Kiffartornerput kipissanata ingerlatiinnarparput
1 Silarsuup pissusia allanngorarpoq — naggatissallu nalaa ingerlatillugu allanngorarnera sukkanerujartuinnarpoq. (1 Kor. 7:31) Pisut uissuumminangaartut Bibelimi siulittuutigineqartut eqquunnerattut pisarput. Silarsuarmi avatangiisitsinni aammalu peqatigiiffimmi teokratiimit aqunneqartumi susoqarnersoq takugaangatsigu paasisarparput Naalagaaffimmik tusagassap nuannersup oqaluussissutiginissaa qanoq pisariaqartigisoq. — Mák. 13:10.
2 Ajoqersuganngortitsiortornissatsinnik peqqusisoq tassaavoq maligassarsuarput Jesus Kristus. ’Silarsuup naggatissaanut allaat ullut tamaasa najornissatsinnik’ neriorsornermisigut suliap tamatuma iluatsinnissaa qularnarunnaarsippaa. (Mat. 28:19, 20) Jesusip ajoqersugaasa taassuma oqaasii ilumooruppaat, naallu akerlilersorneqaraluaqalutik ’soraanngillat ajoqersuillutik iivangkiiliulu Jesus Kristusimik oqaluutigalugu’. (ap. sul. 5:42) Ilumut ullumikkut maligassaalluartut!
3 Jehovas Vidners Årbog 1990 atuaraangatsigu paasisarparput kiffartornerput Jehovap pilluaqqusimagaa. Ajoqersukkat nutaat amerleriangaatsiarsimaqaat; nunat ilaanni allaat annertoorujussuarmik amerleriarsimapput. Silarsuaq tamaat eqqarsaatigalugu siuariarsimaneq ukiualunnguit matuma siorna takorloorsinnaasatsinnit annertuneroqaaq. (Is. 60:22) Ilagiilli ilissi ilaasortaaffigisasi qanoq ingerlappat? Illimmi nammineq? Illit kiffartornermut peqataanerit, aammalu kiffartornermi silarsuaq tamakkerlugu naammassineqartut, ilinnik nuannaartitsisuuppat? Tamatta immikkut kiffartornerput kipissanata ingerlatiinnarparput?
NAMMINEQ PEQATAANERPUT
4 Soorunami oqaluussilluni angalaarfiusartut tamakkeratik inerititaqarluarfiusarput. Oqaluussiffiusullu ilaat, soorlu Irland Kalaallit Nunaallu, oqaluussisartut ilungersortut ukiorpassuarni tamaviaarlutik oqaluussereernerisigut aatsaat inerititaqalersimapput. Oqaluussiffiusut ilaanni akerlilersuisoqartaqaaq, ilaannilu inuit tusagassamik soqutiginninngivittarlutik. Oqaluussiffiusunilu allani ima oqaluussisartoqartigisarpoq allaat angalaarluni oqaluussiffigisassat amigaatigineqarlutik. Oqaluussillutali angalaarfigisartagarput qanoq ittuugaluarpalluunniit ilungersornerput millisinngisaannassavarput. Paulus ima allassimavoq: ’Ajunngitsuliorta arajussinata nalliuppat katersuiumaarattattaaq qasunngikkutta.’ (Gal. 6:9) Oqaassut tamanna kristumiunut tamanut tunngavoq. Qanoq ililluta maleruarsinnaavarput? Kipissanata kiffartornitta ingerlatiinnarnissaanut suna iluaqutigisinnaavarput?
5 Jehova tatigigutsigu taassumalu pissaanera tunaartarigutsigu suliniartuaannarsinnaassaagut kiffartornerpullu imaqarnerusinnaassalluni. Eqqaamajuaannaruk naajartortitsisoq tassaammat Jehova. (1 Kor. 3:6) Ikiorneqarnissatsinnik qinnutitsinnut akissutitut Jehovap unnersuuttarpaatigut, atoriaannaasumik ilinniartittarluta Bibelimullu tunngasunik sakkussarpassualersorluta. Tamakku tamakkiisumik atorluarniarpavut?
ISUMALLUARTUAANNARIT
6 Isumalluanngissuseq inerititaqartumik kiffartornissaagaluamut akornutaasinnaasorujussuuvoq. Inuit siornatigut oqaluussiffigisimasatta ilasseraarsimannginnerat pissutigalugu taakkuninnga isumalluanngitsumik isiginnilersimagutta oqalunnitsigut, kiinnatsigut qarsupittumillu oqaluussinissamut piareersarnitsigut takuneqarsinnaassaaq. Oqaluussinissaq ilinniartitsinissarlu uagutsinnut suliassiissutigineqarsimapput, suliallu inernissaata tungaanut suliuarnissatsinnik peqquneqarsimavugut. Naalalluta Guutimit siulersorneqarnissatsinnik kissaateqarutta kiffartornerput kipissanata ingerlatiinnarsinnaassavarput.
7 Ajortunik mianersoqqusinissamik naapertuilluarnermillu nuannarisaqartunik katersuinissamik Jehovap siunertarisaa naggatissap nalliutinnginnerani naammassineqassaaq. Kiffartornerput kipissanata ingerlatiinnarutsigu kiffartornerput tamakkiisumik nuannaarutigisinnaassavarput siunissamilu Guutip innuttai ilagalugit naassaanngitsumik pilluaqqusaasinnaassalluta. (kmD 3/90 Vi fortsætter vor tjeneste uden ophør)