarlugit. (Esaja 65:21-25 atuakkit). Kusanartumik angerlasimaf­feqarumaarpugut. Nalerisimaar­nartumik sulisas­saqarumaarpugut. Peqqinnartunik mamartunillu nerisas­sarpassuaqarumaarpoq. Uagutsinnut meeqqatsinnullu ajoqusiisin­naasumik pisoqan­ngisaan­nassaaq. (Es 32:17, 18; Ez 34:25) Siunissap toqqissisimanartup tamatuma piviusun­ngornissaa upperil­luinnarsin­naavarput.

13. Neriuutip eqqarsaatiginissaa qaqugukkut pingaaruteqarpa?

¹³ Neriuutip eqqarsaatiginissaa aatsaat taama pingaaruteqartigaaq. Sooq? “Ulluni kingullerni” inuugatta pissutsillu ‘anigoruminaal­lutillu erloqinarmata’. (Tim 2. 3:1) Jehovap siulersuinermigut, nakussatsitsinermigut tapersersuinermigullu pinertusaar­nissatsinnut ullut tamaasa ikiortarpaatigut. (Tuss 145:14) Erloqinar­torsioruttalu pingaartumik siunissamut neriuuterput iluaqutigisin­naavarput. Immaqa ilaquttavit pilersor­nissaat ilungersuutigisarpat. Isumaqarpa taamaat­tuaannassasoq? Naamerluinnaq! Jehovap neriorsorsimavaatit paratiisissami ilaqutariittut timikkut pisariaqartitasi akimungaarlugit tunniuk­kumaarlugit. (Tuss 9:19; 72:12-14) Imaassinnaavoq anniaateqar­tuaannartutit imaluunniit isumakkut timikkul­luunniit perulun­nartumik nappaateqartutit. Imaappali aaqqinnavian­ngitsutit? Naamik. Paratiisissami nappaatit tamarmik toqulu atuukkun­naassapput. (Saqq 21:3, 4) Neriuuterput kamanngin­nissamut, qamuuna eqqissisimanissamut nalerisimaar­nissamullu iluaqutigaarput. Eqqunngitsuliorfigineqaraluarutta, asasatsinnik annaasaqaraluarutta, napparsimagaluarutta allatigul­luunniit misilin­neqaraluarutta nalerisimaarsin­naavugut. Sooq? Nalunngin­natsigu misilin­neqarnerit taakku ‘sivikil­lutillu annikitsut’ paratiisissamilu annikil­lioqqin­ngisaan­nassalluta. – Kor 2. 4:17, 18.

14. Qanoq neriuummut uppernerput nakussatsis­sinnaavarput?

¹⁴ Neriuuterput nalerisimaar­nissamut pingaaruteqarmat qanoq neriuummut uppernerput nakussatsis­sinnaavarput? Soorlu inuk isarualik ungasissumut takusaqarsin­naaniassagami isarusser­tariaqartartoq, taamatuttaaq uagut neriuummut uppernitta nakussatsin­nissaanut iliuuseqar­tariaqarpugut siunissami paratiisis­samiinnissarput takusin­naanias­sagatsigu. Inuuniutissanut pissaaleqilluta ernumas­suteqarutta takorloorsin­naavarput inuuneq qanoq ikkumaartoq aningaasat pisariaqar­tikkunnaarutsigit kinaluunniillu pissaaleqisarun­naarumaartoq. Kiffartoriaaseq aalajangersimasoq suli pisimanagu isumatsaq­qagutta eqqarsaatigisin­naavarput naammal­luinnar­tunngorutta Jehovalu ukiut tuusintillit sinnerlugit kiffartorfigereerlugu anguniagarisimasatta qanoq suunngitsiginera. (Tim 1. 6:19) Maannakkut isumakuluuteqarpal­laarsin­naavugut siunissami pisussat eqqarsaatiginissaanut ajornakusoor­titsilluta. Jehovalli neriorsuutai nuanningaartut eqqarsaatiginerujar­tortillugit ajornan­nginnerulissaaq tamanna ajornar­torsiutitsin­ninngarniit eqqarsaatiginerugutsigu.

15. Christap oqaasii qanoq ilinniarfigaagit?

¹⁵ Christap, Dennisip nulia, neriunnini qanoq annertoq­qutigisimagaa eqqarsaatigiuk. Ima oqarpoq: “Nukinnut sanngiil­lisitsisumik nappaateqarama issiavimmi kaassuar­takkamiit­tariaqar­tarpunga ullullu ilaa sivisuumik innangaan­nartariaqar­tarlunga. Ullut tamaasa anniartarpunga. Nakorsap oqarfigaanga siunissami pitsanngor­navianngitsunga. Eqqarsarpungali siunissaq allaanerusutut isigigaa. Neriuutiga uanga eqqarsaatigineruara, tamannalu qamuuna toqqissial­laatigaara. Maanna anniaateqaraluarlunga pinertusaarpunga, paratiisissamili inuunissara nuannaarutigingaar­tussaavara!”

JEHOVAMIK “MIANERINNITTUT AMIGAATEQAS­SANNGILLAT”

16. Sooq kunngi Daavi allassinnaava Jehovamik mianerinnittut amigaateqas­sanngitsut?

¹⁶ Jehovamut kiffartortoq nalerisimaartoq suli ajornar­torsiuteqartarpoq. Kunngip Daavip nalaatai eqqarsaatigikkit. Biibili naapertorlugu meeqqami ilaat pingasut toqukkut annaavai. Eqqunngitsumik unnerluutigineqarpoq, ikinngutiminit ilumuun­ngitsuliorfigineqarpoq ukiorpaalunnilu qimaasutut inuusariaqarluni. Taamaattorli suli nalerisimaarpoq. Allappoq Jehovamik ‘mianerinnittut amigaateqas­sanngitsut’. (Tuss 34:10, 11) Sooq taamatut allassinnaava? Nalunnginnamiuk Jehovap innuttani ajornar­torsiutinit illersun­ngikkaluarlugit pisariaqar­titaannik tunisarai. (Tuss 145:16) Uaguttaaq tatigisin­naavarput Jehovap misilin­neqarnitsinni ikiortuas­sagaatigut. Qanorluunniit atugaqaraluarutta qamuuna eqqissisimallutalu nalerisimaarsin­naavugut.

17. Sooq nalerisimaarnissaq ilikkarusuppiuk?

¹⁷ Jehovap kissaatigaa nalerisimaas­sasutit. (Tuss 131:1, 2) Taamaattumik nalerisimaarnissaq ilikkarumallugu sapinngisannik iliorit. Qujamasunneq maniguunnerlu ineriar­tortikkukkit neriuullu eqqarsaatigiuarukku nalerisimaar­nerulissaatit. – Flp 4:11.