Illumiit-illumut-oqaluussineq — unamminiarnartoq
1 Illumiit illumut angalaarluni ilisarisimanngisanut saaffiginninneq sallusuissummik ilassinnittut ilarpassuinut unamminiarnartuuvoq annertooq. Jehovamilli piviusumik asanninnertik iluaqutigalugu unamminiarnartoq tamanna ajugaaffigisinnaasarpaat, allaammi ittoortorujussuugaluit ima siumukarluartigisimapput pioneritut aallartissinnaalersimallutik.
2 Biibilimi ersarissumik ersersinneqarpoq kristumiut siulliit illumiit illumut angalaarlutik Guutip naalagaaffia oqaluussissutigisarsimagaat. (ap. sul. 5:42; 20:20, 21) Ukiut hundredellit 20-ssaanni makkunani kristumiutut suliamut tamatumunngarpiaq suleqataavugut. Naak immaqa ilaannikkut pulaakkavut soqutigisaqaratillu uumitsallutillu asissuilluillutillu immaqalu allaat toqqaannartumik akerlilersuisaraluartut Guutimik inoqatitsinnillu asanninnitta suliami tamatumani iliuuseqalersittarpaatigut.
3 Unamminiarnartumik iliuuseqarfiginninnerup kinguneri: Pulaaqqiinerit tamaasa sallusuissutip inerittussaanik siaruarterinissarput ilungersuutigisarparput, nalunagu suliarput inerititaqariartuaarumaartoq. (Nal. oq. 11:6) Pissutsit inuit atugaat allanngorartarput. Arlaannik oqaaserisatsinnik eqqarsaatiginnissutigiligaannik pisoqarsinnaasarpoq, tamannalu pissutigalugu tulliani aggeraangatta piuminarnerusarlutik.
4 Illumiit-illumut-oqaluussinitta pulaakkavut apeqqummut akerleriissutaasumut isummernissaannik periarfissittarpai. Ilumoornermik naapertuil- luassutsimillu nuannarisaqartut Jehovap siunertaasalu ilinniarnissaannut aqqummilu inuunermut naassaanngitsumut ingerlasumi ingerlalernissaminnut periarfissaqalertarput. Silamiut nuannaarniutaannik noqqaassutiginnittut asannittumik mianersoqquneqartarput Jehovamut iluarisaalerumallutik allamik isumataartariaqarnerannik. Taamaalilluni oqaluussineq Jehovamik ataqqinarsisitseqataallunilu aqqanik ilisimaneqalersitseqataasarpoq, pulaagaq tusarnaaraluarpat tusarnaanngikkaluarpalluunniit. — Hes. 3:11.
5 Peqatigitillugulu oqaluussinerup anersaap inerititaanik nammineq ineriartortitsinissatsinnik ikiortarpaatigut, ilaatigut asanninnermik namminissarsiunngitsumik, nuannaarnermik, eqqissinermik kamagittarnermillu. (Gal. 5:22) Oqaluussinerup maniguuttuunissatsinnut paasinnittuunissatsinnullu ikiortarpaatigut, taamaaliornitsigummi allanut ajunngitsuliortaratta. Jehovap suliaanik ulapputeqarluarneq silarsuarmit pineqatsaalissutigaarput. — 1 Kor. 15:58.
6 Unamminiarnartup iliuuseqarfiginissaanut ikiuut: Nutaat suliamut pissanganartumut tamatumunnga qanoq ilillutik peqataanissartik ilinniartariaqarpaat. Illumiit illumut angalaarnissartik eqqaaginnarlugu ilaannikkut nalornisoorsinnaasarput taamaattumillu nikallortoorsinnaasarlutik. Akerliliissutaasartunik nalinginnaanerusunik sammeqatigisinnaavavut qanorlu akisarnissaannik siunnersorlugit. Akerliliissutaasartut qanoq akineqarsinnaanerannik ’Ræsonnerebogimi’ siunnersuutit atorlugit sungiusaqatigisinnaavavut. Oqaluussinissamut piareersarneranni ikiornissaannik neqeroorfigisakkit. Aamma katersuunnernut aalajangersimasumik aggertarneq oqaluussisartunillu misilittagaqarluartunik oqaluussiartoqateqarneq assut iluaqutigissavaat, aammalu nalunaajaaqatigiinnerinut peqataanissaminnut nakussatsissutigissallugu.
7 Illumiit illumut angalaarangatta immikkut pisinnaatitaaffigisarparput Jehovamit aallartitaaneq. Taassumunnga suleqataanikkut ataqqinaammit annerusumik nassaassaqarnerpa? (1 Kor. 3:9) Taanna tunaartarigutsigu illumiit illumut angalaarnerup unamminiarnartup suliarinissaanut anersaavata ikiussavaatigut. — 2 Kor. 3:5. (kmD 93-5 Hus-til-hus-forkyndelsen . . .)