Tusagassamik nuannersumik saqqummiussineq — oqarasuaat ikiortigalugu
1 Inuit nammineq tikillugit tusagassamik nuannersumik oqaluussiffigiumanerusarpavut, pisariaqalersinnaavorli oqarasuaat ikiortigalugu nalunaajaanissaq. Oqaluussisartut timikkut isumakkulluunniit sanngiissuteqartut angerlarsimaffimminnit allamut nikissinnaanngikkallartut imaluunniit allamut nikissinnaanngilluinnartut oqarasuaat atorluarsinnaavaat. Aammattaaq naapinneq ajulikkatsinnut, imaluunniit inissiani isumannaallisaanerit assigiinngitsut pissutigalugit imaalitsiaannaq naapissinnaanngisatsinnut, tamanna atorluarsinnaavarput. Oqarasuaatikkut oqaluussineq uagutsinnut imaannaanngitsuuvoq, piareersarluarnikkulli eqqarsaqqaarluarnikkullu akornutissat anigorneqarsinnaapput.
2 Atassuteqarfiginiakkat aqqi oqarasuaataasalu normui aqqusernit nalunaarsugaaffiisigut oqarasuaatillu allattorsimaffiisigut pissarsiarineqarsinnaapput. Oqarasuaatikkut inunnik attaveqartarnermik suliaq aaqqissuulluagaasariaqarpoq, ajornanngippallu oqarasuaatikkut oqaluussiffissat aaqqissuullugit immikkoortiterneqarsinnaapput. Oqaluusseriaaseq tamanna immikkut ittoq oqaluussinermik nakkutilliisup nakkutigisaraa. Oqaluusseriaatsit allat assigalugit tamakkiisumik peqqissaartumillu nalunaarsuineqartariaqarpoq.
QANOQ PIAREERSARTOQARTARTOQ
3 Sunniuteqarluartussamik oqarasuaatikkut oqaluussisinnaajumalluni inussiarnersumik tusaajuminartumillu nipeqarluni oqaluussisariaqarpoq. Ullaavallaakkut, unnuppallaakkut nerinerulluunniit nalaani sianinnginnissaq pisariaqarpoq. Akisoqanngippat sivisuumik sinernissaq pisariaqanngilaq. Oqarasuaat sianerfigisaq nammineq akisartumik pilerneqarsimappat ima oqartoqaannarsinnaavoq: „Ateqarpunga . . ., siunissamilu Bibelip neriuutissarititaa pillugu oqaloqatigerusullutit sianerfigaakkit. Kingusinnerusukkut sianeqqikkumaarpunga.“ Kingusinnerusukkullu piffissakkut allakkut sianeqqittoqarsinnaavoq.
4 Atuarpaluppallaaqqunak sianertinnak saqqummiussassat misiligarluaqqaartaruk. Oqaluussat malugitiguk inuttut soqutigigit taamaattumillu oqaloqatigerusukkit. Atippit kinguliaqutippillu taanerisigut oqaloqatigiinnersi inuppalaartuutiguk, oqaloqatigiinnissinnilu oqaloqatigisavit aqqa atortaruk.
5 Arriitsumik akunnattuunganngitsumillu oqalugit, aperinngikkaangavillu unillatsiartarnerit pinaveersaakkit. Unillatsiarneq aperinertut paasineqarsinnaasarpoq. Ima oqarsinnaavutit: „Aluu, ateqarpunga . . ., naapissinnaanngeriarakkit sianerfigaakkit.“ Unillatsiarnak ingerlaqqiinnarsinnaavutit: „Sianerfigaakkit apeqqummut soqutiginaqisumut isummat paaserusullugu. Tupigusuutigimaviuk . . .?“ Apeqqut allanngortissinnaavat oqarlutit: „Illit nalaanneqarsimavit . . .?“ imaluunniit: „Illit eqqarsaatigisarpiuk . . .?“ Apeqqutit tamakku kukkusumik akineqarsinnaanngillat, taamaattumillu oqaluussat peqataalluarnerusinnaavoq. Oqaluussinissat nammineq akornusernavianngilat ima oqanngikkuit: „Neriuppunga akornusersuinanga“ imaluunniit: „Neriuppunga ulapippallaanngitsutit.“ Nammineq taamatut oqanngippat naatsorsuutigiinnassavat piffissaqarluartoq.
6 Aperisoqarpat: „Kina siarnuppiuk?“ ingerlaannaq akiinnarsinnaavat: „Jehovap Nalunaajaasuisa ilagaanga, sianerfigaakkillu apeqqummut soqutiginartumut isummat paaserusullugu. Tupigusuutigisimaviuk . . .?“ Oqaluussat oqarpat: „Oqarasuaatima normua sumit pissarsiarigakku?“ akisinnaavat: „Oqarasuaatit allattorsimaffiannit, sianerfigaakkillu apeqqummut soqutiginartumut isummat paaserusullugu. Illit nalaanneqarsimavit . . .?“
7 Inuit Bibelimut tunngasunik apeqqutissaannik akeqanngitsumik akissutissarsinissaannik neqeroorfiginninnermikkut ’Paradisbogi’-milu kapitalit allattorsimaffiannik innersuussinermikkut ilavut kinguneqarluartitsisimapput. Imaluunniit oqartoqarsinnaavoq: „Inissiarsuaq najugaqarfigisat pinerlunniarnermut isumannaallisagaaqaaq, illilli suna pissutaasoraajuk ullumikkut taama pinerlunniarneqartigineranut?“
8 Inissiarsuarmi ataatsimi isumannaallisagaaqisumi kinguneqarluartitserpiannginneq pissutigalugu najugaqartut oqarasuaatikkut attaveqarfigineqartalersimapput. Tamatuma kinguneraa 14-it Bibelimik atuaqqissaaqatigineqartalernerat. Oqaluussinermik annassutaasussamik suliaqarnitsinnut atatillugu oqarasuaatip atorluarnera isumalluarfigigutsigu, Jehovamillu ikiorneqarnissarput tatigigutsigu, periaaseq tamannattaaq inuit assigiinngitsut attaveqarfiginiarneranni sunniuteqarlualersinnaavoq. — 2 Tim. 4:5. (kmD 90/7 Fremh. af den gode nyhed ved hjælp af telefonen)