Oqarasuaatikkut oqaluussineq kinguneqarluartoq
1 Jehovap Nalunaajaasuisut nutaarsiassamik nuannersumik oqaluusseqataaneq kisiat anguniagarinngilarput, aammattaarli anguniagaraarput sapinngisatsinnik kikkut tamarmik Guutip naalagaaffianik tusartissallugit. (Aps. 10:42; 20:24) Inuit anguniaraanni illumiit-illumut angalaarneq pingaartorujussuujuaannarpoq, nassuerutigisariaqassavarpulli kikkut tamarmik attavigisinnaannginnatsigit, naak taamatut aalajangersimasumik oqaluussiuaraluarluta. ’Kiffartuuterput naammassiniarlugu’ aamma inuit ilumoortut naniumallugit allatuttaaq iliuuseqartariaqarpugut, ilaatigut oqarasuaatikkut oqaluussilluta. — 2 Tim. 4:5.
2 Inuppassuit ineqartarput parnaarsorsimangaaramik angujuminaallutik, ilaallu illoqatigiiaartarput allallu arlalinnut najugalinnut ataatsimik isaaffeqartumik parnaaqqajuartumik, nalinginnaasutut matumit-matumut attaviginiarnerannut ajornakusoornerusumik. Isaariakkut oqarasuaateqaraluaraangat biilit nipiliortarmata allatulluunnit oqaloqatigiinnermut akornusiisoqartarmat angujumallugit pitsaanerpaasarpoq oqarasuaatikkut oqaluussiffiginissaat. Allaallumi illumiit-illumut angalaarsinnaagaluaraangatta inuit amerliartuinnartut angerlarsimanngisaannarput. Oqaluussisartorpassuilli inuit angusinnaanngisartik oqarasuaatikkut angusinnaasimavaat. Aappariit ulloqeqqata siornagut illumiit-illumut angalaaramik qulingiluat angerlarsimanngillat. Naalagaaffilersaarfimmut uteramik aqquserngup ujarlerfissiaani oqarasuaataasa normui nanisinnavaat. Angerlarsimanngitsut sianerfigigamikku arfineq-pingasut attavigisinnaasimavai.
3 Oqarasuaatikkut oqaluussinaveersaartarpit? Qatanngut angut oqarpoq: „Oqarasuaatikkut tuniniaasunit sianerfigineqarnissara nuannarinngivippara, taamaattumik taamatut oqaluussinissara nuannarinngivikkaluarpara. Taamaakkaluartorli marloriaannarluni sianereerluni oqarpoq: „Ajorinngilluinnarpara. Isumaqanngisaannaraluarpunga taama oqarsinnaassallunga, kisianni tassa ilumoorpoq. Inuit oqarasuaatikkut oqaloqateqaraangamik eqqissisimasarput, oqaluussisutullu tigoriaannaasunik atortussaqarpugut. Ajunngivippoq.“ Qatanngut arnaq aamma taama qisuariarpoq: „Oqarasuaatikkut oqaluussinissara nuannarinngikkaluarpara. Allaallumi misilikkumanngisaannaraluarpara. Taamaakkaluartoq misiliinnaqaara — paasivaralu qanoq kinguneqarluartigisoq.“ Danmarkimi nakkutilliisoq angalasartoq oqaluttuarpoq: „Taamatut kiffartoriaaseq nuannaraarput tamatigullu najugaannut atuagassianik pajunneqarnissamik oqaloqatigeeqqinnissamillu ataatsimik arlalinnilluunnit isumaqatigiittoqartarpoq.“ Illittaaq misilikkumallerukku paasissavat kinguneqarluartartoq.
4 Oqarasuaatikkut oqaluussinerup aaqqissuussaanera: Ilagiit oqaluussinerat kiffartornermut nakkutilliisumit nakkutigineqarpoq. Pisariaqassappat oqarasuaatikkut oqaluussinerup aaqqissorneqarnissaanut suleqataasussamik utoqqaanertamik allamik ilagiinniluunniit kiffartortumik piukkunnartumik utoqqaanertaqatigiit toqqaasinnaapput. Qatanngut oqaluussisarfinnik isumaginnittoq peqataatinneqartariaqarportaaq, taanna oqaluussisarfinnik tunioraasarmat nakkutigisaralugillu. Nakkutiliisullu angalasartup oqaluussineq tamanna qanoq ingerlanersoq eqqumaffigissavaa.
5 Oqaluussiffissaqarpat matumiit-matumut angalaarfigineqarsinnaanngitsunik oqarasuaatikkut oqaluussiffissatut aaqqissorneqartariaqarput. Qatanngutip tamatuminnga isumaginnittussap peqqissaartumik allattuissaaq oqarasuaatikkut oqaluussiffissatut allanngortillugu. Taamatut oqaluussiffissat annertuvallaassanngillat akuttoqatigiimmik sianerfigineqarsinnaaniassammata. Allagartaq oqarasuaatikkut oqaluussiffissallit tamarmik taamaattuunerannik nalunaarsorneqassapput.
6 Oqarasuaatit normui sumi nanineqarsinnaappat? Ilaatigut telefonbogimi imaluunniit aqqusernguip ujarlerfissiaani Internetimilluunniit nanineqarsinnaapput.
7 Ilagiinni utoqqaanertat oqaluusseriaatsimut tamatumunnga soqutiginnittariaqarput ilinniartitsillutik aaqqissugaqarnikkut. Oqarasuaatikkut oqaluussillutik misilittagaqarsimasut allat taamaaliornissaannut sungiusarsinnaavaat, immaqa ilinniartitsinermik pilersaarut ’Pioneerit allanik ikiuipput’ malillugu. Oqaluussinermut tunngasumik ataatsimiinnermi ilaatigut tamaani pisariaqartitat sammineqaraangat soqutiginnilersitsinartumik oqaluusseriaaseq tamanna sammineqarsinnaavoq.
8 Utoqqaanertat napparsimasunut imaluunniit angerlarsimaffimminiiginnartariaqartunut paarsisutut pulaaraangamik qatanngutit taakku oqarasuaatikkut oqaluussisinnaanissaannut kajumissaarsinnaassavaat. Immaqa utoqqaanertaq oqaluussisartoq tusaatillugu sianerluni oqaluussisinnaavoq. Imaassinnaavoq oqaluussisartoq nammineq oqarasuaatikkut oqaluussiumalissasoq. Taamatut oqaluussisalersimasut arlallit ullut tamaasa taamaaliornissartik nuannarisalersimavaat.
9 Siunnersuut kinguneqarluartoq: Jiisusip ajoqersukkani oqaluussiartoqqugamigit „marlukkuutaarlugit . . . aallartippai“. (Luk. 10:1) Sooq? Nalunnginnamiuk suleqatigiikkunik imminnut ilinniarfigeqatigiillutillu kajumissaaqatigiissinnaasut. Oqarasuaatikkut oqaluussinermi aamma taamaappoq. Suleqatigiinnikkut immitsinnut ilinniarfigeqatigiissinnaavugut, kingunerinik oqaloqatigiilluta sianerfigisassallu tullianut suup oqaluuserinissaanut siunnersoqatigiilluta. Oqaluussisartup aappaa oqarasuaatikkut oqaloqateqartillugu aappaata paasissutissanik qinerluakkanik nassaarluni ikiorsinnaavaa.
10 Oqaasissatit nalunnginniassagakkit inissilluartariaqarputit Biibili, ’Ræsonnerebogi’, atuagassiaaraq Guutip sumik piumaffigaatigut?, atuagassiat allallu eqqanniitillugit. Aallarniutissatit allattukkit inissillugillu takusinnaasanni. Allattuiffissanni aamma eqqanniititaqarit suut pisariaqartut allattoqqissaarniassagakkit. Ulloq nalunaaqutarlu qassinut angerlarsimasoqartoq allakkit, nalunnginniassagakku qaqugu attavigeqqissinnaassagit.
11 Ilaasa sianerfigisartakkaminnit oqarasuaatikkut inukkutigineqarnissartik annilaangassutigaat. Sianerniarlutit oqarasuaaterpit normua akisumiit takuneqarsinnaajunnaarnissaa kissaatigigukku oqarasuaaterpit normua isertortuunissaanut allanngortissinnaavat. Oqarasuaatit angallattakkat ilaat immiussiffigineqarsinnaapput normua akisumiit takuneqarsinnaajunnaarsillugu. Nalornissuteqaruit Tele attavigisinnaavat.
12 Inuit oqarasuaatikkut ilisarinngisaminnut ilasseraanngitsuusarput. Taamaattumik ataqqinninnissat, inussiarnersuunissat periaaseqallaqqinnissallu eqqaamasariaqarpatit. Tusarnaartup nipikkut taamaallaat inuttut qanoq pissuseqarnersutit peqqusersuitsuunersutillu aalajangersinnaavaa. Eqqissisimagit uummatinniillu oqalugit. Sukkavallaartumik oqalunniaqinak, kisianni ersarissumik pisariaqarpallu tusarsaasumik. Tusarnaartortaaq oqalunnissaanut piffissaleruk. Atit sumilu najugaqartutit taakkit. Kissaatiginngilarput inuit isumaqassasut oqarasuaatikkut tuniniaasartuusugut. Malugitiguk oqaloqatigiumagit, oqarniaqinak nunaqqatai tamaasa sianerfigisaqattaaritit.
13 Oqarasuaatikkut oqaluussinissamut aallarniutit: ’Ræsonnerebogi’-mi aallarniutit ilarpassui quppernermi 9-15-imiittut oqarasuaatikkut oqaluussilluni atorneqarsinnaapput. Ima oqarsinnaavutit: „Sianerfigaakkit angerlarsimaffinni naammattoorniaraluarlutit iluatsinngitsoortarakkit. Apeqqut soqutiginartoq illit qanoq isumaqarfiginerit tusarlugu soqutiginartissimavara.“ Taavalu aperiuk.
14 Aallarniut siulleq „Pinerlunniartarneq/toqqissisimaneq“-p ataaniittoq imatut atorneqarsinnaavoq: „Kutaa, _mik ateqarpunga. _mi najugaqarpunga. Apersuillunga paasisassarsiortuunngikkaluarpunga, kisianni tamatta inuttut qanoq toqqissisimanerusinnaasugut soqutiginartikkakku. Akornatsinni pinerluttuliortorpassuaqartarpoq tamatsinnut eqqortitsisartumik, illit isumaqarpit qaquguluunniit illit uangaluunniit eqqissivilluta sumiluunniit unnukkut aneersinnaasugut saassunneqarnissarput annilaangatiginagu? [Akissiiuk.] Guuti tamatumani iliuuseqarumalluni neriorsuuteqartoq pillugu atualaarlara.“
15 Ilaat oqarasuaatikkut Biibilimik atuaqqissaaqatiginissamik neqeroornermikkut iluatsittarput. Minutsialunnguit atorlugit qanoq atuaqqissaqatigiinneq ingerlanneqartartoq misilissinnaavaat. Atuaqqissaaqatigiinneq nanginniarlugu pulaarfiginissaanut neqeroorfigiuk. Nangaassuteqarpat ulloq alla oqarasuaatikkut oqaloqatigiinnersi nangeqqissinnaasoralugu aperiuk.
16 Oqaloqatigiinneq naappat atuagassianik pajukkumallugu imaluunniit nassikkumallugu neqeroorfigiuk. Nalornippat ulloq alla sianerfigeqqissinnaanerit aperiuk. Oqarasuaatikkut oqaloqatigereernerup kingorna pulaarfigineqarnissani immaqa toqqissisimassutiginerussavaa.
17 Iliuuseqarit: Qatanngutip arnap 15-nik ukiullip ulloqeqqata siornagut kiffartornini oqarasuaatikkut aallartissimavaa. Arnamik ’Ilisarsineq’-mik piumasumik oqaloqateqarpoq. Qatanngutip atuagaq aggiukkamiuk arnap paasiumavaa oqarasuaammi normua sumi pissarsiarisimaneraa, normuni isertortuummat. Qatanngut sianerami kukkusimavoq. Arnaq Biibilimik atuaqqissaaqatigineqarusuppoq maannalu kuisimanngitsutut oqaluussisartunngorluni.
18 Qatanngut arnaq oqarasuaatikkut oqaluussiffigisassaminik tunineqarpoq, misilissalluguli paquminarigamiuk aatsaat sapaatip-akunneri pingasut qaangiummata misiliivoq. Aallartinniarluni qanoq sapiillisaarsimava? Vågn op!-mi 22. januaari 1997-imoortumi allaaserisaq qulequtaqartoq „Når jeg er svag, så er jeg stærk“ (’Sanngiittaraangamami pissatsittaraanga’) eqqaasimavaa. Tassani allaasserineqarpoq oqaluussisartoq oqarasuaatikkut oqaluussisartoq timikkut sanngiikkaaluaqarluni. Qatanngut arnaq oqarpoq: „Jehova qinnuigaara nakussatseqqullunga qarlunnullu oqaatsit eqqortut ileqqullugit.“ Oqarasuaatikkut oqaluussilluni siullerpaamik misilikkamiuk qanoq pisoqarpa? Oqarpoq: „Jehovap qinnutiga akivaa. Inuit tusarnaarput, ataatsimillu pulaarfissaqalerlunga.“ Oqarasuaatikkut oqaluussisarnera Biibilimik atuaqqissaaqateqalerneranik kinguneqarpoq. Ima naggasiivoq: „Jehovap ilinniarteqqippaanga tatigilluinnartariaqarlugu namminerlu pinnanga.“ — Uss. 3:5.
19 Allat sallusuissummik oqarasuaatikkut oqaluttuunnerisigut nutaarsiassamik nuannersumik oqaluussinermik kinguneqarluartarpoq. Piareersarluartarit uummammillu tamakkiisumik iliuuseqarlutit. Misiliinerit siulliit iluatsinngikkaluarpata nikallussutigeqinagu. Jehovamit siulersorneqaqqullutit qinnuigiuk, allanillu taamatut pissanganartumik oqaluussillutik misilittagalinnit pissarsiniartarit. Qanortoq taamatut kiffartuusseriaatsimi tamatuminnga peqqissaarussisa sapinngisarpullu tamaat iliorluta oqaluussiffigisartakkatsinni kikkut tamarmik anguniarlugit kissaatigalugu. — Rom. 10:13, 14.