Allat inuttut soqutigikkit
1 Jehovap inunnik allanik soqutiginninnini isertuutinngilaa. Pinngortitami timikkut pisariaqartitaat sinneqangaartumik matussutississimannginnerpai? (1 Mos. 1:29, 30; 2:16, 17; Mat. 5:45; naleqqiuguk Lúkarse 6:35.) Pingaarnerusumillu, ajortimit toqumillu annaannermisigut inuttut soqutigaluta ersersissimannginnerpaa? — Juán. 3:16.
2 Jesusip nunamiikkallarami Ataatami inunnik allanik soqutiginninnermigut maligassiaa naammalluinnartoq malissimavaa. (Mat. 11:28-30; 1 Pîtr. 2:21) Angut pupissorsuaq oqarmat: ’Naalagaq, piumaguit pupeerutissinnaavarma,’ Jesusip akisimavaa: ’Piumavunga,’ angullu taanna ajorunnaarsillugu. (Mat. 8:2, 3) Jesusip illoqarfik Nain qanilliartortillugu inuit uillarnerup erneranik ilisiartortut takugamigit uillarneq nalligingaalerpaa erneralu uummartillugu. (Lúk. 7:11-15) Jesus inunnik soqutiginninnermik ersersitsinissaminik kajumissaarneqartariaqarsimanngilaq. Allaat meeraaqqat piffissaqarfiginissaannut samminissaannullu ajukkunnanngitsutut isigisimavai, inoqatinilu qiimmassarnissaannut tuppallersarnissaannullu piffissaqarfigiuaannarsimavai. — Mat. 20:31-34; Mák. 10:13-16.
ILAQUTTAT IKINNGUTILLU
3 Inunnik allanik soqutiginninnermik ersersitsinissamut periarfissarsiortarnitsigut Jehovap Jesus Kristusillu malinnissaat sulissutigisariaqarparput. Taamaattumik tamakkununnga tunngasut eqqartoriartigik.
4 Kristumiutut pingaarnerpaamik nammineq ilaquttavut inuttut soqutiginninnermik ersersitsivigisariaqarpavut, anersaakkullu peqqissuunissaat sumiginnarnaveersaarlugu. Tamatuma nassatarissavaa ilaquttat aalajangersimasumik atuaqqissaaqatigisarnissaat. Illit ilaquttassilu atuaqqissaaqatigiittarnersi qanoq ingerlava? Atuaqqissaaqatigiissutersi soqutiginartunngorsartarpiuk ulluinnarnilu atornissaanut piukkunnarsartarlugu? Ilaquttavit ataasiakkaarlugit oqaluussiartoqatigisarnerisigut siunnersuutit piviusunngortittarpigit? Oqaluussinermut peqataanerup nuannersuunissaa isumagisarpiuk? Meeqqatit inunnik allanik ikiuinissamik taamaalillunilu kristumiutut tullermik asanninnermik ersersitsinissamik kissaateqalersinniartarpigit? Katissimaguit meeraqarnallu, taamaakkaluartoq ilaqutariittut atuaqqissaaqatigiinnissaq isumagisarpiuk?
5 Sapinngisamik amerlasuut anersaakkut ikiorusuppavut. Tamattali ulapittuuvugut, immaqalu ilaannikkut puiortarparput ilagiinniittunik pisariaqartitsinerusunik inuttut soqutiginninnermik ersersitsinissarput. (Uss. 3:27; Gal. 6:10) Ilagiinni kristumiuni meeqqanik angajoqqaaqanngitsoqarpoq, utoqqaqarpoq, uillarneqarpoq, kisimiittunik pilersuisoqarpoq, napparsimasoqarpoq, nikallungasoqarpoq, innarluuteqartoqarpoq allanillu pisariaqartitsinerusoqarpoq. Jehovap erneratalu, Jesus Kristusip, ilaarnissaat sumiginnartariaqanngilarput, anersaakkulli qatanngutivut tamaasa inuttut soqutiginninnermik ersersitsivigisariaqarpavut. — 1 Kor. 10:24; Fil. 2:4; Epr. 13:16.
6 Bibelimik atuaqqissaartartut qanoq ililluta inuttut soqutiginninnermik ersersitsivigisinnaavavut? Ilarpassuisa paasereersimavaat ilisarisimasatik silamiut ilagisarunnaartariaqarlugit. Naak ulapikkaluarluta taakku inuttut soqutiginninnermik ersersitsivigisarpavut? Inuunerminni allannguisimasut misigitittarpavut uagutsinni nutaanik ikinngutitaarsimasut? Naak atuaqqissaaqatigisanngikkaluarlugit kajumissartarpavut? — Mák. 10:28-30.
7 Tusagassamik nuannersumik tusarnaarusuttut inuttut soqutiginninnermik annerusumik ersersitsivigisinnaavigit? Anersaakkut pisariaqartitaminnik matusinissaannik sapinngisat tamaat ikiorniarpigit? Kiffartuussinermut peqataanerulerumallutit illit nammineq iliuuseqarsinnaavit? Iliuuseqarsinnaaguit taava tunuarsimaaqinak! — Lúk. 9:60-62.
8 Inunnik allanik inuttut soqutiginninnermik ersersitsinitsigut Jehova Jesus Kristusilu ilaartariaqarpavut. Misiginneqataasuusariaqarpugut ikiuinissamullu siulliuniartariaqarluta, soorlu Jesus pupissumut iliuuseqarnermini iliorsimasoq. Aap, inunnik allanik inuttut soqutiginninnermik ersersitsinissamut periarfissat eqqumaffigisariaqarpavut. (kmD 6/91, Vis personlig interesse for andre)