Aasap ingerlanerani suliniutit teokratiimut tunngasut qasukkarfigeqinagit
1 Aasakkut assigiinngitsorpassuarnik sammisassaqarsinnaavugut. Silagikkaangat amerlanersatta ulluinnarnit aliikkusersuutissat allat qasuersaarnerlu nuannaarutigisarpavut. Mianersortariaqarpugulli suliniutivut teokratiimut tunngasut tamakkunannga akornuserneqaqqunnagit. — Fil. 3:16.
2 Aasat tamaasa ataatsimeersuarnissaq erinigisarparput. Ataatsimeersuariarnissat aalajangiussimaviuk, aallarnissat inissaqarniarnissallu piareersarlugit? Ilagiinniittut ilaat tamatuminnga ikiorneqartariaqarpat? Allat inussiarnerlutit ikiorukkit tamassi iluaqutigiumaarparsi.
3 Eqqarsaatigisimaviuk oqaluussinermi peqataanerusinnaanersutit? Inuusuttut amerlasuut paasisimavaat aasakkut atuanngiffik ikiorti-pionerinngornissamut pitsaasumik periarfissaasoq. Ikiorti-pioneriuneq akuttunngitsumik kiffartuussinermi immikkut pisinnaatitaaffinnik annerusunik kinguneqartarpoq. Qatanngut angut ukiuni 33-ini piffissaq tamaat oqaluussisartuusimasoq oqaluttuarpoq atuartuugallarami ukiut sisamat kingulliit aasakkut atuanngiffimmini ikiorti-pioneriusarsimalluni. Ilaqutariit aamma iluaqutigissavaat ulloq naallugu oqaluusseqataagunik. Qanoq atugaqaraluaruttaluunniit tamatta eqqarsaatigeqqissaartariaqarparput oqaluussinermi peqataanerusinnaanerluta. Kiannerussammat qaamanerussallunilu unnukkut oqaluussinermi peqataanerulersinnaassaagut.
4 Aamma ilagiit oqaluussiffigisaminnik naammassinnissinnaanngitsut suleqatigissallugit neqeroorfigisinnaavavut. Immaqa ilagiinnissinni oqaluussisartut allat ilagalugit sapaatit-akunnera ataaseq marlulluunniit oqaluussisartunik amigaateqarfiusumut tikeraarsinnaavutit. Ikittuinnaagussilu immaqa ilagiinni sanilerisassinni aallaqatissarsisinnaassaatit. Ungasissumut aallarsinnaanngikkuit nakkutilliisup angalasartup immaqa oqaatigisinnaavai ilagiit eqqassinniittut suut ikiorsinnaagitit.
5 Feeriarnissat pilersaarutigaajuk? Taamaappat tikeraarfigisassanni rigssalimi ataatsimiinnernut najuuttassavit? Qatanngutit tassaniittut oqaluusseqatigisassavigit? Tamakku feeriarninnut ilaatikkukkit nammineq allallu pissarsiffigilluassavarsi. (Rûm. 1:11, 12) Angalatillutit oqaluussisinnaavit? Biibili atuagassiallu ilaat nassarniakkit. Aamma sulinngiffik atorlugu Biibilimik allanillu atuanngitsoorsimasannik atuarsinnaavutit. Eqqaamajuk naak suliffitsinnit feeriartariaqartaraluarluta Jehovamut kiffartuussinermit feeriarusunngilagut.
6 Utoqqaanertat ilagiit suliniutaat aaqqissuussiffigilluartariaqarpaat. Utoqqaanertat ilagiinnilu kiffartortut aallartussaappata allat taakkua suliassaat isumagisariaqarpaat. Utoqqaanertat piffissaalluartukkut nakkutilliisoq siulittaasoq qaqugu aallarnissaminnik paasitittariaqarpaat, suut tamaasa aaqqissorluarsinnaaqqullugit.
7 Aap, aasaq ulapiffiusinnaasarpoq. Sammisassat assigiinngitsut teokratiimik kiffartuussinitsinnut akornutaagajuttarput. Aasarli manna sapinngisannik pissarsiffiginiaruk sammisassat anersaakkut ittut salliutillugit. — Fil. 1:10. (kmD 9405 Slæk ikke på . . .)