’Paratiisilersaarut’ ikiortigalugu Biibilimik atuaqqissaartitsigit
1 ’Paratiisilersaarut’ pillugu arnaq ima oqarsimavoq: „Isumaqarpunga Biibilip saniatigut atuagaq taanna tassaasoq atuakkat atuarsimasama ilumoornerpaartaralugulu isumassarsinarnerpaartaralugulu kajumissinarnerpaartarigaat!“ Tamatta qularnanngitsumik isumaqatigiissutigaarput atuagaq tamanna inuit Biibilimik paasisaqarnissaannut ikiuutaasoq pitsaanerpaaq Jehovamillu pallorfiginnilernissaannut kajumissaarisuulluni.
2 Ulloq manna tikillugu ’Paratiisilersaarutit’ 62 millionit oqaatsini 115-ini naqiterneqarsimapput, tamatumalu takutippaa silarsuaq tamakkerlugu sulinitsinni atuagaq ikiutaasoq pingaarutilik. 1982-imi saqqummerneraniit oqaluussisartut 2 millioninik amerlaneriarsimapput, qatanngutillu taakkua ilarpassuisa sallusuissut ilikkarsimavaat ’Paratiisilersaarut’ taanna atuaqqissaarlugu.
3 Anguniagalertarit: Amerleriarsimaneq tamanna pisimavoq Jehovap kiffani pilluaqqusarmagit taakkualu inuit ilumoorusuttut ilungersortumik ikiorniartarmatigik Biibilimi tusarliussamik inuunartumik ilinniartillugit. (Rûm. 10:13-15; 1 Tim. 2:4) Nalunngilarput piffissaq sivikitsuinnanngortoq Naalagaaffimmillu tusagassaq eqiasuitsumik oqaluussissutigineqartariaqartoq inuit tamarmik tusarliussamut isummerfigisinnaaqqullugit.
4 Peqatigiiffik siumukarpoq, uagummi nammineq siumukarnerpugut? Suliassarput pingaartoq, ajoqersuganngortitsineq, sulissutigalugu tamaviaarnissatsinnut piumassuseqarpugut? Taamaaliussagutta nammineq anguniagalertariaqarpugut. Soqutiginnipasittut tamaasa pulaaqqittarlugit iliuuseqarnerusinnaavugut? Soormi februarimi nutaamik Biibilimik atuaqqissaaqateqalernissarput anguniarutsigu?
5 Kikkut Biibilimik atuaqqissaartitsisinnaappat?: Oqaluussisartut amerlasuut assigiinngitsunik tunuliaqutallit ’Paratiisilersaarut’ iluaqutigalugu Biibilimik atuaqqissaartitsineq nuannaarutigisimavaat. Atuakkap paasinartumik imaqarnera pissutigalugu atuaqqissaartitsineq oqitsunnguusinnaavoq oqaluussisartunngorlaallu kiffartuussinermut tamatumunnga pingaartumut peqataasinnaapput. Ilatta amerlasuut nammineq atuaqqissaarsimagamikku imarisaa nalunngilluarpaat. Oqaluussisartoq Biibilimik atuaqqissaartitsisimanngikkaluartoq ’Paratiisilersaarut’ atortaleramiuk pingaartillugu ima allassimavoq: „Pingasunik atuaqqissaaqateqalerpunga, sisamassaallu isumaqatigiissuteqarfigaara. Qutsavigeqaassi Biibilimik atuaqqissaartitsinermik taama piuminarsaatigisimagassi.“
6 Inuusuttuttaaq ’Paratiisilersaarut’ ikiortigalugu atuaqqissaartitsisarput. Qatanngutip angutip inuusuttup atuarfimmi nerrivimmini atuagaq taanna saqqumitissimavaa. Tamatuma kingunerisaanik oqaloqateqarluartarsimavoq arlalinnillu atuaqqissaaqateqalersimalluni. Angajoqqaat ilaasa meeqqamik Jehovamut nalunaajaasunit inuusuttunit atuaqqissaaqatigineqarnissaat akuerisimavaat. Allaat meeqqat Jehovap nunami paratiisiusumi inuunissamik neriorsuutai inunnut allanut oqaluttuarisinnaavaat.
7 Inuusuttuugutta utoqqaaguttaluunniit kiffartuussinitsinni nuannaarneq annerpaaq angusarparput Biibilimik atuaqqissaartitsinikkut. Taamaattumik tamatta Jehova qinnuigisarniartigu ikioqqulluta periarfissallu tamaasa atorlugit neriuuterput tamanut nalunaarutigisarlugu. ’Paratiisilersaarut’ atortarniaruk allat ilagaluta Jehovamik unnersiutiginninnissaannik ilinniartikkaangakkit. — Tussiaat 148:12, 13. (kmD 2/93 Led bibelstudier . . .)