Sunniuteqarluartumik pulaaqqiisarnikkut soqutiginninneq malittariuk
1 Oqalugiaat piareersarluagaq soqutiginnilersitsisumik aallarniuteqartarpoq, qaammarsaasuulluni kajumissaarisumillu naggateqarluni. Aallarniutip tusarnaartoq naalaalersittarpaa, oqalugiaalli qaammarsaanngitsoq naggateqanngitsorlu amigaateqarpoq. Oqaluussinermi periaaseq aamma taamaappoq. Pulaarnermi siullermi soqutiginnilersitsineq pitsaavoq, sunniuteqarluartumilli pulaaqqiisarnikkut soqutiginninneq malittarisariaqarpoq.
2 Sooq Guutip naalliunnartut akuerai? Apeqqut eqqarsalersitsisoq. Tamanna ullutsinni amerlasuunit soqutigineqannginnerpa? Qularnanngilaq, taamaattumillu ilanngutassiami qulaaniittumi siunnersuutigineqarpoq pulaarnermi siullermi apeqqut tamanna saqqummiunneqassasoq neriorsuillunilu aggeqqinnermi tamanna akiumallugu.
3 Ima oqarsinnaavutit:
◼ „Aluu. Kingullermik oqaloqatigiikkatta neriorsorsimavakkit aggeqqikkumallunga Guutillu sooq naalliunnartut akuerisimagai oqaluttuukkumallutit. Amerlasuut isumaqarput Guutip ilumut soqutigisimagunisigut naalliunnartut tamaasa soraarsinnissaat isumagissagaluaraa. Immaqa illit aamma taama eqqarsarsimavutit. [Pulaagaq akissuteqartiguk.] Biibilip uppernarsaaffigaatigut Guutip soqutigigaatigut. [Juánasip agdlagai sujugdlît 4:8 atuaruk.] Ulloq manna tikillugu Guutip naalliunnartunik akuersigallarsimanera pissutissaqarluarpoq. Pissutsit ilaat Pîtrusip agdlagai áipait 3:9-mi nassuiarneqarpoq. [Atuaruk.] Allanittaaq pissuteqarpoq, atuagaaqqamilu uani nassuiarneqarput.“ Atuagaaqqami Guutip ilumut soqutigaatigut?-mi quppernerit 12-imiit 14-mut quppikkit apeqqummillu soqutiginartumik eqqartuigitsi.
4 Pulaakkatta ilaat immaqa nassuiaammik itinerusumik tusarusupput, akissutitsinnullu naammaginnillualernissaannut pulaaqqiinerit arlallit pisariaqarsinnaapput. Peqatigiiffiup atuagaatai 192-inik quppernillit arlallit, januarimi neqeroorutigisassavut, kapitaleqarput apeqqummik samminninnermi atorneqarsinnaasumik. ’Paratiisilersaarut’-milu kapitali 11-mi apeqqut tamanna sammineqarpoq.
5 Oqaloqatigiinnerup naggataani apeqqummik nutaamik saqqummiigit pulaakkallu oqarfigiuk tullianik aggeruit akiumallugu. Amerlasuut paaserusuttarpaat inuit toqugaangata susoqartarnersoq. Soormi apeqqut tamanna piffissaalluartumi oqaloqatigiissutigiumagukku?
6 Najoqqutassat tunngaviusut pingasut eqqaamassalugit pitsaassaaq. Allanngortitsisinnaassuseqarit. Immaqa pulaakkap piffissamik aalajangersimasumik inniminniineq sungiusimanngilaa. Naatsumik oqaaseqartarit. Sivisunaarisarnak amerlavallaanillu nassuinaaniartaqinak. Amerlanertigut ikittuinnaat sivikitsumillu nassuiarnerisigut angusaqarluarnerusassaatit. Ammasuugit inussiarnersuullutillu. Pulaagaq inuttut immikkut soqutigiuk. Oqaatsikkut iliuutsikkullu tamanna ersissaaq. Pulaakkap tunuliaqutaa isumaalu pingaartikkit. Naleqquttunik apeqquteqartarit akissutaalu tusarnaarluartarlugit. Ajornanngippat, aqqa apeqqutigiuk, atortarlugulu.
7 Anguniakkatta pingaarnersaraat pulaakkap Bibililersaarutinik oqaloqatiginissaa. Tulliullugu kissaatigaarput siumukartumik Biibilimik atuaqqissaaqatigisarnissaa atuagassiaq tulluartoq, soorlu ’Paratiisilersaarut’, atorlugu. Nuannaarnartoq tamanna immaqa angusinnaassavaat qasusuillutit soqutiginninneq sunniuteqarluartumik pulaaqqiisarnikkut malittarigukku. (kmD 1/93 Følg interessen op . . .)