SAMMISAQ PINGAARNEQ
Ilumut taama pisoqarpa?
Ukiumi 33-mi upernaakkut Jiisusi Nazaretimioq toqutaavoq. Tunngavissaqanngitsumik pikitsitsisutut unnerluutigineqarpoq, peqqarniitsumik persuttarneqarpoq nappakkamullu kikiattugaalluni. Naalliungaarluni toquvoq. Guutilli toqusunit makitippaa, ullullu 40-t qaangiummata Jiisusi qilaliarpoq.
Oqaluttuaq tamanna immikkuullarissoq iivangkiiliuni Kristumiut Allagaataanni Grækerisuuni, aamma Testamentitaatut taaneqartartumi, allaatigineqarpoq. Ilumut taama pisoqarpa? Apeqqut tamanna pingaaruteqarluinnarpoq. Taama pisoqarsimanngippat kristumiut uppernerat paratiisimilu naassaanngitsumik inuunissamik neriuutaat tunngavissaqassanngillat. (1 Korinthimiut 15:14) Taamatulli pisoqarsimappat inuiaat nuannersumik, aamma illit misigisinnaasannik, siunissaqarput. Taamaattumik iivangkiiliut piviusuuppat imaluunniit oqaluttualiaannaappat?
UPPERNARSAATIT SUNIK ERSERSITSISUT
Oqaluttualiat tunngavissaqanngitsut assiginagit iivangkiiliunik allattut pisut annikitsualuttortaat eqqoqqissaartumik allaatigisarpaat. Assersuutigalugu sumiiffippassuit, ullumikkut suli takornariarneqarsinnaasut, taagorneqarput. Inuit oqaluttuarisaanermik ilisimatuunit upperisamik sammisaqanngitsunit uppernarsarneqarsinnaasut eqqaaneqarput. – Lukasi 3:1, 2, 23.
Jiisusi ukiuni 100-ni siullerni 100-kkunnilu atuakkiortunit upperisamik sammisaqanngitsunit eqqaaneqartarpoq.a Toqunerata iivangkiiliuni allaatigineqarnera Romamiut taamani toqutseriaasiannut naapertuuppoq. Tamatuma saniatigut pisut piviusorsiortumik unneqqarissumillu allaatigineqarput – allaat Jiisusip apustilii ajortumik allaatigineqarput. (Matthæusi 26:56; Lukasi 22:24-26; Johannesi 18:10, 11) Tamakkunannga ersersinneqarpoq iivangkiiliunik allattut Jiisusi unneqqarissumik eqqoqqissaartumillu allaatigisaraat.
JIISUSIP MAKITITAANERA SUMIK ERSERSITSIVA?
Jiisusip inuusimanera toqusimaneralu inuppassuarnit upperineqaraluartoq inuit ilaasa makititaanera apeqqusertarpaat. Allaat apustiliisa makititaanera tusaqqaaramikku upperinngikkaluarpaat. (Lukasi 24:11) Pisunili arlalinni apustilit allat ilagalugit Jiisusi makititaasimasoq takugamikku qularunnaarput. Allaat pisumi ataatsimi 500-t takunnittuupput. – 1 Korinthimiut 15:6.
Apustilit tigusaasinnaagaluarlutik toqutaasinnaagaluarlutillu Jiisusip makititaanera sapiillutik tamanut – allaat taassuminnga toqutaatitsisunut – nalunaajaatigaat. (Apustilit Suliaat 4:1-3, 10, 19, 20; 5:27-32) Apustilit taama amerlatigisut Jiisusip makititaanera qularisuugunikku taama sapiitsigisimassagaluarpat? Jiisusip makititaanera taamanikkut nalitsinnilu kristumiuussusermut tunngaviulluinnarpoq.
Jiisusip toqunera makititaaneralu pillugit iivangkiiliuni allassimasut oqaluttuarisaanermut naapertuunnerat ersarippoq. Taakku atuaqqissaarukkit taamani pisut upperinerulissavatit. Tamakkununngali pissutaasut paasigukkit uppernerit nakussatsinneqassaaq. Allaaserisap tulliani pissutaasut sammineqarput.
a Tacitus, ukiup 55-ip missaani inuusoq allappoq “Kristusi, kristumiut ateqaatigisaat, Tiberiusip naalakkersuinerata nalaani nunami naalagaanerutitatta Pontiusip Pilatusip assaani naalliunnartumik toqutaasoq”. Svetoniusip (ukiut 100-t siulliit), juutit oqaluttuarisaanerannik ilisimatuup Josefusip (ukiut 100-t siulliit) aamma Pliniusip Nukarliup, Bityniami naalagaatitap (ukiut 100-kkut), Jiisusi eqqartorpaat.