Aappavit toqunera qanoq naammagalugu atorsinnaagit

BIIBILIMI ersarissumik allassimavoq uiusup ‘nuliani immisut asassagaa’. Nuliaasup aamma “uini ataqqingaassavaa”. ‘Uinittut ataasiusinnaajumallutik’ marluullutik pisussaaffitik isumagisariaqarpaat. (Ef 5:33, NW; 1 Mos 2:23, 24) Aappariit piffissap ingerlanerani attaveqatigiilluarnerulertarlutillu asaqatigiinnerulertarput. Soorlu orpiit marluk imminnut qanittuararsuullutik naajartortut sorlaat ilagutilertartut taamatuttaaq uiusoq nuliaasorlu pilluarlutik aappariittut attaveqatigiilluarnerulertarput.

Taavami uiusoq nuliaasorluunniit toquppat? Inooqatigiinnerminni asaqatigiinnermikkut attaveqatigiilluarnerat kipineqarsinnaanngitsoq kipineqartarporlusooq. Amerlanertigut uiusoq nuliaasorluunniit toqukkut qimagaasoq aliasungaartutut, kiserliortutut immaqalu allaat kamattutut pisuusutulluunniit misigisarpoq. Daniellap ukiuni 58-ini katisimanermini aapparisaminnik toqukkut annaasaqartut arlallit ilisarisimavai.a Uimili toqoreernerata kingorna ima oqarpoq: “Siornatigut taamatut misigisaqarneq qanoq innersoq paasinikuunngisaannarpara. Nammineq misigisimanngikkaanni paasineqarsinnaanngilaq.”

ALIASUNNEQ NAAFFEQARPASINNGITSOQ

Ilisimatuut ilaat oqartarput aapparmik annaasaqarneq tamanit ilungersunarnerpaasoq. Aapparminnik annaasaqarsimasut amerlasuut tamatumunnga isumaqataapput. Milliep ukiorpassuit matuma siorna uillarninngortup inuunini ima nassuiarpaa: “Misigivunga iloqiaallunga.” Taassuma uini ukiuni 25-ni aapparisimasani toqukkut annaareerlugu misigissutsini nassuiarniarsarai.

Susan isumaqartarnikuuvoq uillarninngorsimasut ukiorpassuarni uiminnik upputiginnittarnerat ingasattajaarnerusoq. Ukiulli 38-t katisimareerlutik uia toquvoq. Maanna ukiut 20-t qaangiutereeraluartut suli ima oqartarpoq: “Ullut tamaasa eqqarsaatigisarpara.” Uigigaluani maqaasingaaramiuk qullilillattaasarpoq.

Biibilimi allassimavoq aapparmik toqukkut annaasaqarnermik aliasuutiginninneq annernangaarlunilu sivisoorujussuusartoq. Aaperaap nuliani Sara toqummat “upikkiartorpaa”. (1 Mos 23:1, 2) Aaperaat makititaanissamik upperinnikkaluarluni nuliaminik asasaminik toqukkut annaasaqarnerminik aliasuutiginningaarpoq. (Hebr 11:17-19) Jaakup nuliani asasani Rakeli toqummat eqqarsaatigiuarpaa. Nuliarigaluani ernerminut asannittumik oqaluuserigajuppaa. — 1 Mos 44:27; 48:7.

Oqaluttuat Biibilimeersut taakku qanoq ilinniarfigisinnaavavut? Aapparminnik toqukkut annaasaqarsimasut amerlanertigut ukiorpassuarni annaasaqarsimanerminnik aliasuutiginnittarput. Taakkua qullilisarnerat aliasuttarnerallu sanngiissutitut isigisassanngilarput. Annaasaqangaarsimanerminnulli qisuariarnerat nalinginnaavoq. Misiginneqatiginnittuunissarput tapersersuinissarpullu sivisuumik pisariaqartissinnaavaat.

ULLUNIK ATAASIAKKAARINEQ

Uillarninngortut nuleerninngortullu kisimiikkallarnermissut inooqqiliinnartussaanngillat. Uiusup nuliani, ukiorpassuarni katisimareerlugu, nikallungagaangat isumatsaqqagaangalluunniit qanoq tuppallersassanerlugu qiimmassassanerlugulu naluneq ajorpaa. Uillarninngortoq uigigaluaminit asaneqarsinnaajunnaarlunilu tuppallersarneqarsinnaajunnaartarpoq. Taamatuttaaq piffissap ingerlanerani nuliaasup uini toqqissisimatinnissaa nuannaartinnissaalu ilikkartarpaa. Nuliaasup asannittumik tungiuisarnera, tuppallersaasarnera uiusullu soqutigisaanik pisariaqartitaanillu soqutiginnittarnera nalissaqanngilaq. Nuliaasoq toquppat imaassinnaavoq uiusoq inuunermi siunertaaruttutut misigisoq. Tamanna pissutigalugu aapparminnik toqukkut annaasaqartut siunissaq ernummatigisinnaavaat allaallu annilaangagisinnaallugu. Taakku toqqissisimanissaminnut eqqissisimanissaminnullu najoqqutassiat Biibilimeersut suut iluaqutigisinnaavaat?

Qanittukkut maqaasingaakkatit najoqqilissavatit

“Aqagussaq isumakuluutigeqinasiuk; aqagussaq nammineq piminik isumakuluutissaqassaaq. Ullup suugaluartulluunniit erloqinartua ullormut naammattarpoq.” (Matt 6:34) Jiisusip oqaasii taakku timikkut pisariaqartitatsinnut tunnganerugaluartut aapparminnik toqukkut annaasaqarsimanerminnik aliasuutiginnittorpassuit pinertusaarnissaminnut iluaqutigisimavaat. Charles nuliami qaammatialuit toqoreernerata kingorna ima allappoq: “Monique suli maqaasingaartaraluarlugu ilaannikkut allaaneq ajorpoq maqaasinera artornarnerulersartoq. Taamaakkaluartorli paasinikuuara taama misiginera nalinginnaasoq piffissallu ingerlanerani aliasuppallaarunnaarumaarlunga.”

Charlesip ‘piffissap ingerlanera’ naammagalugu atortariaqarsimavaa. Qanoq taamaaliorpa? Ima oqarpoq: “Jehovap ikiuineratigut ullut ataasiakkaarpakka.” Charles aliasunnermit nikallortinneqanngilaq. Ingerlaannaq aliasukkunnaanngikkaluarluni aliasunnermit nukillaartinneqanngilaq. Aapparisat toqukkut annaasimagukku ullunik ataasiakkaarinikkut aliasuutiginninnerit naammagalugu atorniartaruk. Aqagukkut qiimmassarneqarnerit suna iluaqutigissanerlugu ilisimanngilat.

Toqu Jehovap aallaqqaammut siunertaanut ilaanngilaq. Akerlianilli toqu ‘Diaavulup suliaanut’ ilaavoq. (1 Joh 3:8; Rom 6:23) Saatanip toqu tamatuminngalu siooraginninneq inunnik aqutsinissaminut neriuutaarutitsilluinnarnissaminullu atortarpai. (Hebr 2:14, 15) Saatani nuannaartarpoq inuit ilaat pillualivinnissaminnik nalerisimaalivinnissaminnillu, allaat Guutip silarsuassaani nutaami, upperinnikkunnaaraangata. Adamip ajortuliornera Saatanillu pikitsitsinera pissutigalugit aappaasoq nuliaminik uiminilluunniit toqukkut annaasaqarnermik aliasuutiginningaartarpoq. (Rom 5:12) Jehova Saatanip ajoqusiineranik aaqqiilluinnassallunilu taassuma sakkuanik ajoqusiingaartartumik, toqumik, suujunnaarsitsissaaq. Aapparminnik, immaqa ilittulli, toqukkut annaasaqarsimasorpassuit siooranermit Saatanip atortagaanik aniguisussanut ilaassapput.

Silarsuassami nutaami makitinneqartussat inuunermi atugaasa ilaat allanngortinneqassapput. Inuit attaveqarnerat allanngussaaq. Assersuutigalugu angajoqqaat, aataajusut aamma aanaajusut siuaallu makitinneqartussat qitornatik ernuttatillu peqatigalugit naammalluinnartunngoriartuaassapput. Utoqqalinerup sunniutai atuukkunnaassapput. Kingulliarsuit siuaatik massakkumit allaanerulluinnartumik isiginnittaaseqarfigissagunarpaat. Allannguinerit taakku inuiannut iluaqutaassapput.

Imaassinnaavoq makititaasussat pillugit apeqqutissarpassuaqartugut. Assersuutigalugu aapparisanik marlunnik amerlanerusulluunniit toqukkut annaasaqarsimasut qanoq pissappat? Saddukiiarit arnaq uiminik siullermik, aappassaanik allanillu tallimanik toqusoortoq pillugu apeqquteqarput. (Luk 20:27-33) Makititaappata attaveqarnerat qanoq issava? Naluarput, aamma eqqoriaanissaq apeqqutinillu taakkuninnga ernummatiginninnissaq tunngavissaqanngilaq. Massakkut Guutimik tatiginniinnarsinnaavugut. Jehovap siunissami iliuusai suulluunniit ajunngitsuusussaanerat qularinngilluinnarsinnaavarput. Iliuuserisassai siooraginagit qilanaarisinnaavavut.

MAKITITSISOQARNISSAANIK NERIUUT TUPPALLERSAATIGAARPUT

Asasatta toqukkut annaasimasatta makitinneqarnissaat Guutip oqaasiani ilinniartitsissutigineqartut ersarinnerpaartaasa ilagaat. Biibilimi itsaq makititsisoqarneranik oqaluttuat ‘ilivermiittut tamarmik Jiisusip nipaanik tusarumaarnerannut ilivernillu aniumaarnerannut’ uppernarsaataapput. (Joh 5:28, 29) Taamanikkussamut inuit asasatik makitinneqarsimasut peqatigeqqilerunikkit qiimmattangaassapput. Aamma makititaasut qanoq tipaatsutsigissanerat takorlooruminaatsissinnaavarput.

Inuit milliardillit makitinneqarpata nunarsuarmi aatsaat taama nuannaarneqartigissaaq. (Mark 5:39-42; Saqq 20:13) Siunissami taamatut tupinnartuliortoqarnissaanik takorluuineq asasaminnik toqukkut annaasaqarsimasut tamarmik tuppallersaatigissavaat.

Makititsisoqarpat inuit aliasunnissamut pissutissaqassappat? Biibili naapertorlugu pissutissaqassanngillat. Esaja 25:8 naapertorlugu Jehovap ‘toqu nungutissavaa piujunnaarsivillugu’. Tassa toqu tamatumalu kingunerisartagai alianartut atuukkunnaarsinneqassapput. Esajami siulittuut ima nangippoq: Jehovap kisimi oqartussaasup “isit tamaasa qullingiarumaarpai.” Uivit nuliavilluunniit asasavit toqusimaneranik massakkut aliasuutiginninnerit makititsisoqareerpat allaat eqqaamasinnaassanngilat.

Inuit Guutip silarsuassami nutaami iliuuserisassai tamakkiisumik paasisinnaanngilaat. Jehova ima oqarpoq: ‘Soorlu qilak nunamit qutsissoq, taamattaaq aqqutikka qutsipput aqqutissinnit, eqqarsaatikkalu eqqarsaatissinnit.’ (Esaja 55:9, 1900) Jiisusip makititsisoqarnissaanik neriorsuineranik upperinnikkutta Aaperaatut Jehovamik tatiginninnerput ersersissavarput. Massakkorpiaq kristumiut tamarmik Guutip piumasaatut iliornissaat pingaaruteqarpoq. Taamaaliorutta silarsuassami nutaami makitinneqarsimasut peqatigalugit inuunissamut qinngaqqunnanngitsutut eqqartuunneqassaagut. — Luk 20:35.

NERIUNNISSAMUT PISSUTISSAQ

Neriuutit nuannersoq piviusutut isigigukku siunissaq siooragisariaqassanngilat. Inuit amerlanerit siunissaq neriulluarfigivallaanngilaat. Jehovali pissutsinik pitsaanerulersitsinissaminik neriorsuisimavoq. Qanoq taamaaliussanersoq ilisimaqqissaanngikkaluarlugu qularinngilluinnarsinnaavarput Jehovap pisariaqartitavut kissaativullu tamaasa isumagiumaarai. Apustili Paulusi ima allappoq: “Neriugisaq takusinnaasaq neriugisaanngilaq. Kiami takusinnaasani neriugisinnaavaa? Takusinnaanngisarpulli neriuutigigaangatsigu eqquunnissaa nikallujuilluta utaqqisarparput.” (Rom 8:24, 25) Guutip neriorsuutaanik upperinnilluinnarnerit aappavit toqukkut annaasimanera naammagalugu atornissaanut iluaqutigissavat. Pinertusaaruit siunissami “uummativit kissaatigisaanik” Jehovamit tunineqarnerit qiimmattaatigissavat. Jehovap ‘pinngortitat tamaasa kissaatigisaannik qaarsillartittarlugit’ nalerisimaartissavai. — Tuss 37:4; 145:16; Luk 21:19.

Jehovap siunissaq nuannaarfiungaartoq pillugu neriorsuutaa upperilluinnaruk

Jiisusip toqunissaa sioqqutitsiarlugu ajoqersugai aliasungaalerlutillu annilaangangaalerlutillu isumatsaqqangaalerput. Jiisusip ima oqarluni tuppallersarpai: “Uummatisi annilaanngikkilit. Guutimut upperitsi, uannullu upperitsi.” Imalu nangippoq: “Ataatassinnik iliarsorortillusi qimassanngilassi, ornikkumaarpassi.” (Joh 14:1-4, 18, 27) Jiisusip oqaasii ajoqersugaasa tanitat ukiut hundredelikkuutaat ingerlaneranni neriuuteqarnissamut pinertusaarnissamullu iluaqutigaat. Asasaminnik toqukkut annaasimasaminnik najueqqilernissaminnik kissaateqartut aamma neriuutaarunnissaminnut pissutissaqanngillat. Jehovap taassumalu ernerata imminiinngisaannassavaatsit. Toqusimasut makitinneqassapput. Qanittukkut maqaasingaakkatit najoqqilissavatit.

a Atit allanngortitaapput.

Toqukkut annaasaqarsimanerminnik aliasuutiginnittunik tuppallersaaneq

Qularnanngitsumik kristumiup katisimasup toqoreernerata kingorna amerlasuut aappaasoq qimagaasoq tuppallersarniarlugu arlaatigulluunniit ikiorniarlugu pulaallattaartassavaat. Assersuutigalugu ilimanarpoq uillarnerup ilaquttaminit ikinngutiminillu ikiorneqartarnini qujamasuutigissagaa. Aapparminilli toqukkut annaasaqarsimanerminik aliasuutiginninnerminik arriitsumik qaangiiartortup tuppallersarneqarnissani tapersersorneqarnissanilu sivisuumik pisariaqartissinnaavaa. Biibilimi ima allassimavoq: “Ikinngutaasup asannissutsi tamatigut takutittarpaa, qatanngutaasorlu erniusimavoq annikilliornermi ikiortissaalluni.” — Uss 17:17.

Aapparminik toqukkut annaasaqarsimasoq qanoq ilassisinnaavarput? Biibilimi ima siunnersorneqarpugut: “Tamassi isumaqatigiillusi inooqatigiigitsi misiginneqataasarlusi, qatanngutigiittut asaqatigiillusi [nallittuisarlusilu].” (1 Petr 3:8) Imaassinnaavoq uillarneq nuleernerluunniit toqukkut annaasaqarsimanerminik sivisuumik aliasuutiginnittoq. Taamaattumik ikiuerusukkaluarluta ima aperinerput pitsaavallaarnavianngilaq: “Qanoq ippit?” imaluunniit “ajunngilatit?” Aapparminik toqukkut annaasaqarsimasoq immaqa ima eqqarsassaaq: ‘Naluat qanoq misiginersunga’ imaluunniit ‘piffissami matumani qanoq ilillunga ajunngissinnaagama?’ Taamaattumik unneqqarissumik nuannersumillu oqaaseqalaarneq iluaqutaanerussaaq, soorlu imatut: “Takullutit nuanningaarami” imaluunniit “ataatsimeeqataasutit takullutit qiimmaallannaq”.

Aapparminik toqukkut annaasaqarsimasoq neriartoqqusinnaalluguluunniit pisuttuaqatigiumasinnaavat. Marcosip, nuleernerup, ikinngutiminit pulaarneqartarnini tuppallersaatigingaarpaa. Suut oqaluuserisarpaat? Ima oqarpoq: “Ajornartorsiutikka oqaluuserivallaarnagit qiimmaallannartut suugaluartulluunniit pillugit oqaloqatigiittarpugut.” Uillarneq Ninamik atilik ima oqarpoq: “Ikinngutigilluakkamma amerlanertigut oqaatsit eqqortut piffissami eqqortumi oqaatigisarpaat. Ilaannikkut oqaaseqanngikkaluarlutik najuinnartarpaannga.”

Uillarnerup nuleernerulluunniit toqukkut annaasaqarsimanini oqaluusererusuppagu tusarnaaqqissaarlutillu utaqqisinnaassuseqarit. Alapernaanniaannarlutit aperisassanngilatit. Eqqartuussisassanngilatit. Uillarnerup nuleernerulluunniit qanoq aamma qanoq sivisutigisumik aliasunnissaanik siunnersornissaanut pissutissaqanngilaq. Kisimiikkusunnera aliatsaatigissanngilat. Ulloq alla pulaaqqissinnaavat. Asanninnermik ersersitsiuarit. — Joh 13:34, 35.

Siunissaq pillugu apeqqutissaqarpit?

Jehovap neriorsuutiminik qanoq piviusunngortitsiumaarneranik eqqarsaatiginninneq nalinginnaavoq. Aaperaap Guutimit ernissaminik qanoq tunineqarumaarnini eqqarsaatigikulasarpaa. Aaperaat Jehovamit utaqqisinnaassuseqaqquneqarpoq, pakatsisinneqanngilarlu. — 1 Mos 15:2-5; Hebr 6:10-15.

Josefip toqusimaneranik Jaakup uppertinneqareerluni ernini maqaasingaalerpaa. Ukiorpassuit qaangiummata Jaakup ernini toqusimasorisani suli upputigaa. Jaakulli takorloorsinnaanngisaanik Jehovap pilluaqqusussaavaa. Kingusinnerusukkut Jaakup Josefi allaallu taassuma qitornai najulerpai. Ima oqarpoq: “Ilimagisimanngikkaluarpara kiinnat takoqqissallugu, sunaaffali qitornatit allaat Guutip uannut takutissagai.” — 1 Mos 37:33-35; 48:11.

Biibilimi oqaluttuat taakku qanoq ilinniarfigisinnaavavut? Siullertut, Guutip Ajugaqanngitsup piumasaminik eqqortitsinissaminut sumilluunniit akornuteqarsinnaannginnera qularinngilluinnarsinnaavarput. Aappaattut, qinusarutta Jehovallu piumasaatut iliortarutta taassuma massakkut isumagissallugillu siunissami pisariaqartitavut kissaativullu isumagilluinnassavai. Paulusi ima allappoq: “Taanna pissaanini uatsinni sunniisoq atorlugu qinnutigisavut paasisinnaasavullu akimungaarlugit iliorsinnaasoq, taanna naalannartitaali ilagiinni Kristusi-Jiisusimilu kinguaariissoqatigiinni tamani naassaanngilluinnartumik! Amen.” — Ef 3:20, 21.