Guuti qanoq ateqarpa?

Inum­mik ilisarisiman­niler­niaruit ilimanar­poq ima apereq­qaas­sagit: “Qanoq ateqar­pit?” Guuti taama aperiguk­ku qanormita akis­sava?

“Uanga tas­sa Jahve [Jehova, NW], tas­sa atera!” – Esaja 42:8.

Ateq taan­na aatsaat tusar­piuk? Ilimanar­poq, Guutim­mi aq­qa Biibilimik nutsik­kani amerlasuuni ator­neqar­pian­ngilaq. Ateq taan­na ator­nagu taaguum­mik uumin­nga taarser­neqar­tar­poq: “NAALAGAQ.”a Biibilil­li al­las­simaq­qaarfiini Guutip aq­qa 7.000-t sin­nerlugit ator­neqar­poq. Ateq taan­na hebræerit aap­persaris­saat sisamat JHVH-mik nutser­neqarsin­naasut atorlugit al­lan­neqar­tar­poq, itsarlu kalaal­lisut “Jehova”-mik taaneqar­tar­poq.

Guutip aq­qa al­las­simaq­qaarfin­ni hebræerisuuni nutsik­kanilu amerlasuuni ator­neqar­poq

SOOQ GUUTIP AQQA PINGAARUTEQARPA?

Ateq taan­na Guutimut pingaaruteqar­poq. Guutip atini nam­mineq toq­qar­paa. Ima nalunaar­poq: “Tas­sa atera naas­saan­ngitsumik aterisara, tas­sa ateriumasara kinguaariik­kuutaani.” (2 Mosesi 3:15) Biibilimi Guutip taaguutai, soorlu Ajugaqan­ngitsoq, Ataataq, Naalagaq aam­ma Guuti, ator­neqar­taraluar­tut aq­qa Jehova taaguutaanit ator­neqar­neruvoq, aam­ma atinit al­lanit, soorlu Aaperaamit, Mosesimit, Daavimit aam­ma Jiisusimit, ator­neqar­neruvoq. Aam­mami Jehovap kis­saatigaa atini ilisimaneqalis­sasoq. Biibilimi ima al­las­simavoq: ‘Paasilis­suk il­lit kisivit – aq­qit tas­saasoq Jahve [Jehova, NW] – Qutsin­nerus­saar­tuusutit nunarsuarmi tamarmi.’ – Tussiaat 83:19.

Ateq taan­na Jiisusimut pingaaruteqar­poq. Qin­num­mi Ataatar­puumi Jiisusip ajoqersuk­kani Guutimut ima qinusas­sasut ilin­niar­tip­pai: “Aq­qit il­ler­nar­titaali.” (Matthæusi 6:9) Jiisusi nam­mineq Guutimut ima qinuvoq: “Ataataq, aq­qit naalan­narsisiguk!” (Johannesi 12:28) Jiisusip Guutip aq­qata naalan­narsisin­nis­saa sal­liutik­kamiuk ima qinusin­naavoq: ‘Aq­qit taak­kunun­nga ilisimalersip­para ilisimalersik­kumaarlugulu.’ – Johannesi 17:26.

Ateq taan­na Guutimik ilisarisiman­nit­tunut pingaaruteqar­poq. Itsaq Guutip in­nut­taasa paasivaat il­lersor­neqar­nis­sar­tik an­naan­neqar­nis­sar­til­lu Guutip aq­qanut im­mik­kuul­laris­sumut at­tuumas­suteqar­tut. “Naalak­kap aq­qa pal­lit­taalisap napasuliaatut ip­poq, iluar­toq tas­sunga qimaanasuar­tar­poq isuman­naatsumilu inis­sit­tarluni.” (Ussatit 18:10) “Kinaluun­niil­lu Naalak­kap aq­qanik torlorfigin­nit­toq an­naan­neqas­saaq.” (Joeli 3:5) Guutimut kif­far­tor­tut taas­suma aq­qa al­laas­sutigaat. “Inuiaat al­lat tamarmik inuup­put nam­min­neq guutimik aq­qan­ni; uagul­li inuujumavugut Naalak­kami Guutit­ta aq­qani naas­saan­ngil­luin­nar­tumik.” – Mika 4:5; Apustilit Suliaat 15:14.

ATERMIT TAMATUMANNGA SUNA PAASINEQARSINNAASOQ

Atip tamatuma Guuti ilisaritip­paa. Biibilimik ilisimatoor­pas­suit isum­mersimap­put ateq Jehova ima isumaqar­toq: “Sun­ngorsin­naasorluun­niit.” Jehova atermi isumaa pil­lugu paasititsivoq im­minut pil­luni Mosesimut ima oqarami: “Tas­saavunga uangaasoq!” (2 Mosesi 3:14) Oqaatsit hebræerisuut taak­ku ima nutser­neqarsin­naap­put: “Sun­ngorusun­nera naaper­torlugu taamaalis­saanga.” Guutip aq­qa sunik tamanik piulersitsisin­naaneranik ersersitsiin­narani aam­ma erser­poq siuner­tani angujumal­lugu sun­ngorsin­naasorluun­niit pin­ngor­titanilu, ilaatigut inuit, sun­ngor­tis­sin­naagaaluun­niit. Guutip taaguutai taas­suma oqar­tus­saaneranik pis­saaneranil­lu ersersitsigaluar­tut aq­qa “Jehova” kisimi kinaas­susilit­tut qanoq it­tuuneranik sun­ngorsin­naaneranil­lu ersersitsivoq.

Ateq taan­na Guutip uagutsin­nik soqutigin­nin­neranik ersersitsivoq. Guutip aq­qata isumaanit paasivar­put pin­ngor­titani asajuarai, ilaatigut uagut. Aam­mami aterminik ilisimalersitsineranit erser­poq ilisarisimas­sagitsin­ni kis­saatigigaa. Suliluun­niim­mi aq­qata apeq­qutiginis­saa nalugip­put nam­mineq siul­liul­luni atini ilisimalersip­paa. Erseq­qip­poq Guuti takorlooruminaatsutut ungasit­tutul­lu isigineqarusun­nani kinaas­susilivit­tut qanil­lineqarsin­naasutul­lu isigineqarusut­toq. – Tussiaat 73:28.

Guutip aq­qa atorutsigu taan­na soqutigalugu ersersis­savar­put. As­sersuutigalugu ikin­ngutigerusutavit il­lit atit atoruman­ngil­luin­nar­pagu qanoq misigis­savit? Im­maqa qularis­savat inuup taas­suma ilumut qanil­lerusun­neraatit. Guuti aam­ma taama misigisar­poq. Jehovap atini inun­nut ilisimalersip­paa atoq­qul­lugulu kajumis­saarluta. Atoraangatsigu ersersit­tar­par­put taan­na qanil­lerusul­lutigu. Aterminik eq­qarsaatigin­neq­qis­saar­tar­tut, tas­sa pingaar­titsisut, malugisar­pai. – Malaki 3:16.

Guuti ilisarisimalis­sagaan­ni qanoq ateqar­nersoq paaseq­qaar­tariaqar­poq. Taman­nali naam­magis­san­ngilar­put. Kinaas­susilik taan­na qanoq it­tuunersoq paasisariaqar­par­put.