Apeqquteqarfik

◼ Ikiorti-pioneritut kiffartorneq qanoq isigisariaqarparput?

Ikiorti-pioneritut kiffartorneq immikkut pisinnaatitaaffittut suliassatullu ilumoorussassaasutut isigineqartariaqarpoq. Qaammatit tamaasa oqaluussisartut tituusintikkuutaat ikiorti-pioneritut kiffartortarput, ilaat aalajangersimasumik. Oqaluussisartut ilungersuussisut taakku nersorusuppavut, qaammatit tamaasa periarfissatik atortarmatigik minnerpaamik nalunaaquttap-akunneri 60-it oqaluussinermut atorlugit. Utoqqaanertat allallu oqaluussisartut ikiorti-pioneritut kiffartorniartut kiffartornerminnik ilumoorussinissaannik tamatuminngalu suusupaginninnaveersaarnissaannik kajumissaartariaqarpaat.

Qaammammi ataatsimi arlalinniluunniit ikiorti-pioneriorusuttut pilliutissatik pioneritulli nalinginnaasutut naatsorsoqqaartariaqarpaat. (Lúk. 14:28) Tassa siumut nalilerniaqqaartariaqarpaat kristumiutut pisussaafitik allat sumiginnanngikkaluarlugit nalunaaquttap-akunneri angusassatik angulluarsinnaanerlugit. Ikiorti-pioneriuniarluni aalajanginnginnermi qinunikkut inuttut atukkat isumaliutigeqqissaaqqaartariaqarput. Allat ilaaginnarlugit ikiorti-pionerinngorniartoqartariaqanngilaq. Aalajangernerli eqqarsaatigilluartariaqarpoq nalunaaquttallu akunneri angusassat angusinnaanerlugit paasiniarlugu pilersaarusiortariaqarluni. Qinnuteqaatissap atuaqqissaarnissaa piumasaqaatillu naammassisinnaanerlugit piviusorsiortumik eqqarsaatigeqqissaarnissaa pisariaqarput.

Soorunami pisarnermit suliniuteqarnerunissaq tamatumani pineqarpoq. Qaammatit ilaat nutaarsiassamik nuannersumik oqaluussissutiginninnissamut ’ilungersuussinissamut’ naleqqulluartuupput. (ap. sul. 18:5) Ingammik apriili oktobarilu kiisalu qaammat ilagiinnik nakkutilliisup tikeraarfia taamaapput. Oqaluussisartorpassuit piffissani immikkut suliniarfiusuni oqaluussinermi annerusumik suliniuteqarsinnaajumallutik pilersaarusiamik sukannernerulaartumik maleruaanissaminnut piumassuseqartarput, misiutiginagu taamaaliorneq pilluaqqusaangaarnernik kinguneqarajuttartoq. (2 Kor. 9:6) Oqaluussisartut ilarpassui qaammatini sulinngiffeqarfiusuni qaammatinilu tallimanik weekenditalinni ikiorti-pioneriusinnaajumallutik immikkut iliuuseqarniartarput. Aammali misiutigisanngilaat ikiorti-pioneriuniarlutik nalunaaraangamik ’aap aappimik isumaqartittussaallugu’, qaammammi ikiorti-pioneriuffimminni sapinngisaminnik nalunaaquttap-akunneri 60-it amerlanerusulluunniit oqaluussinermut atornerisigut. — Mat. 5:37.

Oqaluussisartut ikiorti-pioneriunissaminnut periarfissaqanngitsut ikiorti-pionerinik isumaqateqartarsinnaapput taamaalillutillu taakku tapersersorlugit. Ajornanngikkaangat pionerinik sivisungaatsiartumik oqaluusseqateqartarneq pitsaasuuvoq. Ikiorti-pionerit immaqa ingammik ullaap tungaa siusissukkut, ualikkut kingusissukkut unnulerneranilu isumaqateqartarnissartik iluarinerusarpaat. Aamma oqaluussisartut allat pulaaqqittagaannut Biibilimillu atuaqqissaaqatigisartagaannut ilaanissartik nuannarisarpaat. Ikiorti-pionerinik taamatut tapersersuisut aamma misigissavaat tunisineq pilluarnarnerusoq. — ap. sul. 20:35.

Ikiorti-pionererpassuit eqiasuillutik suliniarnerat pingaartittorujussuuarput. Taakkununnga ilaaqqunnissaminnut periarfissaqartut annertuunik pilluaqqussutisinissartik naatsorsuutigisinnaavaat. (Uss. 10:4) Illit ikiorti-pioneritut annertunerusumik iliuuseqarnermut atatillugu nuannaarnerup misigeqqinnissaanut qaqugu periarfissaqaleqqissavit? (kmD 4/93 Spørgsmålskassen)