Decembarimi Biibilimik atuaqqissaaqatitaarniarniarit
1 Jesusip ajoqersukkani peqqusimavai inuit allat nutaarsiassamik nuannersumik ajoqersuutissagaat. (Mat. 28:19, 20) Inunnik ilinniartitseriaaserisinnaasarput pingaarnerpaaq tassa Biibilimik atuaqqissaaqatiginninneq. Suliami tamatumani peqataavit? Taamaanngippat, taava allanik ilinniartitsinermut peqataanerulerumallutit qanoq ilillutit atuaqqissaaqateqalerniarsinnaavit?
2 Immaqa pulaagarput naqitaaqqamik Silarsuaq manna aniguissava?-mik tunisimavarput neriorsorsimallugulu pulaaqqikkumaarluta imarisaa oqaluuseriniassagatsigu.
Naqitaaqqamik tunisimasatsinnut pulaaqqikkutta ima oqarsinnaavugut:
◼ „Ippassaanikkunni maaniikkama oqaluuseraarput piffissami ajornartorsiornartumi inuulluta ullumikkullu pissutsit Jesusip eqqorluinnartumik siumut eqqartorsimagai. Naqitaaqqami kingullermik tunniussanni paasissutissat sivikitsunnguamik ilagalutit sammialaarusukkaluarpakka. Malugeriaruk uani qanoq allassimasoqartoq.“ Qulequttami „Nalunaaqut“-mi immikkoortut marluk pingasulluunniit sammisigik, piffissarlu naapertorlugu allassimaffiit issuarneqarsimasut atuarlugit. Jesusip siulittuutaata ullumikkut eqquunnera eqqaajuk. Aggeqqinnissannik immikkoortullu sinnerisa sammeqqinnissaannik isumaqatigiissuteqarfigiuk. Pulaakkat kajumissaaruk aggeqqinnginninni sammisassarsi atuassagaa.
3 Aamma ima oqarsinnaavutit:
◼ „Kingullermik oqaloqatigiikkatta naqitaaraq Silarsuaq manna aniguissava? ilinnut tunniuppara. Taamanikkut oqaluuseraarput Jesus Kristusip silarsuarmi pisunut qanoq attuumassuteqarnera. Taassuma oqaasii Biibilimi Juánase 17:3-mi issuarneqartut atuarpavut. [Atuaruk.] Inuunermik naassaanngitsumik pissagutta Guutimik Jesusimillu ilisarisimannilernissarput aalajangiisuummata tamatuma ilungersuutiginissaa imminut akilersinnaalluassaaq. Jesusip nunamiikkallarami Guutip pissusii nuannersorpassuit pissuserisimavai. Taamaattumik ingasaassinerunngilaq ilimagissallugu Jesusimik taassumalu kiffartorneranik ilisimasaqarnerujartortilluta taassuma Ataataa ilikkarnerujartuinnassagipput, ilaa? [Pulaakkat akili.] Atagu takoriassagit atuakkami uani Inuk inuit inuusimasut pingaarnerpaartaat-ni qanoq allassimasoqartoq.“ Kapitalip 116-ip quppernerisa qulinganni immikkoortoq siulleq tullialu atuakkit. Erseqqissaatigiuk atuakkami tamatumani Jesus pillugu iivangkiiliulersaarutini sisamani paasissutissat tamaasa ukiut pisimaffii tulleriiaarlugit eqqartorneqarmata. Kapitalit ilaasa qulequtaat, assiliartat atuakkallu aallaqqaataani nunap assinga takutikkit. Pulaakkat soqutiginnilluinnarpasippat atuagaq neqeroorutigisinnaavat.
4 Atuakkamik „Inuk inuit inuusimasut pingaarnerpaartaat“-nik pisimasoq ilasseriarlugu ima oqarsinnaavutit:
◼ „Soorlu kingullermik oqartunga atuagaq Inuk inuit inuusimasut pingaarnerpaartaat Biibilimik atuaqqissaarnermut atortussiaavoq. Takutilaarusuppakkit qanoq ililluni annerpaamik iluaqutissarsiffigineqarsinnaasoq.“ Kapitali 1, „Qilammit tusarliussat“, qupperuk. Apeqqutit atuakkamiittut malugitikkit. Apeqqut siulleq atuaruk, immikkoortorlu aallarniutaasoq sammilerlugu. Quppernerup tulliani assilissamut atassuseruk. Apeqqutit sinneri apeqqutigikkit, piffissarlu naapertorlugu akissutissat oqallisigalugit. Qimannginnerani tullianik aggeqqinnissannik oqaloqatigeqqinnissaanillu isumaqatigiissuteqarfigisinnaavat.
5 Isumalluartuarutta, piareersarluartarutta periarfissallu tamaasa atortarutsigik decembarimi Biibilimik atuaqqissaaqatitaarnissatsinnut piareersimassaagut. (km 93/12 Opret bibelstudier i december)