Ajornartorsiutit nalinginnaanerpaat aaqqiissutissaat

BIIBILIMI allassimanngilaq aappariittut inuuneq oqitsuinnaasoq. Apustili Paulusi Guutimit isumassarsisitaalluni allappoq aappariit ‘ulluinnarni inuunerminni ajornartorsiorumaartut’. (1 Korinthimiut 7:28) Aappariilli imminnut nuannaarutaanerujumallutik ajornartorsiutigilikkaminnillu aaqqiiniarlutik iliuuseqangaarsinnaapput. Aappariit naammagittaalliuutigisartagaat nalinginnaasut arfinillit najoqqutassiallu Biibilimeersut qanoq iluaqutaasinnaanerat misissoriartigik.

1

AJORNARTORSIUT:

“Aapparalu avissaariartulersimavugut.”

NAJOQQUTASSIAQ BIIBILIMEERSOQ:

‘Suna pingaartittariaqartoq paasisiuk.’ — FILIPPIMIUT 1:10.

Illit inuuninni pingaarnerpaanut ilaavoq aappariinnersi. Salliutinneqartariaqarpoq. Taamaattumik ajornartorsiut tamanna ulluinnarni sammisartakkannit pissuteqarnersoq misissoruk. Ullormut sammisartakkatit pissutigalugit aappallu immikkut inooqinasi. Soorunami suliffiit pisussaaffitillu pisariaqartut allat pissutigalugit ilaannikkut takorpiartannginnissinnut pissutaasinnaapput. Sammisartakkalli nammineq aalajangersinnaasatit killilersinnaavatit killilertariaqarlugillu — soorlu piffissaq aliikkutanut ikinngutinulluunniit atugaq.

Aappaasulli ilaat immaqa sulinerusarput aliikkutassarsiorlutilluunniit aappartik najorusunngiinnarlugu. Imaanngilaq aapparminnit ‘avissaariartulersimasut’. Ajornartorsiutit qimarratigaat. Illit taamaakkuit aappalluunniit taamaappat suna ajornartorsiutiviunersoq paasiniartariaqarpat, iliuuseqarfigalugulu. Aatsaat inuunerit aappannut avitseqatigigukku qanitariilersinnaavusi tamakkiisumillu ‘uiniulissallusi ataaseq’. — 1 Mosesi 2:24.

Siunnersuummik tamatuminnga qanoq malinnittoqartoq: Andrewa Tanjilu Australiamiut ukiuni qulini aappareereerput. Andrew ima oqarpoq: “Paasisimavara sulivallaarneq inunnullu allanut tunngasunik imminut akisussaaffilersorpallaarneq aappariinnermut ajoqutaasinnaasoq. Taamaattumik nuliaralu oqaloqatigiinnissamut misigissutsitsinnillu oqaluttuuteqatigiinnissatsinnut piffissamik immikkoortitsisarpugut.”

Dave Janelu USA-mi najugallit ukiuni 22-ni aappareereersimasut unnuit tamaasa nalunaaquttap-akunnerata affaa atortarpaat ullup qanoq ingerlasimanera pillugu eqqarsaatiminnik annissuiffigeqatigiinnermut. Jane ima oqarpoq: “Piffissaq tamanna pingaaruteqangaarmat sumilluunniit akornusersortinnaveersaartarpugut.”

2

AJORNARTORSIUT:

“Aappariinnerput pissarsiffigisarunnaarpara.”

NAJOQQUTASSIAQ BIIBILIMEERSOQ:

“Tamassi immikkut ilissinnut pitsaanerpaaq pinnagu allanut pitsaanerpaaq noqqaassutiginiarsiuk.” — 1 KORINTHIMIUT 10:24.

Aappaasoq aappariinnerminnik sumik pissarsiffigisaqarsinnaanerminik pingaarnerutitsisoq pillualivinngisaannassaaq, arlaleriarluniluunniit allamik aappartaartaraluaruni. Aappariit ingerlalluassagunik tamarmik immikkut tunisineq tigusinermit pingaarnerutittariaqarpaat. Sooq taamaannersoq Jiisusip ima oqaatigaa: “Tunisineq pilluarnarneruvoq tigusinermit.” — Apustilit Suliaat 20:35.

Siunnersuummik tamatuminnga qanoq malinnittoqartoq: Maria Martinilu Mexicomi najugallit ukiuni 39-ni aappareereerput. Inooqatigiinneralli nuannersuujuaannarsimanngilaq. Avaanngunartumik eqqaamasaqarput. Maria ima oqaluttuarpoq: “Oqqaterujussuartilluta Martin ataqqinninngingaartumik oqarfigaara. Kamarujussualerpoq. Nassuiarniarsarigaluarpara, narrujuummisimanermik, taama isumaqarnanga taama oqartoorlunga. Tusaajumanngilarli.” Martin ima oqarpoq: “Oqqatsilluta eqqarsarpunga immaqa inooqatigiikkunnaartariaqartugut, aappariinnerput ingerlalluartinniarsariunnaaginnassagiga.”

Martinip ataqqineqarnissani pisariaqartippaa. Mariap paasineqarnissani pisariaqartippaa. Arlaannaataluunniit kissaatigisani pinngilaa.

Ajornartorsiut qanoq aaqqippaat? “Kamakkunnaamisseeqqaarpunga,” Martin oqarpoq, “isumaqatigiippugullu ataqqeqatigiinnissaq inussiarnisaarfigeqatigiinnissarlu pillugit siunnersuutit pitsaasut Biibilimeersut maleruarniarlugit. Ukiut ingerlaneranni ilikkarparput qanorluunniit ajornartorsiuleraluarutta Guutimut ikioqqulluta qinugutta siunnersuutillu Biibilimeersut maleruarutsigik ajornartorsiutit aaqqissinnaallugit.” — Esaja 48:17, 18; Efesosimiut 4:31, 32.

3

AJORNARTORSIUT:

“Aapparma akisussaaffini eqqortinngilaa.”

NAJOQQUTASSIAQ BIIBILIMEERSOQ:

“Tamatta immikkut Guutimut nassuertussaavugut.”— ROMAMIUT 14:12.

Qularutissaanngilaq aappariit ingerlalluarsinnaannginnerat aappaasup aappaannaa iliuuseqarpat. Pissutsilli suli ajornerussapput marluullutik sumiginnaappata pisuutitseqatigiippatalu.

Aapparpit qanoq iliortariaqarnera eqqarsaatigiuaannarukku pillualersinnaanngilatit. Ingammik nammineq akisussaaffinnik eqqortitsinnginnissamut aapparpit kukkussutai utoqqatsissutigisarukkit pillualernavianngilatit. Illilli uiulluarniarsariguit imaluunniit nuliaalluarniarsariguit ilimanarluinnarpoq aappariilluarnerulissasusi. (1 Petrusi 3:1-3) Pingaarneruvorlu, Guutimut ersersissavat aappariinnermik aaqqissuussineq pilersitaa ataqqillugu, iliuutsitsillu taassumunnga nuannaarutaassapput. — 1 Petrusi 2:19.

Siunnersuummik tamatuminnga qanoq malinnittoqartoq: Kim uinilu Koreami najugallit ukiuni 38-ni aappareereerput. Kim ima oqarpoq: “Ilaannikkut uima uumitsaattarpaanga oqaloqatigisarunnaartarlungalu, naluaralu sooq taamaattarnersoq. Isumaqalertarpunga asajunnaariartuleraanga. Ilaannikkut ima eqqarsartarpunga: ‘Sooq paasissaginni piumaffigisarpaanga uanga qanoq misiginersunga paasiniarnaguluunniit?’”

Kimip naapertuilluanngitsuliorfigineqarnini uimilu iliuuserinngisai isiginiarnerusinnaagaluarpai. Allatulli iliorniarluni aalajangerpoq. “Narrujuummisimaaginnarnanga,” Kim oqarpoq, “siulliullunga eqqisseqatigiissitsiniarpunga. Eqqissisimanerunissaq eqqissisimasumillu oqaloqatigiinnissaq ilikkarparput.” — Jaaku 3:18.

4

AJORNARTORSIUT:

“Nuliama naalanneq ajorpaanga.”

NAJOQQUTASSIAQ BIIBILIMEERSOQ:

‘Angutip kialuunniit Kristusi niaqoraa.’ — 1 KORINTHIMIUT 11:3.

Uiusup misigiguni nuliani naalatsigitinngitsoq eqqarsaatigeqqaartariaqarpaa nammineq niaquminut, Jiisusimut Kristusimut, naalatsigitikkusunnerluni. Uiusup naalatsigitinnini ersersissinnaavaa Jiisusip maligassiaanik malinninnikkut.

“Angutit,” apustili Paulusi allappoq, “nuliasi asassavasi soorlu Kristusip ilagiit asagai imminullu tunniulluni taakku pillugit.” (Efesosimiut 5:25) Jiisusi ajoqersukkaminik ‘naqisimanninneq’ ajorpoq. (Markusi 10:42-44) Erseqqissumik siunnersortarpai pisariaqaraangallu naqqittarlugit. Peqqarniinngisaannarpoq. Inussiarnerfigisarpai pisinnaasaallu killeqartut nalunngilaa. (Matthæusi 11:29, 30; Markusi 6:30, 31; 14:37, 38) Soqutigisaat nammineq soqutigisaminit tamatigut pingaarnerutittarpai. — Matthæusi 20:25-28.

Uiusoq imminut ima aperisariaqarpoq: ‘Ilaqutariinni ittuunermut arnanullu isiginnittaasera najukkanni ileqqunit sunnerneqarsimanerua Biibilimi siunnersuutininngarnit maligassiuilluartuninngarnillu?’ Assersuutigalugu arnaq uiminik isumaqatiginninngitsoq isummaminillu aalajangersimarpaluttumik ataqqinnittumilli ersersitsisoq qanoq isumaqarfigissaviuk? Biibilimi Aaperaap nulia, Sara, uiminut naalatsigitittutut maligassaalluartutut eqqaaneqarpoq. (1 Petrusi 3:1, 6) Taamaattoq pisariaqaraangat isummani annittarpaa, soorlu ilaqutariit navianartorsiortinneqartut Aaperaap maluginngimmagu. — 1 Mosesi 16:5; 21:9-12.

Erseqqippoq Aaperaat qunutitsisuunngitsoq, Sarammi isummaminik annissinissani qunuginngilaa. Taamatulli uiusoq siunnersuutinik Biibilimeersunik maleruaasoq nuliaminik naalagarsiortitsissanngilaq, periarnimininnguaminik tamanik naalagarsiussasoq piumaffigalugu. Ilaquttani asannittumik siulersorunigit nuliaminik ataqqineqalissaaq.

Siunnersuummik tamatuminnga qanoq malinnittoqartoq: James, Tuluit Nunaanni najugalik ukiuni arfineq-pingasuni aappaqareersimasoq ima oqarpoq: “Ilikkalerpara pingaarutilimmik aalajangigassaqartillunga nuliara isumasioqqaarlugu aalajangiinissaq. Imminuinnaq eqqarsaatiginaveersaarpunga. Taassumali pisariaqartitai uanga pisariaqartitannit eqqumaffiginiarneruakka.”

George USA-mi najugalik ukiuni 59-ini aappaqareerpoq. Ima oqarpoq: “Nuliara silassorissutut suleqatitullu pikkorissutut piniartuaannarpara, nikanarnerusutut pinnagu.” — Ussatit 31:10.

5

AJORNARTORSIUT:

“Uiga siulliulluni iliuuseqarneq ajorpoq.”

NAJOQQUTASSIAQ BIIBILIMEERSOQ:

“Ilisimassutsip angerlarsimaffik sanasarpaa, sianiissutsip assamminik aserortertarpaa.”— USSATIT 14:1.

Uippit aalajangiinissani inoqutigiinnilluunniit siulersuinissani tunuarsimaarfigisarpagu, iliuuserisinnaasatit minnerpaamik pingasuupput. (1) Kukkussutaanik uparuaajuarsinnaavutit imaluunniit (2) ilaqutariinni qullersaaneranit arsaarsinnaavat imaluunniit (3) iliuuserisai tamaasa pillugit ilumoorlutit nersualaarsinnaavat. Iliuuserisinnaasat siulliit marluk arlaat iliuuserigukku ‘angerlarsimaffik assannik aserortissavat’. Pingajuat iliuuserigukku aappariinnersi ‘sanassavat’, imaluunniit nakussatsissavat.

Anguterpassuit ataqqineqarnissaq asaneqarnissaminngarnit pingaartinneruaat. Taamaattumik uiit ataqqineqartutut misigitissinnaagukku, ilaqutariinnik siulersuiniarnera iluatsittutut pingaartinneqartutullu misigitissinnaagukku, ilimanarluinnarpoq siulliulluni iliuuseqarnerusalissasoq. Soorunami ilaannikkut uiillu isumaqatigiinngittassaasi. Isumaqatigiinngissutigisarsi marluullusi oqaloqatigiissutigisariaqarparsi. (Ussatit 18:13) Oqaatsilli atukkatit qanorlu oqaatiginerat aappariinnissinnik ‘aserorterissapput’ imaluunniit ‘sanassapput’. (Ussatit 21:9; 27:15) Ataqqinnittumik oqaluttaruit kissaatigisattut kinguneqarnissaa ilimanarnerussaaq — uippit siulersuinissaminik tunuarsimaannginnissaa.

Siunnersuummik tamatuminnga qanoq malinnittoqartoq: Michele USA-mi najugalik ukiuni 30-ni aappaqareersimasoq ima oqarpoq: “Anaanama nukakkalu kisimiilluni perorsaramisigut arnaavoq assut nukittooq nammineersinnaassuseqartorlu. Tamatumuuna arnisariasaartarpunga. Taamaattumik naalatsigitinnissara sulissutigiuartariaqarpara. Assersuutigalugu nammineq aalajangiiginnarnanga uima isumasiornissaa ilikkarpara.”

Rachel Australiamiu ukiuni 21-ni Markimik aappaqareersimasoq aamma peroriartornerminit sunnertissimavoq. Ima oqaluttuarpoq: “Anaanaga ataatannut naalanngisaannarpoq. Oqqannerit ataqqinninngitsuliornerillu nalinginnaapput. Aappariinnitsinni ukiuni siullerni anaanaga ilaartarpara. Ukiulli ingerlaneranni ataqqinninnermik ersersitsinissaq pillugu Biibilimi siunnersuutip maleruarnissaata qanoq iluaqutaatiginera ilikkarpara. Maanna Markilu aappariilluarneroqaagut.”

6

AJORNARTORSIUT:

“Aapparma ileqqui paaminnartut isigisinnaajunnaavippakka.”

NAJOQQUTASSIAQ BIIBILIMEERSOQ:

“Kamageqatigiigitsi isumakkeerfigeqatigiittarlusilu arlassinnut assuarliutissaqaraangassi.”— KOLOSSEMIUT 3:13.

Aappassiariilerassi qularnanngitsumik aappassiartaaviit pissusii ajunngitsut maluginiarnermik pissusii ajortut malugerpianngilatit. Maannakkut aamma taamaaliorsinnaavit? Imaassinnaavoq aappat ‘assuarliutissaqarfigigit’. Imminulli ima aperigit: ‘Aappanni suna isiginiarnerorusuppara — pissuserinnera pissusilunneraluunniit?’

Jiisusi allat kukkussutaannik isiginngitsuusaarisariaqarnitta qanoq pingaaruteqarneranik ersersitsisumik kimittuumik assersuusiorpoq. Ima aperivoq: “Sooq qatanngutivit issiutaa makiarninnguaq isiginiarpiuk, paakkarut illit isinniittoq maluginagu?” (Matthæusi 7:3) Makiarninnguaq tassaagiinnarpoq qisumineerannguaq. Paakkarulli quassuttuujuvoq illuliornermi atorneqarsinnaasoq, soorlu qaliap quassuttuuatut. Sunaana oqaatiginiaraa? “Paakkarut illit isinniittoq peeqqaarallaak, taava isigilluarsinnaassaatit qatanngutivit issiutaata peernissaanut.” — Matthæusi 7:5.

Jiisusi taamatut assersuusiortinnani eqqarsarnartumik ima mianersoqqusivoq: “Eqqartuusseqinasi eqqartuunneqaqqunasi. Eqqartuussissutigisassinnimmi eqqartuunneqarumaarpusi.” (Matthæusi 7:1, 2) Kissaatigigukku illit kukkussutit — paakkarut isinniittoq — Guutip isiginngitsuusaassagaa taava ilinnut pitsaanerpaassaaq aapparpit kukkussutaa isiginngitsuusaarukku. — Matthæusi 6:14, 15.

Siunnersuummik tamatuminnga qanoq malinnittoqartoq: Jenny Tuluit Nunaanni najugalik ukiuni qulingiluani Simonimik aappaqareersimasoq ima oqarpoq: “Uinni paaminnarnerpaajutitara tassaavoq pilersaarusiorsinnaannginnera piffissarlu kingullerpaaq atorlugu iliuuseqartarnera. Quianaannarpoq, aappassiartaariillutami eqqarsaqqaarani periataartarnera nuannaraara. Maannali aamma nammineq kukkussuteqartarlunga eqqumaffiginerusalerpara. Assersuutigalugu naalagaaniarpallaartarpunga. Simonilu marluulluta aappatta naammalluinnanngissutimininnguisa isiginngitsuusaarnissaat sulissutigaarput.”

Curt, Michelep siusinnerusukkut eqqaaneqartup uia, ima oqarpoq: “Aappap pissusii paaminnartut kisiisa isiginiaraanni erseqqarinnerujartortutut ittarput. Taamani Michelemut asannilersoorama pissusii asannilersoorninnut pissutaasut isiginiarnerorusuppakka.”

Qanoq iluatsittoqarsinnaasoq

Assersuutit ikittunnguit taakku ersersippaat aappariinnermi ajornartorsiutit pinngitsoorneqarsinnaanngikkaluartut imaattariaqanngitsoq aaqqinneqarsinnaanngitsut. Qanoq iluatsittoqarsinnaava? Guutimik asanninneq ineriartortinneqartariaqarpoq oqaasianilu, Biibilimi, siunnersuutinik maleruaajumassuseqartariaqarluni.

Alexip Itohanillu Nigeriami najugallit ukiut 20-t sinnerlugit aappareereersimasut tamanna paasisimavaat. Alex ima oqarpoq: “Malugisimavara aappariinnermi ajornartorsiutit tamangajammik aaqqinneqarsinnaasut aappariit najoqqutassianik Biibilimeersunik maleruaappata.” Nulia ima oqarpoq: “Paasisimavarput qinoqatigiittarnerup aamma asaqatigiinneq naammagittarfigeqatigiinnerlu pillugit siunnersuutit Biibilimeersut maleruarnissaasa pingaaruteqassusiat. Maanna katerlaajunitsinniit ajornartorsiutikinneruvugut.”

Siunnersuutit atoriaannaasut Guutip oqaasianeersut ilaquttavit qanoq iluaqutigisinnaaneraat pillugu paasisaqarnerorusuppit? Taamaappat atuakkami Biibilimi sorpiaat ajoqersuutigineqarpat?-mib kapitali 14 oqaloqatigiissutigerusullugu Jehovap Nalunaajaasui oqarfigikkit.

[Quppernerup ataani ilanngussat]

[Qupp. 4-mi assiliartaq]

Immitsinnut piffissaqarfigisarpugut?

[Qupp. 5-mi assiliartaq]

Tigusinermit tunisineruniartarpunga?

[Qupp. 6-mi assiliartaq]

Isumaqatigiinngissutit aaqqinniarlugit siulliullunga iliuuseqartarpunga?

[Qupp. 7-mi assiliartaq]

Aalajangigaqartinnanga nuliama isumaa eqqarsaatigisarpara?

[Qupp. 9-mi assiliartaq]

Aapparma pissusii ajunngitsut isiginiarneruakka?