Guuti Pinngortitsisoq unnersiutigiuk
1 Nunat alianaatsut, seqernup tarrilerneri alutornangaartut, unnuat allaaqqillutik ullorissallit, timmisat tusarningaartumik qarlortarnerat — tamakku tamaasa pillugit kina ataqqivarput? Aap, Pinngortitsisoq unnersiutigerusupparput. Uummatitta iluunngaanit nalunaarut sarĸúmersitat 4:11-miittoq isumaqatigaarput. Jehova Guutip suut tamaasa pinngortissimammagit unnersiutigisariaqarparput.
2 Naak suut tamarmik Guutimit pinngortinneqarsimanerannik uppernarsaateqaraluartoq, inuit inuunerup nalaatsornerinnaakkut pinngorsimanera imaluunniit siunertaqanngitsumik ineriartorsimanera isummiussimavaat. Sallup tamatuma inuit nikanarsarsimavai ileqqorluttunngortissimallugillu, aammalu Pinngortitsisorsuatsinnut mitalliutaalluni. — Nalunaajaasup oqaasii 12:1; Rûmamiut 1:20, 25.
3 Septemberimi Jehovap kiffaatut ilumoortutut Pinngortitsisoq taassumalu suliai angingaartut pillugit sallusuissummik oqaluussinissatsinnut periarfissaqarpugut. Atuagaq Livet — hvordan er det kommet her? Ved en udvikling eller en skabelse? inuunerup qanoq ililluni aamma suna pillugu pinngorsimaneranik paasisaqarusuttunut tamanut neqeroorutigissavarput. Atuakkap tamatuma kisiilluarluta inuunerup pinngorsimaneranik sallusuissutip illersornissaanut ikiussavaatigut.
4 Atuagaq Livet — hvordan er det kommet her? Ved en udvikling eller en skabelse? 1985-imili qallunaatut saqqummersimavoq, naallu taamanikkut imarisai oqalugiaatini arlalinni sammineqarsimagaluartut uagullu nammineq qularnanngitsumik peqqissaartumik atuarsimassagaluaripput, qangalinngorsimavoq. Taamanerniillillu ilagiitsinni oqaluussisartut nutaat amerlaqaat. Taamaattumik allanut neqeroorutigilersinnagu atuakkap imarisai uteqqinniakkit.
5 Immaqa septemberi nalliutsinnagu atuakkap atuaqqinnissaanut piffissaqanngilatit, naak iluaqutaassagaluaqisoq, taamaattoq imarisai nalunngilluartariaqarpatit. Suut sammineqarnersut nalunngittariaqarpatit nanisinnaasariaqarlugillu. Assiliartarpassui nalunngittariaqarpatit innersuussutigisinnaasariaqarlugillu. Piareersarluartaruit nammineq atuakkap atornissaa iluaqutigissavat angusaqarnerussallutillu.
6 Oqaluussiffissat immikkut ittut: Illumit illumut oqaluussinitta saniatigut aamma inuit ineriartorsimanermik pinngortitsisimanermilluunniit soqutigisallit immikkut saaffiginiarsinnaavavut. Suliffiini atuarfimmiluunniit oqaloqatigisinnaavavut. Assersuutigalugu oqaluussisartut inuusuttut ’Pinngortitsinermik’ atuagaq ilinniartitsisuminnut neqeroorutigalugu angusaqarluartarsimapput. Oqaluussisartup inuusuttup ilinniartitsisuni ’Pinngortitsinermik’ atuakkamik tunisimavaa, tupigusuutigisaminillu malugaa ilinniartitsisup atuagaq peqqissaartumik atuaannarnagu aammali atuartut taanna tunngavigalugu ilinniartikkai. (w90 1/9, qup. 32; w86 1/10, qup. 32) Illit atuartuuguit aamma ilinniartitsisunnut atuaqatinnullu taassuminnga atuarusussinnaasorisannut neqeroorutigisinnaavat.
7 Illoqarfitsinni ilinniarnertuut ilinniartitsisullu saaffiginiarlugit immikkut sullissutigisinnaavarput. Inatsisilerisut, nakorsat ilinniarnertuullu allat ’Pinngortitsinermik’ atuakkami paasissutissat tunngaveqarluarnerarlugit pingaartitsinertik oqaatigisimavaat. (yb87, qup. 54) Naammattukkatta ilaasa immaqa atuagaq piniarsinnaavaat qinerlerfissiatut atorniarlugu.
8 Sakkup pitsaasup tamatuma inuppassuit ineriartorsimanermik isumaliuutip qanoq tunngaveqarluanngitsigineranik paasitiinnarnagit aammalu inuunerup tunissutaanik pingaartitsilersissavai. Atuakkap inuunermik Tunisisup, ’qilammik nunamillu Pinngortitsisup’, ataqqinaatissaanik naassaanngitsumik inoorusulersissavai. — Tuss. 146:6. (km 92/9 Pris Gud, Skaberen)