EQQAAMIUMIK OQALOQATEQARNEQ
Guutip naalagaaffia qanga naalakkersuilerpa? — Immikkoortoq 2
Jehovap Nalunaajaasui eqqaamiuminnik oqaloqateqaraangamik ataani allassimasutut oqaloqatiginnikkajupput. Takorlooriartigu Nalunaajaasut ilaata Kristianimik atillip Jonamik atilik pulaaqqikkaa.
NEBUKADNESARIP SINNATTUA — UTEQQIILAARNEQ
Kristian: Aluu Jona. Takoqqinnissat qilanaaralugu. Biibilimik atuaqqissaarlutalu oqaloqatigiittarnerput nuannaarutigisaqaara.a Qanoq ippit?
Jona: Ajunngilanga.
Kristian: Qujanarmi. Kingullermik maaniikkama Jehovap Nalunaajaasuisa Guutip naalagaaffiata 1914-imi naalakkersuilernerarlugu oqartarnerannut suna pissutaasoq eqqartorparput.b Sammeriikkatsitut Biibilimi Danielimik allakkani kapitali 4-mi uppernarsaat pingaarutilik allassimavoq. Siulittuummi tamatumani suna allaatigineqartoq eqqaamaviuk?
Jona: Aap, kunngip Nebukadnesarip orperujussuaq pillugu sinnattua tassani allaatigineqarpoq.
Kristian: Aap, ilumoorputit. Nebukadnesarip sinnattumini orperujussuaq qilammut apissittoq takuaa. Tusarpaalu Guutip inngilia peqqusisoq orpik taanna kipillugu uppitinneqassasoq sorlaalu kippakoq nunami ataannassasoq. ‘Piffissarititat arfineq-marluk’ naappata orpik naaqqissaaq.c Aamma siulittuutip tamatuma marloriarluni eqquunnera eqqartorparput. Siullermik qanoq eqquuttoq eqqaamaviuk?
Jona: Aap, Nebukadnesarimut eqquuppoq, ilaa? Taanna ukiuni arfineq-marlunni silaaruteqqavoq.
Kristian: Ilumoorputit. Nebukadnesarip silaaruteqqanerani taassuma naalakkersuinera kipineqarallarpoq. Siulittuutilli tamatuma eqquunnerani pingaarnerusumi Guutip nunamut naalakkersuinera piffissarititani arfineq-marlunni kipineqarpoq. Kingullermik paasivarput ukiumi 607-imi Kr.in.si. Jerusalemi piuneerussaammat piffissarititat arfineq-marluk taakku aallartittut. Taamanimiilli Jehova Guuti innuttaminut kunnginik nunamiusunik sinniisoqarunnaarpoq. Piffissarititalli arfineq-marluk naaneranni Guuti innuttaminut naalakkersuisussamik nutaamik — qilammiittumik — ivertitsisussaavoq. Allatut oqaatigalugu, piffissarititat arfineq-marluk naammata Guutip naalagaaffia qilammiittoq naalakkersuilerpoq. Maanna piffissarititat arfineq-marluk qanga aallartittut eqqartoreerparput. Taamaattumik piffissarititat taakku qanoq sivisutiginersut naatsorsorsinnaagutsigu Guutip naalagaaffia qanga naalakkersuilersimasoq oqaatigisinnaassavarput. Paasinarpa?
Jona: Aap, eqqartoqqeriaratsigit eqqaamalluarnerulerpakka.
Kristian: Torrak. Misissuinerput nangillugu paasiniariartigu piffissarititat arfineq-marluk qanoq sivisutiginersut. Eqqartueqatigiinnissatsinnut piareersarlunga tamatuma pingaarnerusortai misissoqqammerpakka. Sapinngisannguannik tamakkuninnga nassuiaanniassavakkit.
Jona: Ajunngilaq.
PIFFISSARITITAT ARFINEQ-MARLUK NAANERAT — ULLUT KINGULLIIT AALLARTINNERAT
Kristian: Nebukadnesarip nalaani siulittuutip siullermik eqquunnerani piffissarititat arfineq-marluk tassaasimassagunarput ukiut arfineq-marluk. Guutilli naalagaaffianut tunngatillugu eqquunnerani pingaarnerusumi piffissarititat arfineq-marluk ukiunit arfineq-marlunnit sivisunerujussuusimassapput.
Jona: Sooruna?
Kristian: Siullertut, eqqaamajuk ukiumi 607-imi Kr.in.si. Jerusalemi piuneerusaammat piffissarititat arfineq-marluk aallartittut. Ukiut arfineq-marluinnaasimassappata piffissarititat taakku ukiumi 600-mi Kr.in.si. naasimassagaluarput. Ukiumili tamatumani Guutip naalakkersuineranut tunngatillugu maluginiarnartumik pisoqanngilaq. Aammami eqqartoriikkatsitut ukiut hundredillit tamatuma kingorna Jiisusip nunamiikkallarami ersersippaa piffissarititat arfineq-marluk suli naanngitsut.
Jona: Usimaanna.
Kristian: Taamaattumik piffissarititat arfineq-marluk, ukiutut arfineq-marluttut naatsorsuunneqarnatik, tassaasimassapput piffissaq sivisunerusoq.
Jona: Qanoq sivisutigisoq?
Kristian: Biibilip atuagartaa Saqqummersitat, Danielimik allakkanut attuumassuteqarluinnartoq, iluaqutigalugu piffissarititat arfineq-marluk qanoq sivisutigineri paasisinnaavarput. Tassani eqqaaneqarpoq piffissarititat pingasut affarlu tassaasut ullut 1260-it.d Tassa piffissarititat arfineq-marluk — piffissarititat pingasut affarlu marloriaataat — tassaapput ullut 2520-t. Paasinarpa?
Jona: Aap, suli malinnaavunga. Tamannali Guutip naalagaaffiata 1914-imi naalakkersuilerneranut uppernarsaataanera paasinngilara.
Kristian: Ajunngilaq, taakkua imminnut qanoq attuumassuteqarnerat paasiniariartigu. Ilaannikkut Biibilimi siulittuutini ulloq ukiumut assersuutaasarpoq.e Ulloq ataaseq ukiumik ataatsimik naleqartikkutsigu piffissarititat arfineq-marluk ukiunik 2520-nik sivisussuseqarsimassapput. Ukiut 2520-t taakku 607-imi Kr.in.si. aallartikkamik 1914-imi naasimassapput.f Tassa taama naatsorsuilluta isummerpugut ukiumi 1914-imi piffissarititat arfineq-marluk naasut Jiisusilu Guutip naalagaaffiani kunngiusutut naalakkersuilersoq. Maluginiarnarporlu 1914-imiilli silarsuarmi ilungersunartunik — ulluni kingullerni pisussatut Biibilimi siulittuutigineqartunik — pisoqartarsimasoq.
Jona: Soorlu suut?
Kristian: Jiisusi uani, Iivangkiiliu Matthæusip allagaa 24:7-imi allassimasutut, qanoq oqartoq malugiuk. Jiisusip qilammi naalakkersuilernermi nalaa pillugu ima oqarpoq: “[Inuiaat] pikitsitsiumaarput inuiannut, naalagaaffillu naalagaaffimmut, sumilu tamani kaannersuaqartarumaarpoq nunalu sajuttarluni.” Malugiuk Jiisusip piffissami tamatumani kaannersuaqartarumaarnera nunallu sajuttarumaarnera siulittuutigigai. Ukiuni hundredini kingullerni nunarsuarmi tamakkua ajornartorsiutaasarput, ilaa?
Jona: Ilumut.
Kristian: Versimi tamatumani Jiisusi aamma siulittuivoq Guutip naalagaaffiani kunngisut najuunnermini sorsuttoqartarumaartoq. Biibilillu atuagartaani Saqqummersitani siulittuutigineqarpoq naggatissap nalaani sorsunnerit nunat ilaannaannut sunniuteqaannarnatik nunarsuarmut tamarmut sunniuteqarumaartut.g Sorsunnersuaq siulleq qanga aallartittoq eqqaamaviuk?
Jona: Aap, 1914-imi, ukiumi Jiisusip naalakkersuilerfiatut oqaatigisanni! Taakkua ataqatigiissinnaanerat eqqarsaatiginikuunngisaannarpara.
Kristian: Piffissarititat arfineq-marluk pillugit siulittuut naggatissallu nalaa pillugu Biibilimi siulittuutit allat tamaasa imminnut atassuseratsigit paasisaqarnarsivoq. Jehovap Nalunaajaasuisa upperilluinnarpaat Jiisusi 1914-imi Guutip naalagaaffiani kunngisut naalakkersuilersoq, aamma ukiumi tamatumani ullut kingulliit aallartittut.h
Jona: Tamakku tamaasa paasiniarsarigaluarpakka ...
Kristian: Paasinarpoq. Soorlu oqareersunga, aamma uanga ingerlaannaq paasilluanngilakka. Neriuppungali eqqartuinitsinnit paasigit ukioq 1914 Biibilimi eqqaaneqanngikkaluartoq Jehovap Nalunaajaasuisa ukioq taanna pillugu upperisartik Biibilimik tunngaveqartikkaat.
Jona: Aap, tamanna tupigusuutigiuaannarpara — qanorluunniit oqaraluarussi oqaatsisi, nammineq isumassinnik tunngaveqartinnagit, allassimaffimmik Biibilimeersumik tunngaveqartittarisi. Soormiuna tamakkorpassuit taama paasiuminaatsigisut? Sooruna Guutip Biibilimi toqqaannartumik oqaluttuutiinnanngikkaatigut 1914 tassaasoq ukioq Jiisusip qilammi naalakkersuilerfia?
Kristian: Tassa apeqqutitsialak. Biibilimimi allaatigisarpassuit nassuiaqqissaarneqanngillat. Sooq Guutip Biibili allatsippaa inuit tamatuminnga paasinnissagunik ilungersorlutik paasiniaasariaqartillugit? Immaqa tamanna ulloq alla eqqartorsinnaavarput.
Jon: Ajorinngilara.
Biibilimut tunngasumik aalajangersimasumik eqqarsaatiginnittarpit? Jehovap Nalunaajaasuisa upperisaat pillugu paasisaqarusuppit? Taamaappat Jehovap Nalunaajaasuisa ilaata aperinissaa tunuarsimaarutigeqinagu. Taassuma akissutissarsiorninni ikiorusuppaatit.
a Akeqanngitsumik Biibilimik atuaqqissaaqateqartarnikkut Jehovap Nalunaajaasuisa inuit Biibili pillugu oqaloqatigisarpaat.
b Atuagassiami novembari-decembari 2014-imoortumi allaaserisaq “Eqqaamiumik oqaloqateqarneq — Guutip naalagaaffia qanga naalakkersuilerpa? — Immikkoortoq 1” takuuk.
c Danieli 4:20-22.
e 4 Mosesi 14:34; Ezekieli 4:6.
f “Nebukadnesarip orpik pillugu sinnattua” qupp. 11-miittoq takuuk.
h Atuakkami Biibilimi sorpiaat ajoqersuutigineqarpat?-mi kapitali 9 takuuk, Jehovap Nalunaajaasuinit saqqummersinneqartoq.